¿Ajän xchäp samaj Rqʼatbʼäl Tzij Dios? (Rkaʼn peraj)

TQAKAMLUJ RTZʼETIK RACHÏKʼ XUʼÄN NABUCODONOSOR

Julio: Xbʼä qʼij Ernesto, xa ma tyox xatinwïl. Kan jaʼäl nnaʼ ntzjoj le Biblia awkʼë ronojel semana.a ¿Ütz awäch?

Ernesto: Yïn ütz, matyox.

Julio: ¡Xa matyox kʼa riʼ! Rkʼisbʼäl mul xqtzjon xqaʼij achkë rma ri testigos de Jehová nqaʼij chë Rqʼatbʼäl Tzij Dios xchäp nuqʼät tzij pa 1914.b Achiʼel qatzjon pä, chpan ri capítulo 4 rchë rwuj Daniel kʼo jun nuʼij ri nuʼän chqë röj chë nqanmaj chë ya riʼ jnaʼ xchäp Rqʼatbʼäl Tzij Dios. ¿Natäj chawä achkë riʼ?

Ernesto: Jaʼ, rachïkʼ xuʼän ri qʼatöy tzij Nabucodonosor chrij ri mamaʼ cheʼ.

Julio: Jaʼ, kan ya riʼ xrachkʼaj Nabucodonosor, jun mamaʼ cheʼ ri napon kʼa chkaj. Chpan ri achïkʼ riʼ xkʼoxaj rchʼaʼäl ri ángel ri xuʼij chë tchoy ri cheʼ. Xa xuʼ xkanaj qa jbʼaʼ che rä ri cheʼ chqä rkʼamal. Taq xqʼax ri «siete jnaʼ» ri cheʼ xkʼïy pä chik jmul.c Achiʼel qatzjon qa, ri profecía riʼ kaʼiʼ mul ntzʼaqät. ¿Natäj chawä? ¿Ajän naʼäy mul xtzʼaqät re profecía reʼ?

Ernesto: Ya riʼ taq Nabucodonosor xuʼän itzel rjolon siete jnaʼ, ¿tapeʼ?

Julio: Jaʼ ke riʼ. Rma xuʼän itzel rjolon ma xqʼät ta chik tzij. Ri rkaʼn mul ri xtzʼaqät ri profecía, ya riʼ taq chpan ri siete tiempos ri yerchaʼon Dios rchë nkiqʼät tzij, ma xkiqʼät ta chik tzij. Ri tiempo riʼ xchapatäj taq Jerusalén xchup rwäch pa jnaʼ 607 taq majanä tpë Jesús. Kan chpan ri jnaʼ riʼ ma xejeʼ ta chik ri qʼatöy taq tzij ri nkiqʼät tzij pa rwiʼ rtinamit Jehová. Pa rkʼisbʼäl che rä ri 7 tiempos, Dios xchaʼ jun kʼakʼakʼ qʼatbʼäl tzij chlaʼ chkaj rchë nchʼobʼonäj pa rwiʼ rtinamit. Reʼ ntel chë tzij chë ye Rqʼatbʼäl Tzij Dios xtqʼatö tzij. Kʼa komä, ya xqatzʼët yän ajän xchapatäj pä ri siete tiempos. Komä nkʼatzin nqatamaj janiʼ jnaʼ xuʼän ri siete tiempos. Rchë nqatamaj ajän xchäp pä nuqʼät tzij Rqʼatbʼäl Tzij Dios. ¿Najin nqʼax chawäch?

Ernesto: Jaʼ, najin nnatäj pa chwä ri xqatzjoj qa rkʼisbʼäl mul.

Julio: Kan ütz. Komä tqatzʼetaʼ janiʼ jnaʼ xuʼän ri siete tiempos. Rïn chqä xkʼatzin xinkamluj na pä rtzʼetik rchë nnatäj chwä ri ntel che tzij ri profecía reʼ. Xtintäj nqʼij rchë kan pa rbʼeyal xtinqʼalajsaj chawäch.

Ernesto: Ütz kʼa.

XKʼIS RI SIETE TIEMPOS Y XCHAPATÄJ RI RKʼISBʼÄL TAQ Q’IJ

Julio: Ri naʼäy mul, taq xtzʼaqät ri profecía rkʼë Nabucodonosor, ri siete tiempos xel chë tzij siete jnaʼ. Ri rkaʼn mul, xtzʼaqät ri profecía chrij ri Rqʼatbʼäl Tzij Dios, reʼ ma xuʼ ta chik siete jnaʼ xyalöj, xa kan más na chik xyalöj.

Ernesto: ¿Achkë rma naʼij riʼ?

Julio: Nnatäj chawä chë ri siete tiempos xchapatäj pä pa jnaʼ 607 taq xchup rwäch Jerusalén. Si chpan ri jnaʼ riʼ nqajlaj pä siete jnaʼ, nqapon chpan ri jnaʼ 600 taq majanä tpë Jesús. Ye kʼa chpan ri jnaʼ riʼ majun achkë xbʼanatäj ri rkʼwan riʼ rkʼë Rqʼatbʼäl Tzij Dios. Achiʼel qatzjon pä, taq qʼaxnäq chik pa ciento jnaʼ kʼa riʼ xpë Jesús chwäch Rwachʼlew, ryä xuʼij chë ri siete tiempos majanä tbʼekʼis.

Ernesto: Ah..., jaʼ, ya xnatäj chwä.

Julio: Rma riʼ nqaʼij chë ri siete tiempos, ma siete jnaʼ ta; xa ntzjon chrij kʼïy jnaʼ.

Ernesto: ¿Kʼïy jnaʼ? ¿Janiʼ jnaʼ?

Julio: Chpan ri wuj Apocalipsis, kʼo jun profecía ri rkʼwan riʼ rkʼë ri profecía kʼo chpan ri wuj Daniel, ri xtqrtoʼ rchë nqatamaj janiʼ jnaʼ riʼ ri siete tiempos. Chpan ri profecía riʼ nuʼij chë ri oxiʼ tiempos rkʼë nkʼaj kʼo 1,260 qʼij chpan.d Reʼ ntel chë tzij chë ri siete tiempos nbʼerbʼanaʼ 2,520 qʼij. ¿Najin nqʼax chawäch?

Ernesto: Jaʼ, ye kʼa majanä nqʼax chi nwäch achkë rma rïx niʼij chë Rqʼatbʼäl Tzij Dios xchäp nuqʼät tzij pa 1914.

Julio: Komä xtqatzʼët rij ya riʼ. Chpan jojun profecías, nuʼij chë jun qʼij nukʼambʼej tzij jun jnaʼ.e Si ke riʼ chqä rbʼanik nqajlaj ri siete tiempos, ri 2,520 qʼij nuʼän 2,520 jnaʼ. Si kan chpan ri jnaʼ 607 nqajlaj pä 2,520 jnaʼ, nqapon chpan ri jnaʼ 1914. Rma riʼ nqaʼij chë chpan ri jnaʼ riʼ xbʼekʼis ri siete tiempos. Chqä chë ri jnaʼ riʼ Jesús xok Qʼatöy Tzij chpan Rqʼatbʼäl Tzij Dios. Chqä chpan 1914 xechapatäj pä jojun ri rbʼin le Biblia rchë yebʼanatäj chpan rkʼisbʼäl taq qʼij.

Ernesto: Y, ¿achkë riʼ?

Julio: Chpan Mateo 24:7, Jesús xuʼij achkë riʼ ri xkebʼanatäj taq xtchäp xtqʼät tzij chlaʼ chkaj: «Rma xtjeʼ chʼaʼoj chkiwäch ri tinamït chqä chkiwäch ri qʼatbʼäl taq tzij. Y xa bʼa akuchï xtjeʼ wayjal chqä xkebʼanatäj mamaʼ taq slonel». Achiʼel xqatzʼët, Jesús xuʼij qa chë xtjeʼ wayjal chqä mamaʼ taq slonel. ¿Tapeʼ chë chpan ri jnaʼ riʼ kʼa komä ya riʼ bʼanatajnäq pä?

Ernesto: Jaʼ, kantzij naʼij.

Julio: Jesús chqä xuʼij chë xtjeʼ nmaʼq taq chʼaʼoj taq ryä najin chik nuqʼät tzij. Y chpan ri wuj Apocalipsis nuʼij chë ma xa xuʼ ta xtjeʼ chʼaʼoj chkiwäch koköj taq tinamït, xa kan xtjeʼ chqä chʼaʼoj chkiwäch nmaʼq taq tinamït ri kan xkertzʼlaʼ jontir winäq chwäch le Rwachʼlew.f ¿Nnatäj chawä ajän xbʼanatäj ri Primera Guerra Mundial?

Ernesto: Pa 1914. Ya riʼ ri jnaʼ niʼij rïx chë Jesús xchäp Rqʼatbʼäl Tzij. Ma jmul xinquʼ ta chë 1914 rkʼwan riʼ rkʼë taq Jesús xchäp Rqʼatbʼäl Tzij.

Julio: Taq nqatün jontir ri qatzjon pä chrij ri siete tiempos chqä chrij ri profecías ri ntzjon chrij ri rkʼisbʼäl taq qʼij, nqatzʼët chë kaʼiʼ profecías riʼ kan kikʼwan kiʼ. Ri testigos de Jehová kan qayaʼon chwäch qan chë pa 1914 Jesús xchäp nuqʼät tzij y kan chriʼ xchapatäj wä pä ri rkʼisbʼäl taq qʼij.g

Ernesto: Kʼa najin na nquʼ rij ri najin natzjoj chwä.

Julio: Nqʼax chi nwäch ri nanaʼ. Rïn chqä pa naʼäy mul kwest xqʼax chi nwäch. Nyoʼej chë xkaturtoʼ ri xqatzjoj awkʼë, tapeʼ chpan le Biblia ma nqïl ta ri jnaʼ 1914, ye k’a röj ri testigos de Jehová kan kʼo rma nqanmaj chë Jesús xchäp Rqʼatbʼäl Tzij ri jnaʼ riʼ. Achiʼel xatzʼët, jontir ri xinbʼij chawä kan chpan le Biblia alenäq wä pä.

Ernesto: Jaʼ, ya riʼ kan jaʼäl ntzʼët rïn, rma kan rkʼë le Biblia naqʼalajsaj wä chi nwäch. Xa bʼa achkë kʼutunïk nbʼän chawä, rït ma jmul abʼin ta ya reʼ chwä: «Ya reʼ nquʼ rïn» o «Ya reʼ nmaj rïn». Rït kan ronojel mul naksaj le Biblia. Ye kʼa, ¿achkë rma kan kowan kwest nqʼax chqawäch? ¿Achkë rma ma kan ta xuʼij qa Dios chë pa 1914 Jesús xok qʼatöy tzij?

Julio: Kan ütz ri akʼutunik naʼän. Kʼo kʼïy nuʼij le Biblia ri ma chaq bʼaʼ ta nqʼax chqawäch. ¿Achkë rma Dios ke riʼ xuʼän qa che rä? ¿Achkë rma nqatäj na qaqʼij kʼa riʼ nqʼax chqawäch? ¿Nawajoʼ nqatzjoj rij ya riʼ ri jun semana chik?

Ernesto: Jaʼ, ütz kʼa yatinyoʼej.