Kikʼutunik ri yeskʼin rwäch qawuj

Xa jbʼaʼ chik apü, ¿achkë riʼ ri xtyaʼ Jehová pa kan ri qʼatöy taq tzij?

Apocalipsis 17:16, 17 nuʼij ya reʼ chrij ri xtbʼanatäj taq xtchapatäj ri nimaläj tijöj poqonal: «Ri 10 ukʼaʼ ri xatzʼët chqä ri itzel chköp itzel xtkinaʼ che rä ri ixöq ri kan tzʼil rkʼaslemal. Rma riʼ xtkitzʼlaʼ chqä xtkichʼnabʼaʼ qa. Ryeʼ xtkitäj rchʼakul chqä kan xtkikʼät pa qʼaqʼ. Rma Dios xyaʼ pa kan nkiʼän ri rchʼobʼon ryä, ntel chë tzij, nuʼän chë ryeʼ nkiʼän ri kichʼobʼon chik, y ya riʼ nkiyaʼ ri uchqʼaʼ kʼo pa rqʼaʼ kiqʼatbʼäl tzij che rä ri itzel chköp». Rbʼanon qa, pa qapublicaciones qabʼin chë ri xtyaʼ Jehová pa kan ri qʼatöy taq tzij, ya riʼ nkichüp rwäch jontir ri religiones ri ma pa rbʼeyal ta nkiyaʼ rqʼij.

Ye kʼa nkʼatzin nqajäl ri qabʼin qa. Ri xtyaʼ Jehová pa kan ri qʼatöy taq tzij, ya riʼ chë ryeʼ «nkiyaʼ ri uchqʼaʼ kʼo pa rqʼaʼ kiqʼatbʼäl tzij che rä ri itzel chköp». ¿Achkë rbʼanik xttzʼaqät ya riʼ? Rchë nqʼax chqawäch, qtzjon chkij jojun kʼutunïk.

¿Achoq chkij najin ntzjon wä re profecía reʼ? «Ri ixöq ri kan tzʼil rkʼaslemal», ri nbʼix chqä «Babilonia la Grande» che rä, nukʼambʼej tzij chkij jontir ri religiones ri ma pa rbʼeyal ta nkiyaʼ rqʼij Dios. Ri «itzel chköp ri këq rij» nukʼambʼej tzij chrij ri organización ri xbʼan pa 1919 rchë ntoʼon rchë ma njeʼ ta chʼaʼoj chwäch Rwachʼlew. Rbʼanon qa Sociedad de Naciones rbʼiʼ xyaʼöx, ye kʼa komä Organización de las Naciones Unidas nbʼix che rä (Apoc. 17:3-5). Y «ri 10 ukʼaʼ» nukʼambʼej tzij chrij jontir ri qʼatbʼäl taq tzij ri nkitoʼ ri itzel chköp.

¿Jnan komä rbʼanon kiwäch ri ixöq ri kan tzʼil rkʼaslemal rkʼë ri itzel chköp ri këq rij? Le Biblia nuʼij chë ri ixöq ri tzʼil rkʼaslemal «chʼokäl» chrij ri itzel chköp. Ya reʼ nqrtoʼ rchë nqʼax chqawäch chë ri ixöq riʼ nutoʼ ri itzel chköp chqä nrajoʼ nukʼwaj rbʼey, o nrajoʼ chë yë ryä nbʼin che rä achkë nkʼatzin nuʼän.

¿Achkë xtbʼanatäj rkʼë ri ixöq ri kan tzʼil rkʼaslemal? Ri itzel chköp chqä ri 10 ukʼaʼ «itzel xtkinaʼ che rä ri ixöq ri kan tzʼil rkʼaslemal» tapeʼ najin wä nkitoʼ. Rma riʼ, xtkimäj rbʼeyomal chqä xtkikʼüt chkiwäch jontir winäq ronojel ri ma ütz ta yerbʼanon. Y chrij riʼ xtkiʼän ri rbʼin qa chik Jehová: xtkichüp rwäch (Apoc. 17:1; 18:8). Ya riʼ xtbʼan kikʼë jontir ri religiones ri ma pa rbʼeyal ta nkiyaʼ rqʼij Dios. Ye kʼa, taq majanä tbʼanatäj ya riʼ, Jehová xtuʼän chë ri qʼatöy taq tzij kʼo jun xtkiʼän ri majun bʼëy bʼanatajnäq ta.

¿Achkë xtuʼän Jehová chë xtkiʼän ri qʼatöy taq tzij? Achiʼel xqatzʼët qa, Jehová xtuʼän chë ri 10 ukʼaʼ xtkiʼän «ri rchʼobʼon ryä», y ya riʼ «nkiyaʼ ri uchqʼaʼ kʼo pa rqʼaʼ kiqʼatbʼäl tzij che rä ri itzel chköp» ri këq rij, ntel chë tzij, ri Naciones Unidas (Apoc. 17:13). Taquʼ rij achkë ntel chë tzij riʼ. ¿Chaq ke riʼ komä xtpë pa kijolon ri qʼatöy taq tzij nkiʼän riʼ? Manä, ri profecía nuʼij chë kan yë Jehová xtbʼanö chë ryeʼ xtkiʼän riʼ (Prov. 21:1; tajnamaj rkʼë Isaías 44:28). Y, ¿eqal komä xtkiyaʼ uchqʼaʼ pa rqʼaʼ ri itzel chköp? Manä, ryeʼ kan chanin chqä chaq kʼateʼ xtkiʼän riʼ. Chrij riʼ, taq ri itzel chköp ya kʼo chik uchqʼaʼ pa rqʼaʼ, ryä xtuʼän ri rbʼin qa chik Jehová: xtchüp kiwäch jontir ri religiones ri ma pa rbʼeyal ta nkiyaʼ rqʼij Dios.

¿Achkë kʼa qayoʼen chë xtbʼanatäj chqawäch apü? Röj ma qayoʼen ta chë xkeʼel noticias akuchï nkiʼij chë ri qʼatöy taq tzij más najin nkitoʼ ri Naciones Unidas. Ri qayoʼen röj, ya riʼ chë Jehová chaq kʼateʼ nuyaʼ pa kan ri qʼatöy taq tzij rchë nkiyaʼ ri uchqʼaʼ kʼo pa kiqʼaʼ che rä ri itzel chköp. Taq xtbʼanatäj riʼ, röj qataman chik chë ya xtchapatäj ri nimaläj tijöj poqonal. Loman nbʼeqä ri qʼij riʼ, «qkʼaseʼ apü chqä tqachʼobʼoʼ na ronojel ri yeqaʼän», rma xa jbʼaʼ chik apü ¡kʼo kʼïy ri chaq kʼateʼ xkebʼanatäj! (1 Tes. 5:6).