I yɛrɛ tanga walisa i kana boli ‘fɛn nafantanw’ nɔfɛ
1 Mɔgɔ caman bɛ baara kɛ ni kunnafoni-di-sira min ye bi, o bɛ wele ko E-mail. Hali ni o tɛ kojugu ye mɔgɔ k’i hakilila n’i kunkow fɔ i somɔgɔw, ni i teriw ye E-Mail fɛ, n’a ko kɛra damatɛmɛ wale ye, o ni ‘fɛn nafantan’ jumɛn bɛ se ka kɛ kelen ye? Nt. 12:11.
2 I ɲɛmajɔ E-Mail ko ta fan fɛ: Dɔw b’a miiri k’u bɛ Jehowa ka jɛkuluba kibaruya jɔnjɔnw sɔrɔ, n’u y’a kunnafoni sɔrɔ E-Mail fɛ, u bɛ fɛn minnu jate kunnafoni kuraw ye. Lakalita minnu kɛra Betɛl la, ani ɲankatakow, walima tɔɔrɔkow, ani gundolako min fɔra École du Ministère du Royaume la, n’o ye maakɔrɔw ka kalan ye, nin kow bɛɛ sen b’o la. A bɛ iko dɔw fana bɛ kɔrɔtɔ kojugu ka o kunnafoni sugu ci, bawo u b’a fɛ ka kɛ mɔgɔ fɔlɔ ye k’o kunnafoni lase u teriw ma.
3 Tuma dɔw la, a kunnafoni n’a kibaruyaw ma tilen, walima dɔ fɔra ka fara a kan. Dɔw bɛ nkalon kumaw jɛnsɛn, bawo u cɛsirilen bɛ ka kibaru kabakomaw lase mɔgɔw ma. Mɔgɔ minnu bɛ girin ka o fɛn suguw fɔ, tuma caman na u t’a ko bɛɛ kala ma. (Nt. 29:20) Tuma dɔw la, hali ni kabako don fo mɔgɔ tɛ da a la, a bɛ lakali iko mɔgɔ dɔ ka kunkanko min dɔnni bɛ diya mɔgɔw ye. O kunnafoni sugu minnu tɛ tiɲɛ ye, walima minnu bɛ mɔgɔ lafili, o bɛ dɔ fara “maana nkalonmanw kan, minnu tɛ alaɲɛsiranya lakika yiriwa. 1 Tim. 4:6, 7.
4 N’i ye kunnafoni ci mɔgɔ ma, ni o kunnafoni ma kɛ tiɲɛ ye, o bɛ dusukasi, walima kɔnɔnafili min lase mɔgɔw ma, i nɔ bɛ sɔrɔ o la. Tuma min na a fɔra ka juguya Dawuda ye, ko a denkɛw bɛɛ fagara, a y’a ka ‘finiw fara’ dusukasi bolo. Nka, tiɲɛ yɛrɛ la, a denkɛ kelenpe dɔrɔn de sara. O tun bɛ mɔgɔ dusukasi, nka, o kuma fɔli ka juguya, o ye dɔ fara Dawuda ka dusukasi kan. (2 Sa. 13:30-33) Siga t’a la ko an t’a fɛ ka fɛn fosi kɛ min bɛna an balimaw lafili, walima k’u dusu tiɲɛ, a mana kɛ an balima o balima ye.
5 Ala ka kunnafoni-di-sira sugandilen: An k’a to an hakili la, ko an sankolo la Fa ye kunnafoni-di-sira kelen de sugandi, min ye ‘jɔnkɛ dannamɔgɔ hakilima ye.’ O ‘jɔnkɛ’ de ka baara ye k’a latigɛ kunnafoni minnu bɛ lase sokɔnɔmɔgɔw ma, dannaya sira la, ani ‘waati bɛnnen’ min na o ka kan ka kɛ. O alako dumuni bɛ sɔrɔ Ala ka jɛkuluba dɔrɔn de sababu fɛ. An ka kan ka an ɲɛsin tuma bɛɛ Ala ka o kunnafoni-di-sira de ma walisa ka kunnafoni jɔnjɔnw sɔrɔ. An man kan ka an ɲɛsin mɔgɔw ma minnu bɛ baara kɛ ni ɛntɛrinɛti erozo ye. —Mat. 24:45.
6 Ɛntɛrinɛti Wɛb Sitiw: Intɛrinɛti Wɛb siti dɔ sigira an fɛ. O ye “http://www.watchtower.org” ye. O ye yɔrɔ yamaruyalen ye walisa ka kunnafoniw di mɔgɔw ma. A kun tɛ mɔgɔ dɔw, walima jɛkulu dɔ ka “Wɛb page” labɛn “Jehowa Seerew tɔgɔ la. Fɛn minnu bɛ an ka sɛbɛnw kɔnɔ, ani Bibulu tɛmɛsira bɛɛ minnu bɛ u kɔnɔ, ani Bibulu tɛmɛsira wɛrɛ minnu bɛ ɲɛfɔli di ka an ka faamuya dafa, mɔgɔ dɔw ye o sɛbɛnw ɲɔgɔn dilan k’u ci, hali kafoba ka jamalajɛ baaraboladalen bɛ sɛbɛn minnu kan, u ye olu fana ci, ka o fɛnw bɛɛ lajɛlen kɛ bolomafara kun kɔrɔ. O ko lawulila sɔrɔ kama wo, a ma lawuli sɔrɔ kama wo, ka Watchtower sɛbɛnw ɲɔgɔn dilan, k’u tila-tila, elɛkitoroniki sɛbɛn fɛ, o ye ka “copyright’ sariyaw sɔsɔ. Hali ni dɔw b’a miiri ko a kun ye ka balimaw dɛmɛ, o bɛɛ n’a ta, o baara sifa dagalen tɛ, wa, o ka kan ka dabila.
7 Ka jateminɛ koɲuman, ani ka hakili sɔrɔ, n’an bɛ baara kɛ ni elɛkitoroniki ye kunnafoni sira la, o bɛna an dɛmɛ ka an hakili fa ni ‘fɛn sɔngɔ gɛlɛnw ni fɛn dumanw ye.’ Nt. 24:4.