¿Achkë nuʼij le Biblia chkij kaʼiʼ winäq ri ye kʼo jnan ye kʼa ma ye kʼlan ta?

Ri nuʼij le Biblia

Le Biblia nukʼüt chë Dios ma nrajoʼ ta chë yeqaʼän tzʼil taq bʼanobʼäl (1 Tesalonicenses 4:3). Le Biblia nukʼüt chë ri tzʼil taq bʼanobʼäl ya riʼ taq jun winäq ri kʼo rkʼlaj nukanuj rkʼexel rkʼlaj, ri achiʼaʼ ri nkiʼän tzʼil taq bʼanobʼäl kikʼë achiʼaʼ y ri tzʼil bʼanobʼäl nuʼän jun achï rkʼë jun ixöq ri ma ye kʼlan ta.[1]

• ¿Achkë rma chwäch Dios kan kʼo rqʼij chë ri winäq yekʼleʼ?

• ¿Ütz komä yejeʼ jnan jun kʼlaj winäq tapeʼ ma ye kʼlan ta xa xuʼ rchë nkitzʼët we nkʼän kiwäch o manä?

• ¿Achkë yakowin naʼän rchë ütz xtbʼä akʼlanen?

¿Achkë rma chwäch Dios kan kʼo rqʼij chë ri winäq yekʼleʼ?

• Dios xuʼän qa ri kʼlanen. Xbʼanatäj riʼ taq xerkʼulbʼaʼ ri naʼäy kʼlaj winäq (Génesis 2:22-24). Dios ma ütz ta nutzʼët chë jun achï y jun ixöq jnan yejeʼ we majun ta rqʼij ri kʼlanen chkiwäch.

• Dios ronojel mul nrajoʼ ri más ütz pa qawiʼ. Dios xuʼän ri kʼlanen rchë jun achï y jun ixöq majun bʼëy nkijäch kiʼ. Dios rtaman chë taq jun achï y jun ixöq yekʼleʼ jontir ri yë kʼo chpan ri familia nkïl utzil y yechajïx. Taquʼ rij ya reʼ, rchë kan ütz rbʼanik xtaʼän che rä jun chʼakät nkʼatzin nqaʼän ri nuʼij ri xbʼanö rchʼakat. Ke riʼ chqä, we nqajoʼ utzil pa rwiʼ ri qafamilia, kʼo chë nqanmaj ri nuʼij Dios chqë. Y ronojel mul xtqïl utzil pa qakʼaslemal (Isaías 48:17, 18).

  

• Ri njeʼ sexo chkiwäch ri winäq ri ma ye kʼlan ta kan kʼïy kʼayewal xtkʼäm pa chkij. Achiʼel ri yekanaj qa pa yabʼil tapeʼ ma nqajoʼ ta y ri itzel taq yabʼil nkïl rma ri sexo. Chqä yebʼison y nkinaʼ chë majun ta chik kiqʼij.

• Dios xyaʼ chkë ri winäq jun spanïk: ya riʼ ri yekowin njeʼ kalkʼwal rma ri sexo. Ya riʼ jun spanïk ri kan janina rqʼij. Tqaquʼ reʼ, chwäch Dios ri kʼaslemal kan loqʼoläj. Rma riʼ ryä nrajoʼ chë röj chqä nqayaʼ rqʼij ri spanïk riʼ. Y ya riʼ nbʼanatäj rkʼë ri winäq ri yoj kʼlan wä. Ke riʼ nqakʼüt che kan kʼo rqʼij ri kʼlanen chqawäch (Hebreos 13:4).

¿Ütz komä yejeʼ jnan jun kʼlaj winäq tapeʼ ma ye kʼlan ta xa xuʼ rchë nkitzʼët we nkʼän kiwäch o manä?

Rchë kiʼ kikʼuʼx nkiʼän pa kikʼlanen ma nkʼatzin ta chë naʼäy jnan yejeʼ xa xuʼ rchë nkitzʼët we nikʼän kiwäch o manä. Pa rkʼexel we ryeʼ nkijkibʼaʼ kitzij chkiwäch kan ütz xtkikʼwaj kiʼ y xkikowin xkisöl xa bʼa achkë kʼayewal ri xkekïl. Y ya riʼ xtbʼanatäj xa xuʼ we ryeʼ xkekʼleʼ (Mateo 19:6).a

¿Achkë yakowin naʼän rchë ütz xtbʼä akʼlanen?

Ma jun ta jun kʼlanen ri ma ta njeʼ kʼayewal chkiwäch. Ye kʼa yakowin kan kiʼ akʼuʼx naʼän pan akʼlanen. Ya riʼ xtbʼanatäj we yeqasmajij ri naʼoj ri ye kʼo chpan le Biblia. Tqatzʼetaʼ jojun naʼoj chrij riʼ:

• Tibʼanaʼ ri nkʼatzin chkë ri nkʼaj chik y ma tiʼän ta xa xuʼ riʼ nkʼatzin chiwä rïx (1 Corintios 7:3-5; Filipenses 2:3, 4).

• Tijyowalaʼ iwiʼ y kan tjeʼ iqʼij chiwäch ronojel qʼij (Efesios 5:25, 33).

• Taquʼ na naʼäy achkë ri naʼij (Proverbios 12:18).

• Ma tkatäj ta iyowal y chanin tikuyulaʼ imak chiwäch (Colosenses 3:13, 14).