Sulat Gikan sa Nagamandong Lawas

Minahal nga mga Igsoon:

Sa mensahe ni Jesus sa kongregasyon sa Smirna, siya miingon: “Ayawg kahadlok sa mga butang nga hapit na nimong antoson.” (Pin. 2:10) Ang iyang pagdasig nga dili magpadaog sa kahadlok maoy para usab nato nga nagkinabuhi karon sa “adlaw sa Ginoo.” (Pin. 1:10) Tinuod gyod nga kini maoy “kuyaw nga mga panahong lisod sagubangon,” ug nadasig mi pag-ayo nga makita nga ang katawhan sa Diyos sa tibuok kalibotan nagpabiling matinumanon samtang nag-atubang sa mga pagsulay sa ilang pagtuo ug kaisog!—2 Tim. 3:1-5.

Pero unsay angay natong himoon aron makapabilin tang lig-on ug dili “moatras” sa kahadlok? (Heb. 10:39) Dili tingali na kanunayng sayon kay lagmit makaatubang tag pagsupak ug paglutos. Pero makapili ta nga magmaisogon sa pagdapig kang Jehova ug sa pagbuhat sa kon unsay husto, bisag maulawon ta o usahay mahadlok. Unsay makatabang nato?

Ang Pulong sa Diyos makatabang ninyo nga magmaisogon. Puno nig mga ehemplo sa maisogong mga lalaki ug babaye. Kini nga libro gihimo aron tabangan ta nga susihon ug pamalandongon ang ilang mga ehemplo. Samtang inyong tun-an ang maong mga asoy sa Bibliya, pag-ampo kang Jehova nga makita ninyo kon sa unsang paagi ang ilang mga ehemplo makatabang ninyo sa pag-atubang sa inyong mga kalisdanan karon o sa umaabot. Hunahunaa kon sa unsang paagi si Jehova makatabang ninyo nga magmaisogon. Hunahunaa sab kon sa unsang paagi ang kaisog niini nga mga lalaki ug babaye makatabang ninyo nga magmaisogon sa paghimo sa mosunod:

Pagpahiuyon sa kon unsay kabubut-on sa Diyos. (Sant. 3:17) Dihang gisalikway ni Jehova si Saul ug gipili ang batan-ong si David ingong sunod nga hari, si Jonatan nagmaunongon ug nagmaisogon. Kinasingkasing niyang gisuportahan ang gipili ni Jehova.

Pagbarog alang sa matarong nga mga prinsipyo. (Heb. 11:32-34) Si Hananias, Misael, ug Azarias andam mamatay sa nagdilaab nga hudno imbes ikompromiso ang ilang pagtuo pinaagi sa pagsimbag idolo.

Pagsulti bahin sa kamatuoran. (Mat. 22:16) Hunahunaa si Saulo sa Tarso, kinsa misulti sa kamatuoran bahin kang Jesus ngadto mismo sa mga tawo nga nagdahom nga motabang siya kanila sa paglutos sa mga sumusunod ni Jesus.

Nanghinaot mi nga kini nga publikasyon motabang ninyo nga mahimo mong mas maisogon ug mas molig-on ang inyong pagtuo. (Sal. 27:14) Hinaot panalanginan mo ni Jehova samtang inyong tabangan ang inyong pamilya ug ang mga igsoon sa kongregasyon nga magmaisogon sa pagsuportar sa Gingharian sa Diyos!