¿Achkë riʼ ri Armagedón?

Ri nuʼij le Biblia

Ri Armagedón, ya riʼ ri chʼaʼoj nuʼän Dios kikʼë ri qʼatbʼäl taq tzij chwäch le Rwachʼlew. Ri qʼatbʼäl taq tzij chqä ri winäq yetoʼö kichë ryeʼ achiʼel ta najin nkiʼän chik chʼaʼoj rkʼë Dios rma ma nkinmaj ta rtzij (Salmo 2:2). Chpan ri chʼaʼoj Armagedón xtchup kiwäch jontir ri qʼatbʼäl taq tzij ri ye kʼo chwäch le Rwachʼlew (Daniel 2:​44).

Ri tzij «Armagedón» xa xuʼ jmul nqïl pa Biblia chpan Apocalipsis. Ri profecía nuʼij chë ri qʼatöy taq tzij ri ye kʼo chwäch le Rwachʼlew xkimöl kiʼ rchë nkiʼän chʼaʼoj rkʼë Dios. Ya reʼ xtbʼanatäj «chpan ri ilew ri pa chʼaʼäl hebreo nbʼix Armagedón che rä» (Apocalipsis 16:14, 16).

¿Achkë xketoʼon rchë xtbʼan ri chʼaʼoj Armagedón? Jesús xtkʼwaj bʼey chkiwäch ri ángeles y jontir ryeʼ xtkichüp rwäch rkʼulel Dios (Apocalipsis 19:11-​16, 19-​21). Chkikojöl re winäq reʼ ye kʼo ri ma nkajoʼ ta chë Dios nqʼät tzij pa kiwiʼ y kan itzel yetzjon chrij (Ezequiel 39:7).

Ri chʼaʼoj Armagedón ¿kan chlaʼ pan oriente medio xtbʼan wä? Re chʼaʼoj reʼ ma chriʼ ta xtbʼan wä, xa kan chwäch jontir Rwachʼlew xtbʼanatäj wä (Jeremías 25:32-​34; Ezequiel 39:17-​20).

Ri tzij Armagedón, ri petenäq rkʼë ri chʼaʼäl hebreo Har Meghiddóhn, ntel chë tzij ri jyuʼ Meguidó. Meguidó ya riʼ jun tinamït xjeʼ chlaʼ ojer chpan tinamït Israel. Naqaj chë chriʼ kan kʼo wä chʼaʼoj xbʼan ri kan kʼo kiqʼij. Le Biblia ntzjon chrij jojun chkë ri chʼaʼoj riʼ (Jueces 5:​19, 20; 2 Reyes 9:​27; 23:29). Ri Armagedón ma ya ri ta ri lugar ri nbʼix Meguidó che rä ojer. ¿Achkë rma? Rma chriʼ ma yerqʼiʼ ta jontir ri xtkiʼän chʼaʼoj rkʼë Dios y nixta Jezreel akuchï xjeʼ wä re tinamït reʼ. Nqkowin nqaʼij chë Armagedón ya reʼ taq jontir ri qʼatbʼäl taq tzij xtkimöl kiʼ rchë xtkiʼän chʼaʼoj rkʼë Rqʼatbʼäl Tzij Dios.

¿Achkë xtbʼanatäj chpan ri chʼaʼoj Armagedón? Ma qataman ta achkë rbʼanik Dios xtksaj rchqʼaʼ. Ryä kan xtuʼän achiʼel xuʼän ojer qa: xksaj saqbʼöch, slonel, qʼeqäl taq jöbʼ, ri qʼaqʼ achiʼel jöbʼ, qlojay chqä yabʼil ri kan kʼïy winäq yerkamsaj (Job 38:22, 23; Ezequiel 38:19, 22; Habacuc 3:​10, 11; Zacarías 14:12). Kan kʼïy chʼaʼoj xtbʼanatäj y ye kʼïy chkë rkʼulel Dios kan kiyonïl xtkikamsaj kiʼ chkiwäch. Pa rkʼisbʼäl, kan xtqʼax chkiwäch chë kan rkʼë Dios najin nkiʼän wä chʼaʼoj (Ezequiel 38:21, 23; Zacarías 14:13).

Chpan ri chʼaʼoj Armagedón ¿xtchüp komä Dios rwäch le Rwachʼlew? Chpan ri chʼaʼoj Armagedón Dios ma xtchüp ta rwäch le Rwachʼlew, rma xuʼän le Rwachʼlew rchë kan nqjeʼ chwäch (Salmo 37:29; 96:10; Eclesiastés 1:4). Chqä ma xtchüp ta kiwäch jontir winäq rma le Biblia nuʼij chë ye kʼïy winäq xkekolotäj qa y nuʼij chë reʼ jun molaj winäq reʼ «majun ta jun achï xkowin nejlan kichë» (Apocalipsis 7:​9, 14; Salmo 37:34).

Kantzij na wä, ye kʼo mul le Biblia nuksaj ri tzij Rwachʼlew taq ntzjon chrij ri qaplaneta. Ye kʼa ri tzij Rwachʼlew nksäx chqä rchë ntzjon chkij ri winäq ri ma nkinmaj ta rtzij Dios (1 Juan 2:​15-​17). Rma riʼ, taq le Biblia nuʼij chë chpan Armagedón xtchup rwäch le Rwachʼlew, najin ntzjon chkij ri winäq ri ma nkinmaj ta rtzij Dios (Mateo 24:3).

¿Ajän xtchapatäj ri chʼaʼoj Armagedón? Taq Jesús xtzjoj chrij ri nimaläj tijöj poqonal, ri xtkʼïs rkʼë Armagedón, ryä xuʼij: «Ri qʼij chqä ri hora majun achkë tamayon rchë, ni ri Ángeles ri ye kʼo chkaj ni rïn, ri Rkʼajol Dios; xa xuʼ Ntataʼ kʼo chkaj» (Mateo 24:21, 36). Ye kʼa le Biblia nuʼij chë ri Armagedón xtchapatäj taq Jesús najin na nuqʼät tzij. Y Jesús xchäp pä nuqʼät tzij chpan ri jnaʼ 1914 (Mateo 24:37-​39).