Yɛlɛma ɲumanw La Tour de Garde ko la!
1 San daminɛ na ɲinan, jɛkuluw ye nin kibaruya mɛn: K’a daminɛ san 2008 Zanwuyekalo la, La Tour de Garde bɛna kɛ suguya fila ye. Kelen ɲɛsinnen bɛ an balimaw ma minnu ye Kretiɛnw ye, tɔ kelen ɲɛsinnen bɛ mɔgɔ tɔw bɛɛ ma. I bɛ se ka i yɛrɛ ɲininka nin na: Danfara jumɛn bɛna kɛ o sɛbɛn fila cɛ? Nafa jumɛnw b’a la ka sɛbɛn suguya fila kɛ? Yala an bɛ se ka sigi n’a ye ko fɛn kuraw bɛna kɛ u kɔnɔ wa?
2 U tɛ kelen ye sira minnu fɛ: Kalo tile fɔlɔ bɛna sɛbɛn La Tour de Garde min kan, o bɛna wele La Tour de Garde jirata foro cidenyabaara la. O barokun bɛɛ bɛna labɛn ka mɔgɔw to an hakili la minnu tɛ Jehowa Seerew ye. Kalo tile 15 bɛna sɛbɛn La Tour de Garde min kan, o bɛna wele La Tour de Garde sɛgɛsɛgɛta. O tɛna jira foro cidenyabaara la. Kalan bɛna kɛ barokun minnu kan kalo kelen kɔnɔ, olu bɛna sɔrɔ a kɔnɔ. Barokun wɛrɛ minnu nafa ka bon kɛrɛnkɛrɛnnenya la Kretienw kan minnu ye u yɛrɛbakun di Jehowa ma, olu fana bɛna sɔrɔ a kɔnɔ. La Tour de Garde jirata tɛna diya Jehowa Seerew dɔrɔn ye. Nka, mɔgɔ minnu tɛ Jehowa Seerew ye, minnu bɛ se ka sɔn Bibulu la, a bɛna diya olu fana ye kɛrɛnkɛrɛnnenya la. Réveillez-vous ! bɛna ɲɛsin tuma bɛɛ mɔgɔ sugu camanba ma. Olu la, mɔgɔw bɛ yen minnu tɛ Kretiɛn ye ani minnu bɛ u yɛrɛ ɲininka ni an ka dannakow ye tiɲɛ ye.
3 Nafa minnu b’a la ka sɛbɛn suguya fila kɛ: La Tour de Garde sɛgɛsɛgɛta kɔnɔ, kun t’a la tun ka daɲɛw kɔrɔ ɲɛfɔ i n’a fɔ “Tutigɛbaga,” walisa mɔgɔ minnu tɛ Jehowa Seere ye, olu ka se ka olu faamu. Kunnafoni bɛnnen fana bɛ se ka sɔrɔ a kɔnɔ minnu labɛnna kɛrɛnkɛrɛnnenya la Jehowa Seerew ye ani Bibulu kalandenw ye minnu taara ɲɛ kosɛbɛ alako ta fan fɛ. An dun bɛ se ka mun fɔ La Tour de Garde jirata ko la? Ikomi barokunw ni u sɛbɛncogo bɛna ɲɛsin mɔgɔ tɔw ma, o kosɔn, mɔgɔ min tɛ Jehowa seere ye, a ka kan ka diya o tigi ye ka La Tour de Garde jirata kalan, k’a ta a ɲɛ fɔlɔ la ka na a bila a ɲɛ laban ma. A jɛlen don ko Jehowa Seere kelen-kelen bɛɛ bɛna nafa sɔrɔ La Tour de Garde nimɔrɔ kelen-kelen bɛɛ kalanni na. Ikomi an bɛna La Tour de Garde kelen ani Réveillez-vous ! kelen dɔrɔn jira foro cidenyabaara la kalo o kalo, o la sa, kalo kelen mumɛ bɛna kɛ an bolo walisa ka gafeninw jiracogo nafamaw sɔrɔ.
4 Fɛn kura minnu bɛna sɔrɔ u kɔnɔ: A bolodala ka fɛn kura ɲuman dɔw kɛ La Tour de Garde jirata kɔnɔ. O fɛnw dɔ la kelen ye ko Bibulu kalansira minnu dɔnniya wajibiyalen don, a bɛna olu ɲɛfɔ cogo la min faamuyali bɛna nɔgɔya kosɛbɛ. A fɛn dɔ wɛrɛ ye ko a bɛna a jira Bibulu bɛ se ka denbayaw dɛmɛ cogo min na. Bibulu barokun wɛrɛw bɛna boloda denmisɛnw kama, u bɛna se ka kalan kɛ minnu kan. A nimɔrɔ kelen-kelen bɛɛ kɔnɔ, barokun dɔ bɛna sɔrɔ min bɛna Bibulu tɛmɛsira kɛrɛnkɛrɛnnenw jira, minnu bɛna kunnafoniw di an ma Jehowa jogoɲumanw kan.
5 An bɛ Jehowa deli a ka duba nin fɛɛrɛ tigɛlen kura ye La Tour de Garde ko la. Ala ka to o gafenin ani Réveillez-vous ! ka kɛ sababu ye ka kibaru duman lase mɔgɔ camanba wɛrɛ ma, minnu ka kan ni a ye.—Mat. 10:11.