Kaʼiʼ qachʼalal ri kʼa xeʼok chpan ri Molaj Ukʼwäy Bʼey

PA 5 DE OCTUBRE RCHË 2024, xyaʼöx jun rtzjol chpan ri moloj rchë ri jnaʼ riʼ: ri qachʼalal Jody Jedele chqä Jacob Rumph xeʼok jun chkë ri Molaj Ukʼwäy Bʼey kichë ri Testigos de Jehová. Ryeʼ kan kʼïy chik jnaʼ kiyaʼon pä rqʼij Jehová.

Ri qachʼalal Jody xaläx Misuri (Estados Unidos). Ri rteʼ rtat ya riʼ xekʼutü chwäch chrij Jehová. Rfamilia ye kʼo wä chpan jun tinamït akuchï xa ye jbʼaʼ ok testigos de Jehová ye kʼo. Rma riʼ xtamaj kiwäch ye kʼïy qachʼalal ri xeʼapon chpan ri tinamït riʼ rchë xetoʼon chutzjoxik le Biblia. Kan xel rkʼuʼx taq xtzʼët chë rtinamit Jehová kan jnan rbʼanon kiwäch chqä kowan nkajoʼ kiʼ. Ryä xqasäx pa yaʼ ri 15 de octubre rchë 1983 chqä kan nqä wä chwäch nutzjoj le Biblia. Rma riʼ, taq xkʼïs restudios pan escuela, pa septiembre rchë 1989 xok precursor regular.

Taq ryä chqä ranaʼ kʼa ye koköj na, yekʼwäx wä pa Betel rma kiteʼ kitat. Ya riʼ xbʼanö chkë chë xkajoʼ xesamäj chriʼ. Y kan ke riʼ xbʼanatäj. Pa septiembre rchë 1990, ryä xok pa Betel ri kʼo Wallkill. Naʼäy xsamäj pa Departamento rchë Limpieza y chrij riʼ pa Servicios Médicos.

Chpan ri tiempo riʼ, chunaqaj Betel ye kʼo wä jojun congregaciones ri yetzjon pa kaxlän chqä najin wä yekʼiyär, y rma riʼ yekʼatzin wä más qachʼalal achiʼaʼ rchë yetoʼon chriʼ. Ri qachʼalal Jody xbʼä chpan jun chkë ri congregaciones riʼ chqä xchäp xtjoj riʼ rchë ntzjon pa kaxlän. Jbʼaʼ chrij riʼ, xtamaj rwäch jun precursora ri kʼo pa rcircuito ri Dámaris rbʼiʼ. Taq xqʼax ri tiempo xekʼleʼ y ya Dámaris xok chqä pa Betel.

Pa 2005 xeʼel äl pa Betel rchë xkibʼechajij rteʼ Jody chqä rchë xkibʼechajij rteʼ rtat ya Dámaris. Chpan ri tiempo riʼ, ryeʼ xeʼok precursores regulares, y Jody kan kʼïy mul xok instructor chpan ri Escuela del Servicio de Precursor. Chqä xsamäj chpan ri Comité de Enlace con los Hospitales y chpan ri Comité Regional de Construcción ri nkitzʼët wä jontir ri achkë nbʼan akuchï ye kʼo wä.

Pa 2013, xeskʼïx chik jmul pa Betel, ye kʼa komä rchë xetoʼon chkiyakik jay chlaʼ Warwick. Chqä yetoʼonäq pä rkʼë ri samaj yebʼan Patterson chqä Wallkill. Ri qachʼalal Jody samajnäq pa Departamento Local de Diseño y Construcción y pa Servicios de Información sobre Hospitales. Pa marzo rchë 2023 xok jun chkë ri ntoʼö ri Comité rchë Servicio. Ryä nuʼij ya reʼ chrij ri samaj yerbʼanon pä: «Kʼo mul naxiʼij jbʼaʼ awiʼ taq nyaʼöx jun samaj pan aqʼaʼ ri ma abʼanon ta. Ya riʼ taq nkʼatzin nnatäj chqë chë nkʼatzin nqakʼuqbʼaʼ qakʼuʼx chrij Jehová, rma yë ryä nbʼanö chë nbʼanatäj ri nrajoʼ».

Ri qachʼalal Jacob xaläx chlaʼ California (Estados Unidos). Taq ryä kʼa koʼöl na, rteʼ ma nbʼä ta wä chik pa qamoloj chqä chutzjoxik le Biblia. Tapeʼ ke riʼ, rteʼ xtäj rqʼij rchë xkʼüt chwäch ri naʼoj ye kʼo chpan le Biblia. Ronojel jnaʼ, Jacob nbʼä wä chutzʼetik ratiʼt, ri kowan wä nrajoʼ Jehová. Ratiʼt kowan xtoʼ rchë xrajoʼ xtamaj más chrij Jehová. Rma riʼ taq kʼo wä 13 rjnaʼ, xkʼutuj jun rtjonik chrij le Biblia. Ri 27 de septiembre rchë 1992 xqasäx pa yaʼ taq kʼa kʼajol na. Chqä, rteʼ xtzolin chik jmul pa rtinamit Jehová, y jontir rfamilia xkiʼän progresar chqä xeqasäx pa yaʼ.

Taq ri qachʼalal Jacob kʼa kʼajol na, xtzʼët chë ri precursores kan kiʼ kikʼuʼx. Rma riʼ, kan xa xuʼ xkʼïs restudios pan escuela, pa septiembre rchë 1995 xok precursor. Pa 2000 xbʼä Ecuador rchë xtoʼon chpan jun tinamït akuchï nkʼatzin toʼïk rchë ntzjöx le Biblia. Chriʼ xtamaj rwäch jun precursora aj Canadá ri Inga rbʼiʼ, y taq xqʼax ri tiempo xekʼleʼ. Taq kʼa riʼ jbʼaʼ kekʼleʼ qa, ryeʼ xetoʼon chpan jun koʼöl tinamït ri kʼo Ecuador ri akuchï kʼo jun grupo publicadores. Pa qaqʼij komä, ri grupo riʼ jun congregación chik.

Taq xqʼax ri tiempo, ryeʼ xbʼix chkë chë xkeʼok precursores especiales, y chrij riʼ xetaq rchë xekibʼechʼaʼej ri congregaciones. Pa 2011 xebʼan invitar chpan ri clase 132 rchë xkikʼül ri tjonïk ri Galaad rbʼiʼ. Taq xkiʼän graduar kiʼ, xetaq chpan jalajöj tinamït. Ryeʼ xeʼok betelitas, misioneros chqä xekibʼechʼaʼej ri congregaciones. Ri qachʼalal Jacob xok chqä instructor chpan ri Escuela para Evangelizadores del Reino.

Rma ri COVID-19, ryeʼ xetzolin Estados Unidos. Xeskʼïx pa Betel ri kʼo Wallkill, ri akuchï qachʼalal Jacob xtjöx chpan ri Departamento rchë Servicio. Chrij riʼ xetaq pa sucursal ri kʼo Ecuador, y ryä xok jun chkë ri Comité rchë Sucursal. Pa 2023, xeqʼaxäx Warwick, y pa enero rchë 2024, ri qachʼalal Jacob xok jun chkë ri ntoʼö ri Comité rchë Servicio. Ryä xuʼij ya reʼ chrij jontir ri tinamït akuchï xjeʼ wä: «Ri kʼo más rqʼij ma ya riʼ ta akuchï nqayaʼ wä rqʼij Jehová, xa yë ri achoq kikʼë nqayaʼ wä rqʼij: kikʼë qachʼalal».

Kan kowan nqatyoxij ri samaj nkiʼän ri qachʼalal riʼ chqä kowan yeqaloqʼoqʼej (Filip. 2:29).