10 MOISES
Siya Mihimog Hustong Desisyon
DILI ang Hebreohanong ginikanan ni Moises ang naghatag sa iyang ngalan, kondili ang Ehiptohanong prinsesa nga nagsagop niya. Gipili ni sa prinsesa kay nagpasabot nig “Giluwas Gikan sa Tubig,” ug nianang paagiha niya giluwas ang batang lalaki. Tingali naglaom siya nga ang bata mahimong halangdong membro sa harianong pamilya sa Ehipto inigkadako niini. Seguradong nalipay siyang nakita nga ang bata nakabaton sa kinatas-ang edukasyon. Atong mabasa: “Si Moises natudloan sa tanang kaalam sa mga Ehiptohanon.”
Nagdako siya ingong talahorong batan-on. Ang Bibliya nag-ingon: “Gani, puwersado ang iyang mga pulong ug naghimo siyag dagkong buhat.” Puwede untang mangagpas siya nga madato, mainila, ug mapahimuslan ang tanang kalipayan sa Ehipto. Pero nahibalo si Moises nga kon ingon ana ang iyang kinabuhi, dili siya masuod kang Jehova. Busa kinahanglang modesisyon si Moises: Unsay iyang himoon sa iyang kinabuhi?
Dihang 40 anyos na si Moises, tin-awng nakita ang iyang gihimong desisyon. Atong mabasa: “Tungod sa pagtuo si Moises, dihang dako na, dili gustong magpatawag nga apo sa Paraon. Mas gipalabi niyang daogdaogon uban sa katawhan sa Diyos imbes pahimuslan ang temporaryong kalipay sa pagpakasala.” Gihimo niya ang hustong desisyon, nga nagpakita sa iyang pagtuo ug kaisog. Pero nakahimo sab siyag mga sayop.
Giisip ni Moises ang mga Israelinhon ingong “iyang mga igsoon,” ug gusto niya silang tabangan kay sila gidaogdaog. Usa ka adlaw niana, iyang gitan-aw kon unsa ka grabe ang ilang pag-antos. Nakita niya nga gibunalan sa usa ka Ehiptohanon, nga lagmit tig-asayn ug trabaho, ang usa ka Hebreohanong ulipon. Gibadlong ba ni Moises ang Ehiptohanon? Wala ta mahibalo. Pero ang Bibliya nag-ingon nga si Moises ‘milingi sa palibot’—tingali aron tan-awon kon naa bay tawo nga motabang sa ulipon. Pero wala siyay nakita, maong milihok siya. “Gipatay niya ang Ehiptohanon.” Gituyo ba to niya? O nadala lang ba siya sa kasuko maong wala tuyoa nga napatay niya ang maong tawo? Walay giingon ang Bibliya. Pero nahibalo si Moises nga nameligro siya pag-ayo, maong gilubong niya sa balas ang patayng lawas.
Pagkaugma, nakita niya nga dihay duha ka Hebreohanong ulipon nga nag-away, ug gibulag niya sila. Pero ang ulipon nga sad-an dunay giingon nga nakapahadlok kang Moises: “Kinsay naghimo nimong prinsipe ug maghuhukom namo? Patyon ba ko nimo parehas sa imong pagpatay sa Ehiptohanon?” Nasayran ni Moises nga nabulgar na ang iyang sekreto maong nahadlok kaayo siya.
Ang mga panghitabo dili mao ang gidahom ni Moises. Unsa may iyang gidahom? Ang Bibliya nag-ingon: “Naghunahuna siya nga masabtan sa iyang mga igsoon nga luwason sila sa Diyos pinaagi sa iyang kamot, apan wala nila kana masabti.” Naghunahuna tingali si Moises nga siya ang gipili sa Diyos nga maoy manguna sa pagpagawas sa mga Israelinhon gikan sa pagkaulipon sa Ehipto. Pero wala masabti ni Moises nga dili pa to ang panahon nga hatagag kagawasan ni Jehova ang iyang katawhan. Wala pod damha ni Moises ang reaksiyon sa mga Israelinhon sa iyang gihimo. Wala silay salig niining Hebreohanon nga gimatuto sa harianong panimalay sa Ehipto.
Pilion ba ni Moises ang bahandi ug kadungganan, o tabangan niya ang katawhan ni Jehova?
Wala pa masabti ni Moises adtong panahona nga dili pa gyod siya andam nga manguna sa pagpagawas sa katawhan ni Jehova gikan sa pagkaulipon sa Ehipto. Sa panglantaw sa Diyos, dili pa kuwalipikado si Moises. Tinuod maisogon siya, kusgan, ug “puwersado ang iyang mga pulong.” Pero kinahanglan niyang ugmaron ang usa pa ka hiyas nga importante kaayo kang Jehova—ang kaaghop. Wala siya makapugong maong napatay niya ang Ehiptohanon, ug nahibaloan dayon sa Paraon ang iyang daotang gibuhat.
Gustong patyon sa Paraon si Moises bisag wala pa siya mahatagig kahigayonan nga ipatin-aw kon unsa gyoy tinuod nga nahitabo. Busa mibiya siya sa Ehipto. Wala siya mahibalo kon unsay mahitabo niya, ug iyang gibiyaan ang bahandi, kahayahay, ug kadungganan. Segurado nga nagkinahanglan gyod siyag kaisog nga biyaan ang iyang pinuy-anan ug moadto sa layo kaayong lugar, ang Midian. Daghang tuig siyang nagpuyo ingong langyaw diha sa maong uga nga yuta. May kaisog ba siya sa paghimog mga kausaban sa iyang personalidad? Mahimo kaha siyang maaghop ug mapainubsanong tawo nga maoy gusto ni Jehova para niya? Atong tan-awon.
Basaha ang asoy sa Bibliya:
Pakighisgot:
Sa unsang mga paagi nga si Moises nagpakitag kaisog niining bahina sa iyang kinabuhi?
Tun-ig Dugang
1. Unsay pamatuod sa kasaysayan nga nagpakita nga tukma ang giingon sa Bibliya nga ang mga Israelinhon naulipon sa Ehipto? (w20.03 30) A
Courtesy Brooklyn Museum, gift of Theodora Wilbour
Hulagway A: Usa ka bahin sa karaang listahan sa mga ulipon sa Ehipto nga naay kapin sa 40 ka Semitikanhong ngalan, nga nagpakita nga dihay Israelinhong mga ulipon sa Ehipto
2. Sa unsang paagi tingali natudloan si Moises sa iyang mga ginikanan ug dayon “natudloan sa tanang kaalam sa mga Ehiptohanon”? (Buh. 7:22; w02 6/15 10 ¶2-5)
3. Unsay paagi sa mga Ehiptohanon sa paglubong sa ilang mga patay? Unsa kahay ilang gibati sa gihimo ni Moises nga gawas nga gipatay niya ang Ehiptohanon, iya ra sab ning gilubong sa balas? (it “Ehipto, Ehiptohanon” ¶28) B
Hulagway B: Ehiptohanon nga mummy
4. Si Moises miikyas paingon sa Midian. Sa unsang paagi managsama ang mga Midianhon ug mga Israelinhon? (it “Midian, Midianhon” Num. 2 ¶1-2)
Hunahunaa ang mga Leksiyon
Unsay imong makat-onan kang Moises bahin sa pagpugong sa imong kasuko?
Unsay makat-onan sa mga batan-on kang Moises bahin sa pagpakitag kaisog dihang mopilig hustong mga tumong? C
Hulagway C
Sa unsa pang mga paagi masundog nimo ang kaisog nga gipakita ni Moises niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Dihang banhawon na si Moises, unsay akong ipangutana niya bahin sa iyang kinabuhi nga gihisgotan niini nga asoy?
Pagkat-og Dugang
Sayra kon unsaon nato pagsundog ang pagsakripisyo ni Moises.
Sundoga ang Dunay Pagtuo, Dili ang Walay Pagtuo—Moises, Dili ang Paraon (2:27)
Gisakripisyo ni Moises ang haruhay nga kaugmaon aron makaalagad kang Jehova. Praktikal ba nang himoon karon?
Karera nga Mohatag ug Maayong Kaugmaon Hangtod sa Hangtod (4:58)