Eretirɛti waati bɛ da dɔ yɛlɛ an ye ka dɔ fara baara kan wa?
1 Baarakɛlaba caman bɛ kɔrɔtɔ eretirɛti nɔfɛ, bawo o bɛna u lafiya ka bɔ baara sɛgɛnw ani a degunw la. Tuma caman na, eretirɛti tali bɛ se ka min lase mɔgɔ ma, o ye k’i mago bɔ kow la, ka ɲɛnafin lase i ma, k’i kɔrɔya ka sɔrɔ a tuma ma se. Ni kuntilenna jɔnjɔn tɛ i ka baarakɛtaw la, o bɛ se ka i bila ka jɔrɔ i yɛrɛ ko la. Berezili jamana zurunali dɔ y’a sɛbɛn ko mɔgɔ minnu bɛ foroba baara kɛ, olu mana eretirɛti ta, u bɛ gɛlɛya suguya caman sɔrɔ. A gɛlɛyaw daminɛ ye ‘nisɔngoya ye, dimi-joona, lakanabaliya, u tɛ kuntilenna ye u yɛrɛ la, u tɛ ɲaci ye u yɛrɛ la, u ka ɲɛnamaya kow bɛɛ dulonnen bɛ mɔgɔ tɔw la, a laban na, u b’a miiri ko u tɛ hɛrɛ la, fo u tɛ nisɔndiya sɔrɔ fosi kɛli la, ani a bɛ kɛ u kɔnɔ ko nin ye u ka diɲɛlatigɛ bantɔ ye.’
2 Fan wɛrɛ fɛ, Kerecɛnw bolo o ɲɛnamaya kɛcogoya kura ye donda kura ye, min bɛ u dɛmɛ ka dɔ fara alako baaraw kan. Balimakɛ dɔ si ye san 65 sɔrɔ. Dɔgɔkun fila o kɔfɛ, a ye tutigɛbagaya baara daminɛ. A ko: “Ne ka ɲɛnamaya bɛɛ kɔnɔ, ne ma deli ka dugawu caman sɔrɔ tuma si la ka nin san tan tutigɛbagaya kɔnɔna bɔ.” Furucɛ dɔ ni a furumuso y’a fɔ ko: “An ye san minnu kɛ kɔrɔya la, o sanw bɛɛ la duman daminɛra ni an ka tutigɛbagaya baara ye.” Tiɲɛ na mɔgɔ caman bolo, eretirɛti ye waati ɲuman ye (a bɛ iko sanu) walisa ka dɔ fara an ka cidenyabaara kan, ani ka ladiyalifɛn caman sɔrɔ ka bɔ Jehowa yɔrɔ.
3 An ka to baara la, ka nɔ bɔ: Mɔgɔ minnu ye eretirɛti ta, olu caman lamɔra, ka sɔrɔ fɛn minnu bɛ ɲɛnamaya diya ani k’a nɔgɔya bi, olu si tun tɛ u bolo. U ye baara gɛlɛn daminɛ kabini u fitinin. Hali ni denmisɛnya fanga tɛ u la tun, u ye baarakɛla nafamaw ye hali bi. Tɔn bolofara dɔ ka waajulikɛyɔrɔ kɔnɔ, ni i ye tutigɛbagaw kɛmɛ o kɛmɛ ta, o kɛmɛ kɔnɔ tutigɛbaga 22 ye balimakɛ wala balimamuso ye minnu si san dɔgɔmannin ye san 60 ye. Ni i yɛ u bɛɛ fara ɲɔgɔn kan, u hakɛ bɛ bɛn tutigɛbaga 20 000 ɲɔgɔnna de ma, cɛ fara muso kan. Mɔgɔkɔrɔbaw ninnu jɔyɔrɔ ka bon waajulibaara la. U ka kodɔn ni u ka alamɔgɔya jogow bɛ jɛkulu nafa kosɛbɛ.—Yak. 3:17, 18.
4 N’an sen bɛ tuma bɛɛ kerecɛnya cidenyabaara la, o b’an dɛmɛ kɛnɛya ta fan fɛ, ka dɔ fara an ka ɲɛnamaya kɛcogo ɲuman kan. Balimamuso dɔ si ye san 84 ye. Ale ye tutigɛbagaya baara daminɛ a kɛlen ka eretirɛti ta. A ko: “Ka Bibulu kalan kɛ ni mɔgɔ caman ye, a ka di minnu ye, o ye ne dɛmɛ bawo tuma bɛɛ kunkolola baara bɛ ne bolo. Mɔbili tɛ ne bolo, o la ne bɛ taama kosɛbɛ. O ye ne dɛmɛ ka to kɛnɛya la.” Tutigɛbaga furuɲɔgɔn fila y’a fɔ ko: “Cidenyabaara b’an dɛmɛ ka an hakili basigi ani ka an farikolo kɛnɛman to. An bɛ bɔ ɲɔgɔn fɛ tuma bɛɛ. An bɛ yɛlɛ kosɛbɛ ani an b’an ka ɲɛnamaya diyabɔ.
5 Ka baara kɛ yɔrɔ la, magoba bɛ yɔrɔ min na: Kerecɛn minnu ye eretirɛti ta, ni sɔrɔ dɔɔnin b’u bolo, olu dɔw yɛlɛmara yɔrɔw la, yɔrɔ minnu magoba bɛ Masaya weleweledalaw la. Dɔ wɛrɛw ye dɔ fara u ka cidenyabaara kan, ka baara kɛ foro kɔnɔ, kan wɛrɛ bɛ fɔ foro min kɔnɔ. I n’a fɔ ciden Paul, o weleweledala timinandiw ‘bɛ fɛn bɛɛ kɛ kibaru duman kosɔn, walisa [u] ka jɛɲɔgɔnya sɔrɔ a la ni tɔw ye.’—1 Kɔr. 9:23.
6 Furuɲɔgɔn fila ye tutigɛbagaya daminɛ u kɛlen kɔ ka u denkɛ fila lamɔ. San caman kɛlen tutigɛbagaya la, u ye sinuwakan degeli daminɛ. Sisan k’u to u san 70nan na, a ma mɛn u ye nisɔndiya sɔrɔ k’a ye, k’u tun bɛ ka baara kɛ ni sinuwa kulunin min ye, o kɛra jɛkulu ye. I ma a dɔn ko furuɲɔgɔn kofɔlen ninnu kɛra dugawu ye!
7 Eretirɛti tɛ ta cidenyabaara la: Tuma min na mɔgɔ caman bɛ eretirɛti ta ka bɔ baaraw la, Kerecɛnw si tɛ eretirɛti ta ka bɔ Ala ka baara la. U bɛɛ ka kan ka to baara la fo ka “se laban na.” (Mat. 24:13, 14) Tiɲɛ don, dɔw ka kɔrɔya t’u bila ka baara kɛ Jehowa ye i n’a fɔ u y’a kɛ fɔlɔfɔlɔ cogoya min na. Nka a bɛ dusu don mɔgɔ kɔnɔ k’a ye, k’u bɛ ka u seko bɛɛ kɛ ni dusumandiya ye! Ala ka Kuma b’a sɛmɛntiya ko Jehowa tɛna ɲinɛ u ka baara kɔ ani u ye kanuya min jira a tɔgɔ kosɔn.—Luka 21:1-4; Heb. 6:10.
8 N’i ka eretirɛti tali tɔ man jan, mun na i tɛ delili kɛ, ka sɔrɔ k’a jateminɛ, i bɛ se ka nafaba sɔrɔ cogo min na i ka ɲɛnamaya taabolo kura kɔnɔ? N’i ye Ala ka dɛmɛ sɔrɔ, i bɛ se k’a ye ko eretirɛti bɛ da dɔ yɛlɛ i ye walisa i ka se ka dɔ fara i ka baara kan, min bɛ tanuli lase Jehowa ma ani ka dugawu caman lase an ma.—Zab. 148:12, 13.