A’ye aw ka lamɛnni cogo dɔn

1-2. (a) Bi, Jehova bɛ a magɔ don a ka mɔgɔw la alako ta fan fɛ cogo di? (Zaburu 23:​1, 2, 5) (b) An bɛna kuma mun de kan an ka krecɛn lajɛw ko la nin barokun in kɔnɔ?

BI, JEHOVA bɛ an balo ka ɲɛ hakili ta fan fɛ. O la, siga t’a la ko Dawuda ye nin dɔnkili min da, an sɔnna o kumaw ma. A ko: “Matigi ye ne dɛndɛbaa ye, i n’a fɔ bagangɛnna, ne tɛna dɛsɛ foyi la.”—Zaburu 23:​1, 2, 5.

² Jehova bɛ an balo hakili ta fan fɛ kɛrɛnkɛrɛnnenya la an ka jɛkulu ka lajɛw de sen fɛ. Tuma caman, min bɛ fɔ o lajɛw la, an bɛ o dɔn ka ɲɛ. Nka, hali k’a sɔrɔ ‘tiɲɛ kuma min sera an ma, an sinsinnen bɛ o la’, an mago bɛ o hakilijigin kumaw la (2 Pi. 1:12). Yala tuma dɔw la a ka gɛlɛn i ma i k’i tulomajɔ kosɛbɛ lajɛw la, ka da a kan, fɛn min bɛ ka fɔ, i bɛ o dɔn ka ban wa? N’o don, barokun in bɛna i dɛmɛ kosɛbɛ. An bɛna a ye kun min na an ka kan ka an tulomajɔ kosɛbɛ an ka lajɛw la. An bɛna a ye fana cogoya min na balimakɛ minnu bɛ kalanw di, olu bɛ se k’an dɛmɛ ka lamɛnni kɛ ka ɲɛ lajɛw la. O kɔ, laadilikan minnu bɛ se k’an dɛmɛ ka lamɛnni kɛ ka ɲɛ lajɛw la, an bɛna kuma olu fana kan. Nka, an ka fɔlɔ k’a lajɛ, jɔni de bɛ kuma an fɛ an ka lajɛw sen fɛ.

I HAKILI TO A LA KO JEHOVA DE BƐ KUMA AN FƐ AN KA LAJƐW LA

3. Jehova bɛ kuma an fɛ cogo di ani a sagokɛlaw bɛ baara kɛ ni a ka kuma ye ka ɲɛ cogo di?

³ Jehova bɛ kuma hadamadenw fɛ Bibulu de sababu fɛ, n’o ye a ka kuma ye (2 Tim. 3:​16, 17). Yesu tun bɛ o dɔn. A tun bɛ baara kɛ ni Ala ka kuma ye cogoya la min y’a to a lamɛnbagaw ye u yɛrɛw ɲininka ko: “Nin cɛ bɛ Kitabu dɔn cogo di? k’a sɔrɔ a ma o kalan kɛ” (Yuh. 7:15). Ni Yesu tun bɛ ka Ala ka kuma ɲɛfɔ u ye, dusukun jɛlen tigiw tun bɛ nisɔndiya kosɛbɛ k’a lamɛn. San kɛmɛ kulu fɔlɔ krecɛnw fana, iko Paul ni Apolosi, olu tun bɛ baara kɛ kosɛbɛ ni Ala ka kuma ye, ni u tun bɛ ka a walawala mɔgɔw ye (Kɛw. 17:​2, 3; 18:​24, 28). An Jehova Seerew, an b’a dɔn ko an ka barokunw, an ka JW teleso emisiyonw, an ka jɛmukanw ani an ka wideyow, olu bɛɛ sinsinnen bɛ Bibulu de kan. Minnu siɲɛ fɔlɔ don ka na an ka lajɛw la, olu dabali bɛ ban kosɛbɛ k’a ye ko an bɛ baara kɛ ni Ala ka kuma ye ka ɲɛ an ka lajɛw la. Minnu bɛ kalan di an ka lajɛw la, olu b’u ka kumaw bɛɛ sinsin Ala ka kuma de kan. U tɛ dan dɔrɔn k’a kalan mɔgɔw ye, nka an bɛ se ka o kumaw waleya an ka ɲɛnamaya kɔnɔ cogo min na, u bɛ o jira an na fana.—Luka 24:32.

4. Mun na a nafa ka bon an ka lamɛnni kɛ ka ɲɛ an ka lajɛw la?

⁴ N’a fɔra Heburukan na ko “i tulomajɔ” walima “lamɛnni kɛ”, mɔgɔ o mɔgɔ tun mana o kuma mɛn, o tun b’a dɔn ko, a bɛ ka fɔ a ye ko “kanminɛli kɛ”. O la, n’an bɛ ka Bibulu kalan an ka lajɛw la, a bɛ iko Jehova yɛrɛ de bɛ ka kuma an fɛ. N’an y’a ka kuma faamuya ka ɲɛ, o sababu la a bɛna nɔgɔya an ma ka a kanminɛ. Siga t’a la ko Jehova bɛ nisɔndiya kosɛbɛ n’a y’a ye ko, a bɛ ka min fɔ an ye an ka lajɛw la, an bɛ ka o lamɛn ani ka o waleya an ka ɲɛnamaya kɔnɔ.—Nt. 27:11.

MUN NA AN KA KAN KA LAMƐNNI KƐ KA ƝƐ AN KA LAJƐW LA?

5. Kanuya min bɛ an na ka ɲɛsin Jehova ma, o bɛ an bila ka mun de kɛ? (Yuhana 4:​23, 24; 1 Yuhana 5:3)

⁵ An bɛ lamɛnni kɛ an ka lajɛw la ka d’a kan an bɛ Jehova kanu (Mat. 22:37). An mana ta’a fɛ ka dɔnniya sɔrɔ Jehova ko la, an ka kanuya ka ɲɛsin a ma, o bɛ bonya ka ta’a fɛ. O kanuya de bɛ an bila ka Jehova lamɛn, ka a kanminɛ ani ka a bato i n’a fɔ a y’a fɔ cogo min na a ka kuma kɔnɔ.—Yuhana 4:​23, 24; 1 Yuhana 5:3 kalan.

6. An ka lajɛw la, an bɛ mun de kalan tɔw dɛmɛni ko la?

⁶ An bɛ lamɛnni kɛ lajɛw la, ka d’a kan an bɛ tɔw kanu (Mat. 22:39). An ka lajɛw senfɛ, Jehova bɛ an kalan walisa an k’a dɔn an bɛ se ka an balimaw dɛmɛ cogo min na ani mɔgɔ minnu tɛ Jehova dɔn fɔlɔ. An ka gafenin min tɔgɔ ye ko Mɔgɔw kanu—U kɛ kalandenw ye, o bɛ an dɛmɛ ka jogow sɛnɛ an na, minnu bɛ an dɛmɛ an ka waajulibaara la. Yala a ka gɛlɛn i ma ka mɔgɔw waaju baro gansan senfɛ wa? An ka dɔgɔkun kɔnɔ lajɛ yɔrɔ min tɔgɔ ko “I dege waajulibaara la”, ni balimakɛw ni balimamusow bɛ ka ɲɛjirali kɛ o waati la, i tulomajɔ kosɛbɛ.

7. Mun na a nafa ka bon an ka ta’a fɛ ka Jehova lamɛn?

⁷ An bɛ lamɛnni kɛ lajɛw la, ka d’a kan an b’a fɛ ka hɛrɛ sɔrɔ an ka ɲɛnamaya kɔnɔ bi ani ka ɲɛnamaya banbali sɔrɔ sini. Iko Jehova y’a fɔ a batobagaw ye cogo min na Bibulu sɛbɛn tuma la, ni an b’a fɛ ka hɛrɛ sɔrɔ ani ka ɲɛnamaya banbali sɔrɔ, an ka kan ka a kanminɛ (Dut. 32:​44-47). Ni an bɛ lamɛnni kɛ ka ɲɛ an ka lajɛw la, an bɛ dusudon kumaw sɔrɔ minnu bɛ an dɛmɛ ka an ka gɛlɛyaw muɲu ani ka diɲɛ kura makɔnɔ (Rom. 8:25). O la, ka Jehova kanminɛ kabini sisan, o nafa ka bon kosɛbɛ. Wa an ka kan ka ta’a fɛ fana ka baara caman kɛ a ye nin laban donw na.—Mat. 24:​42-44; Jir. 1:3.

I BƐ SE KA I LAMƐNBAGAW DƐMƐ COGO DI U KA LAMƐNNI KƐ KA ƝƐ LAJƐW LA?

8. Balimakɛ minnu bɛ jɛmukanw di estaradi kan, mun na olu ka kan ka ta’a fɛ ka u ka kalan kɛcogo fisaya?

⁸ Balimakɛ minnu bɛ kalan di estaradi kan, kɛrɛnkɛrɛnnenya la minnu bɛ jɛmukanw di, olu ka kan ka ta’a fɛ ka u ka mɔgɔw kalancogo fisaya. Ni balimakɛw bɛ u ka jɛmukanw labɛn ka ɲɛ ani ka u ka kumaw sinsin Bibulu kan, o bɛ se ka mɔgɔ wɛrɛw sama ka na tiɲɛ ma ani ka balimaw dɛmɛ u ka to tiɲɛ sira kan. O la, ni i ka kan ka kalan di lajɛ dɔ la, a to i hakili la ko, o kalan in bɛ se ka nɔba de bila mɔgɔw la. O la, ni bonya dira i ma ka jɛmukan walima ka kalan di lajɛ dɔ la, laadilikan minnu bɛna di duguma, a ɲini ka olu waleya. Hali ni o laadilikanw ɲɛsinnen bɛ kɛrɛnkɛrɛnnenya la jɛmukan dibagaw de ma, bɛɛ bɛ se ka u waleya.—2 Tim. 4:2; Tite 1:9.

9. I bɛ se ka mun de kɛ walisa i ka jɛmukan faamuyali ka nɔgɔya i lamɛnbagaw fɛ?

⁹ I ka jɛmukan kumaw sigicogo labɛn ka ɲɛ. E min ye jɛmukan dibaga ye, i ka jɛmukan kumaw sigi ɲɔgɔn kan cogoya la min b’a to balimaw bɛ se k’i ka jɛmukan lamɛn nɔgɔya la ani k’a faamuya. Ni i ka jɛmukan faamuyali ka gɛlɛn, balimaw hakili bɛ taa yɔrɔ wɛrɛ. O tuma la, i bɛ se ka mun de kɛ walisa ka jɛmukan di min kumaw sigicogo b’a to i lamɛnbagaw ka i faamuya ka ɲɛ? Laadilikan damadɔw filɛ nin ye: 1) I ka jɛmukan kolomayɔrɔw ye minnu ye, fɔlɔ ka olu fɔ i ka jɛmukan daminɛ na. 2) O yɔrɔ kolomaw bɛɛ kelen-kelen walawala ka ɲɛ. I kɛlen ka i ka jɛmukan yɔrɔ koloma dɔw walawala, a nafa ka bon i k’i jɔ dɔɔnin sani i ka taa ɲɛ. O cogo la, i lamɛnbagaw bɛna a dɔn ko sisan i bɛna kuma i ka jɛmukan yɔrɔ koloma wɛrɛ kan. 3) I ka kuncɛli kumaw kɔnɔ, segin i ka jɛmukan yɔrɔ kolomaw kan.

10. Mun na a nafa ka bon i ka jɛmukan kumaw ka diya e yɛrɛ ye fɔlɔ?

¹⁰ I jija walisa i ka jɛmukan kumaw ka kɛ kumaw ye minnu ka di e yɛrɛ ye fɔlɔ. N’o kɛra, i bɛna kuma ni nisɔndiya ye i kɛtɔ k’i ka jɛmukan di wa i lamɛnbagaw bɛna a ye ko, i bɛ ka kuma n’i dusukun bɛɛ ye (Nt. 2:​4, 5; Kɛw. 4:20). Bibulu tɛmɛsira minnu bɛ i ka jɛmukan pilan kɔnɔ ani kuma minnu bɛ i ka jɛmukan kɔnɔ, i hakili jagabɔ olu kan kosɛbɛ. N’o kɛra, o kumaw na don e yɛrɛ dusukun na. Balimakɛ dɔ ka bɔ Etazuni min si hakɛ ka ca ni san 70 ye, ale hakili bɛ jɛmukan dɔ la, a yɛ min lamɛn a ka denmisɛnya waati la. A ko: “Jɛmukan in dibaga ye dusu don an kɔnɔ cogo min ma, walisa, an bɛ to ka fɛn minnu kalan Bibulu kɔnɔ, an ka to ka an hakili jagabɔ olu kan, ne hakili bɛ o la fo ka se bi ma. An bɛ se ka o kɛ cogo min na, a ye o walawala ka ɲɛ, wa a ye a ka jɛmukan di ni nisɔndiya ye. O jɛmukan ye nɔ ba de bila ne la. A ye ne dɛmɛ ka ne ka Bibulu kalancogo fisaya ani jɛɲɔgɔnya min bɛ ne ni Ala cɛ, ka o kologɛlɛya.”

11. Mun na a nafa ka bon i ka laadilikan kɛrɛnkɛrɛnnenw di i lamɛnbagaw ma i ka jɛmukan kɔnɔ? (1 Timote 4:​13-16)

¹¹ I lamɛnbagaw mago bɛ min na, kɔn ka miiri o la, ani u mago bɛ laadilikan kɛrɛnkɛrɛnnen min na, o di u ma. Sani i ka kunnafɔniw di u ma ten dɔrɔn i ka jɛmukan kɔnɔ, baara kɛ ni Bibulu tɛmɛsiraw ye ka ɲɛ walisa ka dusu don u kɔnɔ ani ka bilasirali kɛrɛnkɛrɛnnenw di u ma. Misali la, ciden Paul ye laadilikan kɛrɛnkɛrɛnnen dɔw di Timote ma, walisa k’a dɛmɛ a kologɛlɛyalen ka to alako ta fan fɛ, ani baara min kalifara a ma Efese dugu la, a ka se ka o kɛ (1 Timote 4:​13-16 kalan). I lamɛnbagaw mago bɛ min na, i hakili jagabɔ o kan. Laadilikan minnu bɛ i ka jɛmukan kɔnɔ, u bɛ se ka olu waleya cogo min na u ka ɲɛnamaya kɔnɔ, u dɛmɛ u k’o fana dɔn.

12. Mun na a nafa ka bon i ka kuma iko baro kɛcogo, i kɛtɔ k’i ka jɛmukan di?

¹² I kɛtɔ k’i ka jɛmukan labɛn, to ka segin a kan ni kanba ye walisa i ka jɛmukan di don na, i ka se ka a di baro cogoya la. N’i b’i ka jɛmukan di iko baro kɛcogo, ani ni i tɛ ka a kalan papiye kɔnɔ, a bɛna nɔgɔya i lamɛnbagaw fɛ u k’i lamɛn ka ɲɛ ani ka i ka jɛmukan kɔnɔna kumaw faamuya. An ka gafenin min tɔgɔ ye ko I jija kalanjɛ ani mɔgɔw kalanni na, a fɔlen bɛ o kɔnɔ ko: “Kuma i n’a fɔ k’i bɛ ka baro kɛ, kuma fana ni kɔnɔnajɛya ye cogo la min bɛ i dusukunnata jira ka ɲɛsin barokun ani i lamɛnbagaw ma.” N’i bɛ kuma ni i dusukun bɛɛ ye, a bɛna nɔgɔya i lamɛnbagaw bɛɛ fɛ u k’i lamɛn ka ɲɛ. I bɛ ka hakilinata minnu di u ma i ka jɛmukan kɔnɔ, o bɛna diya u ye, wa a waleyali bɛna nɔgɔya u ma.

13. I kɛtɔ ka i ka jɛmukan labɛn, mun na a nafa ka bon i ka dɛmɛ ɲini jɛmukan dibaga ŋana dɔ fɛ? (Ja fana lajɛ.)

¹³ Dɛmɛ ɲini jɛmukan dilan ŋana dɔ fɛ. I bɛ se ka o kɛ cogo di? I ye jɛmukan min labɛn, o jira jɛmukan dilan ŋana dɔ la. A ye hakilina ɲuman minnu di i ma, i hakili to olu la i ka jɛmukan di tɔ. Ka fara o kan, a ɲini a fɛ a k’i lamɛn walisa a ka se ka laadilikanw di i ma minnu bɛ se ka to i ka kalan kɛcogo ka fisaya (Nt. 1:5). A bɛ se ka kɛ ko an ka jɛmukan yɔrɔ dɔw walawala cogo jɛlen tɛ, k’a sɔrɔ an t’o dɔn an yɛrɛ ma. Nka, ni balimakɛ dɔ ye an lamɛn, o bɛ se ka an dɛmɛ ka a walawala cogoya la min b’a to a lamɛnni ka nɔgɔya an lamɛnbagaw fɛ. An b’a fɛ ka kɛ jɛmukan dibagaw ni kalan dibaga ɲumanw ye walisa an lamɛnbagaw ka se ka Bibulu tiɲɛ kuma dumanw faamuya ka ɲɛ ani ka u waleya u ka ɲɛnamaya kɔnɔ.a

AN BƐ SE KA MUN DE KƐ WALISA KA TA’A FƐ KA TO KA LAMƐNNI KƐ KA ƝƐ AN KA LAJƐW LA?

14. Mun na an b’a fɛ an ni Zaburu 119 sɛbɛnbaga hakilinata ka kɛ kelen ye? (Zaburu 119:24, 111, 167)

¹⁴ An bɛna ta’a fɛ ka lamɛnni kɛ ka ɲɛ an ka lajɛw la ni an b’a to an hakili la ko Jehova bɛ to ka hakilijigin kuma minnu di an ma an ka lajɛw la, olu nafa ka bon kosɛbɛ. Jehova bɛ to ka hakilijigin kuma minnu fɔ an ye an ka lajɛw la, an mago bɛ olu la walisa ka an ka gɛlɛyaw ɲɛnabɔ nin “laban donw na” minnu na waatiw ka gɛlɛn (2 Tim. 3:1). O la, hali ni a bɛ an kɔnɔ ko an bɛ ka min lamɛn, an ye o mɛn siɲɛ caman ka ban an ka lajɛw la, an k’an jija walisa an ni Zaburu 119 sɛbɛnbaga miiricogo ka kɛ kelen ye, Ala ka hakilijigin kumaw ko la.—Zaburu 119:24, 111, 167 kalan.

15. An bɛ dumuni min sɔrɔ alako ta fan fɛ an ka lajɛw la, an bɛ se ka ta’a fɛ cogo di k’an ka waleɲumandɔn jira olu ko la?

¹⁵ An bɛ kalan minnu sɔrɔ an ka lajɛw la, a nafa ka bon kosɛbɛ an ka ta’a fɛ ka olu jate iko nilifɛn ka bɔ Jehova yɔrɔ. Israɛlka minnu tun bɛ ka yaalayaala kungokolon kɔnɔ, min ye olu sɔrɔ tuma min na Jehova tun bɛ ka manɛ di u ma, an bɛ se ka kalan sɔrɔ ka bɔ olu ka ko la (Ek. 16:​15, 31). Siga t’a la ko, daminɛ na, Israɛlkaw tun bɛ Jehova waleɲumandɔn manɛ in ko la. O tun ye nilifɛn de ye ka bɔ Jehova yɔrɔ. A tun ka di, wa o de y’a to u ka to ɲɛnamaya la. Nka, talen ɲɛ, ka to ka manɛ in dun don o don, o nege bɔra u la (Nɔn. 21:5). An bɛ kalan minnu mɛn an ka lajɛw la, a bɛ se ka kɛ ko an ye o mɛn siɲɛ caman ka kɔrɔ. Nka an man kan ka o hakilijigin kumaw jate iko fɛn nafantanw cogo si la. An bɛ dumuni min sɔrɔ alako ta fan fɛ, an ka kan ka sɔn a ma ko o bɛ bɔ Jehova de yɔrɔ. An ka kan ka to an hakili la ko, an bɛ fɛn o fɛn lamɛn an ka lajɛw la, Jehova ka Jɛkuluba bɛ olu labɛn ka ɲɛ anw kama. An ka kan ka to an hakili la fana ko o kumaw bɛ se ka an dɛmɛ ka latigɛli ɲumanw kɛ an ka ɲɛnamaya kɔnɔ ani ka ɲɛnamaya banbali sɔrɔ.—Nt. 3:​13, 16-18; Yuh. 17:3.

16. Balimakɛ ni balimamuso minnu bɛ ka Jehova bato kabini waati jan, mun de bɛ ka olu dɛmɛ u ka ta’a fɛ ka lamɛnni kɛ ka ɲɛ lajɛw la? (Nin yɔrɔ koorilen fana lajɛ: “Bilasiraliw walisa ka lamɛnni kɛ ka ɲɛ lajɛw la.”)

¹⁶ An bɛna se ka lamɛnni kɛ ka ɲɛ an ka lajɛw la ni an tugura laadilikan nataw kɔ. Balimakɛ ni balimamuso minnu ye baara kɛ Jehova ye kabini waati jan, fɛn min ye u dɛmɛ ka lamɛnni kɛ ka ɲɛ lajɛw la, an ka o lajɛ. Balimamuso min tɔgɔ ko Ashley, ale min ye Jehova bato a ka ca ni san 30 ye sisan y’a fɔ ko: “Ka kɔn ka lajɛw labɛn ka ɲɛ, o de bɛ an dɛmɛ ka lajɛw lamɛn ka ɲɛ. Ni ne ma ne ka lajɛw labɛn, a ka gɛlɛn ne ma ka jaabi di lajɛw la, wa ne hakili bɛ to ka taa fɛn wɛrɛw la k’an to lajɛ la.” Balimakɛ József, min bɛ ka Jehova bato nin y’a san 52 ye, ale ko: “An bɛ to ka barokun minnu mɛn an ka lajɛw la, ka olu lamɛn kokura, o ka di ne ye. Ikomi jɛmukan dibaga bɛɛ kelen-kelen bɛ se ka fɛn kura dɔ ɲɛfɔ o barokun kɔnɔ, o b’a to an ka ta’a fɛ ka o barokun in faamuya ka ɲɛ.” A ko tuguni: “Ni balimakɛ dɔ bɛ ka jɛmukan di k’a sɔrɔ jɛmukan dila ŋana tɛ, ne bɛ kalan min sɔrɔ ka bɔ o jɛmukan kɔnɔ, ne bɛ ne sinsin o de kan. Ne tɛ ne sinsin jɛmukan dibaga ka kalan dicogo kan. Ne b’a to ne hakili la ko a bɛ ka min fɔ, o bɛ bɔ Bibulu de kɔnɔ, o min ye Ala ka kuma ye.”

17. I bɛ se ka mun de kɛ walisa ka lamɛnni kɛ ka ɲɛ lajɛw la? (Ja fana lajɛ.)

¹⁷ Ninnu ye laadilikan wɛrɛw ye minnu bɛ se ka i dɛmɛ ka lamɛnni kɛ ka ɲɛ lajɛw la. 1) N’a y’a sɔrɔ i ka kan ka dumunikɛ sani i ka taa lajɛ la, i jija a kana kɛ dumuni girinman ye walisa sunɔgɔ kana i minɛ lajɛ kɛyɔrɔ la. 2) Na joona ani sigiyɔrɔ ɲini sani lajɛ ka daminɛ. 3) I ka telefɔni walima i ka tablɛti bila cogoya la walisa i hakili kana yala-yala lajɛ waati la. 4) Jɛmukan dibaga bɛ se ka kuma fɛn minnu kan, i hakili jagabɔ olu kan. 5) I ɲɛ jɔlen to jɛmukan dibaga la. Fɛn minnu bɛ ka kɛ i kɛrɛfɛ, kana olu lajɛ. 6) I b’a fɛ i hakili ka to jɛmukan yɔrɔ koloman minnu na, to ka olu sɛbɛn walima ka olu desɛn. 7) Bibulu tɛmɛsira minnu bɛ ka kalan, ani olu bɛ ɲɔgɔn minɛ cogo min na, i hakili to o la. 8) I yɛrɛ ɲininka, ‘Ne ye fɛn nafaman minnu sɔrɔ lajɛ kɔnɔ, ne be se ka baara kɛ ni olu ye cogo di walisa ka dɔ dɛmɛ ne ka jɛkulu kɔnɔ, walima ne ka waajuli baara la?’ 9) Sani tile kelen lajɛbaw ani tile saba lajɛbaw ka se, barokunw ni Bibulu tɛmɛsira minnu bɛ o porogaramu kan, olu lajɛ. 10) Fɔlikan wideyolama min labɛnna, i sigiyɔrɔ kelen ka o lamɛn ka ɲɛ. O la, i dusukun labɛnnen bɛ kɛ walisa ka nafa sɔrɔ ka bɔ o porogaramu la.

TA’A FƐ KA JEHOVA LAMƐN

18. Mun na an ka kan ka ta’a fɛ ka lamɛnni kɛ ka ɲɛ lajɛw la?

¹⁸ An ka kan ka ta’a fɛ ka lamɛnni kɛ ka ɲɛ lajɛw la. O cogoya la, an b’a to Jehova ka an “ɲɛminɛ sira ɲuman kan”, o kɔrɔ, tilennenya sira kan (Zab. 23:3; 31:4). An mago bɛ Jehova ka laadilikanw na walisa an kana taa woyo fɛ, iko bato bɛ taa woyo fɛ cogo min na fiɲɛ sababu fɛ. O de kosɔn, an ka ta’a fɛ ka an ka lamɛnni kɛcogo dɔn, ani laadilikan minnu bɛ di an ma an ka lajɛw la, ka olu waleya an ka ɲɛnamaya kɔnɔ (Luka 8:18). Mɔgɔ minnu bɛ Jehova lamɛn, olu bɛna hɛrɛ sɔrɔ kabini sisan ani ka ɲɛnamaya banbali sɔrɔ sini.—Zab. 119:​2, 14.