I bɛ se ka nafa min sɔrɔ ka bɔ i ka waajulikɛ kulu la

1-2. Mɔgɔ caman bɛ mun de miiri u ka waajulikɛ kulu ko la?

YALA i hakili b’a la don min na i kɛra Masaya kibaru duman weleweledala ye wa? O kɛra don ɲumanba de ye. Kabini o waati, Jehova ka jamakulu min b’a tɔgɔ tanu, i kɛra o mɔgɔ dɔ ye (Zab. 148:​1, 2, 12, 13). O don na, a bɛ se ka kɛ ko, i farala Jehova sagokɛla kulu fitinin dɔ mɔgɔw kan fana min bɛ wele ko: waajulikɛ kulu. O kulu in sababu fɛ, an bɛ se ka Masaya kibaru duman waajuli kɛ “diɲɛ yɔrɔw bɛɛ la”.—Mat. 24:14.

² E ka miirinata ye mun ye ka ɲɛsin i ka waajulikɛ kulu ma? Balimamuso min tɔgɔ ye ko Wendya, ale y’a fɔ ko: “Ka kɛ waajulikɛ kulu mɔgɔ dɔ ye, o ye ne dɛmɛ kosɛbɛ. Ka waajuli kɛ ni ne ka waajulikɛ kulu mɔgɔw ye, o ye ne dɛmɛ ka ne ka waajuli kɛcogo ani ne ka mɔgɔ kalancogo fisaya ka ta’a fɛ. Ne ye dusudon kumaw sɔrɔ minnu ye ne dɛmɛ ka n’magɛrɛ Ala la. Ne sera ka teri sɛbɛw sɔrɔ fana.” Balimakɛ dɔ min tɔgɔ ye ko Rich, ale fana y’a fɔ ko: “Ka kɛ an ka waajulikɛ kulu ɲɛminɛbaga ye, o ye bonyaba de ye ne bolo. Weleweledalaw ka baara ye ka mɔgɔw dɛmɛ u ka taa ɲɛ tiɲɛ sira kan fo ka taa se u ka batɛmu ma. Nka, waajulikɛ kulu ɲɛminɛbaga, ale kɔni ka baara ye, weleweledala fɛn-fɛn bɛɛ a ka waajulikɛ kulu kɔnɔ, ka o tigi dɛmɛ a nɔrɔlen ka to Jehova la ani ka kɛ a batokɛla sɛbɛ ye a ka batɛmu kɔ.” Balimamuso dɔ o min tɔgɔ ko Dinah, ale y’a fɔ ko: “Ne bolo, waajulikɛ kulu ye nilifɛn dumanba de ye! Ne bɛ ne ka waajulikɛ kulu mɔgɔw jate iko ne ka denbaya kɔnɔmɔgɔw.”

3. An bɛna mun de ye nin barokun kɔnɔ?

³ Waajulikɛ kulu ɲɛminɛbagaw ani u dɛmɛbagaw b’u mago don cogo min na weleweledalaw la minnu bɛ u ka waajulikɛ kulu kɔnɔ, an bɛna fɔlɔ ka kuma o de kan barokun in kɔnɔ. An bɛ se ka an jɔyɔrɔ fa cogo min na an ka waajulikɛ kulu kɔnɔ, an bɛna kuma o fana kan. O kɔ, an bɛ se ka nafa min sɔrɔ ka bɔ an ka waajulikɛ kulu la, an bɛna kuma o kan.

WAAJULIKƐ KULU ƝƐMINƐBAGA ANI A DƐMƐBAGA

4. (a) Waajulikɛ kulu ɲɛminɛbaga ka baara ye mun de ye? (b) A b’i mago don a ka waajulikɛ kulu mɔgɔw la cogo di? (Yɔrɔ koorilen min tɔgɔ “Bilasiraliw ka ɲɛsin waajulikɛ kulu ɲɛminɛbagaw ma”, o fana lajɛ.)

⁴ Waajulikɛ kulu ɲɛminɛbaga ye diinɛ maakɔrɔb dɔ de ye waajulikɛ kulu dɔ kalifara min na. A ka baara ye ka balimaw dɛmɛ, minnu bɛ a ka waajulikɛ kulu kɔnɔ, u ka ta’a fɛ ka gɛrɛ Jehova la ani ka kɛ waajulikɛla ɲumanw ye. A bɛ se ka o kɛ cogo di? Fɔlɔ, a b’i mago don ka ɲɛ a ka waajulikɛ kulu mɔgɔw bɛɛ la (Nt. 27:23). A b’i hakili to u la kosɛbɛ, a bɛ to ka i mago don u la, a bɛ to ka kumaɲɔgɔnya kɛ n’u ye tuma bɛɛ walisa k’u kibaruya sɔrɔ. O cogoya de la, a bɛ se ka u dɛmɛ alako ta fan fɛ, ka dusu don u kɔnɔ, ani u mago bɛ dɛmɛ kɛrɛnkɛrɛnnen min na, ka o lase u ma (Nt. 12:25; Esa. 32:2; Yak. 2:​15-17). Filanan, a bɛ a ka waajulikɛ kulu mɔgɔw bɛɛ kelen-kelen dɛmɛ u k’u sɛbɛ don waajulibaara la. Ale yɛrɛ cɛsirilenba don waajulibaara la, wa a b’a seko bɛɛ kɛ walisa a ni a ka waajulikɛ kulu mɔgɔw ka to ka waajuli kɛ ɲɔgɔn fɛ kɛrɛnkɛrɛnnenya la wikɛniw fɛ. A b’i jija fana walisa a ni a ka waajulikɛ kulu mɔgɔw bɛɛ kelen-kelen ka bɔ ɲɔgɔn fɛ waajuli la, walisa ka dusu don o tigi kɔnɔ ani ka a dɛmɛ a ka se waajulibaara kɛ cogo ɲuman na. Ni don min na a tɛ se ka waajuli kɛ ni a ka waajulikɛ kulu mɔgɔw ye, a b’i jija walisa a dɛmɛbaga walima balimakɛ wɛrɛ ka se ka waajuli kɛ n’u ye. Sabanan, balimakɛ batiselen minnu bɛ a ka waajulikɛ kulu kɔnɔ, a bɛ dɛmɛ kɛrɛnkɛrɛnnen lase olu ma walisa baara caman ka se ka kalifa u ma sini (1 Tim. 3:1). A bɛ to ka u fo u ka baara ɲuman na, a bɛ laadilikanw di u ma ka bɔ Bibulu kɔnɔ walisa sini u ka se ka kɛ diinɛ maakɔrɔ dɛmɛbagaw ye walima yɛrɛ diinɛ maakɔrɔw ye. Waajulikɛ kulu ɲɛminɛbagaw bɛ baara nafamanba de kɛ. O de kosɔn, diinɛ maakɔrɔ min bɛ se ka o baara in kɛ ka ɲɛ, diinɛ maakɔrɔw kulu bɛ o de sugandi.

5. Gɛlɛya jumɛnw de bɛ se ka waajulikɛ kulu ɲɛminɛbagaw sɔrɔ?

⁵ Ko dɔw bɛ se ka a to a ka gɛlɛya waajulikɛ kulu ɲɛminɛbagaw ma u k’u mago don ka ɲɛ u ka waajulikɛ kulu mɔgɔw la. An ka kuma Jörg kan, ale min ye waajulikɛ kulu ɲɛminɛbaga dɔ ye Alemaɲi jamana na. Iko diinɛ maakɔrɔ caman, a ka kan ka ko caman ɲɛnabɔ jɛkulu kɔnɔ. Ale ko: “Ka kɛ waajulikɛ kulu ɲɛminɛbaga ye ani ka i jɔyɔrɔ tɔw bɛɛ fa jɛkulu kɔnɔ, o tɛ ko nɔgɔnman ye. O de kosɔn, a man nɔgɔn ne bolo ne ni ne ka waajulikɛ kulu mɔgɔw ka se ka ɲɔgɔn lasɔrɔ, iko a ka di ne ye cogo min na.” Abel, min ye san 70 ye, ale fana ye diinɛ maakɔrɔ ye Uganda jamana na. Ale ko: “An ka jɛkulu kɔnɔ, diinɛ maakɔrɔw ani diinɛ maakɔrɔ dɛmɛbagaw man ca. O de kosɔn, an ka waajulikɛ kulu bɛɛ kelen kelen jama ka ca. O la, ka i mago don waajulikɛ kulu mɔgɔw bɛɛ kelen-kelen na, o man nɔgɔn.” Obed min ye diinɛ maakɔrɔ ye ka bɔ Suriname jamana na, ale y’a fɔ ko: “Ka fɔrmasiyɔn di tɔw ma, o ka di ne ye. Nka, o kɛli bɛ waati caman ani fanga ɲini mɔgɔ fɛ. Wa, tuma dɔw la, o fɔrmasiyɔn nɔ tɛ ye yɔrɔnin kelen a tigi kan. O de kosɔn, ka fɔrmasiyɔn kɛ tɔw kunna, ka o kɛ bolokɔfɛ fɛn ye, o bɛ se ka nɔgɔya an bolo. Nka, mun de bɛ se ka waajulikɛ kulu ɲɛminɛbagaw dɛmɛ u ka u jɔyɔrɔ fa hali ni o kɛli man nɔgɔn?

6. Nafa jumɛn de b’a la ka waajulikɛ kuluw kɛ jamakulu fitinin-fitininw ye?

⁶ Ni o bɛ se ka kɛ, waajulikɛ kuluw ka kan ka kɛ jamakulu fitinin-fitininw dɔrɔn de ye. O cogo la, waajulikɛ kulu ɲɛminɛbaga bɛ se ka a ka waajulikɛ kulu mɔgɔw bɛɛ dɔn ani ka u dɛmɛ walisa u kolo ka gɛlɛya alako ta fan fɛ. Ni diinɛ maakɔrɔw man ca jɛkulu min kɔnɔ dun, olu bɛ se ka mun de kɛ? Ni diinɛ maakɔrɔw kulu ye u ka waajulikɛ kuluw kɛ jamakulubaw ye, waajulikɛ kulu ɲɛminɛbagaw tɛna se ka u ka baara kɛ ka ɲɛ. O de kosɔn, u ka kan ka u ka waajulikɛ kuluw kɛ jamakulu fitininw ye ani ka diinɛ maakɔrɔ dɛmɛbaga dɔw sugandi walisa u k’u mago don u dɔw la. N’o kɛra, waajulikɛ kulu ɲɛminɛbagaw na se ka u ka baara bɛɛ la nafaman kɛ: u bɛna se ka u ka waajulikɛ kulu kɔnɔ mɔgɔ dɛmɛ u nɔrɔlen ka to Jehova la ani ka u ka gɛlɛyaw kun.

7. Jɛkulu minnu kɔnɔ diinɛ maakɔrɔw man ca, waajulikɛ kulu ɲɛminɛbagaw bɛ se ka mun de kɛ walisa u ka se ka u mago don ka ɲɛ u ka waajulikɛ kulu mɔgɔw bɛɛ la? (1 Piɛrɛ 5:2) (Ja fana lajɛ.)

⁷ N’i ye waajulikɛ kulu dɔ ɲɛminɛbaga ye ani ni diinɛ maakɔrɔw man ca i ka jɛkulu kɔnɔ, i jija ka i dɛmɛbaga kalan baara kɛcogo la ka ɲɛ walisa a ka se ka i dɛmɛ ka i mago don Jehova ka sagakulu la (1 Piɛrɛ 5:2 kalan). Baara dɔw kɛli kalifa i dɛmɛbaga la. Misali la, tuma ni tuma, a ɲini a fɛ a ka aw ka waajulikɛ kulu lajɛw ɲɛminɛ. A nafa ka bon kosɛbɛ fana, aw ka to ka kuma aw ka waajulikɛ kulu mɔgɔw ko la, walisa k’a dɔn aw bɛ se ka u bɛɛ kelen-kelen dɛmɛ cogo min na u ka u cɛsiri waajuli baara la ani u nɔrɔlen ka to Jehova la. Ni i b’a fɛ ka taa bɔ i ka waajulikɛ kulu mɔgɔ dɔ ye walisa ka dusu don a kɔnɔ, i n’i dɛmɛbaga bɛ se ka taa ɲɔgɔn fɛ. Sani aw ka taa, aw bɛ se ka dusu don o balima kɔnɔ cogo min na, o ɲɛfɔ a ye. Aw tilalen kɔ, a ye min kɛ ka ɲɛ, a fo o ko la. A bɛ se ka min fisaya, o fana ɲɛfɔ a ye. O cogo la, i bɛna se ka i dɛmɛbaga dɛmɛ ale fana ka kɛ waajulikɛ kulu ɲɛminɛbaga dɔ ye sini (2 Tim. 2:2). I bɛ se ka a ɲini i ka waajulikɛ kulu mɔgɔ wɛrɛw fana fɛ, u ka i dɛmɛ weleweledalaw ka fɔrmasiyɔn na. Misali la, tutigɛbagaw ani weleweledala cɛsirilenw bɛ se ka waajuli kɛ ni weleweledala kuraw ye. U bɛ se ka u dɛmɛ walisa u k’a dɔn u bɛ se ka baro daminɛ mɔgɔw fɛ cogo min na waajuli baara la, u bɛ se ka segin-ka-bɔnyew kɛ cogo min na ani u bɛ se ka bibulukalan daminɛ mɔgɔw kun cogo min na. Cogoya saba min na an bɛ se ka an ka waajulikɛ kulu kɔkɔrɔdon, an ka kuma o kan sisan.

I BƐ SE KA I KA WAAJULIKƐ KULU KƆKƆRƆDON KA ƝƐ COGO DI?

8. I bɛ se ka i ka waajulikɛ kulu kɔkɔrɔdon ka ɲɛ cogo di? (Romɛkaw 1:12)

⁸ To ka taa i ka waajulikɛ kulu lajɛw la tuma bɛɛ. Ni i ka waajulikɛ kulu mɔgɔw bɛ to ka waajuli kɛ ɲɔgɔn fɛ, aw bɛna se “ka ɲɔgɔn jija dannaya la” (Romɛkaw 1:12 kalan). Ni i ni tɔw bɛ waajuli kɛ ɲɔgɔn fɛ, o bɛ jagɛlɛya di i ma, wa i tɛ siran n’a y’a sɔrɔ aw bɛ ka waajulikɛ yɔrɔ min na, o yɔrɔ lakanalen tɛ. N’i ka baara bɛ to ka i bali ka i ka waajulikɛ kulu ka lajɛw kɔkɔrɔdon tuma bɛɛ, yala i bɛ se k’a ɲini i ka patɔrɔn fɛ a k’i ka baara waati yɛlɛma wa? Laala, a ka jaabi bɛna bali i la (Neh. 2:​4-6). Ni i ka kɛnɛyako walima kɔrɔya kosɔn, a ka gɛlɛn i ma i ka to ka na i ka waajulikɛ kulu lajɛw la, o ɲɛfɔ i ka waajulikɛ kulu ɲɛminɛbaga ye. N’o kɛra, a bɛ se ka cogoya ɲini walisa i ka to ka kɛ o lajɛw la wideyokonferansi sababu fɛ. A bɛ se k’a ɲini balima dɔw fɛ, olu ni i ka waajuli kɛ ɲɔgɔn fɛ telefɔni fɛ, walima ka lɛtɛrɛw ci mɔgɔw ma. Yala i ye denmisɛnin ye, wa i ka kɛnɛ, nka o bɛɛ n’a ta, ka bɔ ni i ka waajulikɛ kulu mɔgɔw ye, o ka gɛlɛn i ma wa? N’o don, yala e ni i ka waajulikɛ kulu mɔgɔ dɔ bɛ se ka to ka waajulikɛ ɲɔgɔn fɛ dɔgɔkun o dɔgɔkun wa? A bɛ se ka kɛ ko fɛn min nafa ka bon kosɛbɛ i ka ɲɛnamaya kɔnɔ, i ka kan ka o jateminɛ kokura ani ka to ka i ka waati boloda ka ɲɛ (Rom. 12:11; Kol. 4:5). I ka cɛsiri bɛna nafa lase aw bɛɛ kelen-kelen ma. Jehova deli a k’i dɛmɛ. A bɛ se ‘ka se di i ma ka sɔn a yɛrɛ ka diyaɲekow ma ani ka u kɛ.’—Fil. 2:13.

9. An bɛ se ka mun de kɛ walisa an ka waajulikɛ kulu ka kɛ yɔrɔ ye kanuya ani nisɔndiya bɛ yɔrɔ min na? (Romɛkaw 12:13)

⁹ Kɛ mɔgɔ ladonbaga ye. Bibulu ko: an “ka dunanw ladon.” N’an bɛ to ka mɔgɔw ladon, an ka waajulikɛ kulu bɛ kɛ yɔrɔ ye kanuya ni nisɔndiya bɛ yɔrɔ min na (Romɛkaw 12:13 kalan). Yala an bɛ sɔn an ka waajulikɛ kulu lajɛ dɔw ka kɛ an ka so wa? Jɛkulu dɔw kɔnɔ, u y’a latigɛ ko ni balimakɛ dɔ bɔra yɔrɔ dɔ la ka na jɛmukan di u fɛ yen, waajulikɛ kuluw bɛ to k’a bɔ ɲɔgɔn kɔrɔ walisa jɛmukan dibaga ka na dumunikɛ u fɛ, jɛmukan bannen kɔ. Wa, hali ni jɛmukan dibaga tɛ se ka kɛ n’u ye, waajulikɛ kulu mɔgɔ minnu tun ka kan ka a ladon, olu bɛ se ka a latigɛ ka ɲɔgɔn sɔrɔ yɔrɔ dɔ la, walisa ka dumunikɛ ɲɔgɔn fɛ ani ka dusu don ɲɔgɔn kɔnɔ. Sarah min ye tutigɛbaga kɛrɛnkɛrɛnnen ye, ale y’a fɔ ko: “Ni mɔgɔw ka kan ka na ne fɛ, o bɛ ne jɔrɔ kosɛbɛ. Nka, ne bɛ to ka ne jija walisa ka kow nɔgɔya ne yɛrɛ bolo. O la, sani ne ka hami dumuni caman tobili la, ne b’a ɲini ka kɛ ni balimaw ye ani k’a ɲini ka u dɔn.” Ni an bɛ an seko bɛɛ kɛ walisa an ka waajulikɛ kulu ka kɛ yɔrɔ ye kanuya bɛ yɔrɔ min na, ani ka ɲɔgɔn ladon iko denbaya kelen kɔnɔmɔgɔw, an bɛ gɛrɛ Jehova la, wa an bɛ gɛrɛ ɲɔgɔn na.—Neh. 8:10; Kɛw. 20:35.

10. Ni fɛn dɔ bɛ yen, an ka kan ka min fisaya an ka waajuli baara la, an bɛ se ka mun de kɛ? (Ntalenw 1:5; 27:17) (Ja fana lajɛ.)

¹⁰ A laɲini ka kɛ waajulikɛla ɲuman ye ani ka tɔw dege baara kɛcogo la. N’an taara a fɛ ka kɛ waajulikɛla ɲuman ye, ani mɔgɔ kalanbaga ɲuman ye, ka to ka waajuli kɛ ni an ka waajulikɛ kulu mɔgɔw ye, o kɛli bɛna nɔgɔya an bolo. Yala fɛn dɔ bɛ yen, an bɛ se ka min fisaya an ka cidenyabaara la wa? N’o don, i bɛ se k’a ɲini i ka waajulikɛ kulu mɔgɔ dɔ fɛ a k’i dɛmɛ (Ntalenw 1:5; 27:17 kalan). I ka laɲini ɲɛfɔ i ka waajulikɛ kulu ɲɛminɛbaga ye. Siga t’a la ko a bɛna se ka i dɛmɛ i ka i ka laɲini dafa. I bɛ se ka dɛmɛ ɲini i ka waajulikɛ kulu mɔgɔ tɔw fana fɛ. Balimamuso Heather, ale min ye mɔgɔ ye kuma ka gɛlɛn min bolo, a ye o de kɛ. A ko: “Ne y’a ɲini tutigɛbaga dɔ fɛ a ka ne dɛmɛ walisa ne k’a dɔn ne bɛ se ka segin-ka-bɔnyew kɛ cogo min na ne ka waajulibaara kɔnɔna na. Kanuya ni ɲumaya tun b’a la, wa a tun bɛ waati ta walisa ka bɔ ni ne ye tuma bɛɛ waajulibaara la. O la, ne sera ka to ka segin-ka-bɔnyew kɛ ne ka waajulibaara la, fo ka bibulukalan daminɛ u dɔ la kelen kun yɛrɛ. Ne ye dɛmɛ ɲini a fɛ min kɛ, o diyara ne ye kosɛbɛ ka d’a kan sisan, ne bɛ ka nisɔndiya sɔrɔ ne ka waajuli baara la kokura.” Tiɲɛ yɛrɛ la, an bɛ se ka an ka waajulikɛ kulu kɔkɔrɔdon sira caman fɛ.

I KA WAAJULIKƐ KULU BƐ SE KA I DƐMƐ COGO MIN NA

11-12. I bɛ se ka dɛmɛ jumɛn de sɔrɔ ka bɔ i ka waajulikɛ kulu la alako ta fan fɛ? Misali dɔ fɔ.

¹¹ An bɛ dɛmɛ min sɔrɔ ka bɔ an ka waajulikɛ kulu la alako ta fan fɛ. An bɛɛ kelen-kelen bɛ se ka nafa sɔrɔ ka bɔ an ka waajulikɛ kulu la alako ta fan fɛ. Misali la, Jehova bɛ mɔgɔ minnu kanu kosɛbɛ i n’a fɔ, muso cɛ salenw, falatɔw ani maakɔrɔbaw, waajulikɛ kulu ɲɛminɛbaga bɛ dɛmɛ kɛrɛnkɛrɛnnen lase olu ma (1 Tes. 2:8; Yak. 1:27). Wa, ikomi an ni an ka waajulikɛ kulu mɔgɔw bɛ to ka waajuli kɛ ɲɔgɔn fɛ tuma bɛɛ, o b’a to an yɛrɛw bɛ kɛ weleweledalaw ani kalanbaga ɲumanw ye. Balimakɛ batiselenw, olu fana bɛ dɛmɛ sɔrɔ walisa u ka se ka baara caman kɛ Jehova ka jɛkulu kɔnɔ sini.—1 Tim. 3:10.

¹² Balimamuso Wendy, kuma tun kɛra min kan barokun in kɔnɔ, ale ye nafa min sɔrɔ ka bɔ a ka waajulikɛ kulu la, an ka o lajɛ. A y’a fɔ ko: “Ikomi tiɲɛ tun man di ne fa ye, ne ba tun tɛ se ka bɔ tuma bɛɛ ni an ka waajulikɛ kulu mɔgɔw ye wikɛniw fɛ. Nka, ne kɔni tun bɛ se ka o kɛ ka da a kan yamaruya tun dira ne ma ka o kɛ. Balimamuso piyɔniye dɔ min tun ye mɔgɔkɔrɔba ye, a ye i mago don ne la. Wa, a tun bɛ waajuli kɛ ni ne ye tuma bɛɛ. A ye ne dɛmɛ walisa ne ka ne ka waajuli kɛcogo fisaya ani ka caman kɛ jɛkulu kɔnɔ. Ne ka waajulikɛ kulu ɲɛminɛbaga ye laadilikan minnu di ne ma ni kanuya ye ka bɔ Bibulu kɔnɔ, ne hakili bɛ olu la hali bi, wa o bɛ ka ne dɛmɛ ne ka ɲɛnamaya kɔnɔ hali bi.”

13. An bɛ nafa jumɛn de sɔrɔ n’an bɛ an ka waajulikɛ kulu kɔkɔrɔdon? (Ja min bɛ ɲɛ fɔlɔ kan, o fana lajɛ).

¹³ An bɛ dɛmɛ min sɔrɔ ka bɔ an ka waajulikɛ kulu la dususaalo ko ta fan fɛ. Jɛɲɔgɔnya ɲuman bɛ kɛ an ni an ka waajulikɛ kulu mɔgɔw ni ɲɔgɔn cɛ, ni an bɛ “ɲɔgɔn dɛmɛ” waajulibaara la (Fil. 1:27). Kuma man nɔgɔn minnu ma, walima mɔgɔ minnu bɛ maloya jama cɛ la, ka kɛ waajulikɛ kulu fitinin kɔnɔ, o bɛ se ka u dɛmɛ u ka teriya don nɔgɔya la u ni u ka waajulikɛ kulu mɔgɔw ni ɲɔgɔn cɛ (2 Kɔr. 6:13). Ni gɛlɛyaw bɛ an kan, misali la, n’an man kɛnɛ, n’an fari fagalen don, walima ni an dusu kasilen don an diyanyemɔgɔw ka saya kosɔn, an bɛ se ka dɛmɛ sɔrɔ ka bɔ an ka waajulikɛ kulu mɔgɔw yɔrɔ (1 Tes. 5:14). Siga t’a la ko, an mago bɛna kɛ teri sɛbɛw la an bɛ se ka an jigi da minnu kan don nataw la. (Mat. 24:21). A bɛna nɔgɔya an bolo ka an ka gɛlɛyaw kun ni an b’a dɔn ko an bɛ se k’an jigi da an balimaw ka dɛmɛ kan, olu minnu bɛ an kanu.—Nt. 17:17.

14. Kasaara waati la walima ni ko dɔ cunna an kan, an bɛ dɛmɛ jumɛn de sɔrɔ ka bɔ an ka waajulikɛ kulu la?

¹⁴ An bɛ dɛmɛ min sɔrɔ ka bɔ an ka waajulikɛ kulu la ni kasaara walima ko dɔ cunna an kan. An mago bɛ se ka kɛ furakɛli teliman na. Fiɲɛbana walima kasaara ko dɔ fana bɛ se ka kɛ an ka yɔrɔ la. Famaw fana bɛ se ka an tɔɔrɔ walima wariko gɛlɛya bɛ se ka kɛ an ka yɔrɔ la. O ko suguw mana kɛ, an mago bɛ dɛmɛ min na, an b’o sɔrɔ ka bɔ an ka waajulikɛ kulu yɔrɔ. Misali la, jɛkulu bɛɛ kelen-kelen kɔnɔ, jɛkulu ka baara komite mɔgɔw, olu ni waajulikɛ kulu ɲɛminɛbagaw bɛ baara kɛ ɲɔgɔn fɛ walisa balima minnu mago bɛ dɛmɛ kɛrɛnkɛrɛnnen dɔ la, u ka se ka o lase u ma. Denbaya minnu bɛ u ka waajulikɛ kulu kɔnɔ, waajulikɛ kulu ɲɛminɛbagaw de bɛ a ɲini ka u yɔrɔ dɔn ani k’a dɔn u mago bɛ dɛmɛ kɛrɛnkɛrɛnnen min na furakɛli ko ta fan fɛ, dumuni, ji, siyɔrɔ ani fini ko ta fan fɛ. U mana o kunnafɔni bɛɛ sɔrɔ, u bɛ se ka dɛmɛ lase u ma joona. An ka waajulikɛ kulu bɛ dɛmɛ kɛrɛnkɛrɛnnen min lase an ma ni kasaara walima ko dɔ cunna an kan, o ye nisɔndiya koba de ye!

15. Jehova batobagaw bɛɛ ka laɲini ye mun de ye?

¹⁵ Iko an y’a ye cogo min na, Jehova ka jɛkulu ye denbaya ye min ka bon kosɛbɛ. Sankolo la, mɛlɛkɛ miliyɔn caman, an bɛ se k’a fɔ yɛrɛ miliyari caman, de bɛ ka Jehova bato kantigiya la. Dugukolo kan bi, an ye mɔgɔ miliyɔn kɔnɔntɔn ni kɔ de ye minnu bɛ ka Jehova bato. Wa don o don, dɔ de bɛ fara an kan (Zak. 8:23; Jir. 5:11). Sankolo la wo, dugukolo kan wo, Jehova batobagaw b’a fɛ hadamadenw bɛɛ ka se ka a ka Masaya kibaru duman mɛn (Jir. 14:​6, 7). O la, an ka ta’a fɛ ka nafa sɔrɔ ka bɔ an ka waajulikɛ kuluw la, ka da a kan olu de sababu fɛ, an bɛ se ka ta’a fɛ ka Jehova tanu ni an dusukun bɛɛ ye.—Zab. 111:1.