I ka kɛ kɛwale ɲumanw ɲɛjirabaga ye
1 Ni an camanba b’an lajɛ tuma min na an ka kafoba ka jamalajɛw la, an filɛbagaw bɛ an ka ko kɛcogo ni an ka mɔgɔ minɛcogo kɔlɔsi cogo kɛrɛnkɛrɛnnen na. O la sa, an kelen-kelen bɛɛ ka kan k’an hakili to kosɛbɛ Bibulu ka laadilikan nin na ko: ‘I ka kɛ hakilima ye. I ka i yɛrɛ jira kɛwale ɲumanw ɲɛjirabaga ye fɛn bɛɛ la.’ (Ti. 2: 6, 7) An ka kan ka dɔ fara an ka cɛsiri kan walisa ‘an si kana miiri an yɛrɛ ka kow dɔrɔn na, nka an bɛɛ kelen-kelen ka miiri a mɔgɔɲɔgɔn ka kow fana la.’ (Fil. 2:4) Nin kuma bɛ dusu don an kɔnɔ kosɛbɛ. An bɛ se ka tugu o laadilikan kɔ cogo minnu na, an ka kafoba ka jamalajɛ nata la, n’o ye ko “An ka nɔɔrɔ da Ala kan,” an ka o dɔw lajɛ.
2 Labɛn minnu kɛra jatigila ko la: Mɔgɔ minnu y’a latigɛ ka jigin mɔgɔ dɔ bara, walima foroba siyɔrɔ dɔ la, walima lotɛli la, olu bɛ sira sɔrɔ ka kɛwale ɲumanw jira. O la sa, nin ye ko damadɔw ye minnu b’an dɛmɛ ka se k’o kɛ: Jatigila ɲinisɛbɛnfura, n’o ye “Demande de logement” sɛbɛnfura ye, o lafa cogo jɔnjɔn na, i ka tila k’o di sɛbɛnnikɛla ma. I ye mɔgɔ hakɛ min sɛbɛn o kan, i ka na ni o mɔgɔ hakɛ de ye tigitigi. A fɔ i jatigikɛ, walima i jatigimuso ye ko i bɛ bolomafara di a ma, ji ani kuran sɔngɔ ko la. I ka yɔrɔ saniyalen to. I jiginnen bɛ yɔrɔ min na, ni kasaara dɔ kɛra yen, o yɔrɔnin bɛɛ la, i ka kafoba ka jamalajɛ koɲɛnabɔbagaw kulu ladɔnniya. Ni i bɛ muɲu mɔgɔw kɔrɔ, ka sɔn ka jɛ ka baara kɛ ni lotɛli ɲɛmɔgɔw ani jamalajɛ koɲɛnabɔbagaw kulu ye, an bɛna Ala ka hakili senu mɔ jira, ka kɛ kɛwale ɲumanw ɲɛjirabagaw ye. (Gal. 5:22, 23).
3 Bangebagaw ni denmisɛnninw: An bɛ nin diɲɛ min kɔnɔ, denmisɛn caman jogo man ɲi. Nka, a bɛ ye cogo jɛlen na ko an ka denmisɛnninw jogo ani diɲɛ denmisɛnninw jogo tɛ kelen ye hali dɔɔnin. O bɛ tanuli lase Jehowa ni a ka jɛkuluba ma. O n’a ta o ta, gɛlɛyaw sɔrɔla waati dɔw la, k’a sababu kɛ ko denmisɛnninw ma kɔlɔsi ka ɲɛ. (Nt. 29:15) Bangebagaw man kan k’u denw to u yɛrɛ ma lotɛli la, pisini sen bɛ o la, walima u jatigila la, walima jamalajɛ kɛyɔrɔ la.
4 Sanni kafoba ka jamalajɛ ka kɛ, bangebaga dɔw y’a ye ko a nafa ka bon olu ni u denw ka sigi k’a lajɛ ɲɔgɔn fɛ, u b’a fɛ u denw ka taamacogo min ta. (Efɛ. 6:4) U bɛ u denw dɛmɛ u k’a faamu ko Kerecɛn ka kanuya lakika tɛ “ko bɛnbali kɛ,” walima ko “a tɛ a yɛrɛ ka nafa ɲini.” (1 Kɔr. 13:5) Kafoba ka jamalajɛ ye waati ye min dabɔra a kama walisa an ka kalan Jehowa fɛ. Denmisɛnninw ni mɔgɔkɔrɔbaw bɛɛ bɛ se ka bonya jira ka ɲɛsin o ko labɛnnen ma, u taamacogo fɛ jamalajɛ kɛyɔrɔ la, ani yɔrɔ wɛrɛ la.—Esa. 54:13.
5 Mɔgɔw bɛ fɛnw miiri an ko la minnu tɛ tiɲɛ ye. An taamacogo ɲuman bɛ se ka caman kɛ walisa ka o miirinataw bɔ yen, ka kɛ sababu ye ka mɔgɔw lana bato lakika la. (Mat. 5:16; 1 Pi. 2:12) Anw ani mɔgɔ minnu bɛna bɛn kafoba ka jamalajɛ la, an k’a to olu bɛɛ ka se ka seereya ɲuman sɔrɔ an kɛcogo fɛ ani u minɛcogo fɛ. O cogo la, an bɛna ‘an yɛrɛ jira kɛwale ɲumanw ɲɛjirabaga ye,’ ka nɔɔrɔ da Jehowa kan.—Ti. 2:7.
[Study Questions]
1. Mun na an ka kan ka an hakili to an taamacogo la kɛrɛnkɛrɛnnenya la, kafoba ka jamalajɛ la?
2. An ka kan ka mun to an hakili la jatigila ko la?
3, 4. Denmisɛnninw bɛ se ka tanuli lase Jehowa ma cogo di, ani bangebagaw jɔyɔrɔ ye mun ye o yɔrɔ la?
5. An taamacogo ɲuman bɛ se ka nɔ jumɛn bila mɔgɔ wɛrɛw la?
[Box on page 4]
I ka bonya da mɔgɔ wɛrɛw kan
▪ I ka yɔrɔ saniyalen to
▪ I denw kɔlɔsi ka ɲɛ