Talagsaong Komperensiya Bahin sa Walay-Dugo nga Pag-opera sa Moscow

MGA KAPULI SA PAG-ABONO SA PAG-OPERA maoy ulohan sa usa ka internasyonal nga medikal nga komperensiya nga gipahigayon sa Moscow, Rusya, niadtong Oktubre 6, 1998. Kapin sa 800 ka doktor ang presente sa Vishnevskij Institute of Surgery alang sa simposyum, nga gipahigayon dungan sa Sixth All-Russian Congress of Anaesthesiologists and Intensive Care Specialists.

Si Propesor Andrey Ivanovich Vorobiev, nga nag-alagad ingong pangulong hematologo sa Russian Academy of Medical Sciences, sa Moscow, nag-abiabi sa mga doktor ngadto sa iyang gitawag nga “kining simposyum nga gitumong sa pagpangitag mga kapuli sa pag-abonog dugo.”

Naghubit kon nganong ang komperensiya hinungdanon, gibatbat ni Vorobiev ang “grabeng mga katalagman sa mga pag-abonog dugo.” Siya miingon nga ingong resulta sa mga pag-abonog dugo, ang kadaghanang batang may hemophilia sa mga nasod sama sa Tinipong Bansa, Hapon, ug Alemanya nag-antos sa AIDS. Dayon, human ihatag ang estadistika sa pagkaylap sa hepatitis pinaagig mga pag-abonog dugo, siya mimulo: “Ang mga estadistika makapahibulong gayod. Halos ang tanang pasyente nga may hemophilia natakboyan ug hepatitis.”

Ang medikal nga opinyon, matod ni Vorobiev, mao nga kon ang usa ka tawo “mawad-ag usa ka litro sa dugo, nan kinahanglang ilisan kini ug usa ka litro nga dugo.” Apan “kana sayop!” siya mipahayag. Sa pagtapos sa iyang pangbukas nga pahayag, siya miingon: “Kita mipaluyo sa pag-abonog dugo, ug karon duyog natong biyaan ang daang panghunahuna.”

Daghan sa mga eksperto sa medisina nga naminaw sa programa naggikan sa Rusya, apan dihay mga mamumulong usab gikan sa Pransiya, Sweden, Belgium, ug sa Tinipong Bansa. Gawas pa sa paghubit sa mga kaugmaran sa pag-atiman sa pagkawala sa dugo pinaagig mga kapuli sa pag-abonog dugo, ang mga doktor nagpadayag sa mga kapeligrohan sa pag-abonog dugo, nga naglakip sa risgo sa dili-maayong mga reaksiyon sa imyunidad.

Pagkobre sa Telebisyon

Ang publikong telebisyon sa Rusya, nga makaabot sa kapin sa 235 ka milyong tawo, nagtaganag maayong paloap nga taho bahin sa komperensiya. Ang moderitor, si Elena Malysheva, nagbatbat: ‘Ang ilado-kaayo ug gibantog sa kalibotan nga mga siruhano, mga anestesiologo, ug mga hematologo duyog nga nagtigom sa Moscow aron tubagon ang usa ka pangutana: Mahimo ba ang pag-opera nga walay pag-abonog dugo?’

Gipahibalo ni Elena ang mga nanan-aw kaniya sa TV bahin sa mga sakit nga mahimong ipasa pinaagi sa dugo ug nagsaysay: “Kanay nag-aghat sa mga doktor nga mangitag solusyon. Ug kini nakaplagan. Gitawag kinig walay-dugo nga pag-opera. Ang matag tawo nga operahanan makahisgot sa mga paagi sa walay-dugo nga pag-opera uban sa iyang doktor.”

Sa paggula ni Andrey Vorobiev sa maong programa sa telebisyon, siya miingon: ‘Ang gidonar nga dugo adunay mga protina nga langyaw sa lawas ug makapahinabog di-matagna ug di-malikayang reaksiyon. Dugang pa, bisan unsa pa kita ka maampingon, ang nagdonar makapatakboy sa pasyente sa mga virus nga iyang gidaladala ug nga dili nato arang madiskitahan.’ Busa siya mihinapos: ‘Kinahanglang atong kunhoran ang pag-abonog gidonar nga dugo ngadto sa mga pasyente.’

Mitambong usab sa programa si Jean-François Baron, pangulo sa anestesiolohiya ug intensive care sa Broussais Hospital, sa Paris, Pransiya. Siya mipatin-aw: “Sa akong institusyon kami naggamag espesyal nga mga likido nga makadalag oksiheno. Kining tanan adunay mga kinaiyahan sa dugo apan walay bisan unsang mga protina sa dugo [nga makapasag sakit]. Sa haduol nga umaabot,” siya mitagna, “kini nga mga sambog gamiton unya sa naandang paagi.”

Kini ang nag-aghat sa moderitor sa programa sa pagsugid bahin sa Rusong propesor nga si Felix F. Beloyartsev, kinsa nagpailaila sa usa ka nagadalag-oksiheno nga likido ingong kapuli sa dugo mga 20 ka tuig kanhi. Siya miingon nga sa maong panahon, ang nadiskobrehan ni Beloyartsev wala dawata sa medikal nga katilingban ug siya “naghikog tungod sa walay-hunong nga paglutos nga gipahinabo niini nga diskobre.”

Pagkobre sa Medikal nga mga Basahon

Ang medikal nga mantalaang Meditsinskaya Gazeta mitaho usab bahin sa komperensiya. “Ang pangunang konklusyon sa Simposyum,” kini nag-ingon, “mahimong ipahayag nga sama sa mosunod: Gikinahanglan ang paggamit sa mga kapuli sa pag-abonog dugo diha sa tanang kahimtang diin kini posible ug mohukom lamang sa paggamit ug dugo human sa mainampingong pagtimbangtimbang sa sukod sa risgo diha sa indibiduwal nga paagi sa matag pasyente ug diha lamang sa nagahulga-sa-kinabuhing mga kahimtang.”

Ang medikal nga mantalaan nagtumong usab sa pagkadili-andam sa pipila ka doktor nga mosunod sa pagdumili sa pasyente sa pagdawat ug dugo. Ang mga Saksi ni Jehova, pananglitan, dili modawat ug mga pag-abonog dugo tungod sa sugo sa Bibliya sa ‘paglikay gikan sa dugo.’ (Buhat 15:28, 29) Ugaling, bahin niining butanga, si Michel de Guillenchmidt, propesor sa balaod nga taga-Pransiya, gikutlo nga miingon:

‘Kita angayng magpasalamat sa mga Saksi ni Jehova tungod kay pinaagi sa pagpatungha niining isyuha, wala lamang nila ipatagad ang ilang kaugalingong mga katungod kondili nagtabang usab sa tibuok medikal nga katilingban sa pagsabot sa mga kapeligrohan sa mga pag-abonog dugo. Kini, sa baylo, magdasig sa mga siyentipiko sa pagpangitag mas abanteng mga metodo sa walay-dugo nga pag-opera.’

Usa sa mga artikulo sa Meditsinskaya Gazeta nagsugod sa pag-ingon: “Gikaingon nga ang pag-abonog dugo nahisamag kaminyoon: Walay usang masayod kon unsay mosunod niana.” Dayon, human hisgoti nga ‘ang tawhanong dugo nahisamag lakra sa tudlo sa tawo—walay duha ka managsamang mga lakra,’ ang mantalaan misukna: “Posible ba karon ang paghatag ug bug-os nga garantiya nga ang pasyente dili matakboyan sa mga impeksiyon ingong resulta sa pag-abono?” Kini mitubag: ‘Bisan sa mga nasod nga nakakab-ot ug dalayegong mga resulta sa medisina, walay epektibong sistema sa pagkontrolar sa mga produkto sa dugo.’

‘Busa, pinasukad sa nagsubwak nga awditoryum ug sa tatawng kaikag sa mga delegado bahin sa mga sulirang gihisgotan,’ ang artikulo mihinapos, ‘ang kausaban sa panghunahuna sa mga doktor nagakahitabo.’

Pagtaganag Usa ka Serbisyo

Sa gawas sa hawanan sa komperensiya, ang mga Saksi ni Jehova nagdumala sa usa ka balongbalong diin ilang gitagan-an ang mga doktor ug hugpong sa mga artikulo gikan sa medikal nga mga mantalaan bahin sa paggamit ug kapuling mga metodo sa pagtambal sa pagkawala sa dugo. Ginatos sa mga doktor ang malipayong midawat niini.

Tin-aw, ang may kasayorang medikal nga mga propesyonal nagauswag ngadto sa paglimite sa paggamit ug dugo diha sa medisina.

[Mga hulagway sa panid 26]

Gitagan-an sa mga Saksi ni Jehova ang ginatos ka doktor ug mga artikulo bahin sa labing ulahing panukiduki bahin sa dugo