Ang Ipasabot sa mga Balita
AIDS—Kabayaran
Ang Federal Centers for Disease Control sa U.S. mibanabana nga ang aberids nga balayranan sa ospital sa usa ka adlaw sa pagtambal sa mga pasyenteng may AIDS maoy $830—doble pa kay sa ubang mga pasyente. Ug mibanabana ang mga eksperto nga ang total nga gastos sa pagtambal sa matag pasyente moaberids ug kapin sa $100,000. Kini ug ang tulin nga pagtubo sa gidaghanon sa mga biktima sa AIDS nga nagpatambal ang nakapabalaka sa mga opisyal sa ospital ug sa kompaniya sa seguro.
Gitawag sa Asosasyon sa Ospital sa Amerika ang tulin nga pagkaylap sa AIDS ingong usa ka “time bomb” sa mga ospital sa nasod, samtang ang gasto niini sa dolyar sa dili madugay mokabat ug kaliboan ka milyon sa usa ka tuig. Ang usa ka opisyal sa seguro sa kinabuhi mipasidaan: “Akong nakita kini ingon nga mao ang labing dakong reyisgo sa negosyo sa seguro sa panglawas ug sa kinabuhi nga ginaatubang sukad niining nasora.” Kinsa ang mopas-an sa hilabihan ka dakong galastohan?
Ang kadaghanan sa mga biktima sa AIDS maoy mga homoseksuwal ug mga giyanon sa droga, kansang mapatuyangong paagi sa kinabuhi nakapatunghag sakit sa ilang kaugalingon. Apan dili sila ang magabayad sa pinansiyal nga paagi. Hinunoa, ang gobyerno ug ang mga opisyal sa kompaniya sa seguro nagpakita nga ang nagapaseguro ug ang mga tigbayad ug buhis mapugos sa pagpas-an sa galastohan pinaagi sa mas taas nga mga buhis. Dugang pa, “ang edukasyon, kasegurohan sa katilingban ug ang dagkong mga panginahanglan sa puhonan madaot,” miingon ang editoryal sa New York Post.
Kaniadto, ang mga biktima sa AIDS nga natakdan sa sakit tungod sa ilang paagi sa kinabuhi tingali nagabiaybiay sa moralidad sa Bibliya aron sa pagpakamatarong sa ilang porma sa pagpatuyang sa kaugalingon. Unsa ka dako sa kasakit sa ilang kaugalingon ug sa pag-angin sa uban ang ila untang malikayan! Apan, dili pa ulahi kaayo alang kanila sa pagliso diha sa dinasig nga moral nga mga sukdanan sa Bibliya nga gikan sa “usa nga nagatudlo kaninyo sa inyong ikaayo, ang Usa nga nagapalakaw kaninyo sa dalan nga angay ninyong pagalaktan.”—Isaias 48:17.
Kalinaw ug Kasegurohan—Sa Dili Madugay?
Ang iladong sinulat sa bungbong diha sa Plasa sa Hiniusang Kanasoran mabasa: “Ilang pagahimoon ang ilang mga espada nga mga punta sa daro. Ug ang ilang mga bangkaw himoon nga mga galab: Ang nasod dili na gayod mobakyaw sa espada batok sa laing nasod. Ni makakat-on pa sila mahitungod sa gubat.” Malaomon nga makapamunga sa katumanan niadtong matagnaong mga pulong, gideklarar sa Hiniusang Kanasoran ang 1986 ingon nga mao ang “Internasyonal nga Tuig sa Kalinaw.” Aduna bay katarongan sa pagtuo nga ang HK molampos sa gipanumpaang tumong sa pagtudlo sa kaugalingon ingong tigtipig sa “internasyonal nga kalinaw ug kasegurohan?”
Bisan unsa pay kontribusyon sa HK alang sa umaabot nga singgit sa “kalinaw ug kasegurohan,” ang tanang hinimog-tawo nga kalinaw sa pagkatinuod gitukod diha sa usa ka mahuyang nga pundasyon. Ang gastos sa pagtukod ug nukleyar nga mga hinagiban gibanabanang mikabat sa tres ngadto sa kuwatro ka trilyong dolyares—halos dili malaoman sa usa ka panahon sa pagpanawag sa HK alang sa pagpahinungod sa kalinaw ug kasegurohan sa kalibotan! Sa pagkatinuod, si Vernon Walters, embahador sa U.S. sa Hiniusang Kanasoran miingon, “ang Hiniusang Kanasoran misimang gikan sa iyang katungdanan ingong usa ka institusyon alang sa paghusay sa panag-away,” nga nakapusgay sa mga paglaom niadtong nagtuo nga “labaw pa ang himoon sa H.K. kay sa nahimo niini pinaagi sa pagsulbad sa panag-away.”
Apan, ang kinulit nga mga pulong sa sinugdan gikutlo gikan sa Isaias 2:4 matuman—apan dili sa 1986, ug dili usab pinaagi sa mga paningkamot sa hinimog-tawo nga organisasyon. Hinunoa, ang tinuod nga kalinaw ug kasegurohan sa dili madugay mopatunghag langitnong kagamhanan, kansang dili makitang lider sa pagkatinuod mao ang “Prinsipe sa Pakigdait.”—Isaias 9:6, 7.
Pagbalos Pinaagig Nukleyar—Mao bay Panimalos sa Diyos?
Makataronganon ba ang paggamit ug nukleyar nga mga hinagiban sa pagbalos sa usa ka nukleyar nga pag-atake? Oo, miingon ang Free Church of Scotland sa bag-ong isyu sa ilang magasin sa simbahan, The Monthly Record. Ang artikulo miingon nga ang maong pagbalos sa ulahi mapamatud-ang usa ka “makataronganong pagpahamtang sa kasuko sa Diyos” tungod sa “balaang sugo sa pagpahamtang sa kasuko batok sa daotan.” Ang Record nag-ingon usab nga usa sa ilang saksi ang proklamasyon sa hukom sa Diyos “batok sa nasod . . . nga maoy mouna sa pag-atake sa nukleyar nga gubat.”
Tino nga adunay “adlaw sa pagpanimalos sa atong Diyos.” (Isaias 61:1, 2) Apan ang panimalos sa Diyos batok sa militaristikong mga nasod ipakanaog sa panahon ug sa paagi nga iyang ginapili. Imbes usa ka yutan-ong kasuko sa nasod, ang “kaugalingong kasuko” sa Diyos “magalaglag niadtong nagalaglag sa yuta.” Sa unsang paagi? Pinaagi sa pagpadala sa “Hari sa mga hari,” si Ginoong Jesu-Kristo, ‘sa paghukom ug sa pagpadayon sa gubat sa pagkamatarong.’ Ang iyang langitnong Gingharian “magadugmok ug magaut-ot niining tanang mga gingharian.”—Pinadayag 11:18; 19:11-21; Daniel 2:44.