Mahimo Bang Dag-on ang Bugno Batok sa Droga?

ANG pagdaog sa bugno batok sa mga droga maoy dalayegong tumong, apan dili kini sayong tahas. Ang duha ka kusog nga makina maoy nagpadagan sa ilegal nga tren sa droga—suplay ug panginahanglan. Sulod sa duolag usa ka siglo, ang mga gobyerno ug mga kuwerpo sa kapolisan nagtumong sa pagtagad sa pagpakunhod sa suplay. Yano ang ilang pangagpas: Walay mga droga, walay mga giyanon sa droga.

Pag-atake sa Suplay

Sa maong tumong, ang mga yunit sa droga sa polisiya nakaembargog dagkong mga kargada sa mga droga, ug ang internasyonal nga pagtambayayong misangpot sa pagkapriso sa iladong mga magpapatigayon ug droga. Apan ang mapait nga kamatuoran mao nga bisan pag ang epektibong pagbantay sa polisiya tingali magpugos sa pipila ka magpapatigayon ug droga sa pagbalhin ngadto sa laing dapit, pagpangitag ubang mga baligyaan, o pagkamahimong mas mamugnaon, kini wala makapahunong kanila. “Dili gayod kami molampos sa pagpakigbugno sa mga magpapatigayon ug droga samtang sila adunay way-limiteng salapi ug kinahanglang kami makigbugno sa mga bugno bahin sa pondo,” miangkon ang usa ka eksperto sa narkotiko.

Si Joe de la Rosa, usa ka opisyal sa pagsanta sa krimen sa Kuwerpo sa Kapolisan sa Gibraltar, nakigsulti sa Pagmata! bahin sa kalisod sa pagpukgo sa pagpatigayon ug droga tali sa Aprika ug sa Iberian Peninsula. “Sulod sa 1997 kami nakaembargo ug duolag 400 kilos [880 libra] nga tagok sa cannabis,” matod niya. “Kadaghanan niana wala sa aktuwal embargoha gikan sa mga magpapatigayon ug droga; kadto nakaplagang naglutaw sa dagat o gidagsa sa mga baybayon. Kana mohatag kanimog ideya kon unsa ka daghang droga ang motabok sa Strait of Gibraltar kada tuig. Ang among naembargo maoy tipik lamang. Ang mga tighakot nga mobalhin gikan sa Aprika ngadto sa Espanya adunay mga sakayang demotor nga labi pang kusog modagan kay sa sakayang demotor sa among aduwana. Ug kon hisabtan nila nga sila mameligrong hidakpan, ilabay lang nila sa dagat ang mga droga, busa kami walay ebidensiya nga mahimong pasikaranan sa pagkiha kanila.”

Ang polisiya nag-atubang ug susamang mga suliran diha sa ubang mga bahin sa kalibotan. Ang ordinaryog-hitsurang mga biyahedor, gagmayng mga ayroplano, mga barkong may mga container, ug bisan mga submarino moyuhot ug mga droga tabok sa kadagatan o agi sa malusotang mga utlanan. Usa ka taho sa Hiniusang Kanasoran nagkalkular nga “labing menos 75 porsiyento sa internasyonal nga kargada sa droga kinahanglang mailog aron makunhorag dako ang dakog-sapi nga pagpatigayon ug droga.” Sa pagkakaron, ang porsiyento nga mailog lagmit dili molabaw sa 30 porsiyento alang sa cocaine—ug ubos kaayo alang sa ubang mga droga.

Busa nganong ang mga gobyerno dili mag-atake sa suliran diha sa gigikanan niini ug laglagon ang tanang tanom sa cannabis, mga opium poppy, ug mga punoan sa coca? Ang Hiniusang Kanasoran karong bag-o nagrekomendar nianang lakanga, apan dili kini sayon. Ang cannabis ikatanom sa halos bisan unsang hardin. Usa ka dakong tamnanan ug coca sa Andes anaa sa usa ka rehiyong gibatbat ingong “gawas sa kontrol sa estado.” Ang susamang mga kahimtang naglungtad sa hilit nga mga dapit sa Afghanistan ug Burma, nga pangunang mga gigikanan sa opyum ug heroina.

Dugang nagkomplikar sa kahimtang, ang mga magpapatigayon ug droga sayong makabalhin ngadto sa dinisenyong mga droga, nga adunay nagtubong panginahanglan. Ug ang sekretong mga laboratoryo makagama nianang sintetikong mga droga sa halos bisan diin sa kalibotan.

Ang mas epektibong pagbantay sa polisiya ug mas bug-at nga mga silot sa bilanggoan makapakunhod ba sa negosyo sa droga? Adunay labihan ka daghang tigbaligya ug droga, labihan ka daghang giyanon, ug labihan ka diyutayng polis aron mosaler ang maong pamaagi. Pananglitan, ang Tinipong Bansa may duolag duha ka milyong tawo nga binilanggo—daghan kanila tungod sa mga salang langkit sa droga. Apan ang kapeligrohang mabilanggo wala makapugong sa mga tawo sa paggamit ug mga droga. Sa daghang dili-ugmad nga kanasoran diin kusog kaayo ang halin sa droga, ang kulang-ug-tawo ug gamayg-suweldong mga polis maoy inutil aron mapugngan ang sulog.

Makunhoran Kaha ang Panginahanglan sa Droga?

Kon ang mga singkamot nga makontrolar ang suplay sa droga napamatud-ang kawang, komosta ang pagpakunhod sa panginahanglan? “Ang bugno batok sa mga droga sa tinuoray maoy pakigbugno alang sa mga kasingkasing ug mga hunahuna, ug dili lamang sagubangonon sa mga polis ug mga korte ug mga bilanggoan,” nag-ingon ang magasing Time.

Si Joe de la Rosa, nga gikutlo ganina, susamang nagtuo nga ang edukasyon mao ang bugtong paagi sa pagbugno sa ilegal nga mga droga. “Ang pagkagiyan sa droga maoy suliran sa katilingban nga gimugna sa katilingban, busa kinahanglang usbon nato ang katilingban o labing menos usbon ang panghunahuna sa katawhan,” matod niya. “Among gisulayan nga ilangkit ang mga tunghaan, mga ginikanan, ug ang mga magtutudlo aron ang tanan makaamgo nga ang kapeligrohan anaa, ang mga droga mabatonan, ug ang ilang mga anak mahimong mabiktima.”

Kon Unsay Nahimo sa mga Saksi ni Jehova

Sa daghang katuigan ang mga Saksi ni Jehova aktibong nalangkit sa pag-edukar sa mga tawo nga likayan ang mga droga. Sila nag-andam ug impormasyong gilaraw aron tabangan ang mga ginikanan sa pagtudlo sa ilang mga anak bahin sa mga kapeligrohan sa mga droga.a Dugang pa, ang ilang ministeryo nakatabang sa pagpabag-o sa daghang tiggamit ug mga magpapatigayon ug droga.

Si Ana, nga gihisgotan sa miaging artikulo, gipailaila ngadto sa mga Saksi ni Jehova tungod kay ang iyang igsoong babaye nakadungog sa ilang kalamposan sa pagtabang sa mga giyanon sa droga. Si Ana dili interesado sa Bibliya, apan maukon-ukonong mitambong siya sa usa ka asembliyang gihimo sa mga Saksi. Didto nakit-an niya ang usa ka lalaking kanhi iladong tigbaligyag droga apan bug-os nga nagbag-o sa iyang panagway ug iyang estilo-sa-kinabuhi. “Naghunahuna ko nga kon siya nakahimo sa pagbag-o, makahimo usab ako niana,” matod ni Ana. “Ang iyang pagbag-o nagkombinsir kanako nga angay nakong dawaton ang gitanyag nga pagtuon sa Bibliya.

“Sukad sa una nakong pagtuon sa Bibliya, mihukom ako nga magpuyo lang sa balay, sanglit nasayod ako nga kon mogawas ako sa balay, makahibalag akog ubang mga tiggamit ug droga ug makabalik sa paggamit ug droga. Nasayod na ako nga ang mga droga maoy daotan ug ang Diyos dili mouyon sa maong bisyo. Nakita ko usab ang epekto sa mga droga diha sa mga tawo ug ang kadaot nga nahimo nako sa akong pamilya mismo. Apan gikinahanglan ko ang espirituwal nga kusog aron mahigawas sa akong pagkaulipon sa droga. Lisod nga wagtangon ang mga hilo sa droga. Sa makadiyot nga panahon natulog lang ako sa tibuok adlaw samtang nagkahanaw ang mga epekto sa droga. Apan takos kadto.”

Tinuod nga Paglaom ug Kahulogan

Ang bana ni Ana, si Pedro, nga gihisgotan usab sa miaging artikulo, may susamang pag-ikyas. “Usa ka adlaw samtang nagyupyop ug hashish diha sa balay sa akong magulang lalaki, nakit-an ko ang usa ka librong may ulohan nga nakapaikag kanako,” nahinumdom si Pedro. “Kadto nag-ulohang Ang Kamatuoran nga Motultol sa Kinabuhing Walay Kataposan. Gidala ko kadto sa balay, gibasa, ug gisusi ang mga kasulatan. Natino ko nga nakaplagan ko na ang kamatuoran.

“Tungod sa pagbasa sa Bibliya ug pagsulti sa uban bahin sa akong nakat-onan, mas maayo ang akong paminaw sa lawas ug nakunhoran ang akong pangandoy sa droga. Gihukom ko nga dili ipadayon ang akong giplanong armadong pagpangawat sa usa ka gasolinahan. Ang usa ka higala nagtuon sa Bibliya uban sa mga Saksi ni Jehova, ug sa wala madugay misunod ako sa iyang panig-ingnan. Sa siyam ka bulan gibag-o ko ang akong estilo-sa-kinabuhi ug nabawtismohan. Sa maong panahon, daghang kanhing mga higala ang motanyag kanakog droga, apan sugdan ko dayon ang paghisgot kanila sa Bibliya. Ang pipila paborableng misanong. Ang usa nakabuntog gani sa iyang pagkagiyan.

“Sa paghunong sa bisyo sa droga, kinahanglang ikaw may paglaom. Ang Bibliya naghatag kanako nianang paglaoma, naghatag ug kahulogan sa akong kinabuhi, ug tin-awng nagpakita kanako sa hunahuna sa Diyos bahin sa mga droga ug kapintasan. Namatikdan ko nga mas maayo ang akong pagbati samtang ako nakakat-on bahin sa Labing Gamhanan—ug walay daotang mga epekto. Sa ulahi, ang pagpakig-uban sa hinlo-ug-kinabuhing mga tawo panahon sa mga tigom sa mga Saksi ni Jehova nakatabang nako sa pagpadayon pagsubay niining dalana.”

Gikan sa Pagkamagpapatigayon ug Droga Ngadto sa Pagkamason

Si Jose, ang magpapatigayon ug droga nga gihisgotan sa miaging artikulo, karon mason na usab. Gilisdan siya paghunong sa iyang dakog-sapi nga negosyo. “Mokita kag dakong salapi sa mga droga,” siya miangkon, “apan kini dili usa ka maayong paagi sa pagpanapi. Akong makita ang mga batan-ong may mga pusil ug nindot nga mga kotse. Mabungkag ang mga pamilya, ang krimen kaylap sa kadalanan, ug daghang giyanon sa droga manglungkab sa mga kotse, mangawat sa mga tindahan, o mangatake sa mga tawo aron makasapi alang sa mga droga. Ang daghan mosugod sa hashish, mouswag ngadto sa ecstacy o ubang mga pildora, ug dayon mosulay sa cocaine o heroina pa. Nakaamgo ako nga ako nalangkit sa pagpasugod sa daghan diha sa maong siklo.

“Samtang nagtuon ko sa Bibliya uban sa mga Saksi ni Jehova, ako dugang ug dugang nakombinsir nga daotan ang akong pagkalangkit sa droga. Buot nakong mabatonan ang hinlong tanlag, ug ang akong asawa, kinsa nagtuon usab, samang nagtinguha niana. Siyempre, lisod ang paghunong sa negosyo sa droga. Gisaysay ko ngadto sa akong mga suki ug sa akong mga tigbaligya nga ako nagtuon sa Bibliya ug mibiya na sa negosyo sa droga. Sa sinugdan, dili gayod sila motuo kanako, ug ang pipila dili pa gihapon motuo. Bisan pa niana, mihunong ako duolag duha ka tuig kanhi, ug wala gayod nako kana basoli bisan sa usa ka gutlo.

“Sulod sa miaging tuig, ako nagtrabaho ingong mason, nga maoy akong kahanas. Sa usa ka bulan ako mokita karon ug un-kuwarto sa akong masapi ingong tigbaligyag droga sa usa ka adlaw. Apan kini mas maayong dalan sa kinabuhi, ug ako mas malipayon.”

Usa ka Tibuok-Yuta nga Solusyon nga Mosaler

Ang pila ka maisogong magpapatigayon mibiya na sa negosyo sa droga. Ug ang nagkalainlaing mga matang sa pagpabag-o nakatabang sa libolibong tiggamit nga mabuntog ang ilang pagkagiyan. Apan, sumala sa giila sa World Drug Report, “alang sa tagdugay, kusog kaayong tiggamit ug droga, ang mapinadayonong paglikay mao ang eksepsiyon inay kasagarang hitabo.” Makapasubo, sa matag giyanon nga mapabag-o, daghang bag-ong mga biktima ang malit-agan. Ang suplay ug panginahanglan padayong nagtubo.

Aron dag-on ang bugno batok sa mga droga, kinahanglang adunay tibuok-yutang solusyon kay ang suliran tibuok-yuta man. Bahin niini ang Komisyon sa Narkotikong mga Droga sa Hiniusang Kanasoran nag-ingon: “Bisan pag ang pag-abuso sa droga, pagpatigayon ug droga ug ang kriminalidad nga konektado sa suliran sa droga gisabot diha sa kadaghanang nasod ingong usa sa pangunang mga kapeligrohan sa kasegurohan, ang publiko wala kaayo masayod nga ang ilegal nga mga droga maoy tibuok-yutang suliran nga dili na masulbad sa nasodnon lamang nga mga singkamot.”

Apan ang mga gobyerno ba sa kalibotan maghugpong aron pagpuo niining tibuok-yutang hampak? Ang mga resulta sa pagkakaron dili makapadasig. Ang Bibliya, hinunoa, nagpunting sa usa ka langitnong gobyerno nga molapas sa nasodnong mga utlanan ingong tino nga solusyon. Ang Bibliya nagpasalig kanato nga ang Gingharian sa Diyos, nga mandoan ni Jesu-Kristo, molungtad “hangtod sa kahangtoran.” (Pinadayag 11:15) Busa, ubos sa Gingharian sa Diyos, ang balaang edukasyon magtino nga ang panginahanglan alang sa mga droga mahanaw. (Isaias 54:13) Ug ang sosyal ug emosyonal nga mga suliran nga karon nagtaganag tabunok nga yuta alang sa pag-abuso sa droga mawala na sa walay kataposan.—Salmo 55:22; 72:12; Miqueas 4:4.

Nagkinahanglan Ka bag Tabang?

Bisan karon, ang paglaom diha sa Gingharian sa Diyos diha sa mga kamot ni Kristo nagtukmod sa mga tawo nga modumili sa droga. Kon buot nimog dugang impormasyon, palihog pagkontak sa mga Saksi ni Jehova diha sa inyong dapit.

[Footnote]

[Hulagway sa panid 11]

Gihimo ang pagpanakop labot sa droga

[Credit Line]

K. Sklute/SuperStock

[Hulagway sa panid 12]

Si Pedro ug iyang asawa, si Ana, nagtuon sa Bibliya uban sa ilang mga anak

[Hulagway sa panid 13]

Si Pedro nag-instalar ug mga kasangkapan sa seguridad