Waajuli baara bɛɛ la belebele min ɲɔgɔn ma deli ka kɛ fɔlɔ diɲɛ kɔnɔ

A ka ca ni san 100 ye ko Jehowa Seerew kolabɛnna walisa ka kibaru duman jɛnsɛn. (1 Kɔr. 9:23) O waajuli baara bɛɛ la belebele kɔnɔna na min ɲɔgɔn ma deli ka kɛ fɔlɔ diɲɛ kɔnɔ, an ye o kibaru duman fɔ kan kɛmɛ caman na. An ye o fɔ fana jamanaw na minnu ka ca ni 230 ye. (Mat. 24:14) Nka munna o baara ka kan ka kɛ? Wa, o sera ka kɛ dugukolo yɔrɔ bɛɛ la cogo di?

Wideyo min tɔgɔ ye ko Les Témoins de Jéhovah organisés pour prêcher la bonne nouvelle (Jehowa Seerew kolabɛnna walisa ka kibaru duman fɔ), o bɛ o ɲininkaliw jaabi. Cogo di? Kunnafoni pereperelatigɛlen fɛ an ka diɲɛ kɔnɔ baara ɲɛ caman kan. N’i bɛ ka wideyo lajɛ, i ka jateminɛ kɛ nin ɲininkaliw kan: (1) An ka baara kolabɛnnen bɛ ani a ɲɛminɛnen bɛ cogo di? (2) Baara minnu ɲɛsinnen bɛ an ka gafew sɛbɛnniko ma, u bayɛlɛmaliko ma kan wɛrɛw la, fotoko ni fɛnw ɲɛgɛnniko ma, ani wideyo ni fɛn lamɛnta kow ma, o baaradaw bɛɛ lajɛlen jɔyɔrɔw ye mun ye kibaru duman jɛnsɛnni na? (3) An ka gafedilanyɔrɔ bonyali ani baara minnu ɲɛsinnen bɛ an ka sɛbɛnw ciliko ma, olu kɛkun ye mun ye? (Yuh. 17:3) (4) Sɛbɛn hakɛ jumɛn bɛ bɔ san o san? (5) An ka sɛbɛn minnu sinsinnen bɛ Bibulu kan, olu ye mun tiimɛ? (Heb. 4:12) (6) Ɲɛko ni tuloko bɛ mɔgɔ minnu na, mun bɛ kɛ walisa ka olu dɛmɛ? (7) Wari min bɛ kɛ k’an ka baara kɔkɔrɔdon, o bɛ bɔ min? (8) Service d’information hospitalier (baarada min bɛ kunnafoni lajɛ furakɛli ni opereli ko la jolidon tɛ min na, ka tila k’olu lase Jehowa Seerew ma), le Bureau de service (baarada min ɲɛsinnen bɛ waajuli baara koɲɛ ma diɲɛ bɛɛ kɔnɔ), Bureau de l’assemblée (baarada min ɲɛsinnen bɛ jamalajɛ kow ma), o baaradaw bɛ se k’an nafa cogo jumɛn na? (9) Ikomi i ye Jehowa Seere ye, nin wideyo ye dɔ fara i ka waleɲumandɔn kan nin kow la cogo di (a) cɛsiri min bɛ kɛ Jehowa ka jɛkuluba fɛ kibaru duman waajuli la? (b) Betɛli so minnu ka ca ni 100 ye diɲɛ kɔnɔ? (c) kalan min bɛ kɛ lakɔlɔsibagaw ni misiyɔnɛriw kun? (d) nafa min b’a la ka an ka tile daminɛ ni Bibulu tɛmɛsira lajɛli ye ani k’an ka dɔgɔkun kelen-kelen bɛɛ lajɛw labɛn? (e) nafa minnu b’a la ka na an ka Kretiɛn jamalajɛw la? (f) Alijinɛ min bɛna kɛ dugukolo kan, o kɔrɔ bɛna kɛ mun ye? (Esa. 11:9) (g) e yɛrɛ sen donni sumantigɛ baara la min bɛ ka taa a fɛ?—Yuh. 4:35.

I ye nin wideyo jira i somɔgɔw, i dɔnbagaw, i ka segin-n-kabɔnyew ani i ka Bibulu kalandenw na tuma min na, i ye mun ye olu kɛcogo la min ɲɛna? I kana mɛn k’a sɔrɔ i ma nin wideyo ani kibaru duman kuma fɔ mɔgɔ wɛrɛ ye.—Mat. 28:19, 20.