Yala i bɛ se k’i ka waati boloda ka kɛɲɛ ni a ye wa?
1 Ikomi an ye Kerecɛnw ye, an sɔnna welekan ma ka kɛ “mɔgɔ ɲininaw” ye. (Mat. 4:19) I n’a fɔ mɔnikɛla, an ka mɔgɔɲini baara bɛna nɔ ɲɛnama bɔ ni an bɛ waati boloda ka waajuli kɛ, tuma min na mɔgɔw bɛ se ka sɔrɔ u ka so. Jamana caman na, tile waati bɛna janya ni sufɛla ye kalo nataw la. Mɔgɔ caman bɛna sɔrɔ u ka so wuladanin fɛ walima su daminɛ na. Tuma caman fana, ikomi u lafiyalen bɛ o waatiw la, u ka teli ka mɔgɔ kunbɛn ka ɲɛ u ka so. Yala i bɛ se ka yɛlɛma don i ka waati bolodacogo la walisa i ka se ka waajuli kɛ o waatiw la wa?—1 Kɔr. 9:23.
2 Ka waajuli kɛ wuladanin fɛ ka na a bila su kun fɔlɔ la: Ni an kɔnna ka waajuli boloda ka bɛn ni wuladafɛlaw ye, o bɛ se k’an dɛmɛ ka kibaru duman fɔ mɔgɔ caman ye. (Nt. 21:5) Denmisɛnw bɛ se ka waajuli kɛ ni u bɔra lakɔli la tuma min na. Dɔ wɛrɛw bɛ se ka o kɛ ni baara jiginna tuma min na. Gafe kalan kulu dɔw bɛ se ka fɛɛrɛ tigɛ walisa ka lɛrɛ kelen waajuli kɛ sanni dɔgɔkun gafe kalan ka daminɛ.
3 Ni wuladanin fɛ ani su daminɛ na, an bɛ waajuli kɛ du ni du, o b’a to an bɛ se ka kuma mɔgɔw fɛ, minnu man teli ka sɔrɔ so. Waajulikɛyɔrɔ caman na, waajuli bɛ se ka kɛ nbɛda la, walima seereya bɛ se ka kɛ foroba yɔrɔ dɔ wɛrɛw la k’a daminɛ wuladanin na ka n’a bila su kun fɔlɔ la. Mɔgɔ caman y’a ye ko k’a daminɛ wuladanin na ka na a bila su kun fɔlɔw la, o ye waati bɛɛ la ɲuman de ye walisa ka segin ka na bɔ mɔgɔw ye, ani ka Bibulu-kalanw daminɛ.
4 An ka kan ka jateminɛ kɛ: An ka kan ka kow jateminɛ koɲuman ni an bɛ ka seereya kɛ k’a daminɛ wuladanin na ka na su kun fɔlɔ la. A ka fisa tuma caman na ka seereya kɛ su daminɛ na, yanni k’o kɛ tuma min na mɔgɔw bɛ ka u labɛn ka taa u da. (Fil. 4:5) Ni i bɛ da kɔnkɔn tuma min na, i jɔ yɔrɔ la, i bɛ se ka ye yɔrɔ min na, ani i k’a fɔ k’a jɛya i ye jɔni ye. I teliya ka i nakun fɔ. Ni a y’a sɔrɔ i nana bɔ mɔgɔw ye waati la min bɛnnen tɛ, i n’a fɔ ni denbaya bɛ ka dumuni kɛ, a fɔ u ye k’i bɛna segin ka na waati wɛrɛ la. I ka mɔgɔw gasi sigi tuma bɛɛ.—Mat. 7:12.
5 Farati minnu fana bɛ se ka kɛ yen, an ka kan k’a ɲini ka olu dɔn. Ni an bɛ seereya kɛ fitiri fɛ, walima dibi donnen kɔfɛ, a ka ɲi an ka kɛ mɔgɔ fila ye walima an ka kɛ kuluw ye. An ka to yɔrɔ la, yeelen bɛ yɔrɔ min na kosɛbɛ, an mabɔlen tɛ mɔgɔw la yɔrɔ min na. An ka seereya kɛ yɔrɔ lakanalen dɔrɔn na. Farati bɛ yɔrɔ min na, an kana taa o yɔrɔw la, ni dibi donna.—Nt. 22:3.
6 Ni an bɛ seereya kɛ k’a daminɛ wuladanin na ka n’a bila su kun fɔlɔ la, o b’a to fana an ka waajuli baara kɛ ni tutigɛbaga farankanw ni tutigɛbaga basigilenw ye. (Rom. 1:12) Yala i bɛ se k’a yɛlɛma don i ka waati bolodacogo la walisa i ka se k’i sen don waajulibaara kɛcogo nin na wa?
[Study Questions]
1. Muna an kakan ka yɛlɛma don an ka waati bolodacogo la walisa ka waajuli kɛ?
2. Fɛɛrɛ dama jumɛnw b’an bolo ka waajulu ke mɔgɔw caman ye?
3. I bɛ se ka waajuli kɛ wuladanin fɛ ani su daminɛ na i ka waajulikɛyɔrɔ la, sira jumɛnw fɛ?
4. Ni an bɛ ka seereya kɛ k’a daminɛ wuladanin ka na se su kunfɔlɔ la, mun na a nafa ka bon an ka kɛ mɔgɔ ye min bɛ jateminɛ kɛ, ani min bɛ mɔgɔw gasi sigi?
5. Ni an bɛ ka waajuli kɛ, an bɛ se k’an yɔrɔ janya faratiw la cogo di?
6. Nafa wɛrɛ jumɛnw bɛ seereya kɛli la k’a daminɛ wuladanin na ka na a bila su kun fɔlɔ la?