Jehowa ka don ka surun
1 Kerecɛnw bɛ Jehowa ka don nali makɔnɔ ni kɔrɔtɔ ye, o min sababu fɛ Jehowa bɛna nin diɲɛ halaki, ka na ni diɲɛ kura ye, tilennenya na sigi min kɔnɔ. (2 Pi. 3:12, 13) Ikomi an t’a dɔn tigitigi o don bɛna na tuma min na, an ka kan ka to an ɲɛ na, ka mɔgɔ wɛrɛw dɛmɛ olu fana ka to u ɲɛ na. (Eze. 33:7-9; Mat. 24:42-44) Ka taasi Ala ka kiraya Kuma la, o bɛna barika don an ka dannaya la ko “Jehowa ka donba surunyara.”—Sof. 1:14.
2 Fangatigiya minnu ye diɲɛ mara ka tugu ɲɔgɔn kɔ: Iko a sɛbɛnnen bɛ cogo min na Jirali 17:9-11 la, ciden Yuhana bɛ kuma “masakɛ wolonwula kan.” O masakɛw bɛ fangatigiyaw jira minnu ye diɲɛ mara ka tugu ɲɔgɔn kɔ. Yuhana bɛ kuma fana “masakɛ seginnan kan” min ye Nations Unies bisigi ye bi, ni o ye diɲɛ seleke naani jɛkulu ye. Yala an bɛ se ka sigi ni a ye ko fangatigiya wɛrɛw bɛ na diɲɛ kɔnɔ tuguni wa? Ayi. Kiraya kuma b’a jira ko o masakɛ seginnan ‘bɛ taa halakili yɔrɔ la,’ wa, dugukolo kan masakɛ wɛrɛw ma kofɔ o kɔ fɛ. Yala o kiraya kuma bɛ i dɛmɛ ka a faamu an bɛ waati min na tariku kɔnɔna na wa?
3 Daniel 2:31-45 b’an dɛmɛ ka Jehowa ka don nali faamu. O kiraya kuma na, Nebukadnezar ye ja belebeleba min ye sugo dɔ la, o bɛ fangatigiyaw jira minnu ye diɲɛ mara ka tugu ɲɔgɔn kɔ. O fangatigiya kelen-kelen bɛɛ ye u tile kɛ kaban. An bɛ waati jumɛn na bi, tariku kɔnɔna na? An bɛ waati la min jiralen bɛ ni ja belebele senw ye. Kiraya kuma b’a ɲɛfɔ ni barika ye, fɛn min bɛna kɛ sɔɔni. Hadamadenw ka mara bɛna bɔ yen pewu, ka sirabila “masaya ye min tɛna tiɲɛ abada.” O ko b’a jira cogo min na ko Jehowa ka don ka surun, yala i ɲɛ bɛ o la wa?
4 Fɛn wɛrɛ minnu b’a jira ko Jehowa ka don ka surun: Fɛn wɛrɛ minnu b’a jira ko Jehowa ka don ka surun, an bɛ ka olu ye an ɲɛ na. Ciden Paul ye min fɔ mɔgɔw jogo kan ‘laban donw na,’ an ɲɛ b’a la ko o de bɛ ka kɛ. (2 Tim. 3:1-5) Seereya min ka kan ka kɛ dugukolo yɔrɔ bɛɛ la sanni laban ka se, an sen bɛ o la. (Mat. 24:14) An bɛ cidenyabaara min kɛ jama na, o k’a jira ka taga a fɛ ko mɛlɛkɛ ka kuma ye kɔrɔtɔko ye, o min ko: “A’ye siran Ala ɲɛ, k’a bonya, katuguni a ka kiritigɛ waati sera.”—Jir. 14:6, 7.