¿Rmak komä ri päq jontir ri ma ütz ta nqaqʼaxaj pa qakʼaslemal?

Ri nuʼij le Biblia

Manä. Le Biblia ma nuʼij ta chë ri päq ma ütz ta. Chqä ma yë ta ri päq nbʼanö chë jontir ri ma ütz ta yebʼanatäj. Kʼo nkʼaj ke reʼ nkiʼij: «Kan yë ri päq nbʼanö rchë jontir ri ma ütz ta yebʼanatäj». Ri winäq nkiquʼ chë re tzij reʼ kan chpan le Biblia lenäq wä pä. Ye kʼa, ¿kantzij komä riʼ? Ma kan ta ke riʼ nuʼij. Le Biblia kan ya reʼ nuʼij: «Ri xa chrij päq nbʼä wä awan xa ryon kʼayewal nukʼäm pä pan awiʼ»a (1 Timoteo 6:10).

¿Achkë nuʼij le Biblia chrij ri päq?

Le Biblia nuʼij chë we ütz nqaʼän che rä rksaxik ri päq, ya riʼ kan xtqrtoʼ (Eclesiastés 7:12). Chqä kan ütz ntzjon chkij ri winäq ri yespan chqä yekitoʼ ri nkʼaj chik (Proverbios 11:25).

Ye kʼa kʼo chë nqaʼän kwent qiʼ. Le Biblia nuʼij chë ma yë ta ri päq kʼo más rqʼij chpan qakʼaslemal. Hebreos 13:5 nuʼij: «Tikʼutuʼ rkʼë ikʼaslemal chë ma chrij ta ri päq bʼenäq wä iwan, chqä kiʼ ikʼuʼx tibʼanaʼ rkʼë ri kʼo iwkʼë». ¿Achkë nqatamaj qa? Ri päq kan nkʼatzin chqë, ye kʼa ma ya riʼ ta tqayaʼ más rqʼij. Kan kiʼ qakʼuʼx tqabʼanaʼ rkʼë ri kʼo qkʼë, ri kan achkë xtkʼatzin chqë: qaway, qatzyaq, chqä jun qachoch (1 Timoteo 6:8).

**¿Achkë rma kan kʼayewal xtuʼän chawäch we nbʼä awan chrij ri päq?**

Ri winäq ri kowan yejakʼäkʼ ma xtyaʼöx ta ri kʼaslemal chkë ri majun bʼëy xtkʼis ta (Efesios 5:5). Naʼäy, rma ri kowan yerayin xa jnan rkʼë ri nayaʼ kiqʼij tyox (Colosenses 3:5). Rkaʼn, ri winäq kowan yejakʼäkʼ rchë nkïl ri nkajoʼ, kʼo ma ütz ta nkiʼän. Chqä Proverbios 28:20 nuʼij: «Ye kʼa ri kan chanin nrajoʼ nbʼeyomär kan kʼo itzelal xkeruʼän». Rkʼë jbʼaʼ nkikanuj rbʼanik rchë yeleqʼan, nkixiʼij jun winäq rchë nkesaj päq che rä o rkʼë jbʼaʼ xketoʼon rchë nbʼan jun secuestro o nkikamsaj jun winäq.

Tapeʼ ma xtqaʼän ta ya reʼ, ri kowan xtqajoʼ ri päq kʼo ma ütz ta xtkäm pä pa qawiʼ. Le Biblia nuʼij: «Ye kʼa ri kiyaʼon chwäch kan yeʼok bʼeyomaʼ xkepë itzel taq raynïk pa kan chqä xkeqä chkipan ri itzel taq raynïk riʼ» (1 Timoteo 6:9).

Ri utzil xtkäm pä ri nanmaj achkë nuʼij le Biblia

Taq ronojel mul nqanmaj ri nuʼij pä Dios chqä ma nqaʼän ta ri ma ütz ta rchë nqïl päq, kan kiʼ qakʼuʼx xtqaʼän. We röj nqatäj qaqʼij rchë nqanmaj rtzij Dios, ryä nuʼij chqë: «Majun bʼëy xkatinyaʼ ta qa chqä majun bʼëy xkatinmestaj ta qa» (Hebreos 13:5, 6). Ya reʼ nuʼij chqä: «Ri winäq ri jïk rkʼaslemal xtyaʼöx kʼïy utzil pa rwiʼ» (Proverbios 28:20).

Ri naʼoj nyaʼ le Biblia chrij ri päq

Eclesiastés 7:12: «Ri njeʼ anaʼoj kan jnan jbʼaʼ rkʼë ri njeʼ arajil, rma che kaʼiʼ riʼ kan yatkitoʼ».

Ri ntel chë tzij: We ütz xtaʼän che rä rksaxik ri päq kan kʼo wä xtkʼatzin chawä.

Lucas 12:15: «Tapeʼ kan pa rkʼiyal ri achkë jun kʼo awkʼë, ma ya riʼ ta xtyaʼö akʼaslemal».

Ri ntel chë tzij: Ri päq ma ya riʼ ta xkakolö y ma ya riʼ ta kʼo más rqʼij chpan akʼaslemal.

1 Timoteo 6:10: «Ri xa chrij päq nbʼä wä awan xa ryon kʼayewal nukʼäm pä pan awiʼ, y rma jojun xa chrij riʼ bʼenäq wä kan, eqal eqal xkʼis qa ri kikʼuqbʼäl kʼuʼx chqä kilon kʼïy kʼayewal».

Ri ntel chë tzij: Ri päq ma itzel ta, ye kʼa ri winäq ri xa chrij päq bʼenäq wä ran y kan ya riʼ chik ryaʼon rqʼij pa rkʼaslemal, ya riʼ kan kʼayewal xtkʼäm pä pa rwiʼ. Ri rfamilia ma kiʼ ta chik kikʼuʼx chqä ryä nrïl ryabʼil rma kowan nsamäj.

Hebreos 13:5: «Tikʼutuʼ rkʼë ikʼaslemal chë ma chrij ta ri päq bʼenäq wä iwan, chqä kiʼ ikʼuʼx tibʼanaʼ rkʼë ri kʼo iwkʼë».

Ri ntel chë tzij: Ma taʼän ta chë xa xuʼ päq nawajoʼ nachʼäk, más ütz kiʼ akʼuʼx tabʼanaʼ rkʼë ri kʼo awkʼë.

Mateo 19:24: «Más chaq bʼaʼ xtqʼax jun camello chpan jun bʼaq rchë tʼisoʼn chwäch jun bʼeyon xttok chpan Rqʼatbʼäl tzij Dios».

Ri ntel chë tzij: Jesús xuʼij che rä jun bʼeyon kʼajol chë ttok rtzeqelbʼëy, ye kʼa ri kʼajol riʼ ma xrajoʼ ta rma kan bʼenäq ran chrij ri bʼeyomäl. Ri xuʼij qa Jesús kan kʼo rqʼij, rma si más xtayaʼ rqʼij ri bʼeyomäl chwäch Dios ya riʼ xtbʼanö chë ma xtawïl ta chik ri kʼaslemal ri majun bʼëy xtkʼis ta.

a Nkʼaj chik Biblias ke reʼ rbʼanik kibʼanon qa che rä: «Rma ri nbʼä awanima chrij ri päq, chriʼ npë wä ronojel rwäch itzelal».