Mahimo Kang mas Maisogon!

1-3. Nganong ang mga pulong ni Jesus nga “bangon mo, manglakaw na ta” nagpakita sa iyang dakong kaisog?

“BANGON mo, manglakaw na ta.” Posible nga wala na gyoy molabaw niini sa tanang pulong nga nagpakitag kaisog. Ngano? Masayran nato ang tubag dihang atong konsiderahon kon kinsay nagsulti niini ug kon nganong iya ning gisulti.—Mat. 26:46.

² Si Jesu-Kristo ang nagsulti niini ngadto sa iyang matinumanong mga sumusunod. Iya na kining gisulti kanila sa miagi. (Juan 14:31) Pero niining higayona, lahi kaayo ang kahimtang. Didto siya sa tanaman sa Getsemane sa gawas sa siyudad sa Jerusalem. Lawom na ang kagabhion, ug nahibalo si Jesus nga dihay nagpaingon nga armadong mga tawo. Nahibalo siya kon unsay tuyo niining mga tawhana. Hapit na niyang maatubang ang kinalisdang pagsulay nga masinatian sa usa ka tawo. Ug nahibalo siya nga mag-inusara siya sa pag-atubang niini.

³ Wala mosulay si Jesus sa paglikay sa kapeligrohan. Puwede unta siyang magpatabang sa gamhanang mga anghel aron mapanalipdan siya, pero wala na niya himoa. (Mat. 26:53) Samtang nagkaduol ang mga tawo nga modakop niya, siya miingon: “Bangon mo, manglakaw na ta.” Nahibalo si Jesus nga siya dakpon, mag-antos, ug patyon. Nganong andam siyang mag-antos ug mamatay? Kay gihigugma niya ang iyang Amahan ug gihigugma pod niya ang iyang mga sumusunod.

4-5. Unsa nga kaisog ang gipakita ni Jesus, ug nganong nagkinahanglan ta niini?

⁴ Walay duhaduha, si Jesu-Kristo ang labing maisogong tawo nga nabuhi sukad. Usa ba ka sa iyang mga sumusunod? Kon mao, maisogon pod ka. Ang matuod nga mga Kristohanon angayng magmaisogon. Nagkinabuhi na ta sa gubot ug peligrosong mga panahon, maong mas gikinahanglan nato karon ang kaisog.

⁵ Unsa nga kaisog ang gipakita ni Jesus? Ang tinuod nga kaisog wala magpasabot nga wala tay gikahadlokan, nga ipameligro nato ang atong kaugalingon sa wala ray hinungdan, o mohasmag dayon sa kapeligrohan kay nagtuo ta nga dili ra ta maunsa. Wala pod ni magpasabot sa paghimog pintas nga mga buhat aron pamatud-an nga isog ta. (Sal. 11:5) Lahi nga kaisog ang gipakita ni Jesus. Mao kini ang kaisog o kusog nga mopalihok nato sa pagbuhat sa kon unsay matarong sa panan-aw sa Diyos bisan unsa pa ni ka lisod o makahahadlok.

Masundog Nimo ang Kaisog ni Jesus!

6. Kon mobati ta nga kulang ang atong kaisog, sa unsang paagi ang ehemplo ni Jesus makahupay nato?

⁶ Tingali naghunahuna ka kon makapakita ba kag kaisog dihang makaatubang kag pagsulay sama kang Jesus. Kon mao, hinumdomi ni: Si Jesus makataronganon. Sama sa iyang amahan, dili gyod magdahom si Jesus ug labaw pa sa atong maarangan. (Sal. 103:14; Juan 14:9) Pananglitan, nianang gabhiona sa tanaman sa Getsemane, gihangyo ni Jesus ang iyang mga apostoles nga magpabilin sa pagtukaw, pero nangatulog sila. Bisan pa niana, buotan niyang gisultihan sila: “Hinuon, andam ang espiritu, apan luya ang unod.” (Mat. 26:41) Nakasabot siya sa ilang mga kahuyangan, ug makasabot pod siya sa imong mga kahuyangan.

7-8. Sa unsang paagi gipasaligan ni Jesus ang iyang mga sumusunod?

⁷ Gipasaligan sab ni Jesus ang iyang mga sumusunod. Imadyina ang ilang gibati dihang gipasaligan sila ni Jesus: “Magmalig-on kamo! Gidaog na nako ang kalibotan.” (Juan 16:33) Nahibalo siya nga masundog nila ang iyang kaisog—ug wala gyod siya masayop. Dugang pa, dihay daghang higayon nga gipasaligan ug gitabangan ni Jesus ang uban nga mahimong mas maisogon. Pananglitan, giingnan ni Jesus ang paralisado nga dili na siya angayng mabalaka kay gipasaylo na ang iyang mga sala. (Mat. 9:2) Sa wala pa niya ayoha ang babaye nga may grabeng sakit, iyang giingnan siya: “Ayawg kahadlok.” (Mat. 9:22) Iyang gipakalma ang iyang mga tinun-an dihang nahadlok sila sa unos. (Mat. 14:27) Ug human sa iyang pagkabanhaw, iyang gipasaligan si apostol Pablo kinsa nameligro nga patyon sa suko nga mga maghuhukom, ug iyang giingnan siya: “Magmaisogon!”—Buh. 23:9-11.

⁸ Mao pod nay pasalig kanimo sa maisogong Hari nga si Jesus. Gusto niya nga “magmaisogon” ka. Ug nahibalo siya nga kaya na nimong himoon. Ang iyang Amahan nga si Jehova naghatag sa imong gikinahanglan aron imo nang mahimo.

Nganong ang Bibliya Makatabang Nato nga Mahimong mas Maisogon?

9. Nganong ang Pulong sa Diyos makadasig nato?

⁹ Sa Bibliya, gihatagan ta ni Jehova ug daghang ehemplo nga makatabang nato nga mahimong mas maisogon. Mabasa nato ang tinuod nga mga asoy sa daghang lalaki ug babaye, bata ug tigulang, nga lainlaig kahimtang. Silang tanan seguradong “may pagbati nga sama kanato,” parehas kang propetang Elias. (Sant. 5:17) Parehas sila nato nga mga dili hingpit ug may mga kahuyangan, limitasyon, ug kasaypanan. Ug sama nato, nakaatubang pod silag lainlaing kalisdanan ug bisan gani peligrosong mga kahimtang. Pero sama kang Jesus, nasagubang na nila. Sila nagmaisogon, ug ang ilang mga ehemplo padayong nagdasig nato karon.

10-11. Unsang kaayohan ang mahatag niini nga libro kanimo, ug unsaon nimo ni paggamit? (Tan-awa sab ang kahon nga “Kon Unsaon Paggamit Kini nga Publikasyon Para sa Personal nga Pagtuon ug Pamilyahanong Pagsimba.”)

¹⁰ Kini nga libro gidisenyo aron tabangan ka nga mahimong mas maisogon. Sa mosunod nga 54 ka kapitulo, makita nimo kon giunsa pagtabang ni Jehova ang dili hingpit nga mga tawo sama nimo nga makabatog kaisog nga ilang gikinahanglan. Busa basaha ang matag asoy, dayon pag-research aron makakat-on kag dugang bahin sa matag karakter. Samtang imo nang himoon, mas mailhan pa gyod nimo ang maong mga lalaki ug babaye.

¹¹ Hinaot ang ilang mga ehemplo makatabang nimo nga mahimong mas maisogon aron makalahutay ka niining lisod nga “kataposang mga adlaw.” (2 Tim. 3:1) Hinumdoman nato matag adlaw ang pasalig ni Jehova: “Dili gyod ka nako biyaan, ug dili gyod ka nako talikdan.” Sama sa giingon ni Pablo, ang maong mga pulong makatabang nga “dili ta mahadlok, hinuon moingon ta: ‘Si Jehova ang akong magtatabang; dili ko mahadlok.’”—Heb. 13:5, 6.