“Kɔrɔbɔli bɛ kun mɔgɔ min na,” hɛrɛ bɛ o tigi ye

¹ Kretiɛnw bɛɛ bɛ kɔrɔbɔliw sɔrɔ. (2 Tim. 3:12) Kɔrɔbɔliw bɛ se ka kɛ banaw ye, walima diɲɛ gɛlɛya, walima kojugu dɔ kɛli nege ye, walima tɔɔrɔw ye mɔgɔw bɛ minnu da an kan. Kɔrɔbɔliw bɛ se ka kɛ ko caman wɛrɛ fana ye. Sitanɛ bɛ kɔrɔbɔli minnu da a kan, olu kun ye ka an senna sumaya an ka Kretiɛn cidenyabaara la, walima ka an bila an ka o kɛ bolokɔfɛko ye, walima yɛrɛ, k’an bila an ka an ka baara jɔ Jehowa ye. (Job 1:9-11) Ni an bɛ kɔrɔbɔliw kun, o bɛ hɛrɛ lase an ma cogo di?—2 Pi. 2:9.

² I yɛrɛ labɛn kɔrɔbɔliw kama: Jehowa y’a ka Tiɲɛ Kuma di an ma. Yesu ka ɲɛnamaya ni a ka kalansiraw bɛ o kɔnɔ. Ni an bɛ Yesu ka kumaw lamɛn, ani n’an bɛ tugu olu kɔ, o bɛna kɛ fɛn ye an bɛna an sinsin min kan, wa, an labɛnnen bɛna kɛ o cogo la kɔrɔbɔliw kama. (Luka 6:47-49). An bɛ fanga sɔrɔ nin fana fɛ—An balimakɛw ni an balimamuso minnu bɛ jɛkulu kɔnɔ, jɛkulu lajɛw ani sɛbɛn minnu sinsinnen bɛ Bibulu kan, ni olu dilanna jɔnkɛ dannamɔgɔ hakilima fɛ. Ka se ka Ala deli, o ye fɛn ye Ala ye min fana di an ma. O barika la, an bɛ se ka Ala deli tuma caman na.—Mat. 6:13.

³ Jehowa ye jigiya dɔ fana di an ma. Ni an bɛ an ka dannaya kologɛlɛya Jehowa ka layiduw la, an jigiya bɛna kɛ an dusukun na iko ‘banamini (n’o ye ko an jigiya bɛna kɛ iko negekuruba min bɛ kurun to yɔrɔ kelen kɔgɔji kan). A sigilen sinsinnen don.’ (Heb. 6:19) Bibulu sɛbɛnwaati la, kurun tun tɛ bɔ abada dankan na k’a sɔrɔ o negekuruba tɛ a la, hali ni sankolo cogo tun ka ɲi, ko san tɛna na ani ko fiɲɛ tɛ ka ci. Ni sanfiɲɛ tun balala ka wuli, ni negekuruba filila ji la, o tun bɛ se ka kurun bali a ka taa gosi dankan fara la. O cogo kelen na, ni an bɛ an ka dannaya kologɛlɛya Ala ka layiduw la kabini sisan, o bɛna an sabati gɛlɛyaw bɛna na an da la tuma min na i ko sanfiɲɛba. Gɛlɛyaw bɛ se ka bala ka na. A daminɛ na, sɔn kɛra Paul ni Barnabasi ka waajuli baara ma Lisitre. Nka, ko yɛlɛmana joona, Yahutu dɔw nali fɛ minnu tun bɛ waajulibaara kɛlɛ—Kɛw. 14:8-19.

⁴ Ka kow kun, o bɛ na ni hɛrɛ ye: Ni an bɛ taa a fɛ cidenyabaara la hali ni mɔgɔw b’an kɛlɛ, o b’a to an bɛ hakili lafiya sɔrɔ. Ni mɔgɔw bɛ miiri ko an ka kan ka lamaloya Krisita kosɔn, o b’an nisɔndiya. (Kɛw. 5:40, 41) Ni an bɛ kɔrɔbɔliw kun, o b’an dɛmɛ ka jogoɲumanw sɛnɛ an na i n’a fɔ majiginnenya, kanminɛni, ani ka kow kun, wa an bɛna o jogoɲuman sɛnɛ an na cogo dafalen na kosɛbɛ. (Dut. 8:16; Heb. 5:8: Yak. 1:2, 3). Ni an bɛ kow kun, o b’an dɛmɛ an ka an jigi da Jehowa kan, an ka an ka dannaya da a ka layiduw kan, ani an ka lakana ɲini ale kɔrɔ.—Nt. 18:10.

⁵ An b’a dɔn ko kɔrɔbɔliw ye waatininko de ye. (2 Kɔr. 4:17, 18) Kɔrɔbɔliw bɛ cogo di an ma k’a jira ko an bɛ Jehowa kanu fo ka se hakɛ min ma. Ni an bɛ kɔrɔbɔliw kun, an b’a jira ko Sitanɛ ye jalaki kuma minnu fɔ, ko olu tɛ tiɲɛ ye. O kosɔn, an bɛ ka min kɛ, an tɛna o dabila abada. “Kɔrɔbɔli bɛ kun mɔgɔ min na, o ye dubaden ye [walima o ye mɔgɔ ye hɛrɛ bɛ min ye], katuguni ni a tilennen sɔrɔla kɔrɔbɔli fɛ, Ala ye ɲɛnamaya masafugula min layidu ta a kanubaaw ye, a na o sɔrɔ.”—Yak.1:12.