Taq nbʼanatäj jun kʼayewal

Tapeʼ xtaʼän jontir ri kʼo pan aqʼaʼ rchë kiʼ rkʼuʼx nuʼän afamilia, kʼo mul kʼo xkebʼanatäj ri ma ayoʼen ta. Ya riʼ nuʼän chë ma kiʼ ta chik akʼuʼx xtaʼän (Eclesiastés 9:11). Ye kʼa Dios nuyaʼ pä qatoʼik taq kʼo kʼayewal nqïl. We rïx xtismajij ri naʼoj kʼo chpan le Biblia ri xkeqatzʼët qa, rït chqä afamilia xkixkowin xtiköchʼ xa bʼa achkë kʼayewal.

1 TAKʼUQBʼAʼ AKʼUʼX CHRIJ JEHOVÁ

RI NUʼIJ LE BIBLIA: «Tiyaʼ qa pa rqʼaʼ ryä ronojel ri nbʼanö chë nchʼpü ikʼuʼx, rma ryä kan najin yixurchajij pä» (1 Pedro 5:7). Ronojel mul tnatäj chawä chë ma yë ta Dios nyaʼö pä kʼayewal chawij (Santiago 1:13). We xkajelun rkʼë, ryä kan xtyaʼ pä atoʼik (Isaías 41:10). Le Biblia nuʼij: «Tiʼij che rä [Dios] jontir ri kʼo pan iwan» (Salmo 62:8).

Jun chik ri xtkʼuqbʼaʼ akʼuʼx ya riʼ naskʼij chqä nanukʼuj rwäch le Biblia ronojel qʼij. We rït xtaʼän riʼ, xtatzʼët chë Jehová kantzij «nukʼuqbʼaʼ qakʼuʼx taq nqqʼax chwäch xa bʼa achkë kʼayewal» (2 Corintios 1:3, 4; Romanos 15:4). Ryä nuʼij chë xtyaʼ pä chawä rït «ri uxlanen ri petenäq rkʼë Dios, ri majun ta jun winäq nkowin nqʼax pa rjolon» (Filipenses 4:6, 7, 13).

RI ÜTZ NAʼÄN:

• Taʼij che rä Jehová chë katurtoʼ pä rchë ma nchʼpü ta más akʼuʼx chqä rchë kan pa rbʼeyal yachʼobʼon

• Taquʼ rij jalajöj rbʼanik nasöl jun kʼayewal y tachaʼ ri más xkaturtoʼ

2 TACHAJIJ AWIʼ RÏT CHQÄ AFAMILIA

RI NUʼIJ LE BIBLIA: «Ri winäq ri nqʼax jun naʼoj pa rjolon kan kʼo nutamaj, y ri winäq ri kʼo rnaʼoj yë ri etamabʼäl xtrajoʼ xtyaʼ rxkïn che rä» (Proverbios 18:15). ¿Achkë nkʼatzin chkë chkijujnal ri ye kʼo chpan afamilia? Tatamaj jontir ri nkʼatzin chkë. Katzjon kikʼë y tayaʼ axkïn chkë (Proverbios 20:5).

We nkäm jun winäq ri janina nawajoʼ, ma kakʼïx ta yatoqʼ. Tnatäj chawä chë Jesús chqä xoqʼ (Juan 11:35; Eclesiastés 3:4). Ri yatuxlan chqä yawär kowan xkaturtoʼ (Eclesiastés 4:6). Jontir reʼ xkatkitoʼ rchë ma kan ta más kʼayewal xtuʼän chawäch.

RI ÜTZ NAʼÄN:

• Tkʼluj chawä yatzjon rkʼë afamilia taq majanä tiwïl jun kʼayewal. Ke riʼ, taq xtiwïl jun kʼayewal, ma kʼayewal ta xtuʼän chkiwäch yetzjon awkʼë

• Katzjon kikʼë winäq ri xeqʼax yän chpan jun kʼayewal achiʼel najin naqʼaxaj rït

3 TAKANUJ ATOʼIK

RI NUʼIJ LE BIBLIA: «Ri kantzij achiʼil, najowan ronojel mul; y kan ntok jun awachʼalal taq kʼo kʼayewal yepë» (Proverbios 17:17). Ri awachiʼil kan nkajoʼ yatkitoʼ, ye kʼa rkʼë jbʼaʼ ma kitaman ta achkë rbʼanik nkiʼän che rä. Rma riʼ, taʼij chkë achkë ütz nkiʼän rchë yatkitoʼ (Proverbios 12:25). Chqä ütz nakanuj atoʼik kikʼë winäq ri kitaman chrij le Biblia. Ri toʼïk xtkiyaʼ chawä rkʼë le Biblia, xkaturtoʼ rchë xkakowin xkaqʼax chpan ri kʼayewal (Santiago 5:14).

We nakʼwaj awiʼ kikʼë winäq ri kan kikʼuqbʼan kikʼuʼx chrij Dios chqä chrij ri rtzjun, xtawïl ri toʼïk ri nkʼatzin chawä. Jun chik ri xkatoʼö rchë xtkʼuqeʼ pä akʼuʼx ya riʼ yeʼatoʼ ri achkë xa yebʼison. Taʼij chkë chë rït kan akʼuqbʼan akʼuʼx chrij Jehová chqä chrij ri rtzjun chqë. Keʼatoʼ ri nkʼaj chik chqä ma keʼayaʼ ta qa ri winäq ri yechʼpü chawij chqä yatkajoʼ (Proverbios 18:1; 1 Corintios 15:58).

RI ÜTZ NAʼÄN:

• Katzjon rkʼë jun awachiʼil y tayaʼ qʼij chë yaturtoʼ

• Chöj taʼij achkë nkʼatzin chawä