Ɲininkaliw Jaabi

◼ Ni an bɛ seereya kɛ kasoladenw ye, an ka kan k’an janto mun na?

Diɲɛ bɛɛ kɔnɔ, kasoladenw hakɛ ka ca ni miliyɔn 8 ye. A dɔw b’a jira ko kibaru duman ka di u ye. (1 Tim. 2:⁠4) An ka tɔn bolofara dɔ bɛ lɛtɛrɛ 1400 ɲɔgɔnna de sɔrɔ kalo o kalo, ka bɔ kasoladenw ani u somɔgɔw yɔrɔ, walisa sɛbɛn dɔw ka ci u ma wala mɔgɔ ka taa bɔ u ye. Kasoladen caman bɛ a jira sɛbɛ la, k’u bɛ u nafa don nin ko la. Nka, a yera fana ko dɔw bɛ a kɛ i n’a fɔ u bɛ u nafa don a ko la, k’a sɔrɔ u fɛn ɲinitɔ don, u b’a fɛ dɔrɔn ka nafa dɔ sɔrɔ ka bɔ Jehowa ka jamakulu la. O de kosɔn, an bɛɛ ka kan k’a ɲini k’an jan to nin ko damadɔw la, ni an bɛ seereya kɛ kasoladenw ye.

Tuma caman, lɛtɛrɛw bɛ ci walisa ka seereya kɛ kasoladenw ye. A ɲininen bɛ k’a gɛlɛya ko, an balimamusow kana sɛbɛnni kɛ ka ci kasoladen cɛmanw ma, hali ni u b’a fɛ ka dɛmɛ de lase u ma, alako ta fan fɛ. An balima cɛmanw minnu bɛ kow ɲɛdɔn kosɛbɛ, olu dɔrɔn de bɛ se ka nin baara kɛ. A bɛ se ka ɲini an balimamuso dɔw fɛ minnu faamuyalen bɛ waajuli baara la kosɛbɛ, olu ka to ka sɛbɛn ci kasoladen musomanw ma minnu bɛ a jira sɛbɛ la, ko Bibulu tiɲɛ ka di u ye. Min ye ka nilifɛn wala ka wari ci kasoladenw ma, o man kan ka kɛ, hali ni a y’a sɔrɔ k’u ye o fɛn sifa ɲini.

Ni kasoladen dɔ y’a jira ko a b’a mago don Bibulu la, o tigi tɔgɔ ani a ka ladɛrɛsi bɛ di jɛkulu ma, kasobon bɛ min ka wajulikɛyɔrɔ kɔnɔ. An balimakɛw minnu bɛ kow ɲɛdɔn kosɛbɛ o jɛkulu kɔnɔ, tuma caman olu b’a dɔn min ka kan ka kɛ. Ni aw tɛ jɛkulu tɔgɔ dɔn o yɔrɔ la, o kunnafoni bɛ se ka di tɔn bolofara ma.

Kojugu tɛ, ni balima sugandilenw ni kasoladenw bɛ jɛ ka lajɛ kɛ ɲɔgɔn fɛ. O cogo la, kasoladen caman bɛ se ka kalan kɛ ɲɔgɔn fɛ, waati kelen kɔnɔ. O bɛɛ n’a ta, lajɛ kɛrɛnkɛrɛnnen man kan ka labɛn kasobon kɔnɔ, min bɛ a to an balimaw ni kasoladenw bɛ ɲagami ɲɔgɔn na. O tɛmɛnen kɔ, o tɛna kɛ hakilitigiya ye, weleweledalaw ka wuli u yɛrɛma ten ka taa kasobon la, ka to ka taa bɔ kasoladenw ye.

Ni an bɛ seereya kɛ kasoladenw ye, an kana ɲinɛ abada ko an ka kan ka “kegunya iko saw, ka kɛ mɔgɔ jɛlenw ye iko jɛnɛntubanw.”​—⁠ Mat. 10:16.