Pagwali sa Maayong Balita sa Donegal

“PAGKATAGSAON!” “Makapalipay.” Kadtong mga ekspresyona ang madunggan sa grupo sa 120 ka tawo nga gikan sa Britanya nga nakaadto sa Donegal, usa ka lungsod sa amihanang-kasadpan sa Irlandiya. Dili, dili sila mga turista nga nagkomento sa ilang nakita. Sila maoy mga lalaki, mga babaye, ug mga bata nga mibiyahe sa ilang kaugalingong gasto sa pakigbahin sa ilang paglaom alang sa umaabot uban sa mga tawo sa Kasadpan sa Donegal.

Sanglit aduna lamay 19 ka Saksi ni Jehova sa tunga sa 120,000 ka pomuluyo sa Donegal, ang kadaghanang tawo sa niining dapita wala maduawi sa mga Saksi sa daghang katuigan. Busa, kining dakong grupo sa mga bisita kinabubut-ong mituman sa buluhaton sa pagwali sa maayong balita sa Gingharian sa Diyos diha sa matahom nga baybayon sa Atlantiko sa Donegal.

Dakong pangandam ang gihimo sa lokal nga mga Saksi alang sa pag-abot sa grupo. Ang uban mibiyaheg gatosgatos ka milya aron sa paghimog mapa sa tibuok lugar, ang surbi nga mapa gipasibo sumala sa bag-ong ordinansa, ug gibutangag reperensiyang numero ang matag dalan aron sayon nga matultolan sa ulahi. Dayon, ang teritoryo gibahinbahin sa gagmayng seksiyon, ang matag usa adunay mga 400 ka balay. Samtang sa Britanya, kadtong nakadesisyon sa pagbiyahe okupado sa ilang kaugalingong pagpangandam​—sa pagtino nga ang sakyanan, sak-anan, ug igong suplay sa literatura sa Bibliya madala.

Sabado, Hunyo 8, 1985 ang adlaw sa paggikan sa Britanya. Sa sayo sa kabuntagon, ang tanan nagtigom ug mipadulong sa irport. Dayon, milanding sila sa Belfast, Amihanang Irlandiya. Unya nagkabulagbulag sila sa napulo ka gagmayng bus nga maoy ilang sakyanan sulod sa duha ka semana. Tapos sa pagmaneho latas sa Amihanang Irlandiya ug gitagamtam ang pagkamaabiabihon sa Londonderry Congregation, mitabok sila sa utlanan ug nagbulag, nangadto sa giasayn nang daang mga dapit sa tulo ka nagkalainlaing bahin sa Donegal. Giunsa sila sa pag-abiabi?

Misanong ang Lokal nga Katawhan

Ang mga tawo sa Donegal mahigalaon ug maabiabihon, ug tungod niini madali silang pakigsultihan. Daghan kanila mibangon ug mga pangutana, ug makalipay ang pagbukas sa Bibliya ug sa pagpunting sa tin-awng mga tubag niini. Maayo usab nga nakabilin ug literatura sa Bibliya uban sa mga nangutana aron ilang mapauswag ang ilang pagsabot iniglakaw sa mga bisita.

Ang usa ka babaye nga nagpuyo sa hilit nga balay sa uma midapit sa duha ka Saksi sa iyang balay. Miuyon dayon siya nga ang kahimtang sa kalibotan misamot na ka grabe ug miasoy nga daghang tawo sa dapit magpanuko sa pagpasakag mga estranghero sa ilang mga balay tungod sa pagsulbong sa krimen diha sa mahilom ug malinaw niadto nga dapit sa Irlandiya. Daghang mga tigulang gibun-og ug gipangawatan sa mga gang sa mga kriminal nga naglibodlibod sa maong lugar. Busa nganong nanapit siya sa mga Saksi sa iyang balay? Tungod kay “tinuod” silang tan-awon.

Sa pagkakita niining babayehana nga natuman na ang mga tagna ni Jesus bahin sa kataposang mga adlaw, misanag ang iyang mga mata, ug napuno kini sa mga luha sa iyang nadunggan ang paglaom sa pagkabanhaw. (Mateo, kapitulo 24; Lucas, kapitulo 21) Namatay ang iyang bana sa 20 na ka tuig sa miagi. Malipayon niyang gidawat ang kopya sa librong Ikaw Mabuhing Walay Kataposan sa Paraiso sa Yuta ug mihangyo nga magpaduaw siya pag-usab.

Kining matanga sa eksperyensiya nasoblisobli sa matag karon ug unya. Ang usa ka batan-ong lalaki nagduhaduha bahin sa paglungtad sa Diyos. “Kon aduna may Diyos,” siya miingon, “nganong daghan man kaayo ang pagkadaotan?” Gipakita sa miduawng mga Saksi nga sa dili madugay mangilabot ang Diyos sa kalihokan sa tawo ug sulbaron ang daghang problema nga naghasol sa batan-ong lalaki. Iyang gihangyo sila sa pagbalik aron makaila ang iyang mga ginikanan. Sa mibalik ang mga Saksi, nagbilin silag kopya sa librong Mabuhing Walay Kataposan aron makita sa pamilya ang tubag sa dugang nilang mga pangutana.

Ang usa ka batan-ong babaye nagbangotan, tungod sa iyang kuwatro anyos nga anak nga namatay sa miaging pila ka semana. Nadasig kaayo siya sa impormasyon nga gipakita sa librong Mabuhing Walay Kataposan, ilabina sa pagpatin-aw niini bahin sa paglaom sa pagkabanhaw. Tungod sa kagul-anan nga gipahinabo sa kamatayon sa iyang anak nga lalaki, nagduhaduha siya kon aduna bay Diyos. Apan sa gibasa ang mga teksto nga nagpakita sa kahimtang ug paglaom sa patay, nausab ang iyang panagway. Ngano? Tungod kay iyang naamgohan nga ang iyang anak malinawon, nga natulog diha sa kamatayon nga may posibilidad nga banhawon.​—Ecclesiastes 9:5, 10; Juan 5:28, 29.

Duha sa bisitang mga Saksi miduaw sa eskuylahan, ug gidapit sila sa magtutudlo sa lawak-tunghaan nga puno sa 30 ka batang estudyante. Malipayong midawat ang magtutudlo sa kopya sa publikasyong Akong Basahon sa Estorya sa Bibliya ug gisultihan ang klase: “Maghisgot kitag estorya niining libroha karong hapona.” Dayon, sa naniudto ang pundok sa mga Saksi sa duol, miduol ang pila ka estudyante sa pagpangomosta. Ang duha ka magtutudlo miduol sa pagsusi kon unsay nahitabo, ug sila, usab, malipayong midawat sa mga kopya sa libro.

Sa hapon nianang adlawa, ang usa sa mga Saksi nakahibalag ug 11-anyos nga batang lalaki ug nangutana kaniya: “Nakadungog ka na bag mga Saksi ni Jehova?” “Oo,” mitubag ang bata, “karon didto sa eskuylahan.” Dayon mihangyo siyag kopya sa librong Estorya sa Bibliya. Sa ulahi gihapon nianang hapona, sa balay diin mibalibad ang inahan sa librong Mabuhing Walay Kataposan, ang bata sa balay naghisgot nga nakakitag librong Estorya sa Bibliya sa eskuylahan. Busa midawat ang inahan ug kopya nianang publikasyona.

Ngadto sa Tanang Matang sa mga Tawo

Diha usa ka balay, gipakita sa bisitang mga Saksi ang mga ilustrasyon sa librong Mabuhing Walay Kataposan sa usa ka tigulang nga babaye. Mikomento ang babaye nga Bibliya ang iyang gikinahanglan. Busa nalipay ang mga Saksi sa pagtanyag kaniya sa kopya sa New World Translation of the Holy Scriptures. Sa nakabaton na siyag Bibliya, nalipay usab ang babaye sa pagdawat sa kopya sa publikasyon alang sa pagtuon sa Bibliya. Iyang gisultihan ang iyang mga bisita nga nakadungog siya nga may mga Saksi nga miabot sa maong lugar ug miampo nga duawon unta siya ug dalhan siyag Bibliya. Karon iyang gibati nga gitubag ang iyang pag-ampo.

Ang usa ka batan-ong lalaki nga 30 anyos midapit sa duha ka Saksi sa iyang balay. Human sa mubong panaghisgot sa Kasulatan, siya miingon: “Tingali dili kamo malipay kon inyong mahibaloan kon kinsa ako. Usa ako ka pari.” Ang mga Saksi miingon nga malipay sila sa pagpakigsulti kaniya, ug nagbangon ug daghang pangutana ang pari bahin sa ilang pagtuo. Sa nangutana siya bahin sa paggamit sa ngalang Jehova, nalipay ang mga bisita sa pagtanyag kaniya ug kopya sa pulyetong Ang Balaang Ngalan nga Magapadayon sa Walay Kataposan. Midawat usab siya ug kopya sa librong Mabuhing Walay Kataposan, usa ka publikasyon nga seguradong makatabang kaniya sa pagtubag sa iyang daghang mga pangutana.

Sa laing okasyon, ang usa sa mga Saksi giduol sa usa ka batan-ong lalaki nga nakadungog niya nga naghisgot sa Bibliya sa tig-abiabi sa hotel. Mibangon siyag mga pangutana sama sa, “Nganong gubot man kaayo ang kalibotan?” Malipayon kaayo ang Saksi sa pagpakig-ambit sa iyang nakat-onan gikan sa Bibliya bahin niini ug sa ubang nalangkit nga mga ulohan. Ug kinsa kining batan-ona? Usa ka pari nga mingbakasyon sa maong lugar.

Gawas sa regular nga buluhaton sa pagpamalaybalay, gipahimudsan usab ang ubang mga higayon sa pagpakigsulti sa tanang matang sa mga tawo. Diha sa usa ka lugar sa bukid, ang usa sa gamayng bus mihunong sa daplin sa dalan aron makailis ang mga pasahero sa ilang mga sapatos ug sapatos nga goma alang sa pagbaktas sa kalamakan ug sa pagpakigsulti sa pundok sa mga lalaki nga nanumba ug nagkamadag peat nga igsusugnod alang sa tingtugnaw. Laing grupo mihunong sa matahom nga lugar sa daplin sa linaw sa bukid diha sa lasang. Natulog sa awto diha sa duol mao ang trabahante sa planta sa koryente nga nagpahimulos sa iyang libreng panahon sa udto. Natugaw ang iyang pag-inusara, apan nalipay siya sa makadasig nga panaghisgot ug mitambong sa tigom nga gihikay alang sa grupo nianang gabhiona.

Laing tawo nga nagpadagan sa traktora diha sa dalan gipahunong sa usa ka Saksi ug gipangutana siya kon may panahon ba siya sa pila ka minutos sa pagpakigsulti. Maikagon kaayo siyang makigsulti bahin sa Bibliya, ilabina sa “malisod nga panahon” nga atong gikinabuhian. (2 Timoteo 3:1-5) Napukaw ang iyang kaikag sa gipakitaan siya sa mga ilustrasyon sa librong Mabuhing Walay Kataposan. Nalipay ang tawo sa pagkadungog nga kining publikasyona magamit alang sa panaghisgot sa pamilya sa Bibliya ug miingon nga gamiton dayon niya kini sa pagtudlo sa iyang unom ka anak.

Ang maliksi nagaduawng mga ministro sa tanang panuigon, nga giduyogan sa gamayng grupo sa lokal nga mga Saksi sa Donegal, may maayong katarongan nga malipay sa ilang mga paningkamot. Sulod sa duha ka semana samtang didto ang mga bisita, nakagugol silag 5,767 ka oras sa pagpakigsulti sa uban bahin sa Bibliya. Sila nakapanagtag ug 1,613 ka libro ug mga Bibliya, lakip sa 2,611 ka kopya sa magasing Bantayanang Torre ug Pagmata! Ilabinang gipabilhan sa pila ka mga tagbalay mao ang pinulongan sa Irlandiya nga bersiyon sa publikasyong Akong Basahon sa mga Estorya Bibliya.

Walay magarbohon dogmatiko ug nagpakamatarong sa kaugalingong mga pagbati ang nagpadala sa miduawng mga Saksi ngadto sa Donegal. Hinunoa, buot nilang ipakigbahin ang pila ka maayong balita sa mga tawo kinsa, tungod kay nagpuyo sa hilit nga dapit, dili makabaton sa mga higayon sa pagpaminaw niana. Mikomento sa una pang biyahe nga susama niini, gitawag sa usa ka lokal nga pamantalaan kadtong nakigbahin nga mga “gitgit.” Tingali, nagsugyot kini nga anaa lamang sila sa ting-init ug human niana manglupad ra. Apan kadtong “mga gitgit,” o ang uban nga sama kanila, mobalik sa pagtabang sa mga matinud-anong mga tawo sa pagkabaton sa tukmang kahibalo sa katingalahang mga saad sa Bibliya. Sa pagkatinuod, ang uban nga nakigbahin sa unang mga biyahe sa pagsangyaw namuyo na sa Donegal.

“Kini pa ang labing maayong pagbiyahe sukad.” Mao kana ang mga ekspresyon sa apresasyon ug kalipay nga gipadayag sa uban nga nakigbahin niini nga buluhaton. Ilang naeksperyensiyahan ang pagkatinuod sa sanglitanan sa Bibliya: “Ang kalag nga mahinatagon mahimong matambok, ug ang dagayang nagabisbis dagaya usab nga pagabisbisan.” (Proverbio 11:25) Oo, dako gayod nga panalangin ang pagpakigbahin sa espesyal nga paningkamot sa pagwali sa maayong balita sa Donegal. Makabahin ka ba sa samang magantihong pag-alagad kang Jehova sa imong bahin sa kalibotan nga karon hinog na sa abundang ani?

[Mapa/Letrato sa panid 29]

(Alang sa bug-os nga pagkahan-ay sa teksto, tan-awa ang publikasyon)

DONEGAL

NORTHERN IRELAND

Londonderry

Belfast

IRELAND

[Mapa]

EUROPE

ATLANTIC OCEAN

[Letrato]

Nalipay sila sa pagwali sa maayong balita sa Donegal

[Hulagway sa panid 30]

Nagsangyaw sa balay ug balay sa amihanang-kasadpan sa Irlandiya