Yë Jehová tayaʼ pa naʼäy loman naʼän estudiar más

1, 2. a) Si xayaʼ chawäch naʼän na estudiar más, ¿achkë xtkʼatzin ma xtayaʼ ta qa rbʼanik? b) ¿Achkë ntel chë tzij ri tzij «ma q·el ta qa chpan ri bʼey qakʼwan»? (Filipenses 3:16).

YE KʼO jojun rsamajelaʼ Jehová xkiʼän na estudiar más taq xkikʼïs kibásico. Rkʼë jbʼaʼ xkiquʼ chë ya riʼ xkertoʼ rchë xtkïl jun samaj ri xtyaʼ qʼij chkë rchë nkiyaʼ Jehová pa naʼäy chqä rchë nkitzüq kiʼ. Si ayaʼon chik chawäch naʼän na estudiar más, ¿achkë xkatoʼö rchë jnan na xtuʼän awäch rkʼë Jehová? (Sant. 4:8a). Rkʼë jbʼaʼ chkipan ri jnaʼ ri abʼanon pä chik estudiar kʼo xkikʼüt pä kiʼ chawäch ri rkʼë jbʼaʼ xkiʼän ta chë xaqʼäj rtzij Jehová. Rma riʼ, le Biblia nuʼij chë nkʼatzin «ma tqayaʼ ta qa rbʼanik» jontir ri qabʼanon pä kʼa komä rchë nqanmaj rtzij Jehová (taskʼij Filipenses 3:16).

² Pa chʼaʼäl griego, chpan ri tzij «ma tqayaʼ ta qa rbʼanik» kʼo jun verbo ri xksäx rchë xbʼix chë ri soldados jnan wä yebʼä. Rma riʼ, si rït xtaʼän na estudiar más, kʼo chë ma xtayaʼ ta qa ri bʼey ri akʼwan komä chuyaʼik rqʼij Jehová. Chpan re tjonïk reʼ xtqatzjoj kij kajiʼ naʼoj ri ye kʼo chpan le Biblia. Tapeʼ ataman chik chkij re naʼoj reʼ, kan kowan xkatkitoʼ. Achiʼel xaʼän taq xeʼasmajij re naʼoj reʼ ojer, ke riʼ chqä xtkʼatzin xtaʼän komä ke xtaʼän na estudiar más. Y kʼa xtkʼatzin na xtaʼän riʼ taq xtakʼïs ri estudios riʼ.

TATJAʼ AQʼIJ RCHË JNAN NA NUʼÄN AWÄCH RKʼË JEHOVÁ

3. Taq xtaʼän estudiar más, ¿achoq chwäch nkʼatzin nachajij wä awiʼ?

³ ¿Achoq chwäch nkʼatzin nachajij wä awiʼ? Taq xtaʼän estudiar más, kʼo más xtkʼatzin xtaʼän chpan jun qʼij, y rkʼë jbʼaʼ rma riʼ kan ma xtjameʼ ta chik awäch. Qataman chë nawajoʼ yatok jun ütz alumno, ye kʼa si ma xtachajij ta awiʼ, rkʼë jbʼaʼ ma kan ta xtayaʼ chik rqʼij ri ryaʼik rqʼij Jehová. Rkʼë jbʼaʼ ma kan ta xkabʼä chik pa qamoloj, ma kan ta xkatel chik chutzjoxik le Biblia, ma kan ta xtatjoj chik awiʼ chrij le Biblia chqä ma kan ta xtaʼän chik orar (Apoc. 2:4).

4. ¿Achkë rbʼanik nqasmajij ri naʼoj ri nuʼij chë tqayaʼ qan «chrij ri samaj ryaʼon qa ri Qajaw» pa qaqʼaʼ? (1 Corintios 15:58).

⁴ (Taskʼij 1 Corintios 15:58). Rchë yakowin nakʼwaj jun bicicleta, nkʼatzin nasloj ri pedales. Ke riʼ chqä röj, si nqajoʼ nqakʼwaj jun ütz kʼaslemal, nkʼatzin nqayaʼ qan «chrij ri samaj ryaʼon qa ri Qajaw» pa qaqʼaʼ. ¿Achkë rbʼanik nasmajij ri naʼoj riʼ? Ma tamestaj ta chë tapeʼ nkʼatzin najäm awäch rchë naʼän ri nrajoʼ Jehová, ri más nkʼatzin ya riʼ chë jontir riʼ njeʼ más rqʼij chawäch chpan akʼaslemal. Tnatäj chawä chë ri nayaʼ rqʼij Jehová ya riʼ más rqʼij y ma yë ta ri estudios (Mat. 22:37). Jun qachʼalal qʼopoj ri Samantha rbʼiʼ nuʼij: «Xinyaʼ chi nwäch chë si jun qʼij ri westudios ma nkiyaʼ ta chik qʼij chwä nyaʼ rqʼij Jehová, ri qʼij riʼ xtinyaʼ qa westudios».

5. ¿Achkë ütz naʼän rchë chrij ri nrajoʼ Jehová xtayaʼ wä awan?

⁵ ¿Achkë ütz naʼän apü taq majanä tachäp awestudios? Ma tamestaj ta achkë kʼo más rqʼij. Taquʼ rij reʼ: «¿Ntaman chik achkë xtinbʼän rchë xkibʼä na pa qamoloj, rchë xkinel na chutzjoxik le Biblia chqä rchë xtintjoj na wiʼ chrij le Biblia?» (Jos. 1:8; Mat. 28:19, 20; Heb. 10:25). Chqä ütz kʼo natamaj qa chrij ri xaqʼaxaj ojer. Taquʼ rij reʼ: «¿Achkë xinbʼän rchë yë ri ryaʼik rqʼij Dios xinyaʼ naʼäy pa nkʼaslemal taq xibʼä pan escuela? ¿Kʼo jun ri xinbʼän ri nwajoʼ ta jun chik rbʼanik xinbʼän che rä? ¿Achkë ütz nbʼän komä rchë más ütz rbʼanik nbʼän che rä?». Tayaʼ chawäch naʼän ri nrajoʼ Jehová loman xtaʼän na estudiar más. Tatjaʼ aqʼij rchë yatok jun ütz alumno, ye kʼa ma tayaʼ ta qʼij chë ya riʼ nbʼanö chë ma jnan ta chik nuʼän awäch rkʼë Jehová (Mat. 6:24).a

6. ¿Achkë ütz naquʼ rij rchë natzʼët si kʼa yë na Jehová ayaʼon naʼäy pan akʼaslemal? (Tatzʼetaʼ chqä ri achbʼäl).

⁶ Taq xtachäp awestudios, chaq taqïl tatzʼetaʼ achkë rbʼanik yït bʼenäq. Rkʼë jbʼaʼ jmul pa jun ikʼ ütz naquʼ rij reʼ: «¿Kʼa yë na ryaʼik rqʼij Jehová kʼo más rqʼij chi nwäch?». Chaq taqïl tatzʼetaʼ si ma ye kʼo ta naʼoj awkʼë ri nkikʼüt chë rkʼë jbʼaʼ ma ke riʼ ta chik. Ütz naquʼ reʼ: «¿Najin nkʼuluj chwä ma yibʼä ta chik pa qamoloj o kʼa rnaj yinapon? Taq yïn kʼo pa moloj, ¿xa ndeberes najin nquʼ kij o xa xuʼ pa videollamada yijeʼ wä qa?». Ütz naquʼ chqä rij reʼ: «¿Najin nbʼän orar o nskʼij nBiblia menos chwäch rbʼanon qa? ¿Yibʼä chutzjoxik le Biblia xa rma ya riʼ nkʼatzin nbʼän, y rma riʼ nwajoʼ chë nkʼis yän?». Si kʼo jojun chkë reʼ ri najin nbʼanatäj awkʼë, kan chanin takanuj rbʼanik rchë najäl ri naʼoj riʼ. Ma tayaʼ ta qʼij chë awestudios nkiʼän chë ma yë ta chik ri nrajoʼ Jehová nayaʼ naʼäy pan akʼaslemal.

TACHAJIJ RI ACHKË YEʼAQUʼ

7. ¿Achkë naʼoj nkʼatzin nachajij awiʼ chkiwäch loman najin naʼän estudiar?

⁷ ¿Achoq chwäch nkʼatzin nachajij wä awiʼ? Ye kʼo jojun estudios rkʼë jbʼaʼ nkikʼüt «naʼoj ri xa ye tzʼukun», achiʼel ri ateísmo o ri evolución (Col. 2:8). O rkʼë jbʼaʼ nkiʼän chë xa chawij chik rït nakʼuqbʼaʼ wä qa akʼuʼx. Jun qachʼalal kʼajol nuʼij: «Ma xa xuʼ ta xkikʼüt chqawäch achkë rbʼanik naʼän jun samaj, xa kan xkijuʼ jojun naʼoj pa qajolon ri ma rkʼwan ta riʼ rkʼë rnaʼoj Jehová. Chaq taqïl wä nkiʼij chqë chë xa xuʼ röj nqkowin nqbʼanö chë kiʼ qakʼuʼx xtqaʼän. Ya riʼ xuʼän chë xinquʼ chë ma nkʼatzin ta wä chik rtoʼik Jehová chwä rchë kiʼ nkʼuʼx nbʼän chqä xuʼän chë ma kan ta xinkʼuqbʼaʼ chik nkʼuʼx chrij».

8. ¿Achkë rma kan nkʼatzin nachajij ri yeʼaquʼ? (Proverbios 5:1, 2).

⁸ (Taskʼij Proverbios 5:1, 2). Le Biblia nuʼij chë nkʼatzin nachajij ri yeʼaquʼ. Kan ronojel bʼaʼ mul nqachajij jun ri kʼo nrajoʼ ntzʼil·ö rchë. Y ya riʼ najin nuʼän Satanás chqä ri rwinaq rkʼë ri yeʼaquʼ (1 Ped. 5:8). Ri nkiquʼ ri winäq chrij ri ütz chqä ri ma ütz ta, ri rbʼanik xtzʼuktäj pa ri kʼaslemal chqä ri majun ta jun Dios, rkʼë jbʼaʼ xtuʼän chë ma xtanmaj ta chik ri ataman pä. Ri winäq rkʼë jbʼaʼ xtkiʼij chë ri naʼoj kʼo kikʼë ryeʼ kan más na qʼaxnäq, ye kʼa ma ke riʼ ta, rma le Biblia nuʼij chë chwäch Dios «ri naʼoj ri kʼo chwäch le Rwachʼlew xa majun ta kiqʼij» (1 Cor. 3:18-20).

9. ¿Achkë ütz naʼän rchë nachajij ri yeʼaquʼ?

⁹ ¿Achkë ütz naʼän apü taq majanä tachäp awestudios? Rchë nachajij ri yeʼaquʼ, nkʼatzin nayaʼ chwäch awan chë kantzij jontir ri nanmaj. Rma riʼ taq majanä tachäp awestudios, ütz naquʼ rij reʼ: «¿Achkë rma nnmaj chë kʼo Dios? ¿Achkë rma nyaʼon chwäch wan chë le Biblia ya riʼ Rchʼaʼäl? ¿Achkë rma nnmaj chë ri nuʼij le Biblia chrij ri ütz chqä ri ma ütz ta kʼo más rqʼij chwäch ri nkikʼüt ri winäq?». Chqä ütz naquʼ achkë xbʼanatäj awkʼë taq xajeʼ pan escuela. Taquʼ reʼ: «¿Xa kaʼiʼ nkʼuʼx xinbʼän chrij Dios taq xtzjöx chrij ri evolución? ¿Xinrayij xinbʼän jojun ri ma ütz ta ri xkiʼän wachiʼil? ¿Kʼo jun ri xinbʼän ri nwajoʼ ta jun chik rbʼanik xinbʼän che rä? ¿Achkë ütz nbʼän komä rchë nyaʼ más chwäch wan chë ri nuʼij le Biblia ya riʼ ri más ütz?». Tayaʼ chwäch awan nachajij ri yeʼaquʼ loman najin naʼän estudiar (2 Tim. 2:16-18).b

10. ¿Achkë ütz naʼän rchë ronojel mul nachajij ri yeʼaquʼ?

¹⁰ Taq xtachäp awestudios, chaq taqïl tatzʼetaʼ achkë rbʼanik yït bʼenäq. Taquʼ rij reʼ: «¿Kʼa itzel na ntzʼët ri ma ütz ta rbʼanik kʼaslemal kikʼwan ri winäq? ¿Yikowin ntzʼët taq xa tzʼukün taq naʼoj najin nkikʼüt chi nwäch? ¿Kan nyaʼon chwäch wan chë xa xuʼ Rqʼatbʼäl Tzij Dios nkowin nusöl jontir ri kʼayewal?». Rchë chë awachiʼil chqä amaestros ma nkijäl ta ri yeʼaquʼ, nkʼatzin ronojel mul natjoj awiʼ chrij le Biblia chqä naquʼ rij ri naskʼij. Si ma nawajoʼ ta nuʼän kaʼiʼ akʼuʼx, chaq taqïl nkʼatzin natjoj awiʼ chrij Rchʼaʼäl Dios (1 Tim. 4:15).

ÜTZ RKSAXIK TABʼANAʼ CHE RÄ ATIEMPO

11. Loman najin naʼän estudiar ¿achkë xtkʼatzin xtaʼän rkʼë atiempo?

¹¹ ¿Achoq chwäch nkʼatzin nachajij wä awiʼ? Ri estudios xtachäp kan kʼïy atiempo xtkimäj, y más taq xtpë ri exámenes o taq xtkʼatzin xtajäch jun adeber. Si ma xkakowin ta pa rbʼeyal xtaksaj atiempo ya riʼ xtuʼän chawä chë xtaʼän estresar awiʼ y xtikʼo akʼuʼx. Rma riʼ kowan xtkʼatzin xtaʼän ri najowatäj rchë ma xtpë ta ayabʼil.

12. ¿Achkë jojun rbʼanik xtkʼatzin xtaksaj atiempo? (Efesios 5:15, 16).

¹² (Taskʼij Efesios 5:15, 16). Rchë kan pa rbʼeyal naksaj atiempo nkʼatzin natzʼët akuchï naksaj wä. Ya riʼ ma chaq bʼaʼ ta xtuʼän chawäch rma kan kʼo kʼïy ri xtkʼatzin xtaʼän. Tapeʼ xtkʼatzin xtajäm awäch rchë xtaʼän estudiar, xtkʼatzin chqä xtajäm awäch rchë xkajeʼ rkʼë afamilia chqä kikʼë ri qachʼalal pa congregación (Sal. 133:1; Prov. 18:1). Ye kʼa ri más rqʼij ya riʼ xtaʼän ri nkʼatzin rchë xtayaʼ Jehová naʼäy pan akʼaslemal (Mat. 6:33). Chqä rkʼë jbʼaʼ kʼo jojun xtkʼatzin xtaʼän pan afamilia o rkʼë jbʼaʼ kʼo asamaj. Y ma tamestaj ta chë ri xtaʼän ejercicio y xkawär ri horas ri nkʼatzin xkaturtoʼ rchë ma kan ta xkayawäj (Ecl. 4:6; 1 Tim. 4:8). Rchë xkakowin xtaʼän jontir reʼ nkʼatzin ütz rksaxik naʼän che rä atiempo.

13. ¿Achkë xtkʼatzin xtaʼän rchë ütz rbʼanik xtaksaj atiempo?

¹³ ¿Achkë ütz naʼän apü taq majanä tachäp awestudios? Le Biblia nuʼij chë ri winäq ri nuchʼöbʼ na achkë nuʼän, ronojel ütz xttel apü chwäch (Prov. 21:5). Rma riʼ, taq majanä tachäp awestudios, tatzʼetaʼ achkë xkakowin xtaʼän rkʼë atiempo. Taquʼ rij reʼ: «¿Ütz rksaxik xinbʼän che rä ntiempo taq xijeʼ pan escuela? ¿Kʼo jun ri xinbʼän ri nwajoʼ ta jun chik rbʼanik xinbʼän che rä? ¿Achkë ütz nbʼän komä rchë más ütz rbʼanik nbʼän che rä?». Ütz rksaxik atiempo tabʼanaʼ ke riʼ ma yë ta atiempo xtbʼin chawä achkë kʼo chë xtaʼän.c

14. ¿Achkë kʼutunïk ütz naquʼ kij?

¹⁴ Taq xtachäp awestudios, chaq taqïl tatzʼetaʼ achkë rbʼanik yït bʼenäq. Taquʼ rij reʼ: «Ri horario ri nbʼanon, ¿nuyaʼ qʼij chwä rchë nbʼän ejercicio, yiwär ri horas ri nkʼatzin chqä yijeʼ kikʼë qachʼalal pa congregación? ¿Yikowin njäch ndeberes? Si ma ke riʼ ta, ¿xa rma komä kan kʼïy nbʼän, o xa rma kʼa pa rkʼisbʼäl nyaʼ wä qa jontir? ¿Nkiquʼ komä wamigos chqä nfamilia chë kʼo nkʼatzin njäl?». Si natzʼët chë kʼo nkʼatzin najäl chpan ahorario o kʼo ayaʼon chpan ri ma abʼanon ta, kan tabʼanaʼ riʼ. Chqä ütz nakʼutuj anaʼoj chkë ri atzʼeton rït chë kan ütz rksaxik nkiʼän che rä kitiempo (Prov. 11:14).

KAJEʼ KIKʼË WINÄQ RI KʼO KINAʼOJ

15. Loman najin naʼän estudiar, ¿achoq chwäch nkʼatzin nachajij wä awiʼ?

¹⁵ ¿Achoq chwäch nkʼatzin nachajij wä awiʼ? Loman najin naʼän estudiar, rkʼë jbʼaʼ awachiʼil yatkiʼän invitar rchë yabʼä kikʼë taq xikʼïs yän ri clases y rït rkʼë jbʼaʼ kan nawajoʼ yabʼä kikʼë. Rma kan kʼïy tiempo yixjeʼ pa clase, kʼo kʼïy ri jnan nqä chiwäch. Y rkʼë jbʼaʼ naquʼ chë kʼo más kʼïy yakowin naʼän kikʼë ryeʼ chwäch kikʼë jojun qachʼalal pa congregación. Ye kʼa nkʼatzin nachajij awiʼ. Rma tapeʼ jnan yixjeʼ pa clase ma jnan ta anaʼoj kikʼë. Y si xkajeʼ más tiempo kikʼë, xa xtakʼän apü kinaʼoj (1 Cor. 15:33). Ya riʼ xbʼanatäj rkʼë Michael, ri kajiʼ jnaʼ xuʼän estudiar chqä xuʼän rpráctica rchë ntok electricista. Ryä nuʼij: «Rma xijeʼ más 40 horas pa jun semana kikʼë wachiʼil, taq xqʼax ri tiempo ma itzel ta chik xintzʼët che rä rbʼanik yekitzʼët ri ixoqiʼ, ri música yekikʼoxaj chqä ri itzel taq tzij yekiʼij».

16. ¿Achkë naʼoj nqatamaj chpan Proverbios 13:20?

¹⁶ (Taskʼij Proverbios 13:20). Le Biblia nuʼij achkë kʼayewal nqïl si ma ütz ta qachiʼil yejeʼ. Chqä nuʼij reʼ: «Ri yerachbʼilaj ajnaʼoj taq winäq xttok jun ajnaʼoj winäq». ¿Achkë naʼoj nqatamaj qa? Chë kan xtqakʼän ri ütz chqä ri ma ütz ta kinaʼoj ri winäq achoq kikʼë xtqjeʼ wä. Rma riʼ kajeʼ kikʼë winäq ri nkajoʼ chë ütz yabʼä pan akʼaslemal chqä nkajoʼ Jehová rkʼë ronojel kan achiʼel rït (Sal. 101:6, 7; 119:63).

17. ¿Achkë ütz naʼän rchë ma yajeʼ ta kikʼë winäq ri ma nkiyaʼ ta rqʼij Jehová?

¹⁷ ¿Achkë ütz naʼän apü taq majanä tachäp awestudios? Tatzʼetaʼ jaruʼ tiempo xkajeʼ kikʼë awachiʼil rchë estudio. Jun Testigo ri Trenton rbʼiʼ nuʼij: «Ütz nkʼwaj wiʼ kikʼë jontir, pero taq nkʼis ri clases ma yijeʼ ta chik kikʼë. Ryeʼ ma ye wamigos ta, xa xuʼ ye wachiʼil rchë estudio». ¿Y rït? ¿Achkë xtaʼän rchë ma xkajeʼ ta kʼïy tiempo kikʼë awachiʼil rchë estudio? Taquʼ rij reʼ: «¿Achkë xinbʼän rchë ma kan ta kʼïy tiempo xijeʼ kikʼë wachiʼil pan escuela? ¿Kʼo jun ri xinbʼän ri nwajoʼ ta jun chik rbʼanik xinbʼän che rä? ¿Achkë ütz nbʼän komä rchë más ütz rbʼanik nbʼän che rä?». Tayaʼ chawäch yajeʼ kikʼë winäq ri kʼo kinaʼoj y ma kajeʼ ta kikʼë winäq ri ma nkiyaʼ ta rqʼij Jehová.d

18. ¿Achkë ütz naquʼ rij? (Tatzʼetaʼ chqä ri achbʼäl).

¹⁸ Chaq taqïl tatzʼetaʼ achkë rbʼanik yït bʼenäq. Taquʼ rij reʼ: «¿Xa más jnan najin nuʼän nwäch kikʼë wachiʼil rchë estudio? ¿Najin nkʼän apü rbʼanik yetzjon, ri rbʼanik yequʼü chqä ri nkiʼän? ¿Xtuʼij komä Jehová chë kantzij ri respuestas najin nyaʼ?» (Sal. 1:1). Si natzʼët chë xa najin nakʼän apü anaʼoj chkij, kan chanin tajalaʼ ri najin naʼän. Tatjaʼ aqʼij chë ri awamigos ri ye kʼo nkajoʼ chqä Jehová achiʼel rït. Y ma tamestaj ta chë ütz natzjoj le Biblia kikʼë awachiʼil rchë estudio. Rma kitaman awäch chqä kʼïy tiempo yajeʼ kikʼë, rït yakowin natzjoj chrij Jehová chkë.

TABʼANAʼ APÜ RI ACHKË NKʼATZIN

19. Taq majanä tachäp awestudios, ¿achkë nkʼatzin naʼän apü rchë yaqʼax chkiwäch ri kʼayewal ri rkʼë jbʼaʼ xkeʼawïl? Tayaʼ jun ejemplo.

¹⁹ Jun winäq ri nqä chwäch nbʼä pa taq kʼechelaj kʼo nkʼatzin nuʼän taq majanä tchäp bʼey. Jojun chkë riʼ ya riʼ nuʼän ejercicio, nuksaj äl tzyäq ri xttoʼ pa kʼechelaj y nuchʼöbʼ akuchï nrajoʼ nbʼä wä. Tapeʼ ma rtaman ta achkë xtbʼanatäj pa bʼey, jontir ri rbʼanon äl kan xttoʼ rchë xtapon akuchï rchʼobʼon wä. Ke riʼ chqä nkʼatzin naʼän rkʼë awestudio. Tabʼanaʼ ri nkʼatzin rchë jnan nuʼän awäch rkʼë Jehová. Taksaj «jontir samajbʼäl rchë chʼaʼoj ri petenäq rkʼë Dios» y tayaʼ pan ajolon chë ma xtaʼän ta estudiar rchë xkabʼeyomär o rchë xtjeʼ aqʼij chkiwäch ri winäq, xa kan rchë xtyaʼöx rqʼij Jehová rkʼë ronojel ri xtaʼän (Efes. 6:11-13; 1 Cor. 9:26, 27; 10:31).

20. ¿Achkë rbʼanik xtasmajij ri naʼoj kʼo chpan 2 Corintios 13:5?

²⁰ Le Biblia nuyaʼ re naʼoj reʼ chqë: «Chaq taqïl titzʼetaʼ qa iwiʼ rchë nitzʼët we ikʼwan ikʼaslemal achiʼel nuʼij ri Rchʼaʼäl Dios. Chaq taqïl titzʼetaʼ achkë inaʼoj najin nikʼüt» (2 Cor. 13:5). ¿Achkë rbʼanik yakowin nasmajij re naʼoj reʼ loman najin naʼän estudiar? Chaq taqïl tatzʼetaʼ achkë rbʼanik yït bʼenäq kikʼë ri kajiʼ naʼoj ri xqatzjoj chpan re tjonïk reʼ. ¿Najin naʼän ri nkʼatzin rchë jnan nuʼän awäch rkʼë Jehová? ¿Najin nachajij ri yeʼaquʼ rchë ma nakʼän ta apü kinaʼoj ri winäq? ¿Ütz rksaxik najin naʼän che rä atiempo? ¿Najin yeʼakanuj awamigos pa congregación pa rkʼexel akuchï naʼän wä estudiar? Ronojel mul ütz naquʼ kij re kʼutunïk reʼ taq yït kʼo pan escuela, pan asamaj o xa bʼa akuchï yït kʼo wä. Xa bʼa achkë xtaqʼaxaj, tabʼanaʼ jontir ri nkʼatzin rchë jnan nuʼän awäch rkʼë Jehová. Tayaʼ chwäch awan chë Jehová ronojel mul xtyaʼ rtzil pan awiʼ rma ri xtaʼän (Prov. 3:5, 6).