Pagkaplag ug Kalipay sa Napunog-Kasamok nga Kalibotan
“PAGKALIPAY kamo kanunay diha sa Ginoo,” misugo si apostol Pablo. “Usbon ko ang pag-ingon, Pagkalipay kamo!” (Filipos 4:4) Apan alang sa kadaghanan, daw maikyason ang kalipay. ‘Unsaon nimo sa pagkalipay kon atubangon mo ang kawalad-on, pagkawalay trabaho, balikong nga kauban sa trabaho, imoral nga mga pangabig, o kapit-osan sa tunghaan?’ mahibulong ang pipila.
Dili makataronganon alang sa Diyos sa pagdahom sa iyang katawhan nga magmalipayon kanunay. Gidasig sa Diyos si Pablo sa pagtagna nga kini mao ang “kritikal nga panahon nga malisod sagubangon.” (2 Timoteo 3:1-5) Bisan pa, nagpakita ang Bibliya nga bisan sa labing grabeng mga sirkumstansiya, ang usa makabaton gihapon ug usa ka sukod nga kalipay. Si Jesus, pananglitan, “miantos sa kahoy sa pagsakit” ug “sa pagsupak sa mga makasasala.” Siempre dili gayod ikalipay nga ilansang sa estaka o pasipalahan sa mga tawo. Gihisgotan gani ni Pablo nga grabe kaayo ang kasakit ni Kristo nga tungod niana iyang gihangyo ang Diyos “sa makusog nga pagsinggit ug paghilak.” Apan nakaantos si Jesus niining tanan “alang sa kalipay nga gibutang sa iyang atubangan.”—Hebreohanon 12:2, 3; 5:7.
Ang unang mga Kristohan usab “miantos sa dakong sangka ilalom sa mga kasakitan, nga usahay [sila] iladlad sa teyatro aron pasipalahan ug sakiton.” Apan, si Pablo miingon, nga ilang “gikalipay nga nasakmitan sa [ilang] mga kabtangan.” (Hebreohanon 10:32-34) Apan sa unsang paagi posible kini?
Kalipay—Gikan sa Gawas o sa Sulod?
Dili gikan sa gawas ang kalipay. Kini maoy kalidad sa kasingkasing. (Itandi sa Proverbio 17:22.) Ang gawasnong mga butang sama sa pamilya, mga higala—bisan ang kinaham nga pagkaon—makahatag ug limitadong kalipay. (Buhat 14:16, 17) Ngani, bisan lamang ang pagpaabot ug maayong butang mohatag nag kalipay! (Itandi sa Proverbio 10:28.) Apan, ang kalipay nga makuha sa tawo gikan sa gawasnong mga sirkumstansiya o materyal nga mga butang dili molungtad ug dugay.
Sa laing bahin, ang gawasnong mga kahimtang daw makawala sa atong kalipay. Pananglitan, gibatbat sa batan-ong lalaking ginganlag Jim kon sa unsang paagi naapektohan siya sa iyang sekular nga trabaho: “Wala akoy gana sa akong trabaho . . . walay katarongan nga igugol ko ang akong kinabuhi aron lamang moasenso sa usa ka kompaniya nga daw walay pagtagad kanako. Dugang pa, ang kadaghanan sa mga tawo nga akong kauban sa trabaho maayo lamang sa atubangan, dili sinserong mga tawo.” Ang pagpaningkamot sa pagpatunghag artipisyal nga kalipay napamatud-ang walay kapuslanan. Si Jim nanumdom: “Nasulayan nako ang tanang matang sa mga droga sukad sa 10 anyos pa ako. Apan nalibog kaayo ako. Gilaayan ako sa kinabuhi nga akong gisubay: inom-inom, paggamit ug mga droga, ug sa pag-adto sa mga salosalo. Walay kahulogan ug katuyoan ang kinabuhi. Akong gipangutana ang akong kaugalingon, ‘Asa man ako makakaplag ug butang nga mas maayo?’”
Ang kasinatian ni Jim ning bahina makapahinumdom kanato sa nahitabo kang Haring Solomon. Siya, usab, nakadiskobre sa pagkawalay kapuslanan sa pagpangagpas sa pagkaplag ug kalipay pinaagi sa pagpatuyang sa kaugalingon:
“Ako miingon, sulod sa akong kasingkasing: ‘Umari ka karon, sulayan ko ikaw sa kasadya. Sa ingon, tan-awa maayo sab.’ Ug, ania karon! kini usab kakawangan. Ako miingon mahitungod sa hudyaka: ‘Kini binuang!’ ug mahitungod sa kasadya: ‘Unsa man ang nahimo niini?’ Gisusi ko sulod sa akong kasingkasing sa paglipay sa akong unod uban sa bino, samtang gimandoan ko ang akong kasingkasing uban ang kaalam, ug sa pagsulod sa binuang hangtod nga akong nakita kon unsay maayo ang nabuhat sa mga anak sa tawo ilalom sa langit sa tanang mga adlaw sa ilang kinabuhi. Nakahimo akog dagkong mga butang. Nagtukod akog mga balay alang kanako; nagtanom ug kaparasan alang kanako. Nagbuhat ako ug mga tanaman ug mga parke alang kanako . . . Ug bisan unsa nga gitinguha sa akong mga mata wala nako ihikaw. . . . Ug gitan-aw ko ang tanang mga buhat nga nahimo sa akong mga kamot ug sa buhat nga akong gikugihan, ug, tan-awa! ang tanan kakawangan ug sama nga naggukod sa hangin.”—Ecclesiastes 2:1-5, 10, 11.
Aduna bay paagi sa kinabuhi nga mapuslanon, usa nga mohatag kalipay bisan ilalom sa grabeng mga kahimtang?
Ang Tuboran sa Tinuod nga Kalipay
“Ang kalipay ni Jehova maoy inyong kalig-on,” miingon si Nehemias. (Nehemias 8:10) Oo, ang kalipay nagagikan sa Labing Makagagahom nga Diyos tungod kay, una, siya mao ang Maglalalang sa tanang maayong mga butang nga mohatag tinuod nga kalipay. “Kusog ug kalipay anaa sa iyang dapit,” miingon ang Bibliya. (1 Cronicas 16:27) Busa, ang tinuod nga paagi aron makab-ot ang kalipay, mao ang pagpakighigala, o ang pagbaton ug usa ka relasyon, sa Maglalalang mismo sama sa gitagamtam ni Abraham! (Santiago 2:23) Makahatag bag kalipay ang ingon nga pagpakighigala? Tagda ang gipahayag sa salmista: “Ang imong [sa Diyos] pagpakighigala mas maayo kay sa kinabuhi.” (Salmo 83:3, The Bible in Living English) Sa ulahi maayong mahibaloan nga si Jim sa hinayhinay midangat sa pagpabili niining mga kamatuorana. Karon malipayon na siyang Kristohanon.
Sa unsang paagi makahatag kalipay ang pagpakighigala sa Diyos? Una sa tanan, ang Diyos “maghahatag ug ganti niadtong matinuorong magapangita kaniya.” (Hebreohanon 11:6) Sa pag-alagad sa Diyos, walay angay kabalak-an ang tawo nga basin ang iyang mga paningkamot makawang o masayloan. Ang labing gamayng mga lihok sa pagsimba ginaapresyar gayod niya. (Itandi sa Marcos 12:41-44.) Ug kon panalanginan ni Jehova ang iyang matinumanong mga higala, ang iyang panalangin “mopadato, ug siya dili magdugang ug kasakit niana.” (Proverbio 10:22) Sa pagkatinuod, ang mga mahigugmaon sa Diyos makalantaw sa unahan sa pagpahimulos sa ganti sa kinabuhing walay kataposan diha sa iyang Bag-ong Kahikayan nga niini “magapuyo ang pagkamatarong.” (2 Pedro 3:13) Kining maong paglaom nagahatag tinuod nga katarongan sa kalipay sa mga Kristohanon!
Laing butang nga tagdon mao nga ang “kalipay” maoy bunga sa espiritu sa Diyos. Apan si Jehova madagayaong mohatag sa iyang espiritu ngadto sa iyang mga higala sa panahon nga sila mohangyo. (Galacia 5:22; Lucas 11:13) Unsay resulta? Ang salmista miingon, “Malipayon ang katawhan kansang Diyos mao si Jehova!”—Salmo 144:15.
Pagtipig sa Atong Kalipay
Apan, bisan ang dinihogang mga Kristohanon sa mga adlaw ni Pablo mibati usab ug kaguol. (1 Tesalonica 5:14) Ug karon ang kapit-osan ug kalisdanan sa kinabuhi mihatag ug dakong kapildihan. Sanglit ang kalipay maoy hiyas nga nagapuyo sa kinailadman sa kasingkasing sa tawo, kining maong mga kalisdanan dili angay makawala sa imong kalipay. Tagda, pananglitan, si Jesu-Kristo. Atong nahibaloan sa sinugdan nga “alang sa kalipay nga gibutang sa iyang atubangan nga miantos siya sa kahoy sa pagsakit.” (Hebreohanon 12:2) Bisag masakit nga kasinatian ang pagkalansang sa kahoy, ang relasyon ni Jesus sa iyang Amahan lig-on kaayo nga dili makatugot kaniya sa paghunahuna sa pagkaluoy sa kaugalingon. Sa dayag ang dakong butang nga anaa sa hunahuna ni Jesus mao “ang kalipay nga gibutang sa iyang atubangan”: ang pribilehiyo sa pagbayaw sa ngalan ni Jehova, ang palaabuton sa pagluwas sa bug-os tawhanong rasa gikan sa sala, ang kadungganan sa pag-alagad ingong Hari sa Gingharian sa Diyos! Bisan sa iyang pinakamalisod nga gutlo, nagpalandong si Jesus niining mga butanga ug nakabaton ug dakong kalipay!
Maingon man nakaantos ang unang mga Kristohanon sa paglutos, ngani ‘ilang gikalipay nga nasakmitan sa ilang mga kabtangan,’ dili tungod kay ikalipay nila nga abusohan sa kalisdanan, kondili tungod kay ang ilang hunahuna anaa sa kon ngano nga ilang antuson kining mga butanga. Angay silang malipay “tungod kay giisip nga sila takos nga pakaulawan alang sa [iyang] ngalan.” Angay silang malipay tungod sa ‘paglaom sa kinabuhing walay kataposan’ nga anaa sa ilang atubangan.—Buhat 5:41; Tito 1:2.
Karon makapabilin gihapon kitang malipayon, bisan kon atubangon sa dagkong mga problema. Imbes magpalayo ug hunahunaon ang atong mga problema, atong mapahinumdoman ang atong kaugalingon sa mga panalangin sa pagbaton ug panaghigalaay uban kang Jehova ug sa pagpaluyo sa mahigugmaong mga igsoong lalaki ug babaye. Usahay igo na kini sa paghimo sa atong pag-antos nga daw gamay kaayo. Giilustrar ni Jesus kining butanga ning paagiha: “Ang babaye, kon magbati, mag-antos sa kasakit, tungod kay miabot na ang iyang takna; apan sa diha nga kahimugsoan na siya sa bata, dili na siya makahinumdom sa kasakit tungod sa kalipay nga nahimugso sa kalibotan ang usa ka bata.”—Juan 16:21.
Adunay daghang maayong mga panig-ingnan sa mga indibiduwal diha sa Kristohanong kongregasyon karon nga nagtabon sa ilang mga problema sa kalipay. Usa ka Kristohanong babayeng ginanglag Evelyn, pananglitan, nag-antos sa nagkalainlaing mga sakit, lakip sa kanser. Malisdan siya sa paglakaw ug nag-antos sa kasakit. Apan regular siya sa pagtambong sa mga tigom ug kanunayng adunay masilakong pahiyom sa iyang nawong. Ang sekreto sa iyang kalipay? “Misalig ako kang Jehova,” mao kanay isulti niya kanunay. Oo, imbes hunahunaon ang iyang kalisdanan, naningkamot siya sa pagsentro sa iyang hunahuna sa mga katarongan nga angay niyang ikalipay. Nakahatag kini kaniyag kalig-on sa pagsagubang sa iyang sakit.
Siempre, daling mawala kanato ang atong kalipay. Ang uban madala sa pangibog sa materyal nga mga butang o kalingawan. Ilang mapasagdan ang Kristohanong mga tigom, personal nga pagtuon, ug pag-alagad sa kanataran. Imbes magpatunghag kalipay sa iyang kinabuhi, ang usa nga maibogon sa materyal nga bahandi ‘nagaduslak sa iyang kaugalingon sa daghang mga kasakit.’—1 Timoteo 6:10.
Ang pagpangagpas sa “mga buhat sa unod” maoy laing paagi sa pagpukan sa kalipay sa tawo. Ang pakighilawas, kahugawan, haluag nga pamatasan makahatag lumalabay nga kalipay, apan sukwahi kini sa espiritu sa Diyos, nga mobungag kalipay. (Galacia 5:19-23) Ang usa nga magpatuyang sa kasal-anan nagapameligro sa iyang kaugalingon nga maputol gikan sa Tuboran sa kalipay—si Jehova!
Busa, pagkamaayo, nga ampingan pag-ayo sa Kristohanon ang iyang kalipay. Kon, sa usa ka hinungdan, nakita nimo ang imong kaugalingon nga walay kalipay, susiha kon unsay imong mahimo aron mabawi kana. Tingali nagkinahanglan ka sa dugang pagtuon ug pagpalandong sa Bibliya. Pinaagi lamang sa padayong paghinumdom sa atong kaugalingon sa atong paglaom nga kita “malipay sa paglaom” sa unahan, bisan sa panahon nga mag-antos sa kasakitan. (Roma 12:12) O tingali adunay panginahanglan sa paghimog dugang bahin sa pagsangyaw sa “maayong balita sa gingharian.” (Mateo 24:14) Ang “paghatag” niining paagiha dili kalikayan nga mobungag dugang sukod sa kalipay!—Buhat 13:48, 52; 20:35.
Ang atong puno sa problema nga kalibotan magpadayon sa paghatag kanatog kasamok. Apan pinaagi sa pagpasuod sa atong langitnong Higala, mahawiran nato ang atong kalipay ug makasulod sa Bag-ong Kahikayan sa Diyos nga niini ang tanang mga kababagan sa kalipay walaon sa walay kataposan!—Pinadayag 21:3, 4.