‘Pagpataas sa mga Pisi sa Balongbalong’ sa Japan

“PADAKOA ang hawanan sa imong balongbalong. Ug ipabuklad kanila ang tabil sa imong dakong tabernakulo. Ayaw pagdaginot. Patas-i ang imong mga pisi sa balongbalong, ug lig-ona ang imong mga lagdok.”—Isaias 54:2.

Pinaagi niadtong mga pulonga, gitudlo ni Isaias ang panahon sa dihang ang tinuod nga pagsimba ni Jehova nga Diyos moagig kusog nga kauswagan. Karon, sa nagkalainlaing nasod sa tibuok nga kalibotan, nagpakakita kita ug katingalahang teokratikong kauswagan. Tingali, kini, ilabinang makita diha sa Japan, diin adunay duolan sa 96,000 ka magsisimba sa tinuod nga Diyos.

Kauswagan sa Nangaging Katuigan

Sa sayo sa ikaduhang dekada niining sigloha nga unang miabot ang maayong balita sa Gingharian sa Diyos sa Japan. Si Charles T. Russell, ang unang presidente sa Watch Tower Society, mihimog 700-milya (1,100-km) nga paglibot sa tanang kaislahan sa Japan ug nakakita sa panginahanglan sa pagsangyaw sa tinuod nga Kristiyanidad. Sa 1926 usa ka Amerikanong-Hapones ang giasayn sa Japan ingong unang misyonero sa Watch Tower Society.

Duolan sa 20 ka tuig, daghang binhi sa kamatuoran ang napugas ug ubay-ubay ang nakahibalo bahin sa Gingharian ni Jehova. Kadaghanan kanila nakaagig mapintas nga mga pagsulay sa ilang pagtuo sa mga kamot sa militaryong kagamhanan sa katuigan sa 1933-45.a

Sa 1949 gisugdan ang buluhatong pagsangyaw sa Japan. Misugod pagpangabot ang gibansay sa Gilead nga mga misyonero. Sa pagka Agosto, dihay pito ka misyonero nga naasayn sa Tokyo, ug, sa aberids, nuybe ka tawo ang nakigbahin sa buluhatong pagsangyaw kada bulan. Miabot ang unom pa ka misyonero sa Oktubre, lima kanila misugod sa buluhatong pagsangyaw sa Kobe. Unsa kahay pagsanong sa pagsangyaw ning nasod sa mga magtutuo sa Budhismo ug Shintoismo, nga nagpauli sa kalisang sa Gubat sa Kalibotan II?

Wala pay pulo ka tuig ang numero sa mga magmamantala sa Gingharian mitubo sa 1,000. Apan ang ‘hawanan sa balongbalong wala mapadak-i.’ Sa pagka Nobyembre 1970, ang numero sa mga Saksi midaghan sa napulo ka pilo, ug sa milabay ang tulo ka tuig miabot kinig 20,000. Sa laing tulo ug tunga ka tuig kanang numeroha midoble pag-usab—sa bag-ong kinatas-ang 40,000 ug kapin pang mga magmamantala sa Gingharian! Apan, duna pay daghang karnerohon nga pangitaonon, ug mipadayon si Jehova sa pagbubo sa iyang panalangin sa madasigong kalihokan sa iyang katawhan sa Japan. Kapin lamag unom ka tuig, sa pagka Hunyo 1983, ang 40,000 midoble na usab ug kapin sa 80,000, ug, hangtod niining pagtaho, ang numero sa mga magmamantala sa Gingharian sa Japan miabot ug 97,305!

Kadtong Nagasangyaw sa Bug-os Panahon

Sa dayag, si Jehova mao ang Usa nga nagapaluyo ning kauswagan. Apan, dakong bahin usab ang nahimo sa madasigong mga misyonero ug ubang bug-os panahong mga magmamantala.

Sa pagka 1952 ang grupo sa misyonero midaghan hapit 50, ug daghang bag-o lumad nga mga Saksi nanagpanulod sa payoner nga buluhaton. Ang panig-ingnan sa madasigong mga misyonero nakadasig ug dugang ug dugang pa sa ilang bag-ong bawtismadong mga kauban sa paghalad sa ilang kaugalingon sa bug-os panahon sa pag-alagad kang Jehova. Karon, 37 ka tuig human nga misulod ang unang mga misyonero sa nasod, hapit 40 porsiento sa tanang mga Saksi sa Japan anaa sa bug-os panahong (payoner) buluhaton sa matag bulan, uban sa 36,118 ang mitaho bisan sa mubong tunga-sa-tingtugnaw nga bulan sa Pebrero 1985. Daghan sa mga misyonero nga nakigbahin sa kauswagan sukad sa sinugdanan nag-alagad gihapon dinhi, apan ang presenteng grupo sa 76 ka misyonero karon sama na lamang sa gamayng ‘tulo sa lawod’ sa tinagpulo ka libong lokal nga mga payoner.

Buot ka bang makighimamat sa pipila niining mga madasigon? Ilailahon nato ang pipila, nga naghawas sa hulagway niining mga payonera.

Una, himamata ang mga karaan na. Si Iwako Kono mao ang among pinakatigulang nga espesyal payoner. Sa panuigong 70 nakatagamtam siya sa pribilehiyo sa pag-alagad duolan sa 28 ka tuig ug nakatabang halos 50 ka tawo sa pagpahinungod ug bawtismo. Dayon anaa si Sadakichi Shimada. Sa panuigong 87 siya ang pinakatigulang nga regular payoner sa Japan. Si Toyoko Umemoto nahimong espesyal payoner sa 26 anyos pa siya nga adunay kapin sa 29 ka tuig sa matinumanong pag-alagad, siya ang labing dugay nga nakaalagad tali sa tanang lumad nga Hapones nga espesyal payoner.

Sa pikas nga bahin, adunay daghang batan-on nga migamit sa ilang pagkabatan-on sa pag-alagad kang Jehova. Si Meri Aida 14 anyos pa sa nadawat niya ang iyang asaynment sa pag-alagad ingong regular payoner. Sa wala pa kana nakabahin na siya sa auxiliary payoner nga pag-alagad sa 41 ka bulan sukad sa iyang bawtismo sa panuigong 11. Iyang gihimo kini samtang nag-eskuyla.

Si Akiko Goto siyete anyos sa misugod ang iyang inahan sa pagsulod sa buluhatong regular payoner, bisan pa sa pag-atiman sa duha ka gamayng anak. Gisunod ni Akiko ang maayong sulondan sa iyang inahan ug nahimong regular payoner sa nag-18 anyos siya, ug dayon sa milabay ang duha ka tuig nahimo siyang pinakabatang espesyal payoner sa Japan. Si Hisako Wakui 21 anyos sa misugod siya ingong espesyal payoner. Karon, human sa mga 28 ka tuig, nakapribilehiyo siya sa pagtabang ug 37 ka tawo sa pagkahimong mga magsisimba ni Jehova.

Daghan ang nanggawas sa dagkong mga siyudad ngadto sa gagmayng kalungsoran ug kabaryohan sa pagdala sa “maayong balita sa gingharian” sa tanang takos niini. Makaikag, mga 60 porsiento sa tanang regular payoner maoy mga ginang sa panimalay, ug ang kadaghanan kanila adunay dili magtutuong mga bana. Kining katingalahang espiritu sa pagpayoner maoy nakapakusog sa pagtubo sa intereses sa Gingharian sa Japan.

Ang Dinaliang Panginahanglag mga Tigomanan

Ang mga Hapones nga mga Saksi bug-os nga nagapabili sa sugo sa Bibliya sa dili ‘pagbiya sa atong panagtigom, ilabina gayod sa makita nato nga nagakahiduol na ang kataposang adlaw.’ (Hebreohanon 10:25) Sa unang mga tuig, ang kadaghanang mga kongregasyon maghimo sa ilang mga tigom sa gagmayng mga lawak sa labor halls o sa mga awditoryom. Ang kadaghanan niini abangan sa matag semana. Kasagaran moabot ang mga igsoon sa ilang mga tigom nga sultihan nga dili magamit ang lawak nianang adlawa. Nagkahulogan kini sa pagdalidalig pangitag laing lokasyon ug dayon, duolan sa usa ka oras, andamon kini alang sa mga tigom!

Makalilipay, ang kadaghanan niana miagi na. Ang kadaghanan sa mga kongregasyon karon adunay ilang kaugalingong mga tigomanan. Ang uban nangabang sa tinuig nga paagi samtang gibag-o sa uban ang bakanteng mga tinukod o mga bodega. Apan ang kantidad sa yuta sa Japan mahal kaayo—nga moabot ug mga $35 ngadto sa $50 (U.S.) matag kuwadrado piye—ug pipila ra ka kongregasyon ang makaabot sa pagpanag-iyag yuta nga katukoran sa ilang mga Kingdom Hall. Giguba sa pipila ka igsoon nga adunay propidad ang ilang mga balay ug nagtukod pag-usab uban sa Kingdom Hall sa unang andana ug sa itaas ang ilang residensiya. Sa kadaghanang tagsaong kahimtang, ang mga tawong dili mga Saksi ni Jehova o dili gani interesado sa Kristiyanidad mitanyag sa pagtukod ug mga Kingdom Hall sa ilang yuta ug gipaabang kini sa mga Saksi ni Jehova, mihangyo pa gani sa mga Saksi sa paghatag ug mga plano alang sa ilang tigomanan. Miresulta kini ug tinuod tagsaong mga Kingdom Hall.

Pananglitan, sa Yokohama, misugot ang tag-iyag parkinganan sa pagtukod ug Kingdom Hall sa stilts ibabaw sa iyang lote ug gipaabang ang tigomanan sa mga Saksi. Ang usa sa Tokyo anaa sa ikaduhang andana sa tinukod nga nahimutang sa tunga sa mga pundasyon sa itaas nga relis sa tren. Sa kataposang taho, ang mga igsoon didto naanad na sa kasaba sa mga tren sa itaas.

Sa nagkadako ang mga kongregasyon, nagkadako usab ang mga sirkitong asembliya. Samtang sa 20 ka tuig kanhi ang sirkitong asembliya aduna lamay 300 ngadto sa 400 ka tumatambong, karon adunay 1,500 ngadto sa 2,000, o kapin pa. Malisod nga makita ang mga pasilidad alang sa mga asembliya nga ingon niini ka dako. Busa, sa 1975, ang nahapay nga bolinganan gawas sa Tokyo gipaabangan ug giremodelo ug nahimong usa sa unang Assembly Hall sa Japan, nga makapalingkod ug 1,200. Ang ikaduha, kongkreto nga tinukod, maoy misunod sa 1982. Nahimutang kini sa sentral (Kansai) nga dapit sa Japan ug bug-os nga gitukod pinaagi sa boluntaryong pamuo sa Saksi nga mga lalaki, mga babaye, ug mga bata. Kini makapalingkod ug 1,800. Ang ikatulong Assembly Hall gitukod sa bulontaryong mga trabahante sa propidad sa Watch Tower Society sa sangang mga hedkuwarter sa Ebina. Makapalingkod kinig 3,000.

Ang kataposang panahon nga nagkatigom ang tanang mga magmamantala sa Japan sa usa ka asembliya mao ang internasyonal nga kombensiyon sa Ösaka sa 1973, ug 31,263 ang mitambong. Sukad niadto, tungod sa kakulang sa maayong mga pasilidad, nakitang praktikal ang mas gagmayng mga kombensiyon. Kawhaan ug upat sa maong mga kombensiyon gihimo sa 1984, ug may mitambong nga 179,439 ug 3,236 ang nabawtismohan.

Pagpadako sa Sanga

Aron makaapas sa kusog nga pagtubo sa kanataran, ang sangang opisina sa Sosyedad naghimog dako kaayong pagpadako sa nangaging katuigan. Gikan 1949 ngadto sa 1962 nahimutang ang opisina sa duha ka andanang estilong Hapones nga balay sa Minato Ward, sa Tokyo. Sa kataposan gipulihan kini sa pito ka andanang tinukod nga nagsilbing mga hedkuwarter hangtod sa 1972. Niadtong panahona nakita sa Sosyedad ang panginahanglan sa pagprinta sa iyang kaugalingon. Busa usa ka bag-ong pabrika ug puloy-anang Bethel ang gitukod diha sa usa ka akre (0.4 ha) sa yuta sa Numazu City, 75 milya (120 km) sa habagatang kasadpan sa Tokyo.

Apan, sa lima lamang ka tuig, nagkagamay ang mga pasilidad sa Numazu. Busa, ang 18 akre (7 ha) gipalit sa Ebina, ug maanindot nga pabrika ug puloy-anang Bethel, tulo ka pilo sa gidak-on sa pasilidad sa Numazu, ang gitukod. Kining grupo nga mga tinukod, nga bug-os nga gitukod sa mga Saksi mismo, gipahinungod sa Mayo 15, 1982.

Ang paggamag magasin gisugdan uban sa bag-ong imprintahanang rotary offset press samtang nagpadayon pa ang pagtukod. Sa natapos ang konstruksiyon, dihay gidugang nga upat ka kolor nga rotary offset press. Naghinamhinam ang mga igsoon sa dihang ang tinagpulo ka libong kopya sa New World Translation of the Holy Scriptures sa pinulongan sa Hapones ang migawas sa prensa sa Sosyedad sa 1982. Aron makaapas sa nagkadaghang pidido sa mga magasin ug mga literatura, ang lima ka pundok nga rotary offset press ang gitaod sa Enero 1984. Mopatungha kinig libolibong mga magasin sa usa ka minuto ug dungang makaprinta sa pinulongan sa Hapon nga Ang Bantayanang Torre ug Pagmata!

Aron maatiman ang pagprinta ug sa pagpadala ug sa pagtagad sa mga panginahanglan sa mga trabahante, mitubo ang pamilyang Bethel sa 345 ka membro. Dugang pa, 165 ang nagtrabaho sa bag-ong proyekto sa konstruksiyon. Makaikag, adunay 19 ka parisan sa mga igsoon sa unod niining pamilyaha.

Bisan ug tulo pa lamang ka tuig nga gipahinungod ang mga pasilidad sa Ebina, gisugdan na ang trabaho alang sa dugang pagpadako. Padayong gitukod sa mao gihapong propidad mao ang bag-ong walo ka andanang puloy-anang Bethel, nga makapapuyog 250 ka tawo, ug dugang unom ka andanang pabrika. Sa pagkatinuod, ang “mga pisi sa balongbalong” gipatas-an nga wala dahoma.

Mga Palaabuton

Niining yuta sa relihiyon sa Budhismo ug Shintoismo, adunay daghang tawo nga nagapangitag usa ka butang nga ilang katuohan. Kon pila pa ang mosulod sa “balongbalong” ni Jehova tan-awonon pa. Ang timaan sa umaabot nga kauswagan mao ang kamatuoran nga 224,696 ka tawo ang nagkatigom sa Abril 15, 1984, sa paghandom sa kamatayon ni Jesus. Ug gihatagag dakong paningkamot ang pagtabang sa mga interesado. Kada bulan, duolan sa 142,000 ka pagtuon sa panimalay ang gihimo.

Sa dihang miabot ang unang mga misyonero sa 1949, kinsay makatuo nga human sa 37 ka tuig moabot ug kapin sa 97,000 ka aktibong mga magdadayeg si Jehova niining yutaa? Bisan pa, si Jehova ang nagapalampos niini. Sumala sa iyang saad, siya sa pagkatinuod ‘nagapadako sa tabil sa balongbalong’ ug ‘nagapataas sa mga pisi sa balongbalong’ alang sa iyang katawhan. Ang iyang mga Saksi magpadayon sa pagkugi ug sa paghulat kaniya sa pagpangani sa dili pa matapos kining sistema sa mga butang.

[Mga footnote]

[Graph sa panid 23]

(Alang sa bug-os nga pagkahan-ay sa teksto, tan-awa ang publikasyon)

Pagtubo sa mga magmamantala sa Gingharian sa Japan sa miaging 37 ka tuig

(Pebrero)

1949 9

1958 1,000

1970 10,000

1973 20,000

1976 40,000

1983 80,000

1985 97,305

[Hulagway sa panid 24]

Si Toyoko Umemoto mao ang pinakadugay sa espesyal payoner

[Hulagway sa panid 25]

Si Sadakichi Shimada mao ang pinakatigulang nga regular payoner sa Japan