Lujuratɔw don​—nka u bɛ nɔ bɔ

¹ Ni i ye Jehowa Seere ye min ye lujuratɔ ye, o n’a ta o ta i bɛ se ka nɔ bɔ cidenyabaara la. Tiɲɛ na, i bɛ cogoya min na, o bɛ se ka sira caman dayɛlɛ i ye ka seereya kɛ, ka dusu don mɔgɔ wɛrɛw kɔnɔ fana.

² Cogo minnu bɛ yen ka Seereya kɛ: Lujuratɔ caman bɛ u niyɔrɔ kɛ k’a dafa cidenyabaara la. Misali la, an balimamuso dɔ ye gɛlɛya sɔrɔ opereli dɔ kosɔn. O la a ka gɛlɛ a ma ka bɔ a nɔ la ani ka kuma. Nka a y’a ye ko a bɛ se ka sɔn-ni-sɔn gafenin jira mɔgɔw la, ni a cɛ ye u ka mɔbili jɔ mɔgɔ ka ca yɔrɔ min na. O cogo la, don dɔ la, a ye gafenin 80 to mɔgɔw bolo lɛrɛ fila dɔrɔn kɔnɔ. I bɛ o cogoya kɛrɛnkɛrɛnnen min na, o bɛ se k’a to i ka kuma mɔgɔw fɛ minnu lasɔrɔli ka gɛlɛ cogo wɛrɛ la, i na a fɔ, dɔgɔtɔrɔso baarakɛlaw, minnu ye lujuratɔ ye iko e yɛrɛ cogo, ani o lujuratɔw ka dukɔnɔmɔgɔw. Ni a bɛ ten, o yɔrɔw kɛ i ka waajulikɛyɔrɔ ye.

³ I ka waajuli bɛ se ka kɔmana ɲuman caman sɔrɔ! Ikomi mɔgɔ dɔw bɛ i ka cɛsiri kɔlɔsi, ani Bibulu bɛ nɔ ɲuman min bila i ka ɲɛnamaya kɛcogo la, Masaya kibaru bɛ se ka diya u ye. Ka fara o kan, ni i bɛnna ni mɔgɔw ye, tɔɔrɔ bɛ minnu kan, e yɛrɛ ye min dɔn i ka ɲɛnamaya kɔnɔ, o bɛ se k’i dɛmɛ ka Ala ka kuma kɛ k’u dusu saalo.​—2 Kɔr. 1:4.

⁴ I bɛ se ka dusu don tɔw kɔnɔ: Lorɛli tun bɛ fogonfogon nɛgɛlama dɔ kɔnɔ san 37, nka o bɛɛ la, a ye mɔgɔ 17 dɛmɛ u ka Bibulu dɔnniya jɔnjɔn sɔrɔ. Yali Lorɛli ka ko tɛ dusu don an bɛɛ kɔnɔ wa? O cogo kelen na fana, i ka misali bɛ se ka i dannayakɛɲɔgɔnw dɛmɛ u ka u jija Jehowa ka baara la.​—g93 22/1 ɲ. 18-​21.

⁵ Hali ni i cogoya bɛ i bali ka bɔ ka waajuli kɛ ka caya i n’a fɔ i b’a fɛ cogo min na, o bɛɛ n’a ta i bɛ se ka dusu don tɔw kɔnɔ. Balimakɛ dɔ ye nin fɔ: “Ne y’a ye ko hali ni mɔgɔ dɔ ka lujura ka jugu o tigi bɛ se ka kɛ dɛmɛba ye mɔgɔ wɛrɛw bolo. Ne ni ne muso kɛra mɔgɔ caman kɔkɔrɔdonbaga ye jɛkulu kɔnɔ. K’a da an cogoya kan, u tun bɛ se ka an lasɔrɔ waati bɛɛ la. Nka, o n’a ta o ta, i cogoya kosɔn, a bɛ faamu ko i tɛ se tuma bɛɛ ka walew kɛ minnu bɛ kɛɲɛ ni i ka cɛsiri ye. Nka mɔgɔ dɔ wɛrɛw ka dɛmɛ fɛ i na se ka i niyɔrɔ kɛ k’a dafa cidenyabaara la. O la sa, ni i mago bɛ dɛmɛ na i kana siga-siga k’o fɔ maakɔrɔw ye, wala mɔgɔ wɛrɛw ye jɛkulu kɔnɔ minnu bɛ se k’i dɛmɛ.

⁶ I bɛ fɛn o fɛn kɛ walisa ka baara kɛ Jehowa ye, a ɲɛ bɛ olu bɛɛ la, ani fana a bɛ nisɔndiya sɔrɔ i ka baara la, i bɛ o min kɛ ni i ni bɛɛ ye. (Zab. 139:​1-4) N’i y’i sinsin Jehowa kan a bɛ se k’i barika bonya walisa i ka cidenyabaara ka kɛ fɛn nafama ye min bɛ nɔ bɔ.​—2 Kɔr.12:​7-​10.