Masaya so ladonni —An ka bato senuma kɔnɔko nafama dɔ
1. San wolonwula tɛmɛnen kɔnɔna na, baara belebele jumɛn de kɛra, ani mun tora ka kɛ?
1 San wolonwula tɛmɛnen kɔnɔna na, Farafinna kɔnɔ, Masaya so 7.137 ɲɔgɔn de jɔra walima u jɔcogo yɛlɛmana. Masaya so 13 jɔra Senegal, 5 Mali la, 2 Gine-Bisawo, ani 2 jɔra Ganbi. Masaya So jɔkulu ani mɔgɔw bɛɛ minnu y’u dɛmɛ, an bɛ olu bɛɛ waleɲumandɔn tiɲɛ na u ka baara gɛlɛn na. Baara belebele de kɛra, wa, wariba de donna o da fɛ walisa ka yɔrɔw di an ma an ka Kretiɛn lajɛw kama, an lafiyalen bɛ minnu kɔnɔ, minnu ka ɲi, ani minnu cogo bɛnnen don lajɛw kama. O kosɔn, an bɛ se ka an ka waleɲumandɔn jira o ko la Masaya sow ladonni kɔkɔrɔdonni fɛ. An bɛ bato senuma kɔnɔko nafama in min kɛ Jehowa ye, an bɛ se ka o ko kɔkɔrɔdon cogo jumɛn na? — Jir. 7:15.
2. An ka kan ka mun miiri an ka Masaya so ko la, wa o bonya min b’an bolo, an kelen-kelen bɛɛ ka kan ka nafa jumɛn don o la?
2 An ka kan ka min miiri Masaya so ko la: An ka kan ka mun miiri Masaya so ko la? An ka kan ka Masaya so jate i ko Krisita ka “bolofɛn” minnu kalifara an ma jɔnkɛ dannamɔgɔ hakilima fɛ. (Mat. 24:42-47) O kosɔn, a ka kan ka kɛ bonya ye an bolo ka Masaya so koɲɛ kɔkɔrɔdon ni an ka wari ye, ka bɔ an yɛrɛ la fana ka dɛmɛ don walisa a saniyalen ka to, a ka to yɔrɔ ye min bɛ se k’a jira ani min minɛcogo ka ɲi. Masaya so kɔnɔna ani a kɛnɛmana bɛɛ ka kan ka Jehowa ka jɛkuluba jira cogo ɲuman na. O kosɔn, an b’a ɲini jɛkulu kɔnɔmɔgɔw bɛɛ fɛ u ka u yɛrɛ labila, ka baara kɛ ni u sekow ni u bolofɛnw ye ka se ka u ta kɛ kosɛbɛ walisa u ka Masaya so ka to yɔrɔ ye min ladonnen bɛ koɲuman. (Zab. 110:3) Bɛɛ ka kan ka kɛ baarakɛlaw ye minnu sɔnnen don, minnu bɛ baara kɛ i ko a ɲinina u fɛ cogo min na. (Zab. 133:1) Ka an jan to Krisita “bolofɛnw” na, o ka kan ka kɛ an bɛɛ kunkanko ye, denmisɛnw ni mɔgɔkɔrɔbaw bɛɛ dama ka kan o la. Maakɔrɔw ka kan ka kɛ ɲɛfɛ, ka jɛkulu kɔnɔmɔgɔw kalan u ka kan ka min miiri Masaya so ko la u ka misali ɲuman jirali fɛ, ani u ka kuma fɛ. —1Pi. 5:3.
3, 4. Baara jumɛnw ka kan ka kɛ: a) dɔgɔkun o dɔgɔkun? b) Kalo o kalo? c) San o san?
3 Kow bolodala cogo min na Masaya so ladonni kama: Jɔnkɛ dannamɔgɔ hakilima ye kunnafoniw di o kɛcogo kan, ka maakɔrɔw ni lakɔlɔsibaga taamakɛlaw kalan o kɛcogo la. U kalanna ko Masaya so ka kan ka saniya lajɛ kelen-kelen bɛɛ kɔfɛ, ko a yɔrɔ misɛnninw saniyali ka kan ka kɛ kalo o kalo, ani ko a saniyali belebele bɛ kɛ san o san. Ka Masaya so saniya lajɛ kelen-kelen bɛɛ kɔfɛ, o kɔrɔ ye ka a kɔnɔna kuuru bɛɛ furan, ani Masaya so filanan fana sen bɛ o la, ka ɲɛgɛnw ko, ka gɔngɔn bɔ banw walima sigilanw na, sɛbɛndiyɔrɔ ani kunnafoni-walan na ani ka ɲama bɛɛ bɔn walima ka buwati lankolonw bɛɛ fili. Jɛkulu kelen-kelen bɛɛ ka gafe kalan kulu kelen walima kulu fila bɛ se ka o saniyali baara kɛ dɔgɔkun o dɔgɔkun. Samiyɛ la, a bɛ se ka kɛ ko a wajibiyalen don cɛsiriba ka kɛ walisa Masaya so ka to yɔrɔ saniyalen ye.
4 Ka fara o kan, Masaya so saniyali min bɛ kɛ kalo o kalo, nin fɛnw sen bɛ o la: ka Masaya so dafɛla dilan ka ɲɛ, kogow, fenɛtiriw ani daw, kuran mɛnɛyɔrɔw ni u fagayɔrɔw, kankɔrɔtalan-minɛnw marayɔrɔ ani kuranjuruw, sɛbɛndiyɔrɔw, tɛgɛkoyɔrɔw, mɔgɔ bɛ sigi min kan n’i taara ɲɛgɛn na ani bolomafara buwatiw, olu bɛɛ ka kan ka saniya. Ni o saniyali baara banna, maakɔrɔ dɔ ka kan ka sɛbɛnfura lafa, saniyali baara kɛcogo ɲɛfɔlen bɛ min kan, ka a bolo nɔ bila o la, ka tila k’o ci comité de gestion (Masaya so kow ɲɛnabɔli komité) ma walima maakɔrɔkulu ma walisa k’a sɛmɛntiya ko Masaya so saniyali baara kɛra, k’u ladɔnniya fana ni u mago bɛ fɛnw na Masaya so saniyali baara kama, walima ni a yɔrɔ dɔ ka kan ni dilanni ye, walisa o kow ka ɲɛnabɔ joona. Ka fara o saniyali baara kan, siɲɛ kelen san kɔnɔ, Masaya so saniyaliba bɛ kɛ. Fɛn o fɛn minnu bolodala ka kɛ kalo o kalo saniyali baara la, o fɛnw kelen-kelen bɛɛ ka kan ka kɛ, ka fara Masaya so ladonni baara wɛrɛw kan, i n’a fɔ pɛntiri baaraw ani a fɛn misɛnnin minnu ka kan ka dilan. O saniyali baara belebele min bɛ kɛ siɲɛ kelen san kɔnɔ, jɛkulu minnu bɛ u lajɛ Masaya so kɔnɔ, olu bɛɛ bɛ se ka a boloda k’o saniyali baara kɛ tile damadɔw sani Hakilijigin ka kɛ.
5, 6. a) 2 Masakɛw 22:5, 6 ani Waajulikɛlaw 10:18 b’an kalan mun la? b) Sariyakolo min bɛ 2 Tile Kibaruw 24:5 la, an bɛ se k’o sirataama Masaya so ladonni la cogo jumɛn na?
5 Baara nafama wɛrɛ min sen bɛ Masaya so ladonni na, o ye ka teliya ka yɔrɔ tiɲɛnenw labɛn, a mana kɛ a yɔrɔ o yɔrɔ ye, walisa wariba kana bɔ kɔfɛ u dilanni na, ani farati minnu bɛ se ka sɔrɔ o yɔrɔw la, k’olu fana bali. Tiɲɛ don ko so barikama dɔ bɛ se k’a jɔ, nka san damadɔw o kɔfɛ, a bɛ se ka kɛ ko a ni dilanni ka kan. Jerusalɛm Alabatoso tun jɔra ni kabakuru girinma belebelew ye. Nka, san damadɔw o kɔfɛ, a yɔrɔ dɔw tun ka kan ka dilan, i n’a fɔ kogo pɛrɛndaw. (2 Mas. 22:5, 6) O kɔfɛ, masakɛ ye dusu don sarakalasebagaw kɔnɔ ko: “A’ ye taa Juda bɔnsɔn ka duguw la ka wari dɔ lajɛ Israɛl bɔnsɔn bɛɛ cɛma san o san, walisa aw ka Ala ka so tiɲɛ yɔrɔw dila. Ayiwa aw ka aw teliya ka o kɛ.” (2 Til. 24:5) An bɛ se k’o kɛcogo ladege bi cogo jumɛn na?
6 An ka Masaya so ladonni na, yɔrɔ minnu ka kan ka dilan, ni olu yera dɔrɔn, u ka kan ka dilan o yɔrɔnin bɛɛ la. Jɛkulu maakɔrɔw ani lakɔlɔsibaga taamakɛlaw bɛ sɛgɛsɛgɛli baaraw ɲɛminɛ, wa, fɛn o fɛn ka kan ka dilan, ka olu sɛbɛn, ka teliya k’o baara kɛ joona. O baara man kan ka bila ka Hakilijigin waati makɔnɔ. Aw ka aw hakili to a la ko: “Salaya de b’a to bili bon bɛ firi, ni min bolo tɛ baara kɛ, ji na don o tigi ka so kɔnɔ.” (Waaj. 10:18) I ko a sɔngɔ ka nɔgɔn kosɛbɛ ka nɔgɔ bɔ kogo pɛntirilenw la ni finikolon ani safunɛji ye ka tɛmɛ kogo kuuru bɛɛ pɛntirili kan kokura, o cogo kelen na, a sɔngɔ ka nɔgɔn kosɛbɛ fana ka kogo yɔrɔ pɛrɛnnen dilan ka tɛmɛ kogo binnen kuuru bɛɛ jɔli kan kokura. San 2003 Utikalo An ka Masaya Cidenyabaara ɲɛw 3-4 lajɛ.
7. Jɔni de ka kan ka kɛ ɲɛfɛ Masaya so ladonni ko la? O bɛna na ni mun ye?
7 An kelen-kelen bɛɛ bɛ se ka mun kɛ: Maakɔrɔw ni cidenyabaara magannaw kelen-kelen bɛɛ ka kan k’u sen don jɛkulu ka Masaya so saniyali ni a minɛcogo ɲuman baara bolodalenw bɛɛ la. Ni u bɛ o kɛ, u bɛ misali ɲuman min jira, jɛkulu bɛna tugu o kɔ. (Heb. 13:7) O bɛna bɛɛ bila ka u ka waati, u fanga, u seko ni u bolofɛnw don Masaya so saniyali ni a ladonni baara bolodalen na. U bɛna o jate i ko u ka bato senuma kɔnɔko dɔ Jehowa ye. (Mat. 22:39; 1 Kɔr. 16:1, 2) An dalen b’a la ko ni Masaya so tora minɛcogo ɲuman na i ko bato lakika kɛyɔrɔw, u bɛna bonya da Jehowa kan kabini sisan ani fo waati jan kɔnɔ.