ƝIninkali Jaabi

◼ Yala a bɛnnen don Jehowa Seere dɔ ka fura kɛ dɔgɔtɔrɔso la walima a k’a bila yɔrɔ la min b’a mago don cɛkɔrɔbaw ni musokɔrɔbaw la, n’o dɔgɔtɔrɔso walima n’o yɔrɔ ɲɛminɛnen bɛ diinɛ jɛkulu dɔ fɛ wa?

Diinɛ jɛkulu caman bɛ dɔgɔtɔrɔsow ɲɛminɛ, walima u bɛ yɔrɔw ɲɛminɛ, cɛkɔrɔbaw ni musokɔrɔbaw bɛ ladon minnu na walisa ka mɔgɔw fura kɛ walima k’u mago don mɔgɔw la bana mɛnnen bɛ minnu na. Tuma caman na, o yɔrɔ suguw ma sigi Babilonɛba ka ɲɛtaa kama. (Jir. 18:2, 4) I b’a sɔrɔ u sigira kun fɔlɔ min na, o ye ka wari don diinɛ jɛkulu dɔ kun. Bi, diinɛ tɔgɔ dɔrɔn de bɛ o dɔgɔtɔrɔso dɔw la bawo u sigira a mɛnna diinɛ jɛkulu dɔ fɛ. Nka, dɔgɔtɔrɔso dɔ wɛrɛw la, hali bi diinɛ ɲɛmɔgɔw de bɛ u mago don baara caman na.

Ni Jehowa seere dɔ ka kan ka fura kɛ dɔgɔtɔrɔso la walima ka bila yɔrɔ la cɛkɔrɔbaw ni musokɔrɔbaw bɛ ladon yɔrɔ minnu na, ale yɛrɛ de ka kan k’a latigɛ ni a bɛna taa yɔrɔ la min ɲɛminɛni bɛ se ka kɛ diinɛ jɛkulu dɔ bolo. Jehowa seere dɔ dusukun bɛ se k’a bila k’o kɛ, nka Jehowa seere dɔ wɛrɛ dusukun bɛna a bali k’o kɛ. (1 Tim. 1:5) Tuma dɔw la, ko dɔ bɛ yen minnu bɛ se k’an bila ka fɛnw latigɛ cogo dɔ la, sani ka olu latigɛ cogo wɛrɛ la. O kosɔn, a ka ɲi ka o kow jateminɛ.

Misali la, a bɛ se ka kɛ ko dɔgɔtɔrɔso walima cɛkɔrɔbaw ni musokɔrɔbaw bɛ ladon yɔrɔ min na, ni diinɛ tɔgɔ bɛ o dɔgɔtɔrɔso walima o yɔrɔ la, k’olu dɔrɔn de ka surun an na. Walima ni dɔgɔtɔrɔso wɛrɛ ka surun an na, i b’a sɔrɔ diinɛ tɔgɔ bɛ dɔgɔtɔrɔso min na, o de dɔnnen bɛ yɔrɔ ye min ka ɲi kosɛbɛ. A bɛ se ka kɛ fana ko diinɛ tɔgɔ bɛ o dɔgɔtɔrɔso min na, baarakɛminɛn ɲɛnamaw bɛ o dɔgɔtɔrɔso kelenpe dɔrɔn de la walisa ka bana kɛrɛnkɛrɛnnen dɔ fura kɛ, walima a bɛ se ka kɛ ko dɔgɔtɔrɔ min b’i fura kɛ walima min bɛna i opere, o bɛ se k’a ka baara kɛ o yɔrɔ dɔrɔn de la. Ka fara o kan, ikomi i ye Kretiɛn ye, hakilila min bɛ i la joli ko la, tuma dɔw la diinɛ tɔgɔ bɛ dɔgɔtɔrɔso minnu na, olu de bɛ se ka sɔn o ma, k’a sɔrɔ gofɛrɛnɛman ka dɔgɔtɔrɔsow walima dɔgɔtɔrɔso wɛrɛ min ye mɔgɔ dɔ ta ye, olu tɛna sɔn i hakilila ma. O kosɔn, ko dɔw bɛ yen an ka kan ka minnu jateminɛ, n’an bɛna a latigɛ walisa k’a dɔn an bɛna taa dɔgɔtɔrɔso min na.

N’i y’a latigɛ ka taa dɔgɔtɔrɔso walima yɔrɔ la min b’a mago don cɛkɔrɔbaw ni musokɔrɔbaw la, ni diinɛ tɔgɔ bɛ u la, i bɛ se ka o ko mafilɛ i n’a fɔ baara min bɛ kɛ i ye o yɔrɔ la n’i b’o sara. I bɛ se fana k’o diinɛ jɛkulu mafilɛ i n’a fɔ baarakɛda dɔ min bɛ wari ɲini a ka baara kɛlen kun kɔrɔ. Wa, ka taa o baarakɛda sugu la walisa o ka baara dɔw kɛ i ye i bɛ minnu sara, o kɔrɔ tɛ ka sin ka bolomafara di i yɛrɛ sago la walisa ka diinɛ nkalonma dɔ kɔkɔrɔdon. I ye fɛn dɔ de san walima i ye baara kɛlen dɔ de sara di.

Ikomi i ye Kretiɛn ye, a jɛlen don ko o ko suguw la, i ka kan k’a ɲini k’a dɔn tigitigi ko i tɛ ka i sen don bato fu ka ko dɔw la. Ka fara o kan, mɔgɔ minnu bɛ baara kɛ o yɔrɔw la, walima minnu bɛ na bɔ o yɔrɔ la, olu bɛ wele ni tɔgɔ minnu ye diinɛ sira la, i n’a fɔ “Mɔnpɛrɛ” walima “Masɛri,” i man kan ka olu fɔ. (Mat. 23:9) I ka kan k’a ɲini k’a dɔn tigitigi, ko i bɛna min kɛ, o tɛ fɛn wɛrɛ ye fo ka baarakɛda dɔ ka baara kɛlen sara a ye i furakɛliko la, wa ko fɛn wɛrɛ si tɛ o kɔ.

N’i ladala dɔgɔtɔrɔso la, i bɛ se k’a fɔ dɔgɔtɔrɔso mɔgɔw ye ko i ye Jehowa seere ye, wa, ko i b’a fɛ jɛkulu maakɔrɔw ka to ka na bɔ i ye. O bɛn’a to i bɛ dɛmɛ sɔrɔ alako ta fan fɛ i ladali kɔnɔna bɛɛ la dɔgɔtɔrɔso la.—1 Tes. 5:14.

Cɛkɔrɔbaw walima musokɔrɔba minnu bilala yɔrɔ la min bɛ u mago don u la, olu somɔgɔ minnu ye Jehowa seerew ye ani jɛkulu maakɔrɔw ni jɛkulu kɔnɔmɔgɔ tɔw ka kan k’o mɔgɔw dɛmɛ alako ta fan fɛ, kɛrɛnkɛrɛnnenya la n’a y’a sɔrɔ u bɛ yɔrɔ la min ɲɛminɛnen bɛ diinɛ jɛkulu dɔ fɛ. N’an b’an jan to o ko la, o bɛna dusu don kosɛbɛ o mɔgɔkɔrɔbaw kɔnɔ, wa o bɛna u bali ka u sen don diinɛ kow la k’a sɔrɔ u m’o dɔn, walima k’u sen don u ka seliw walima o ko ɲɔgɔnna wɛrɛw la minnu bɛ kɛ o yɔrɔw la.

K’a sɔrɔ o kow b’an hakili la, n’an bɛna a latigɛ walisa k’a dɔn n’an bɛna taa dɔgɔtɔrɔso walima yɔrɔ la min b’a mago don cɛkɔrɔbaw ni musokɔrɔbaw la, n’o ɲɛminɛnen bɛ diɲɛ jɛkulu dɔ fɛ, ko minnu bɛɛ sen bɛ o la, an kelen-kelen bɛɛ ka kan ka olu jateminɛ.—Gal. 6:5.