Ɲininkaliw Jaabi

◼ Wariko gɛlɛya bɛ balima minnu kan jamana wɛrɛw la, n’an b’a fɛ ka olu dɛmɛ, dɛmɛsira jumɛn de ka ɲi ni a bɛɛ ye?

Tuma dɔw la, an bɛ a mɛn k’an balima dɔw bɛ jamana wɛrɛw la, minnu mago bɛ minɛnw na k’a sabu kɛ tɔɔrɔ, kasaara dɔ, walima ko wɛrɛ ye u sɔrɔ. O ye balima dɔw bila ka wari ci Tɔnbolofaraw ma o jamana suguw la, k’a fɔ ko wari ka kɛ ka mɔgɔ kɛrɛnkɛrɛnnen dɔw dɛmɛ, wala ka jɛkulu dɔ dɛmɛ, wala a ka kɛ yɛrɛ ka masaya so kofɔlen dɔ jɔ.​—2 Kɔr. 8:​1-4.

Fan dɔ fɛ, a ka ɲi k’an balimaw dɛmɛ ni kanuya ye, nka fan wɛrɛ fɛ ko wɛrɛw bɛ yen minnu ɲɛnabɔli teliya la nafa ka bon ka tɛmɛ waridibaga hakilinata kan. Tuma dɔw la yɛrɛ i b’a sɔrɔ wari cira kun min kosɔn o ɲɛnabora kaban. Siga tɛ a la, ko ni bolomafara kɔni cira Tɔnbolofara ma kaban, diɲɛ bɛɛ ka waajuli baara kama, wala masaya so jɔli kama, wala kasaaraw kama, o nafolo dilenw na don a dibagaw sagona sira fɛ.

An balima minnu bɛ Tɔnbolofaraw la, olu degera koɲuman walisa ni gɛlɛya dɔ balala ka na, u ka se ka o koɲɛ ɲɛnabɔ teliya la. Cogo bɛɛ la, Tɔnbolofara bɛ Ɲɛmɔgɔya Kulu ladɔnniya o gɛlɛya ko la. Ni dɛmɛ wɛrɛ yɛrɛ ka kan ka kɛ ka fara kɛlen kan, Ɲɛmɔgɔya Kulu bɛ se k’a ɲini Tɔnbolofara wɛrɛw fɛ minnu yɔrɔ ka surun, olu ka dɛmɛ don, wala wari yɛrɛ bɛ se ka ci ka bɔ tɔnsigiyɔrɔsoba la.​—2 Kɔr. 8:​14, 15.

O kosɔn, bolomafara o bolomafara dabɔra diɲɛ bɛɛ ka waajuli baara kama, wala masaya so jɔli kama jamana wɛrɛw la, wala kasaaraw kama, olu bɛɛ ka kan ka ci i ka Tɔnbolofara ma. O wari bɛ se ka di jɛkulu ma ka ci, wala i yɛrɛ bɛ se ka sin k’a ci Tɔnbolofara ma. O cogo la, “jɔnkɛ dannamɔgɔ hakilima” bɛ an ka balimaya magow bɛɛ ɲɛ, cogo bɛnnen na, ka kɛnyɛ ni Ɲɛmɔgɔya Kulu ka fɛɛrɛ siginenw ye.​—Mat. 24:45-​47; 1 Kɔr. 14:33, 40.