Nisɔndiya min bɛ a la ka cidenyabaara kɛ waati dafalen na

¹ Aw minnu ye denmisɛnw ye, siga t’a la ko aw miirila aw ka siniɲɛsigi ma. Ntalenw 21:5 b’a fɔ an ye ko “Min timinan ka di baara la, o ka ko latigɛlenw bɛ nafa lase a ma.” Aw nafa b’a la ka miiri kosɛbɛ aw ka diɲɛnatigɛ kuntilennaw la. Ni aw bɛ miiri o kow la, aw kana ɲinɛ a kɔ k’a boloda ka cidenyabaara kɛ waati dafalen na. Mun na?

² Baliku minnu kɛra tutigɛbagaw ye u denmisɛnman, u dɔw ɲininka u bɛ mun miiri o ko la. U bɛɛ bɛna nin kuma kelen de fɔ: “O kɛra ne ka ɲɛnamaya sanw bɛɛ la ɲumanw ye.” Balimakɛ dɔ tun ye cidenyabaara kɛ waati dafalen na kabini a denmisɛnnama, o ye nisɔndiya minnu sɔrɔ, a y’olu fɔ ko: “Laadilikan ɲuman min ye ‘k’i hakili to i Dabaga la i ka kamalenya waati la,’ ni ne miirila ko ne tugura o la, o bɛ wasaba lase ne ma.” (Waaj. 12:⁠1) Kamalenninw, ani npogotigininw, ni aw b’a fɛ ka sira ta min b’a to aw ka o nisɔndiya sɔrɔ, fo aw ka sigi ka o boloda ni aw bangebagaw ye.

³ Bangebagaw, aw ka dusu don aw denw kɔnɔ, u ka cidenyabaara kɛ waati dafalen na: Iko Fa min b’a mago don a denw na, Jehowa b’a jira bangebagaw la tigitigi, u ka kan ka taama sira min kan. (Esa. 30:21) Jehowa kɛtɔ ka an ɲɛminɛ o cogo la ni kanuya ye, a ye ɲɛjirabaga ɲuman ye bangebaga Krecɛnw bolo. Sanni aw k’a to aw denw k’a sugandi sira min ka fisa u ma, aw k’u lamɔ ni hakilitigiya ye sira kan, u ka kan ka taama min kan walasa u ka se ka Jehowa ka dugawuw sɔrɔ. Ni u kɔrɔbayara tuma min na, i ye u lamɔ cogo min na, o de bɛna u dɛmɛ ka “koɲuman ni kojugu faranfasi.’ (Heb. 5:14) Maakɔrɔw b’a dɔn k’u kɔrɔla cogo o cogo, u man kan ka u sinsin u yɛrɛw ka hakilila kan, nka, k’u ka kan k’u ka dannaya da Jehowa kan walasa u ka siraw ka tilen. (Nta. 3:​5, 6) Denmisɛnw mago b’o la ka tɛmɛn mɔgɔkɔrɔbaw kan, bawo u tɛ fɛn bɛrɛ dɔn diɲɛnatigɛ ko la.

⁴ Bangebagaw, ni aw denw bɛ san tan ɲɔgɔn na, walima ni u ma o sɔrɔ, aw ni aw denw ka baro kɛ cogo jɛlen na u kuntilennaw kan, baara ko ta fan fɛ. Lakɔli laadilikɛlaw, lakɔli karamɔgɔw, ani u kalandenɲɔgɔnw bɛna ɲini k’u bila u ka tugu diɲɛbaaraw ni a nafolow nɔfɛ. Aw k’aw denw dɛmɛ u ka lakɔli kalan sugandi min nafa ka bon kosɛbɛ, n’a bɛna u dɛmɛ u ka jɔ n’u ka musakaw ye, k’a sɔrɔ u ma Masaya kunkankow bila u bolo kɔfɛ. (1 Tim. 6:​6-11) Tuma caman na, ka kalan janw ani baara dege kɛ ɲɔgɔn fɛ, walima ka kalan kɛ i degetɔ bɛ sara min na, olu bɛ se ka kɛ fɛnw ye mɔgɔ mago bɛ min dɔrɔn na walasa ka se ka jɔ n’a ka musakaw ye tuma min na a bɛ tutigɛbaga basigilen baara daminɛ cidenyabaara la.

⁵ Dusu don denmisɛnw kɔnɔ u kana miiri furu ma sisan. Ni kɔfɛ, u b’a latigɛ ka furu kɛ, o b’a sɔrɔ u labɛnnen don ka ɲɛ walasa u ka se furu doni girinbaw kɔrɔ. (I ka san 1996 Ɔkutɔburukalo tile 15 La Tour de Garde ɲ. 14. dakun 21-23 lajɛ) Kabini u fitinin, aw k’a jira u la ko a ka ɲi ka kɛ tutigɛbaga ye, ka baara kɛ yɔrɔw la weleweledala magoba bɛ yɔrɔ minnu na, ka kɛ tutigɛbaga kɛrɛnkɛrɛnnen ye, ani ka baara kɛ Betɛl la. O cogo la aw bɛ a nege don aw denw la dɔɔnin dɔɔnin u k’u ka ɲɛnamaya kɛ cogo la, min bɛ diya Jehowa ye, ka mɔgɔ wɛrɛw nafa, ani ka nisɔndiya lase u ma.

⁶ Denmisɛnw, ka cidenyabaara kɛ waati dafalen na, aw ka o bila jɔyɔrɔ fɔlɔ la: Denmisɛnw, a kun tɛ aw k’a ɲini k’a dɔn tutigɛbagaya baara ye min ye. Aw bɛ se ka ɲini k’o kɛ waati tilancɛ kɔnɔ, aw kɛtɔ tutigɛbaga farankan ye aw ka lakɔlidenya kɔnɔna na, ani lakɔli bila waatiw la. O tuma na sa, aw bɛna a dɔn cogo min na tutigɛbagaya baara bɛ wasa lase mɔgɔ ma kosɛbɛ. Yali aw bɛ se k’a ye cogo jɛlen na ko aw bɛ se ka kɛ tutigɛbaga farankan ye sisan fo ka taa se lakɔlibila nata laban ma wa?

⁷ Ni aw ye balimakɛw funankɛninw ye Ala ka jɛkuluba kɔnɔ, cogo min b’aw bolo ka mankutu sɔrɔ walasa ka kɛ cidenyabaara magannaw ye, aw ka miiri kosɛbɛ o la. (1 Tim. 3:8-10, 12) Ka fara o kan, aw ye miiri ni aw b’a fɛ ka baara kɛ Betɛl la, walima ka cidenyabaara kalan kɛ aw si mana se o kɛli ye. Aw ka tutigɛbagaya baara bɛna aw kalan ko nafama caman na, i n’a fɔ: k’i ka kow bɛɛ boloda ni i bɛ ka i ka ɲɛnamaya kɛ, k’i ka kow labɛn ka ɲɛ kosɛbɛ, bɛn bɛ se kɛ e ni mɔgɔ wɛrɛw cɛ cogo min na, ani k’i dɛmɛ i ka kɛ mɔgɔ ye min b’a jɔyɔrɔ facogo dɔn ɲɛnamaya kɔnɔ. Kɔfɛ, o kow bɛɛ bɛna i labɛn fɛn wɛrɛw kama minnu ka bon kosɛbɛ, Ala ka baara la.

⁸ Ka cidenyabaara kɛ waati dafalen na, o taɲɛ koloma yɔrɔ dɔ ye ka kisɛya Ala ka baara la. Ciden Pol ye o dusu sugu don mɔgɔ kɔnɔ, ka jira o bɛna ni dugawu minnu ye, a ko: “Aw bɛ fɛn o fɛn kɛ, aw ye o kɛ ni aw niw bɛɛ ye, i n’a fɔ n’aw b’a kɛ Jehowa ye bawo aw b’a dɔn ko aw bɛna dugawu sɔrɔ Jehowa de bolo.” (Kol. 3:23, 24) Jehowa ka duba aw ye ka nisɔndiya caman di aw ma ka cidenyabaara kɛ waati dafalen na.