Kanpaɲi kɛrɛnkɛrɛnnen walasa ka Bibulukalanw daminɛ Sɛtanburukalo la

Sɛtanburukalo la, an bɛna cɛsiribaw kɛ walasa ka Bibulukalanw kofɔ denbayaw bɛɛ ye, an kɛtɔ ka baara kɛ ni Ɲɛnamaya kɛ nisɔndiya la fo badaa! gafenin ye. Weleweledalaw bɛ se k’a sugandi ka kɛ tutigɛbaga farankanw ye ka lɛrɛ 30 kɛ. An bɛna nin kanpaɲi kɛrɛnkɛrɛnnen in kɛ cogo jumɛn na?

• Ɲɔgɔnye fɔlɔ la: Baara kɛ ni gafenin ɲɛ 16nan ye walasa ka baro nege don i barokɛɲɔgɔn la, ani k’a ɲini ka Bibulukalan kɛcogo jira a la. Mɔgɔ minnu tun y’a jira ko tiɲɛ ko ka di u ye ani i ka segin-ka-bɔnyew, i hakili to olu la. Hali n’a y’a sɔrɔ ko u tun banna ka Bibulukalan kɛ, a bɛ se ka kɛ ko an ka Bibulukalan kɛcogo kura in ani an ka gafenin kura in ko bɛna diya u ye. An man kan ka gafeninw to so kɔnɔ ni mɔgɔ tɛ yen. An man kan fana ka u don lɛtɛrɛw kɔnɔ ka di mɔgɔw ma minnu ma a jira fɔlɔ ko tiɲɛ ko ka di u ye. Jɛkulu ka baara komite bɛ se ka lajɛ farankanw labɛn waajuli kama o kalo kɔnɔ.

• Cogoya wɛrɛw: Ni aw ka jɛkulu bɛ baara kɛ ni prezantuwari ye, a’ye Ɲɛnamaya kɛ nisɔndiya la fo badaa! gafenin jira o kan. Mɔgɔ minnu bɛ u magon don nin gafenin in na, a’y’a jira olu la, ko ni gafenin kelen dira u ma, Bibulukalan fana bɛ se ka kɛ u kun fu la. Bibulukalan kɛcogo jira a tigi la teliya la o baro sen fɛ, walima kow sigi sen kan walasa ka o kɛ waati wɛrɛ la. Baara lakɔlɔsibaga bɛ se ka labɛnw kɛ walasa weleweledala minnu bɛ se kosɛbɛ, olu ka taa baaradaw la aw ka waajulikɛyɔrɔ la ka Bibulukalan kofɔ mɔgɔw ye. I baarakɛɲɔgɔnw ani i bɛ seereya di mɔgɔ minnu ma senfɛ seereya hukumu kɔnɔ, i bɛ se fana ka Bibulukalan kofɔ olu ye.

Yesu y’a fɔ an ye ko, an ka mɔgɔw ‘kɛ ale ka kalandenw ye,’ “ka u kalan”. (Matiyu 28:19, 20) Nin kanpaɲi kɛrɛnkɛrɛnnen in ka an dɛmɛ ka o kuntilenna dafa an kɛtɔ ka baara kɛ ni Ɲɛnamaya kɛ nisɔndiya la fo badaa! gafenin ye!