An bɛ se ka mɔgɔw dɛmɛ cogo di ?

¹ Ni Jehowa Seerew y’a mɛn ko kasaara kɛra dugukolo yɔrɔ dɔ la, tuma caman na u bɛ ɲininkali kɛ ko: “An bɛ se ka mɔgɔw dɛmɛ cogo di?” Iko Kɛwalew 11:​27-30 b’a jira cogo min na, san kɛmɛ fɔlɔ la Kerecɛnw ye dɛmɛ lase u balimaw ma Jude mara la, bawo kɔngɔba tun bɛ o yɔrɔ la.

² Bi fana, kasaara bɛ se ka kɛ a yɛrɛ ma, walima a bɛ se ka kɛ hadamadenw nɔ ye. Ni o ko sugu kɛra, jamanaw ye yamaruya di an ka Tɔn ma a ka wari ka kɛ ka mɔgɔw dɛmɛ gɛlɛya bɛ minnu na ani minnu ye kasaara sɔrɔ, ani wari ka kɛ fana ka mɔgɔw dɛmɛ waati wɛrɛw la, ni o magoba bɛ yen tuma min na.

³ Misali la, kɔgɔji ye tiɲɛniba kɛ tuma min na Asi woroduyanfan na salon, an balima caman ye wari di walisa ka o yɔrɔ mɔgɔw dɛmɛ. An balimaw y’u sɛbɛ don ka wari ci, walisa o ka fara wari kan, Tɔn bɛ min kɛ ka mɔgɔw dɛmɛ minnu ye kasaara sɔrɔ. O kɛra koɲuman ye min nafa ka bon an bolo kosɛbɛ. Nka, ni wari dibaga bɛ wari ci k’a pereperelatigɛ a y’a di kasaara min kama, jamana dɔw ka sariyaw b’a wajibiya o wari ka don o ko dɔrɔn dafɛ ani waati dɔ kɔnɔ, hali ni a sɔrɔla an balimaw mago ɲɛna kaban, ani ko wari tɔ tora.

⁴ O kosɔn, an b’a fɔ aw ye ko a ka fisa aw ka wari ci diɲɛ bɛɛ baara kama, ni aw b’a fɛ ka wari ci walisa ka mɔgɔw dɛmɛ minnu bɛ gɛlɛya la, walima ni aw bɛ wari ci mɔgɔw kama minnu ye kasaara sɔrɔ. Diɲɛ bɛɛ baara ka wari bɛ kɛ ka mɔgɔw dɛmɛ minnu ye kasaara sɔrɔ ani ka an balimaw mago ɲɛ alako ta fan fɛ. Ni kun dɔ kosɔn, mɔgɔ dɔ b’a fɛ ka wari ci kasaarako kama, ka o wari danfara ka bɔ diɲɛ bɛɛ baara ka wari la, an bɛ sɔn o la halisa. Nka, a ka fisa o tigi kana a pereperelatigɛ wari cira kasaara min kama, ani baara ka kan ka kɛ ni o wari ye cogo min na.

⁵ Kun min na an b’a fɔ aw ye ko a ka wari ci diɲɛ bɛɛ baara kama, o ye ko wari caman bɛ sɔrɔ Masaya baara kama ani fɛnw kama minnu bɛ o baara kɔnɔna na, sanni a maralen ka to ka kasaara nataw kɔnɔ. O kɛcogo ani hakilila min bɛ Efesekaw 4:16 kɔnɔ, olu bɛ ɲɔgɔn ta, a sɛbɛnnen bɛ o min kɔnɔ ko an ka jɛn ka baara kɛ ɲɔgɔn fɛ walisa farikolo bɛɛ ka jiidi ka dɔ fara a yɛrɛ kan, kanuya la.