Denbaya ka ko bolodalen​—Denbaya ka kalan

¹ E min ye Kerecɛn ye ko denw bɛ i bolo, i bɛ se ka nilifɛn bɛɛ la belebele min di i denw ma, o ye ka a don i denw dusukun na dɔɔnin-dɔɔnin, kanuya min bɛ i la ka ɲɛsin Jehowa ma. O kɛtuma ɲuman dɔ ye “ni i bɛ i sigi i ka so kɔnɔ” denbaya ka Bibulu-kalan kama (Dut. 6:​5-7) Ni i furuɲɔgɔn ye Seere ye, walima ni i furuɲɔgɔn tɛ Seere ye, walima ni e kelen dɔrɔn de bɛ ka i denw lamɔ, o kow bɛɛ la i bɛ se ka i denw dɛmɛ u ka gɛrɛ i la, ka gɛrɛ Jehowa la, denbaya ka kalan sababu fɛ.

² Denbaya ka kalan daminɛ: A fɔlɔ ye min ye, o ye k’a ko sigi walisa denbaya ka kalan kɛ ɲɔgɔn fɛ, ka o kɛ a delinako ye. Kalan bɛ se ka kɛ waati min na, ni o siga bɛ i la, mun na e ni i ka sokɔnɔmɔgɔw tɛna kuma o kan? (Nt. 15:22) Ni den fitininw b’i bolo, i bɛ se k’a ye ko a ka fisa ka kalan surun kɛ ni u ye, siɲɛ caman dɔgɔkun kɔnɔna na. A lajɛ i bɛ se ka ko boloda cogo min na walisa o ka bɛn kosɛbɛ i ka sokɔnɔmɔgɔw ma. Waati jɔnjɔn sigi denbaya ka kalan kama, wa i jɔlen ka to a kan ka i nɔrɔ o la.

³ I bɛ se ka mun kalan? Fɛn min bɛna sɛgɛsɛgɛ jɛkulu ka gafe kalan nata la, walima La Tour de Garde nata la, dɔw ni u ka denbaya bɛ o labɛn ɲɔgɔn fɛ. Barokun minnu ɲɛsinnen bɛ kɛrɛnkɛrɛnnenya la kamalenninw ni npogotigininw ma, dɔw bɛ u ka kalan kɛ o barokunw kan. Denkɛ ni denmuso bɛ cɛ dɔ bolo, min ko: “ni fɛn kelen bɛ yen min kɛli ka di denmisɛnw ye dɔgɔkun kɔnɔ, o ye ni an bɛ Recueil d’histoires bibliques gafe kɔnɔkow ladege, ka olu kɛ teyatiri ye. O bɛ fɛn min kɛ u la, ani o bɛ u dɛmɛ ka faamuyali min sɔrɔ, o nafa ka bon kosɛbɛ ka tɛmɛn dakunw hakɛ kan, an bɛ minnu kalan.

⁴ Kalan kɛ dɔgɔkun o dɔgɔkun: Denbaya ka kalan ka kan ka kɛ dɔgɔkun o dɔgɔkun. Sokɔnɔmɔgɔw bɛɛ fana ka kan ka o kɔnɔ ni nisɔndiya ye. Tuma dɔw la, yɛlɛma bɛ se ka don a kɛdon ni a kɛwaati la walisa ka ko cunnenw ɲɛnabɔ. Ko dɔw fana bɛ se ka kɛ, minnu kosɔn, yɛlɛma ka kan ka don barokun kalanta la. Nka o yɛlɛma si man kan ka denbaya ka kalan bolodalen ko jɔ waatijan kɔnɔ. Du dɔ kɔnɔ, denmuso dɔ kumana nin cogo la: “Ni an ka kalan waati tun ka kan ka yɛlɛma, baa tun bɛ waati kura sɛbɛn ka o nɔrɔ firigo da la walisa bɛɛ ka se k’a dɔn kalan bɛna kɛ waati min na.” Ka o cɛsiri suguw kɛ walisa k’a to denbaya ka kalan kɛli la ka taga a fɛ, o cɛsiriw ka kan ka tanu kosɛbɛ! Ikomi i bɛ ka taga a fɛ ka i denw lamɔ ‘ni Jehowa ka kololi ni a ka laadili ye,’ i b’a jira ko i bɛ u kanu, ani ko i bɛ an sankolola Fa kanu.​—Efɛ. 6:4.