¿Ajän xchäp rsamaj ri Rqʼatbʼäl Tzij Dios? (Naʼäy peraj)

TATAMAJ MÁS CHRIJ LE BIBLIA

Julio: Kan nqä chi nwäch ri najin nqatzjoj chrij le Biblia.a Nnatäj chwä chë ri jmul qa xakʼutuj chwä ¿achkë rma röj ri testigos de Jehová, nqanmaj chë ri Rqʼatbʼäl Tzij Dios xchäp rsamaj pa 1914?

Ernesto: Jaʼ, ya riʼ xinskʼij chpan jun chkë ri irevistas, chë Rqʼatbʼäl Tzij Dios xchapatäj pa jnaʼ 1914, y kʼo jun ma xqʼax ta chi nwäch. Rïx niʼij chë jontir ri ninmaj chpan le Biblia lenäq wä pä.

Julio: Jaʼ, kan ke riʼ.

Ernesto: Ye kʼa rïn nskʼin jontir le Biblia y ma wlon ta ri jnaʼ riʼ. Chqä xibʼä pa Internet rchë xinbʼekanuj ri jnaʼ «1914» chpan jun Biblia en línea, y majun xinwïl ta.

Julio: Kan ütz ri najin naʼän. Naʼäy, rma askʼin rwäch jontir le Biblia. Nqʼalajin chë kan naloqʼoqʼej kowan.

Ernesto: Jaʼ, chi nwäch rïn kan kowan rqʼij.

Julio: Rïn chqä kan ke riʼ nquʼ. Rma riʼ kan ütz naksaj rchë naqʼalajsaj akʼutunik. Y kan ya riʼ nuʼij le Biblia chqë chë nqaʼän rchë njeʼ más qanaʼoj.b ¡Janina ütz chë rït natäj aqʼij naʼän riʼ!

Ernesto: Matyox, Julio. Rïn kan nwajoʼ ntamaj más. Rma riʼ, taq xinkanuj xinwïl jbʼaʼ chrij ri jnaʼ 1914 chpan ri libro ri najin nqanukʼuj rwäch. Ntzjon chrij jun cheʼ ri xchoy, chrij riʼ xkʼïy pä chik jmul. Ke riʼ jbʼaʼ xqʼax chi nwäch.

Julio: Jaʼ. Ya riʼ jun profecía ri nutzjoj chpan Daniel capítulo 4. Nutzjoj chrij jun achïkʼ ri xuʼän Nabucodonosor, ri qʼatöy tzij chlaʼ Babilonia.

Ernesto: Jaʼ, ya riʼ. Xinskʼij rwäch kʼïy mul y ma xqʼax ta chi nwäch achkë rma Rqʼatbʼäl Tzij Dios rkʼwan riʼ rkʼë ri jnaʼ 1914.

Julio: Majun taquʼ ta. Nixta Daniel, ri xtzʼibʼan qa ri wuj, ma xqʼax ta chwäch achkë xtzʼibʼaj qa.

Ernesto: ¿Kantzij naʼij?

Julio: Jaʼ. Tatzʼetaʼ ri nuʼij chpan Daniel 12:8: «Rïn xinkʼoxaj riʼ, ye kʼa ma xqʼax ta pa njolon».

Ernesto: Nbʼij k’a rïn xa xuʼ rïn ma nqʼax ta chi nwäch.

Julio: ¿Y ataman rït achkë rma Daniel ma xqʼax ta chwäch? Rma majanä tapon ri q’ij rchë nqʼalajsäx ri xtzʼibʼäx qa. Ye k’a komä ma ke riʼ ta chik. Ri profecías ri xtzʼibʼäx qa ya nqʼax chik chqawäch.

Ernesto: ¿Kantzij naʼij?

Julio: Jaʼ. Ya riʼ nuʼij ri Daniel 12 versículo 9. Aweʼ nuʼij: «Re tzij reʼ kʼo chë ma ntel ta rtzjol chqä kʼo chë nakʼöl qa rchë ntzʼet kʼa chkipan ri rkʼisbʼäl taq qʼij». Achiʼel xqaskʼij qa, re profecía reʼ nuʼij chë «kʼa pa rkʼisbʼäl taq qʼij» nqʼax chqawäch. Y ronojel ri yebʼanatäj komä nukʼüt chë ya yoj kʼo chik chkipan ri q’ij riʼ. Rkʼë re libro reʼ xtqatzʼët más chrij riʼ.c

Ernesto: ¿Nawajoʼ nakʼüt re profecía reʼ chi nwäch?

Julio: Ütz kʼa.

RI ACHÏKʼ XUʼÄN NABUCODONOSOR

Julio: Naʼäy xtqatzʼët achkë ntel chë tzij ri achïkʼ xuʼän Nabucodonosor.

Ernesto: Ütz kʼa.

Julio: Nabucodonosor xrachkʼaj jun mamaʼ cheʼ ri napon kʼa chkaj. Chpan rachïkʼ xkʼoxaj jun r·ángel Jehová ri xuʼij, chë tchoy ri cheʼ riʼ. Xuʼ xkanaj qa rkʼamal chqä rkutaʼn ri cheʼ riʼ. Chrij riʼ xqʼax «siete jnaʼ». Kʼa riʼ xkʼïy chik qʼanäj ri cheʼ riʼ.d Re profecía reʼ naʼäy xbʼetzʼaqät rkʼë Nabucodonosor. Ryä jun qʼatöy tzij ri kan kowan rchqʼaʼ, achiʼel ri cheʼ riʼ ri napon kʼa chkaj. Reʼ nukʼambʼej tzij chë ryä achiʼel ta xchoy. Xqʼax «siete jnaʼ» ma xtchʼobʼonäj ta chik. ¿Nnatäj chawä achkë ntel chë tzij riʼ?

Ernesto: Mmm... Ma nnatäj ta chwä.

Julio: Le Biblia nuʼij chë xuʼän itzel rjolon, ke riʼ xkanaj qa kʼa taq xqʼax siete jnaʼ, o «siete tiempos». Rma ke riʼ xbʼanatäj rkʼë, ma xkowin ta chik xqʼät tzij. Y taq xeqʼax ri jnaʼ riʼ, xkʼachöj pä y xok chik qʼatöy tzij.e

Ernesto: Kan najin nqʼax chi nwäch riʼ. Ye kaʼ ri xbʼanatäj rkʼë Nabucodonosor, ¿achkë rbʼanik rkʼwan riʼ rkʼë Rqʼatbʼäl Tzij Dios y 1914?

Julio: Nqʼax chqawäch rma re profecía reʼ kamul xbʼetzʼaqät. Naʼäy ya riʼ taq ma xyaʼöx ta chik qʼij che rä Nabucodonosor chë nchʼobʼonäj. Rkaʼn ya riʼ taq majun ta chik jun qʼatöy tzij xchaʼöx rma Dios. Y rkʼë ri rkaʼn reʼ rkʼwan riʼ rkʼë Rqʼatbʼäl Tzij Dios.

Ernesto: ¿Y achkë rma ataman chë kamul xbʼetzʼaqät?

Julio: Qataman riʼ rma kan chpan ri profecía nuʼij wä jojun achkë ri xebʼanatäj. Daniel 4:17 nuʼij chë ri profecía xyaʼöx «rchë jontir ri winäq xtkitamaj chë ri Nimaläj Rqʼij nuqʼät tzij pa kiwiʼ y ryä xtchaʼö achoq pa rqʼaʼ xtyaʼ wä ri Rqʼatbʼäl Tzij». ¿Xatzʼët rït ri tzij nuʼij «nuqʼät tzij pa kiwiʼ ri winäq»?

Ernesto: Jaʼ, aweʼ nuʼij «ri Nimaläj Rqʼij nuqʼät tzij pa kiwiʼ ri winäq».

Julio:¿Achkë riʼ «ri Nimaläj Rqʼij» naʼij rït?

Ernesto: Yë Dios, ¿tapeʼ?

Julio: Jaʼ. Re tzij reʼ, nukʼüt chqawäch chë ma xa xuʼ ta chrij Nabucodonosor ntzjon wä. Ntzjon chqä chrij Dios rma «nuqʼät tzij pa kiwiʼ ri winäq». Taq xtanukʼuj re profecía reʼ más xtqʼax chqawäch achkë rma nqaʼij riʼ.

Ernesto: Ütz kʼa, tqatzʼetaʼ.

RI NQÏL CHPAN RI WUJ RI XTZʼIBʼAJ DANIEL

Julio: Chpan rwuj Daniel kʼo jun nuʼij ri chaq bʼanaqïl nukamluj. Ya riʼ Rqʼatbʼäl Tzij Dios y ri nqʼatö tzij chpan ya riʼ Jesucristo. Tqatzʼetaʼ ri nuʼij Daniel 2:44. Tabʼanaʼ utzil taskʼij.

Ernesto: Ütz kʼa. Nuʼij: «Pa kiqʼij qa ri qʼatöy taq tzij riʼ, ri Dios ri kʼo chkaj, xtyaʼ jun rqʼatbʼäl tzij ri majun bʼëy xtchup ta rwäch chqä ma xtkanaj ta qa pa rqʼaʼ jun chik tinamït. Ri qʼatbʼäl tzij riʼ xtwulaj chqä xtchüp kiwäch jontir ri qʼatbʼäl taq tzij, chqä xa xuʼ ri qʼatbʼäl tzij riʼ xtkanaj qa xtbʼä qʼij xtbʼä säq».

Julio: Matyox. ¿Naʼij rït chë re versículo reʼ najin ntzjon chrij Rqʼatbʼäl Tzij Dios?

Ernesto: Mmm... Ma ntaman ta.

Julio: Ri versículo nuʼij xa xuʼ «ri qʼatbʼäl tzij riʼ xtkanaj qa xtbʼä qʼij xtbʼä säq»; ntel chë tzij chë majun bʼëy xtchup ta äl rwäch. ¿Kʼo komä jun qʼatbʼäl tzij ri más xtyalöj chwäch Rqʼatbʼäl Tzij Dios?

Ernesto: Majun ta.

Julio: Jaʼ kantzij. Tqatzʼetaʼ chik jun profecía ri ntzjon chrij Rqʼatbʼäl Tzij Dios. Y ya riʼ nqïl chpan Daniel 7:13, 14 y chriʼ nutzjoj rij jun winäq ri xtbʼeʼok qʼatöy tzij. Tatzuʼ ri nuʼij: «Y xyaʼöx uchqʼaʼ pa rqʼaʼ, xyaʼöx rqʼij chqä xyaʼöx jun qʼatbʼäl tzij pa rqʼaʼ rchë chë winäq ri jalajöj kitinamit chqä kichʼaʼäl nkiyaʼ rqʼij. Ri uchqʼaʼ xyaʼöx pa rqʼaʼ majun bʼëy xtesäx ta äl pa rqʼaʼ chqä ri rqʼatbʼäl tzij majun bʼëy xtchup ta rwäch». Chpan re versículos reʼ kʼo jojun ri xqatzjoj yän qa rij.

Ernesto: Jaʼ, ntzjon chik jmul chrij jun qʼatbʼäl tzij.

Julio: Jaʼ. Re qʼatbʼäl tzij reʼ kan kʼo rqʼij. Rma chpan re texto reʼ nuʼij nuqʼät tzij pa kiwiʼ «winäq ri jalajöj kitinamit chqä ri kichʼaʼäl». Reʼ ntel chë tzij chë xtchʼobʼonäj pa rwiʼ jontir Rwachʼlew.

Ernesto: Ma qʼaxnäq ta chi nwäch riʼ, ye kʼa kantzij naʼij.

Julio: Tqatzʼetaʼ chik jmul ri nuʼij aweʼ: «Ri uchqʼaʼ xyaʼöx pa rqʼaʼ majun bʼëy xtesäx ta äl pa rqʼaʼ chqä ri rqʼatbʼäl tzij majun bʼëy xtchup ta rwäch». ¿Re versículo reʼ kan jnan jbʼaʼ nuʼij rkʼë ri kʼo chpan Daniel 2:44, tapeʼ?

Ernesto: Jaʼ, kan jnan jbʼaʼ.

Julio: Tqakamluj ri naʼoj ri qatzʼeton pä kʼa komä. Ri profecía ri kʼo chpan ri capítulo 4 rchë rwuj Daniel xtzʼibʼäx rchë nyaʼöx rtzjol chkë ri winäq, rchë xtkitamaj chë ri «Nimaläj Rqʼij nuqʼät tzij pa kiwiʼ». Re profecía reʼ nukʼüt chqawäch chë xbʼetzʼaqät rkʼë jun ri kʼo más rqʼij chwäch Nabucodonosor. Chqä, chpan jontir ri wuj xtzʼibʼaj Daniel nqïl kʼïy profecías ri ntzjon chrij ri qʼij taq xtyaʼöx qʼatbʼäl tzij pa rqʼaʼ Jesús. Reʼ nukʼüt chqawäch chë ri profecía ri kʼo chpan ri capítulo 4 rchë ri wuj Daniel ntzjon chrij Rqʼatbʼäl Tzij Dios, ¿tapeʼ?

Ernesto: Jaʼ, kan ke riʼ wä. Ye kʼa ma nqʼax ta chi nwäch achkë rma rkʼwan riʼ rkʼë 1914.

«NQʼAX SIETE JNAʼ»

Julio: Qtzjon chik jmul chrij Nabucodonosor. Xqaʼij chë ri naʼäy mul xtzʼaqät ri profecía riʼ, ya riʼ chrij Nabucodonosor ri xkʼambʼej tzij ri mamaʼ cheʼ. Y taq xchoy ri cheʼ ya riʼ taq ryä ma xqʼät ta chik tzij siete tiempos, rma xuʼän itzel rjolon. Ye kaʼ taq xqʼax ri tiempo riʼ xkʼachöj pä chik jmul rjolon y xtzolin chik pa rqʼatbʼäl tzij. Y rkaʼn ri achoq chrij xtzʼaqät wä re profecía reʼ, ya riʼ taq xqʼat Rqʼatbʼäl tzij Dios ye kʼa ma rma ta kʼo jun itzel xuʼän.

Ernesto: ¿Achkë rbʼanik riʼ? Ma nqʼax ta chi nwäch.

Julio: Tatzuʼ napeʼ. Le Biblia nuʼij chë ojer qa ri israelitas ri yeʼok qʼatöy taq tzij kan pa «rtrono Jehová yetzʼyeʼ wä».f Reʼ ntel chë tzij yertaqon Dios. Re qʼatbʼäl tzij reʼ nukʼambʼej tzij Rqʼatbʼäl tzij Dios. Ye kʼa, taq xqʼax ri tiempo, kʼïy chkë ri qʼatöy taq tzij riʼ xkiyaʼ qa kij chwäch Jehová. Y kan ke riʼ chqä xkiʼän ye kʼïy israelitas. Rma ri, Jehová xyaʼ qʼij che rä Babilonia chë xchʼäk ri tinamït Israel pa jnaʼ 607, taq majanä tpë Jesús. Kan chpan ri qʼij riʼ, Dios majun ta chik jun qʼatöy tzij xtäq pä rchë nchʼobʼonäj chriʼ Jerusalén. Ntel chë tzij, chë kan chriʼ xqʼat wä Rqʼatbʼäl tzij Dios. ¿Najin nqʼax chawäch?

Ernesto: Jaʼ, nqʼax jbʼaʼ.

Julio: Pa 607 taq majanä tpë Jesús xchapatäj pä rajlaxik ri siete jnaʼ. Ya riʼ ri jnaʼ ma xyaʼöx ta chik qʼij che rä ri Rqʼatbʼäl tzij Dios xtchʼobʼonäj. Taq xkʼis ri tiempo riʼ, Dios xchaʼ jun kʼakʼakʼ qʼatbʼäl tzij rchë chlaʼ chkaj. Ri nkʼaj chik profecías ri xqaskʼij chpan rwuj Daniel xbʼetzʼaqät taq xbʼekʼis ri jnaʼ riʼ. ¿Ajän komä xkʼis ri tiempo riʼ? Ye kʼa we nqïl rqʼalajsaxik ri kʼutunïk riʼ xtqatamaj ajän xchäp Rqʼatbʼäl Tzij Dios.

Ernesto: Nquʼ rïn, pa 1914.

Julio: Kan ke riʼ wä, achiʼel xaʼij.

Ernesto: ¿Achkë rma ataman chë ya riʼ jnaʼ xbʼanatäj?

Julio: Rma taq Jesús xpë chwäch le Rwachʼlew ryä xuʼij chë majanä tbʼekʼis ri siete jnaʼ riʼ.g Reʼ ntzjon chrij jun sbʼläj nüm tiempo. Ri siete jnaʼ riʼ xchapatäj pä pa ciento jnaʼ taq majanä tpë Jesús chwäch le Rwachʼlew y majanä tkʼis qa taq Jesús xbʼä chkaj. Ye kʼa, chqä xqaʼij qa chë ri profecías ri kʼo chpan rwuj Daniel ma xtqʼax ta chqawäch kʼa pa «ri rkʼisbʼäl taq qʼij».h Pa rkʼisbʼäl chë ri jnaʼ 1800, ri estudiantes rchë le Biblia xkitäj kiqʼij xkinukʼuj más chrij ri profecías rchë Daniel. Ke riʼ eqal eqal xqʼax chkiwäch chë pa jnaʼ 1914 xbʼetzʼaqät ri profecía riʼ. Jontir ri xbʼanatäj pa jnaʼ 1914, nukʼüt chqawäch chë chpan ri jnaʼ riʼ, ya riʼ xchäp Rqʼatbʼäl Tzij Dios chlaʼ chkaj. Y ya riʼ chqä nbʼix rkʼisbʼäl taq qʼij che rä. Rkʼë jbʼaʼ chawäch rït kan kowan kʼïy re naʼoj reʼ y rkʼë jbʼaʼ ma xtqʼax ta jontir chawäch.

Ernesto: Kantzij naʼij chwä, reʼ nkʼatzin nkamluj na chik rtzʼetik.

Julio: Nqʼax chi nwäch, rïn chqä kan eqal na xintamaj. Rma riʼ nyoʼej chë ri xqatzjoj awkʼë xkʼüt chawäch chë röj ri testigos de Jehová ri achkë nqanmaj chpan le Biblia lenäq wä pä.

Ernesto: Jaʼ, rïn kan ntzʼeton chë ri achkë ninmaj chpan le Biblia niwesaj wä pä.

Julio: Rïn ntzʼët chë rït chqä ke riʼ nawajoʼ naʼän. Achiʼel xqatzʼët kan kowan kʼïy ri nuʼij, rkʼë jbʼaʼ ya reʼ nbʼanö chawä chë kʼa kʼo na nawajoʼ natamaj chrij ri achkë xqatzjoj qa. Achiʼel xqaʼij qa ri siete jnaʼ xchapatäj pa 607 taq majanä tpë Jesús. Re profecía reʼ rkʼwan riʼ rkʼë ri Rqʼatbʼäl Tzij Dios. Ye kʼa, ¿achkë rma nqaʼij chë xbʼekʼis pa jnaʼ 1914?i

Ernesto: Ya riʼ ri nwajoʼ ntamaj rïn.

Julio: Kan yë chqä le Biblia nqrtoʼ rchë nqajlaj ri jnaʼ riʼ. ¿Nawajoʼ chë jun qʼij nqtzjon más chrij riʼ?j

Ernesto: Ütz kʼa, yatinyoʼej.