Kapitulo 14—Pagkaluwas Ngadto sa Usa ka Bag-ong Yuta
Sa Unsang Paagi ang “Bag-ong mga Langit ug usa ka Bag-ong Yuta” Magsugod
1. (a) Diha sa Bibliya, unsa ang kanunayng gipunting nga “mga langit”? (b) Diha sa ubang mga teksto, unsa ang kahulogan sa “yuta”?
Kon maghisgot ug langit makahunahuna ang mga tawo ug wanang, bulan ug mga bitoon. Gilangkit sa Bibliya ang “mga langit” sa pagmando. (Buhat 7:49) Usahay migamit kini sa ekspresyong “mga langit” nga nagpunting sa Diyos mismo ingong Unibersal nga Soberano. (Daniel 4:26; Mateo 4:17) Bisan ang mga kagamhanan sa tawo gipunting usab nga “mga langit,” tungod kay kini adunay posisyon nga labaw kay sa ilang mga sakop. (2 Pedro 3:7) Sa susama, ang “yuta” sagad nagpasabot sa globo, apan mahimong magpunting usab kini sa tawhanong katilingban. (Genesis 11:1; Salmo 96:1) Ang kasayoran mahitungod niini makatabang kanimo sa pagsabot sa kahulogan sa katingalahang mga saad mahitungod sa “bag-ong mga langit ug usa ka bag-ong yuta.” Ang uban niining mga saara unang natuman sa mga adlaw sa karaang Israel.
‘Managlipay Kamo Tungod sa Gihubat Ko’
2. Nganong gitugotan ni Jehova ang Israel nga mabihag, apan unsay iyang gitagna?
2 Ang nasod sa Israel nailalom sa pakigtugon sa Diyos, nga solemneng miuyon sa pagsunod kaniya. Apan wala sila magpabiling maunongon. Tungod niini, gipahibalo ni Jehova nga iyang kuhaon ang iyang panalipod, nga nagtugot sa Jerusalem nga malaglag ug ang katawhan mabihag sa Babilonya. (Isaias 1:2-4; 39:5-7) Apan siya sa maluloy-on mitagna nga ipasig-uli ang mahinulsolong nanghibilin.—Isaias 43:14, 15; 48:20.
3. Unsay kahulogan sa Isaias 65:17?
3 Tungod sa pagkapiho niini, mihisgot si Jehova mahitungod sa umaabot nga kapasig-ulian ingon nga daw nahitabo na kini, nga nag-ingon: “Ania karon ako nagahimo ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni motungha pa sa kasingkasing. Apan managsadya kamo, ug managlipay sa walay kataposan tungod sa gibuhat ko. Kay ania karon, gihimo ko ang Jerusalem nga usa ka hinungdan sa pagmaya ug ang iyang mga pumoluyo nga usa ka kalipay.” (Isaias 65:17, 18) Nagkahulogan kini ug kaluwasan sa mahinulsolong mga Israelitas.
4. (a) Kanus-a miabot ang gitagnang kaluwasan? (b) Unsay kahulogan balik niadto sa “bag-ong mga langit” ug sa “bag-ong yuta”?
4 Daw imposible kining mga butanga sumala sa tawhanong hunahuna, ang gamhanong Babilonya nahulog sa mga Midianhon ug sa mga Persianhon sa 539 W.K.P. Ang Hudiyo nailalom sa bag-ong kagamhanan, ang “bag-ong mga langit.” Bisan pa nga wala mahimo si Siro nga Hudiyohanong proselita, siya miila nga gitugotan siya ni Jehova nga makabaton ug awtoridad nga iyang naangkon ug nga gisugo siya ni Jehova sa pagtukod pag-usab sa templo sa Jerusalem. (2 Cronicas 36:23; tan-awa ang Isaias 44:28.) Balik sa Jerusalem sa 537 W.K.P., si Gobernador Zerubabel ug ang Hataas nga Saserdote nga si Jesua prominenteng nag-alagad usab nianang kagamhanan sa “bag-ong mga langit,” ug ang napasig-uling nanghibiling Hudiyo maoy naglangkob sa “bag-ong yuta,” usa ka nahinloang katilingban nga nagtukod pag-usab sa putling pagsimba sa yuta.—Esdras 5:1, 1.
5, 6. (a) Unsa ang ebidensiya nga sila tinuod gayod nga nausab na nga mga tawo? (b) Dihang gibadlong sila ni Jehova, sa unsang paagi lahi ang ilang pagsanong kay sa ilang pagsanong sa wala pa sila mabihag?
5 Ingong pamatuod nga sila maoy katawhan nga nausab na sa hunahuna ug sa kasingkasing, kinahanglang maoy ilang unahon ang intereses sa putling pagsimba sa ilang mga kinabuhi, tinuod nga tahuron ang pagkasoberano ni Jehova ug sa pagpatalinghog sa iyang mga propeta. Kaharmoniya niini, lakip sa unang mga butang nga ilang gihimo dihang miabot sila sa Juda mao ang “pagtukod sa halaran sa Diyos sa Israel” ug sa pagtanyag ug mga halad.—Esdras 3:1-6.
6 Dihang ang materyalistikong mga kiling ug kahadlok sa tawo nakababag sa pagkatapos sa pagtukod sa templo, gibadlong ni Jehova ang katawhan pinaagi sa iyang mga propeta, ug sila namati. (Haggeo 1:2, 7, 8, 12; 2:4, 5) Sa ulahi, dihang gipunting ang seryosong kapakyasan sa pagsunod sa mga kinahanglanon sa Kasugoan mahitungod sa kaminyoon, gitul-id sa mga tawo ang ilang mga dalan. (Esdras 10:10-12) Imbes nagbaton ug mga mata nga, sa mahulagwayon, dili makakita ug mga dalunggan nga dili makadungog sa pulong sa Diyos, sila nakasinati ug espirituwal nga pagkaayo ug migamit sa ilang mga katakos sibo sa kabubut-on ni Jehova. (Itandi ang Isaias 6:9, 10 sa 35:5, 6.) Ingong resulta, gipauswag sila ni Jehova sibo sa mga saad nga makita diha sa Isaias 65:20-25.
7. Sa unsang paagi nasayod kita nga adunay dugang katumanan ang tagna ni Isaias?
7 Apan mao ba lamang kana ang tanan alang sa katumanan sa tagna mahitungod sa “bag-ong mga langit ug sa usa ka bag-ong yuta”? Dili gayod. Ang Kristohanong apostol Pedro miingon nga ang unang siglong mga Kristohanon mahinamong naghulat sa dugang nga katumanan. (2 Pedro 3:13) Ang ilang gihulat gihikyad na karon sa atubangan sa atong mga mata. Sa unsang paagi? Sa paagi sa mga hitabo nga nalangkit ang pagpalingkod sa trono sa Dakong Siro, ang gihimayang Jesu-Kristo.
8. (a) Kanus-a gitukod ni Jehova kining “bag-ong mga langit,” ug sa unsang paagi lahi kini gikan sa unang katumanan sa tagna? (b) Sa unsang paagi anam-anam nga napadako ang sakop sa “bag-ong mga langit”?
8 Sumala sa ato nang nakita, sa 1914 nga gihatag ni Jehova nga Diyos diha sa iyang Anak ang awtoridad aron sa pagsugod sa pagmando taliwala sa iyang mga kaaway. Ang dugay nang gihulat nga “bag-ong mga langit” misugod sa paglungtad niadto. Ang nahitabo mas katingalahan kay sa mga hitabo nga nalangkit sa kaluwasan sa karaang Israel. (Salmo 110:2; Daniel 7:13, 14) Ang kagamhanan nga natawo sa 1914 sa tinuod nagmando gikan sa langit mismo, ug gihatagan kini sa Diyos ug awtoridad ibabaw sa tibuok yuta. Ang pagpadako niini nga kagamhanan nahitabo sa ulahi sa pagkabanhaw sa dinihogan sa espiritu nga mga sumusunod ni Kristo (nga nangamatay na) aron mahimong mga hari ug mga saserdote sa langit uban sa ilang Ginoo. Dihang ang ubang mga sakop nianang Gingharian nga matang makatapos sa ilang yutan-ong kinabuhi, sila usab idugang sa nagatubong sakop sa “bag-ong mga langit.” (1 Tesalonica 4:14-17; Pinadayag 14:13) Sa pagkakaron ang kinabag-an sa kaubang mga manununod ni Kristo aktibo karon nianang langitnong Gingharian. Busa, ang inanak sa espiritu nga mga Kristohanon nga makig-uban ni Kristo maoy nagalangkob sa Bag-ong Jerusalem, nga mahitungod niini si Jehova miingon: “Ania karon gihimo ko ang Jerusalem nga usa ka hinungdan sa pagmaya ug ang iyang mga pumoluyo nga usa ka kalipay.”—Isaias 65:18.
9. Unsang “usa ka hinungdan sa kalipay” ang gitukod ni Jehova dinhi sa yuta sa 1919?
9 Dili lamang sa langit kondili sa yuta usab nga nakahatag si Jehova ug “usa ka hinungdan sa kalipay.” Ang nanghibilin sa mga manununod sa Gingharian ania pa sa yutan-ong esena. Sa panahon sa Gubat sa Kalibotan I gipahimuslan sa klero sa Kakristiyanohan ang kagubot sa gubat sa pagpasaka ug bakak nga mga sumbong batok niining mga Estudyante sa Bibliya ug nga maoy hinungdan nga nahukman ug hataas nga mga sentensiya sa pagkabilanggo ang sakop sa ilang Nagamandong Lawas. Apan sa 1919 gipagawas sila, sa aktuwal gipagawas gikan sa pagkabilanggo nga sinulsolan sa Babilonyang Bantogan. Pinaagi sa espiritu ni Jehova nga nagapaluyo kanila, sila nagreorganisar pag-usab ingong katawhan nga bug-os nagapahinungod sa putling pagsimba ug sa mga intereses sa Gingharian sa Diyos.
10. (a) Sa unsang paagi ang mga paglaom sa espirituwal nga mga Israelites lahi niadtong namauling nga mga Hudiyo sa 537 W.K.P.? (b) Unsay gihatag kanila ni Jehova nga ilang buhaton? (c) Sa unsang paagi iyang madagayaong gipanalanginan sila samtang dinhi pa sila sa yuta, ug sa unsang paagi gibatbat sa gikutlong mga kasulatan ang mga kahimtang nga ilang gitagamtam?
10 Apan, ang ilang mga paglaom ug mga ginapaabot lahi niadtong sa mga Hudiyo nga mibalik sa ilang yutang natawhan sa 537 W.K.P. Ang mga sakop sa espirituwal nga Israel nagapaabot ug usa ka panulondon nga “gitipigan didto sa mga langit” alang kanila. (1 Pedro 1:3-5) Apan sa dili pa sila sa aktuwal makadawat niana nga ganti, may buluhatong gihatag ni Jehova kanila nga buhaton. Mahitungod niini, siya sa matagnaon miingon: “Ug ginabutang ko ang akong mga pulong sa imong baba, ug natabonan ko ikaw sa landong sa akong kamot, aron akong mapahamutang ang mga langit ug mapahiluna ang mga patukoranan sa yuta ug magaingon sa Sion, ‘Ikaw mao ang akong katawhan.’” (Isaias 51:16) Iyang gibutang ang iyang “mga pulong,” ang iyang balita, ngadto sa baba sa iyang mga alagad aron ilang iwali sa tibuok yuta. Sa masaligon misugod sila sa pagpahibalo nga lig-ong gipahimutang sa Diyos ang “bag-ong mga langit” nga walay tawo ni mga panulay ang makaluka kanila. Ang paagi sa pag-atiman ni Jehova sa mga hawas sa langitnong Sion dayag nga nagpaila kanila ingong iyang katawhan. Lahi gikan sa biniyaan sa espirituwal ug moral nga kahimtang sa kalibotan, ang “yuta” nga giokupar sa espirituwal nga Israel, ang ilang natad sa kalihokan, nahimong dapit diin ang espirituwal nga mga balor ug mga kalihokan mauswagon. Usa kini ka espirituwal nga paraiso! (Isaias 32:1-4; 35:1-7; 65:13, 14; Salmo 85:1, 8-13) Apan unsay ikasulti mahitungod sa “bag-ong mga langit” nga gitagna sa Isaias 65:17?
Pagpangandam Alang sa “Bag-ong Yuta”
11. (a) Kanus-a ilabina nga nag-andam si Jehova ug umaabot nga mga sakop sa “bag-ong yuta”? (b) Gilandongan sila sa unsa nga katawhan nga migawas sa karaang Babilonya?
11 Nagsugod ilabina sa 1935, gipahinabo ni Jehova nga makakita ang mga sakop sa espirituwal nga Israel nga midangat na ang panahon sa pagtigom sa dakong panon sa katawhan nga may palaabutong kinabuhing walay kataposan sa Paraiso sa yuta. Kon itandi sa “gamayng panon” sa mga manununod sa Gingharian, sila sa tinuod nahimong dakong panon. (Pinadayag 7:9, 10) Sila, usab, giagak ngadto sa espirituwal nga paraiso. Sila gilandongan sa mga dili-Israelinhon nga migawas sa Babilonya uban sa mga Hudiyo sa 537 W.K.P. maingon man niadtong migawas sa ulahi. (Esdras 2:58, 64, 65; 8:17, 20) Kining tanang dakong panon sa modernong adlawng mga saksi ni Jehova nga may yutan-ong paglaom maoy umaabot nga mga sakop sa “bag-ong yuta.”
12. Sa unsang paagi giandam karon ang katawhan aron takos sila nga mahimong patukoranan sa “bag-ong yuta”?
12 Kadtong makalabang buhi sa dakong kasakitan ug nga sa ilang atubangan may palaabuton nga hingpit tawhanong kinabuhi sa aktuwal maoy molangkob sa patukoranan nianang “bagong yuta,” ingong unang mga sakop niana. Kinahanglang malig-on ang patukoranan. Busa, sa pagkakaron sila bug-os nga gitudloan sa mga dalan ni Jehova. Sila gitabangan nga makabaton ug kinasingkasing nga pagsabot sa isyu sa unibersal nga pagkasoberano. Sila nagtuon kon unsa ka bililhon ang “pagsalig kang Jehova sa bug-os nilang kasingkasing ug dili magsalig sa ilang kaugalingong salabotan.” (Proverbio 3:5, 6) Sila may higayon sa pagpamatuod sa ilang kaugalingon nga madasigon ug maunongong mga tigpaluyo sa Gingharian sa Diyos pinaagi sa bug-os nga pakigbahin sa pagsangyaw sa “kining maayong balita sa gingharian” karon. (Mateo 24:14) Sila nagpakasinati kon unsay kahulogan nga mahimong bahin sa tibuok-yutang katilingban nga niana ang katawhan gikan sa tanang kanasoran ug mga pinulongan ug mga rasa nagtinabangay diha sa mahigugmaong panag-igsoonay. (Juan 13:35; Buhat 10:34, 35) Nagapaningkamot ka ba aron bug-os nga makapahimulos niining programaha sa edukasyon? Alang niadtong nagahimo sa ingon, katingalahang mga palaabuton ang anaa sa unahan.
Ang “Bag-ong Yuta” Nahimong Tinuod
13. Sa unsang paagi ang umaabot nga “bag-ong yuta” mas dakong katumanan sa saad ni Jehova kay sa nahitabo sa 537 W.K.P.?
13 Ang kataposan, bug-os nga katumanan sa saad ni Jehova sa pagtukod ug “usa ka bag-ong yuta” mas dako kay sa niadtong nahitabo balik sa 537 W.K.P. Dili lamang kadtong nagalangkob sa “bag-ong yuta” maoy mga tawong nakagawas sa Babilonyang Bantogan, kondili kanang bug-os kalibotang imperyo sa bakak nga relihiyon malaglag sa walay kataposan. (Pinadayag 18:21) Kining matarong tawhanong katilingban—ang “bag-ong yuta”—dili libotan sa mga nasod nga nagayubit kang Jehova ug nagalutos sa iyang mga alagad, sama sa nahitabo sa unang katumanan sa tagna ni Isaias. Ang tanang tawhanong mga kagamhanan, tungod sa ilang pagdumili sa pagpasakop sa pagkasoberano ni Jehova, malaglag, ug ang daotang tawhanong katilingban karon bug-os nga paphaon sa yuta. (Daniel 2:44; Proverbio 2:21, 22) Dihang magsugod ang matarong Bag-ong Kahikayan sa Diyos, ang makapuyo lamang sa planetang Yuta mao kadtong nagahimaya kang Jehova, ug nakakaplag tumang kalipay sa iyang mga dalan.—Salmo 37:8, 9.
14. (a) Kanus-a ang 2 Pedro 3:13 ug Pinadayag 21:1 matuman? (b) Unsay kalainan sa mga kahimtang nga niana magalihok unya ang “bag-ong mga langit”? (c) Kinsa ang malakip sa “bag-ong yuta”?
14 Mao kanang mahimayaong panahon ang gihatagag pagtagad ni apostol Pedro diha sa iyang ikaduhang dinasig nga sulat. (2 Pedro 3:13) Nagpunting sa samang kulbahinam nga palaabuton, gitaho ni apostol Juan ang mga detalye sa pinadayag nga gihatag ngadto kaniya, sa pag-ingon: “Ug unya nakita ko ang bag-ong mga langit ug ang usa ka bag-ong yuta; kay ang unang langit ug ang unang yuta nangahanaw na man, ug ang dagat wala na.” (Pinadayag 21:1) Dihang matapos na ang dakong kasakitan ug si Satanas ug ang iyang mga demonyo itambog na sa bung-aw, usa ka bag-ong panahon ang magsugod. Ang daotang impluwensiya ni Satanas ug sa iyang mga demonyo mangawala. Ang iyang enterong sistema sa mga butang malaglag. Dayon ipakanaog sa “bag-ong langit” ang mahigugmaong katuyoan ni Jehova alang sa iyang mga linalang nga dili na pagasamokon pa sa mga kagamhanan nga nagasalikway sa pagkasoberano ni Jehova. Ilalom nianang “bag-ong langit” adunay usa ka tinuod “bag-ong yuta,” nga langkoban sa “dakong panon” diin ngadto kanila gitanyag sa Diyos ang bililhong palaabutong walay kataposang kinabuhi diha sa tibuok-yutang Paraiso sa katahom, kadagaya, kalipay ug pakigdait. Dihang moabot ang tinudlong panahon sa Diyos aron banhawon ang mga tawong patay, sila usab makabaton ug higayon nga mahimong bahin nianang “bag-ong yuta” nga niini magapuyo ang pagkamatarong.—Pinadayag 20:12, 13.
15. Nganong importante kanimo ang saad sa Pinadayag 21:3, 4?
15 Mahitungod sa palaabuton sa katawhan nga giandam sa Diyos, si apostol Juan nakadungog niining pahayag gikan sa langit: “Tan-awa! Ang puloy-anan sa Diyos anaa uban sa mga tawo, ug siya magapuyo uban kanila, ug sila mahimong iyang katawhan. Ug ang Diyos magauban kanila. Ug iyang pagapahiran ang mga luha gikan sa ilang mga mata, ug ang kamatayon mawala na, ug walay na usab unyay pagminatay, ni paghilak ni kasakit. Kay ang unang mga butang nangagi na.” (Pinadayag 21:3, 4) Pagkamalipayon unya sa kinabuhi!
16. Unsang mga kalaoman sa umaabot ang nakapukaw sa atong mga kasingkasing bahin sa mga saad sa (a) Isaias 11:6-9? (b) Isaias 35:1-7? (c) Isaias 65:20-25? (d) Kinsa ang nagpaposible niining makalilipayng mga palaabuton alang kanato?
16 Ang mga kahimtang nga naglungtad sa Eden ug ang mga milagro nga gihimo ni Jesus naghatag matahom nga mga pasiunang talan-awon kon unsa unya ang kahimtang nianang “bag-ong yuta.” Dugang pa, ang mga bahin sa mga tagna sa Isaias 11:6-9 ug 35:1-7 ug 65:20-25 makakaplag pisikal nga katumanan nianang panahona, sa dakong panalangin sa matinumanong katawhan. Unsa ka makapapresko unya nianang panahona dihang ang hinungdanong mga kahimtang sa espirituwal nga panglawas ug kauswagan matagamtam uban ang pisikal ug mental nga pagkahingpit diha sa usa ka yuta nga sa tanang bahin nahimong Paraiso! Duyog niana nga katingalahang palaabuton sa atong atubangan, atong ipatugbaw ang atong mga tingog sa pagpasalamat kang Jehova, ang Dakong Maglalalang sa tanan!