¿Jontir komä ri religiones yojkitoʼ rchë más junan nuʼän qawäch rkʼë Dios?

Ri nuʼij le Biblia

Manä. Jontir ri religiones ma ye junan ta. Chpan le Biblia nqïl kʼïy rubʼanik ri xyaʼöx ruqʼij Dios ri ma xqä ta chwäch ryä. Ya reʼ ütz yeqajäch pa kaʼiʼ peraj.

Peraj 1: Ri ruyaʼik kiqʼij tyox

Le Biblia nuʼij chë majun nkʼatzin wä nqayaʼ kiqʼij tyox (Jeremías 10:​3-5; 16:19, 20). Jehová xuʼij reʼ chkë ri israelitas ojer: «Ma tiyaʼ ta kiqʼij nkʼaj chik dioses ri ma yë ta rïn» (Éxodo 20:​3, 23; 23:24, Dios habla hoy).a Taq ri israelitas xkiyaʼ kiqʼij nkʼaj chik dioses, «Jehová xkatäj ruyowal chkë» (Números 25:3; Levítico 20:2; Jueces 2:​13, 14).

Dios k’a ya riʼ na nuquʼ chrij ri ruyaʼik kiqʼij «ri nbʼix dioses chkë» (1 Corintios 8:​5, 6; Gálatas 4:8). Ryä nuʼij chkë ri winäq ri nkajoʼ nkiyaʼ ruqʼij chë ma tkixöl ta kiʼ kikʼë ri religiones ri ma pa rubʼeyal ta nkiyaʼ ruqʼij. Le Biblia nuʼij: «Kixel pä chkikojöl ryeʼ chqä ma tiyüj ta chik iwiʼ kikʼë» (2 Corintios 6:​14-​17). Xa ta jontir ri religiones ye junan ta chqä yojkitoʼ ta rchë junan nuʼän qawäch rkʼë Dios, ¿achkë rma Dios nukʼutuj ya riʼ chqë?

Peraj 2: Ri rubʼanik nyaʼöx ruqʼij Dios ri ma nqä ta chwäch ryä

Ojer qa, ri israelitas xa xkixöl ri rubʼanik xkiyaʼ ruqʼij Dios kikʼë nkʼaj chik bʼanobʼäl ri xebʼan rchë xyaʼöx kiqʼij nkʼaj chik dioses, rma riʼ Jehová ma kiʼ ta chik rukʼuʼx xuʼän kikʼë (Éxodo 32:8; Deuteronomio 12:​2-4). Jesús xuʼij chë ri ukʼwäy taq bʼey judíos ma pa rubʼeyal ta wä najin nkiyaʼ ruqʼij Dios. Ryeʼ xkikʼüt chë kan achiʼel ta najin nkiyaʼ ruqʼij Dios, ye kʼa xa kaʼiʼ wä kipaläj, rma ma najin ta wä nkismajij «ri naʼoj ri kʼo más kejqalen chpan ri Pixaʼ, achiʼel ri pa rubʼeyal naʼän che rä jontir, ri napoqonaj kiwäch ri nkʼaj chik chqä ri nakʼuqbʼaʼ akʼuʼx chrij Dios» (Mateo 23:23).

Pa qaqʼij komä, ri religión ri nqrtoʼ rchë más junan nuʼän qawäch rkʼë Dios, ya riʼ ri nukʼüt ri naʼoj ri ye kʼo chpan le Biblia (Juan 4:​24; 17:17; 2 Timoteo 3:​16, 17). Ye kʼa, ri religiones ri yekikʼüt naʼoj ri ma ye kʼo ta chpan le Biblia, xa nkiʼän chë ri winäq ma nkajoʼ ta chik nkitamaj ruwäch Dios. Ye kʼïy winäq nkinmaj chrij ri Trinidad, chë röj nkʼaseʼ qa qan taq nqkäm o chë Dios yeruyaʼ ri itzel taq winäq pa qʼaqʼ. Chqä nkiʼij chë ri naʼoj riʼ chpan le Biblia yeʼelesan wä pä. Ye kʼa ri naʼoj riʼ xa kikʼwan kiʼ rkʼë ruyaʼik kiqʼij dioses ri majun ta kiqʼij y ma rkʼë ta ruyaʼik ruqʼij Dios. Nqaʼij riʼ rma xa nkijäl ri rubʼanik nrajoʼ Dios chë nyaʼöx ruqʼij kikʼë costumbres ri xa kikʼë winäq ye petenäq wä (Marcos 7:​7, 8).

Chqä, Dios kan itzel nutzʼët chë ri religiones ma nkismajij ta ri nkikʼüt (Tito 1:​16). Rchë chë jun religión nqrtoʼ rchë más junan nuʼän qawäch rkʼë Dios, kʼo chë nukʼüt chqawäch achkë rubʼanik nqasmajij pa qakʼaslemal ri naʼoj ye kʼo chpan le Biblia. Jun tzʼetbʼäl, le Biblia nuʼij: «We jun winäq nuʼij chë nuyaʼ ruqʼij Dios, ye kʼa ma nuqʼïl ta raqʼ, xa najin nuqʼöl qa riʼ ryä chqä majun nkʼatzin wä ri najin nuʼän rchë nuyaʼ ruqʼij Dios. Ri rubʼanik nyaʼöx ruqʼij ri Qatataʼ Dios [ri religión], ri kan chʼajchʼöj chwäch ryä, ya reʼ: yeqachajij ri mebʼaʼiʼ, ri malkaʼn taq ixoqiʼ taq najin nkiqʼaxaj kʼayewal chqä nqakʼwaj jun chʼajchʼöj kʼaslemal» (Santiago 1:​26, 27; notas). Ri Biblia La Palabra de Dios para Todos nuksaj ri tzij «religión pura» chpan re versículo reʼ taq ntzjon chrij ri rubʼanik nqä chwäch Dios chë nyaʼöx ruqʼij.