“Tugu a sen nɔ na”

1. An bɛ se ka kɛ cidenyabaarakɛlaw ye minnu bɛ nɔ bɔ cogo di?

¹ Yesu tun ma don Yahutudiinɛ karamɔgɔw ka lakɔli la, o n’a ta o ta, tariku kɔnɔna bɛɛ la, ale de kɛra cidenyabaarakɛla bɛɛ la belebele ye. An bɛ barika da Ala ye ko Yesu ka cidenyabaara maana maralen tora an ka nafa kama. Walisa an ka kɛ cidenyabaarakɛlaw ye minnu bɛ nɔ bɔ, fo an ka “tugu a sen nɔ na.”—1 Pi. 2:21.

2. Mun bɛna an dɛmɛ ka kanuya sɛnɛ an dusukun na, kanuya min bɛ i ko min tun bɛ Krisita dusukun na ka ɲɛsin mɔgɔw ma?

² An k’a jira ko an bɛ mɔgɔw kanu: K’i mago don mɔgɔw la ni kanuya ye, o de ye Yesu bila ka mɔgɔw dɛmɛ. (Mar. 6:30-34) Mɔgɔ caman bɛ an ka waajulikɛyɔrɔ la minnu bɛ “ka tɔɔrɔ” wa, u magoba bɛ tiɲɛ na. (Rom. 8:22) U bɛ gɛlɛyajugu min kɔnɔ, ani Jehowa b’a mago don u la ni kanuya ye cogo min na, n’an bɛ miiri o kow la, o bɛna an bila ka taa a fɛ waajuli la. (2 Pi. 3:9) Ka fara o kan, mɔgɔw ka teli kosɛbɛ ka sɔn an ka cikan ma ni u b’a ye ko an bɛ an mago don u la tiɲɛ na.

3. Yesu ye cogo jumɛnw sɔrɔ ka kibaru duman fɔ mɔgɔw ye?

³ Ni cogo b’i bolo tuma o tuma, i ka kuma: Yesu tun bɛ cogo sɔrɔ tuma bɛɛ ka kibaru duman fɔ mɔgɔw ye. (Mat. 4:23; 9:9; Yuh. 4:7-10) O cogo kelen na, an fana ka kan k’an labɛn walisa ka kuma tiɲɛ kan n’an bɛ ka an ka don o don baaraw kɛ. Dɔw bɛ Bibulu ni sɛbɛnw to u bolo kɔrɔ walisa u ka se ka seereya kɛ u ka baara kɛyɔrɔ la, n’u bɛ mobili kɔnɔ ka taa yɔrɔ dɔ la, n’u bɛ ka sanni kɛ walima o ko ɲɔgɔnna wɛrɛw la.

4. An bɛ se ka Masaya kɛ an ka waajuli kumakun ye cogo jumɛn na?

⁴ I sinsin Masaya ko kan i ka cidenyabaara kɔnɔna na: Masaya kibaru duman tun ye Yesu ka waajuli kumakun ye. (Luka 4:43) Hali ni an bɛna fɔlɔ ka min fɔ, o sinnen tɛ Masaya ko ma, o n’a ta o ta, an b’a to an hakili la ko an ka kan ka an barokɛɲɔgɔn dɛmɛ a k’a ye ko an mago bɛ Masaya la. Hali n’an b’a fɔ ko cogoya jugu minnu bɛ diɲɛ kɔnɔ olu b’a jira ko an bɛ laban donw na, o bɛɛ n’a ta, an bɛ min fɔ kɛrɛnkɛrɛnnenya la, o ye hɛrɛ kibaru duman de ye.—Rom. 10:15.

5. Walisa an ka cidenyabaara ka nɔ bɔ, Bibulu jɔyɔrɔ ka kan ka kɛ jumɛn ye?

⁵ An ka baara kɛ ni Ala ka Kuma ye walisa ka an ka kumaw kɔkɔrɔdon: Yesu ka cidenyabaara kɔnɔna bɛɛ la, a ye baara kɛ ni Sɛbɛnniw ye walisa ka a ka kalan kɔkɔrɔdon. A ma mɔgɔw kalan fɛn si la min tun bɛ bɔ a yɛrɛ la. (Yuh. 7:16, 18) A tun bɛ balo Ala ka Kuma de la, k’o waleya ale yɛrɛ kan tuma min na Sitanɛ y’a kɔrɔbɔ. (Mat. 4:1-4) Walisa an ka se ka mɔgɔw kalan cogo la min bɛ nɔ bɔ, an ka kan ka Bibulu kalan don o don, wa, k’o waleya. (Rom. 2:21) N’an bɛ ɲininkaliw jaabi cidenyabaara kɔnɔna na, an ka kan k’a jira Bibulu bɛ an ka kuma fɔlenw kɔkɔrɔdon cogo min na, wa, an k’an tilen k’o kalan Bibulu kɔnɔ, n’a bɛ se k’a kɛ tuma o tuma. An b’a fɛ an barokɛɲɔgɔn k’a ye ko an tɛ ka an yɛrɛ hakililaw fɔ a ye, nka ko an ka kumaw sinsinnen bɛ tigitigi Ala ka miiriyaw de kan.

6. Yesu ye mun de kɛ walisa a ka kumaw ka don a lamɛnbagaw dusukunw la?

⁶ N’i bɛ mɔgɔw kalan, a kɛ cogo la min bɛ don mɔgɔ la: Garadiw ko: “Mɔgɔ si ma kuma i ko nin cɛ abada!” (Yuh. 7:46) U ye o kuma fɔ Yesu de kan tuma min na sarakalasebaga kuntigi ni Farisiɛnw y’u ɲininka kun min na u ma Yesu minɛ. Ni Yesu tun bɛ mɔgɔw kalan, a tun tɛ kunnafoniw dɔrɔn di u ma. A tun bɛ mɔgɔw kalan cogo la min tun bɛ don u la. (Luka 24:32) A tun bɛ misaliw di minnu tun bɛ mɔgɔw ka don o don kow kan, walisa ka u dɛmɛ k’a kumaw faamu. (Mat. 13:34) Yesu ma a lamɛnbagaw tunun ni kunnafoniw ye minnu tun ka ca fo ka dama tɛmɛ. (Yuh. 16:12) A tun bɛ mɔgɔw ɲɛsin Ala de ma, a tun tɛ u ɲɛsin ale yɛrɛ ma. An fana bɛ se ka kɛ karamɔgɔ ɲumanw ye i n’a fɔ Yesu tun ye karamɔgɔ ɲuman ye cogo min na, nin dɔrɔn fɛ, n’an ‘b’an janto mɔgɔw kalanni la.’—1 Tim. 4:16.

7. Munna Yesu taara a fɛ a ka cidenyabaara la?

⁷ Taa a fɛ hali ni mɔgɔw tɛ u mago don i ka kumaw la ani ni u bɛ i kɛlɛ: Hali ni Yesu tun ye kabako caman kɛ, mɔgɔ caman ma a lamɛn. (Luka 10:13) Hali Yesu somɔgɔw yɛrɛ tun b’a miiri ko “a hakili wulila.” (Mark. 3:21) O bɛɛ n’a ta Yesu taara a fɛ a ka baara la. Hakili ɲuman tora a la, bawo a tun dalen b’a la tigitigi ko a tun bɛ min fɔ, o ye tiɲɛ ye, wa, k’o tiɲɛ tun bɛ se ka mɔgɔw hɔrɔnya. (Yuh. 8:32) Jehowa ka dɛmɛ sababu fɛ, an fana jɔlen b’a kan ka taa a fɛ an ka baara la.—2 Kɔr. 4:1.

8, 9. Kibaru duman nafa kosɔn, cogo jumɛn na an bɛ se ka jɛn fɛnw kɔ walisa ka Yesu ladege?

⁸ Jɛn ka kan ka kɛ fɛn minnu kɔ, o kɛ walisa ka se k’i sen don cogo dafalen na cidenyabaara la: Yesu tun bɛ se ka bolofɛnw sɔrɔ minnu tun bɛna a ka ɲɛnamaya diya ani ka o nɔgɔya a bolo. Nka, a jɛnna olu sɔrɔli kɔ a ka cidenyabaara kosɔn. (Mat. 8:20) A tun y’a cɛsiri ka waajuli kɛ ni a barika bɛɛ ye, tuma dɔw la fo dibi dontuma na. (Mark. 6:35, 36) Yesu tun b’a dɔn ko waati dansigilen de tun b’a bolo walisa k’a ka baara kɛ. Ikomi “waati surunyara,” an yɛrɛ fana ka kan ka jɛn fɛn dɔw kɔ i n’a fɔ an ka waati, an sekow, an bolofɛn ani an fanga, ka olu bɛɛ don an ka baara la walisa ka Yesu ladege.—1 Kɔr. 7:29-31.

⁹ San kɛmɛ fɔlɔ Kretiɛnw tun ye cidenyabaarakɛla ŋanaw ye bawo Yesu de tun ye u dege. (Kɛw. 4:13) An fana bɛ se ka an ka cidenyabaara kɛ k’a dafa ni an bɛ Yesu ladege ale min kɛra cidenyabaarakɛla bɛɛ la belebele ye tariku kɔnɔna bɛɛ la.—2 Tim. 4:5.