Tila 4: Ka Bibulu-kalanw ɲɛminɛ minnu bɛ taa ɲɛ

Kalandenw dege u k’u labɛn

¹ Kalanden min bɛ kɔn ka kalansen kalan, ka tiiri ci jaabiw kɔrɔ, ka miiri a bɛna o jaabiw fɔ cogo min na a yɛrɛ ka kuma fɔcogo la, a ka ca a la, o kalanden bɛ taa ɲɛ alako ta fan fɛ. O kosɔn, ni Bibulu-kalan basigira kaban, i ni kalanden ka jɛ ka kalansen kelen labɛn ɲɔgɔn fɛ walisa i ka labɛn kɛcogo jira a la. Kalanden caman bɛ dɛmɛ sɔrɔ ni i ye kalansen kuturu labɛn ni u ye.

² Tiiri ci jaabiw kɔrɔ, ɲɛfɔli surunmanw sɛbɛn gafe kɛrɛda la: Ɲininkali minnu bɛ sɛbɛn kɔnɔ, olu jaabi jɔnjɔnw bɛ sɔrɔ cogo min na, o ɲɛfɔ kalanden ye. I yɛrɛ ye tiiri ci cogo min na daɲɛ kolomaw kɔrɔ walima kumasen kolomaw kɔrɔ i ka sɛbɛn kɔnɔ, o jira kalanden na. E ye o kɛ cogo min na, a fana bɛna a ɲini k’i ladege, ka tiiri ci sɛbɛnniw kɔrɔ, a mago bɛ minnu na dɔrɔn ka jaabi di. (Luka 6:​40) O kɔ a ɲini a fɛ a ka jaabi di a yɛrɛ ka fɔcogo la. O bɛna a to i k’a dɔn ni a bɛ ka yɔrɔ kalanta faamu ka ɲɛ.

³ Bibulu tɛmɛsira minnu sɛbɛnnen bɛ nka u kɔnɔkuma ma walawala, olu sɛgɛsɛgɛli ni ɲɛmajɔ ye, o jɔyɔrɔ ka bon kalanden ka labɛn kɔnɔ. (Kɛw. 17:11) A dɛmɛ a k’a faamu ko Bibulu tɛmɛsira kelen-kelen bɛɛ bɛ dakun miiriya dɔ de sinsin. A jira kalanden na, a bɛ se cogo min na ka ɲɛfɔli surunw sɛbɛn a ka sɛbɛn kɛrɛda la. A to a k’a faamu ko a bɛ ka min kalan, o sinsinnen bɛ Bibulu de kan. Dusu don a kɔnɔ a ka ɲɛfɔli kɛ kosɛbɛ ni Bibulu tɛmɛsira dilenw ye aw ka kalan waati.

⁴ Yɔrɔ kolomaw jateminɛli ani seginnkanni: Sanni kalanden ka labɛn sɛbɛ daminɛ, min ka ɲi a ma o ye ka hakilila dɔ sɔrɔ teliya la yɔrɔ kalanta mumɛ kan. A jira a la ko a bɛ se ka o kɛ ni a bɛ jateminɛ teliman kɛ fɛn dɔw kan. O fɛnw filɛ nin ye: kalansen tɔgɔ walima, tila tɔgɔ, dakunw tɔgɔw ani ja minnu bɛ yɔrɔ kalanta kɔnɔ. A ɲɛfɔ kalanden ye ko sanni a k’a ka labɛn kuncɛ, min ka ɲi a ma o ye ka waati dɔ ta ka segin ka yɔrɔ kalanta kolomayɔrɔw sɛgɛsɛgɛ. Ɲininkali minnu bɛ kɛ kalan laban na walisa k’i ka dɔnniya sɛgɛsɛgɛ, ni olu dilen bɛ, kalanden bɛ se ka baara kɛ ni olu ye walisa ka segin yɔrɔ kalanta bɛɛ kan. O bɛna kɛ sababu ye kunnafoniw bɛ to a hakili la.

⁵ Ni an bɛ kalanden dege a ka kalan labɛn koɲuman, o bɛ a dɛmɛ ka jaabi ɲumanw di jɛkulu ka lajɛw waati. O bɛ a dɛmɛ fana ka kalan kɛ a delina ye. O bɛna a nafa waati jan kɔnɔ aw tilalen kɔ a ka Bibulu-kalan na.