Tayaʼ rqʼij Jehová rkʼë afamilia

Achiʼel atzʼeton pä chpan re folleto reʼ, le Biblia kʼo kʼïy naʼoj chpan ri xkaturtoʼ rït chqä afamilia. Jehová nrajoʼ chë rïx kiʼ ikʼuʼx niʼän. Chqä nuʼij chë we yë ryä xtiyaʼ naʼäy pan ikʼaslemal, ryä xtyaʼ pä jontir ri nkʼatzin chiwä (Mateo 6:33). Dios nrajoʼ ntok awachiʼil. Rma riʼ tabʼanaʼ jontir ri achkë nkʼatzin rchë jnan nuʼän awäch rkʼë. ¡Majun ta chik jun utzil ri más nüm ri nkowin nrïl jun winäq! (Mateo 22:37, 38).

1 MÁS JNAN TBʼANAʼ AWÄCH RKʼË JEHOVÁ

RI NUʼIJ LE BIBLIA: «‹Rïn xkinok Itataʼ rïx, y rïx xkixok walkʼwal›, ya riʼ nuʼij Jehová» (2 Corintios 6:18). Dios nrajoʼ ntok jun utziläj awachiʼil, y jun rbʼanik rchë yajelun rkʼë ya riʼ taq yachʼö rkʼë. Rma riʼ, le Biblia nuʼij reʼ: «Chaq taqïl kixchʼö rkʼë Dios» (1 Tesalonicenses 5:17). Ryä nqä chwäch chë rït naʼij che rä jontir ri nbʼanö chë nchʼpü akʼuʼx chqä ri nanaʼ (Filipenses 4:6). We rït xkachʼö rkʼë Dios kikʼë afamilia, ryeʼ xtkitzʼët chë rït nanmaj chë Dios kantzij kʼo.

Ye kʼa ma xa xuʼ ta nkʼatzin yachʼö rkʼë Dios, rït chqä nkʼatzin nayaʼ axkïn che rä. ¿Achkë rbʼanik xtaʼän riʼ? Xtaʼän riʼ taq xtatjoj awiʼ chrij le Biblia chqä chkij ri publicaciones ri yeʼelesan pä chpan le Biblia (Salmo 1:1, 2). Taquʼ kij ri naʼoj natamaj (Salmo 77:11, 12). Jun chik rbʼanik nakʼoxaj Dios ya riʼ yabʼä chpan kimoloj ri testigos de Jehová (Salmo 122:1-4).

Jun chik rbʼanik rchë más jnan nuʼän awäch rkʼë Dios, ya riʼ taq natzjoj chrij ryä chkë ri nkʼaj chik. Taq más xtaʼän riʼ, más xkajelun rkʼë ryä (Mateo 28:19, 20).

RI ÜTZ NAʼÄN:

• Tajamaʼ awäch rchë yachʼö rkʼë Dios chqä rchë naskʼij rwäch le Biblia ronojel qʼij

• Tatoʼ afamilia rchë nkiyaʼ pa naʼäy ri ryaʼik rqʼij Jehová chwäch ri kʼastanen o atzʼanen

2 KIʼ IKʼUʼX TIYAʼ RQʼIJ DIOS PAN IWACHOCH

RI NUʼIJ LE BIBLIA: «Kixjelun rkʼë Dios, y ryä xtjelun pä iwkʼë rïx» (Santiago 4:8). Tachaʼ jun qʼij chqä jun hora rchë niyaʼ rqʼij Dios pan iwachoch ronojel semanas (Génesis 18:19). Ye kʼa ma xa xuʼ ta ya riʼ nkʼatzin naʼän: xa kan ronojel qʼij takʼutuj atoʼik che rä Dios chqä tatoʼ afamilia rchë más jnan nuʼän kiwäch rkʼë. Le Biblia nuʼij: «Kʼo chë [...] nakʼüt [chrij Jehová] chkiwäch ri awalkʼwal y natzjoj chkë taq yït tzʼyül chawachoch, taq yït bʼenäq pa bʼey, taq yapneʼ (yakotzʼeʼ) y taq yakatäj» (Deuteronomio 6:6, 7). Tayaʼ chwäch awan naʼän achiʼel xuʼän Josué, ri xuʼij: «Ye kʼa rïn chqä ri ye kʼo pa wachoch, kan yë Jehová xtqayaʼ rqʼij» (Josué 24:15).

RI ÜTZ NAʼÄN:

• Tatoʼ afamilia rchë niyaʼ rqʼij Dios pan iwachoch ronojel semanas y keʼatoʼ chkijujnal rchë más jnan nuʼän kiwäch rkʼë Dios