An ka waajuli kɛ ka taga a fɛ
1 An bɛ waati gɛlɛnw de la. Jama ka murutilikow, siyakɛlɛw, kasaara minnu bɛ kɛ k’a sɔrɔ hadamaden tɛ u sababu ye ani ko cɛjugu wɛrɛw ka ca kosɛbɛ. Hadamadenw mago bɛ kibaru duman na bi ka tɛmɛ waati tɔw bɛɛ kan. Nka, mɔgɔ caman bɛ yen minnu ka sira tɛ Ala kow la. Yɔrɔ dɔw la, a ka gɛlɛn ka mɔgɔw sɔrɔ u ka so, nka fɛn min ka gɛlɛn ka tɛmɛ o kan, o ye ka mɔgɔw sɔrɔ minnu bɛ an lamɛn walima minnu b’a fɛ ka Bibulu kalan kɛ. O bɛɛ n’a ta, a nafa ka bon kosɛbɛ an ka Ala ka Masaya sigilen kibaru duman waajuli kɛ ka taga a fɛ.—Mat. 24:14.
2 Kanuya ka ɲɛsin mɔgɔw ma: Kanuya min bɛ Jehowa la ka ɲɛsin mɔgɔw ma, an ka waajuli bɛ o jira k’a jɛya. Bibulu ko ‘Jehowa t’a fɛ mɔgɔ si ka halaki, nka a b’a fɛ bɛɛ ka nimisa u ka jurumuw la.’ (2 Pi. 3:9; Eze. 33:11) O la sa, iko Yesu y’a fɔ cogo min na, Jehowa ye sariya sigi ko ‘kibaru duman waajuli ka kɛ siyaw bɛɛ la fɔlɔ.’ (Mar. 13:10) Ala b’a ɲini mɔgɔw bɛɛ fɛ, k’a gɛlɛya u ma kosɛbɛ, ko u ka u ɲɛsin ale ma walisa u ka kisi tuma min na kiri bɛna bin Sitanɛ ka diɲɛ kan. (Jl. 2:28, 29, 32; Sof. 2:2, 3) Jehowa ye o cogo min di an fana ma nin ye, yala an tɛ a waleɲumandɔn o la wa?—1 Tim. 1:12, 13.
3 Waajulibaara min bɛ kɛ diɲɛ kɔnɔ, o dantigɛli sɛbɛn y’a jira ko san 2004 kɔnɔna na, Bibulu-kalan 6 085 387 ɲɔgɔn de ɲɛminɛna kalo o kalo, ko kalanden kura 5 000 ɲɔgɔn de fana batisera dɔgɔkun o dɔgɔkun. O mɔgɔ kura minnu ye u yɛrɛbakun di Jehowa ma, olu dɔw sɔrɔla bawo Jehowa dubara weleweledalaw ka cɛsiri kɔtigɛbaliw ye walisa ka kuma mɔgɔ bɛɛ fɛ u ka waajulikɛyɔrɔw la. O nana ni nisɔndiyaba ye jɛkuluw kɔnɔ dɛ, o ye bonya ye an bolo fana ka kɛ Ala ka baarakɛɲɔgɔn ye nin kisilibaara la.—1 Kɔr. 3:5, 6, 9.
4 An ka Ala tɔgɔ tanu: An bɛ waajuli kɛ ka taga a fɛ walisa ka Jehowa tanu kɛnɛ kan, ka a tɔgɔ fana saniya mɔgɔ bɛɛ ɲɛ na. (Heb. 13:15) Sitanɛ ye ‘dugukolo kan mɔgɔw bɛɛ lafili,” ka u bila ka da a la ko Ala tɛ se ka hadamadenw ka kunkow ɲɛnabɔ, ko a ka sira tɛ hadamaden ka tɔɔrɔ la, walima yɛrɛ ko Alako tɛ tiɲɛ ye. (Jir. 12:9) An ka waajuli sababu fɛ, an bɛ tiɲɛ lafasa an sankolola Fa ɲuman ko la. An ka taga a fɛ ka a tɔgɔ tanu sisan ani fo abada.—Zab. 145:1, 2.