‘Koɲuman kɛ mɔgɔ bɛɛ ye’

¹ Feburuye ni Marisi kalow An ka Masaya Cidenyabaara farankanw kumakunw tun ye ko: ‘Ala ka Kuma fɔ k’a dafa.’ ani ‘Kɛwale ɲuman caman kɛ’ (Kol. 1:25; 1 Tim. 6:18). O sɛbɛnw kɔnɔ, dusu donna an kɔnɔ ka dɔ fara an ka cɛsiriw kan walasa Kibaru duman ka di mɔgɔ minnu ye, an k’olu dɛmɛ u ka na Hakilijigin na. O sɛbɛnw ye dusu don an kɔnɔ fana walasa an denw, ani Bibulu kalanden minnu sera wajuli kɛ ye, an k’olu dɛmɛ u ka kibaru duman wajuli daminɛ. Mɔgɔ minnu ye wajulikɛbaliw ye jɛkulu kɔnɔ, an k’olu fana dɛmɛ u ka wajuli kɛ kokura. Siga t’a la, an ye cɛsiriba minnu kɛ, an ye nafa dɔ sɔrɔ olu la. ‘N’a bɛ se ka kɛ waati o waati la, an ka [taga a fɛ ka] koɲuman kɛ mɔgɔw bɛɛ ye.’ —Gal. 6:10.

² A ɲini u fɛ u ka na kokura: Dantigɛli sɛbɛnw b’a jira ko Afiriki tilebin yanfan n’a cɛmancɛ yanfan na, mɔgɔ 600 000 ni kɔ nana Hakilijigin na minnu tun tɛ weleweledaw ye. Ikomi u nali b’a jira ko kibaru duman ka di u ye cogo dɔ la, an ka kan ka mun kɛ walasa ka dusu don o mɔgɔw kɔnɔ minnu “labɛnnen don koɲuman ɲɛnamaya banbali kama,’ walasa u ka kɛ ‘dannabagaw ye’? (Kɛw. 13:48) U dusu lamin u ka segin ka na jɛkulu lajɛw la, joona joona.

³ Ni mɔgɔ dɔ y’a jira ko kibaru duman ka di a ye, mun na i tɛna o tigi wele a ka na jɛkulu ka gafe kalan lajɛ la, walasa an ka baro nafama kɛ Esayi ka kiraya kuma kan? Ni o tigi ye i somɔgɔ, walima i dɔnbaga dɔ ye, i bɛ se k’a wele a ka na i ka jɛmu lamɛn ni i bɛ tɛmɛn don min na ala-ka-marako kalan na. Foroba jɛmu minnu ka kan ka kɛ dɔgɔkun nataw la, i ka to k’olu kumakun fɔ a ye. (O foroba jɛmuw sɛbɛn ka kan ka gengen kunnafoni walan kan.) Ko o ko bɛ se k’a to o tigi k’a kanu ka Jehowa bato, i k’a ɲini, k’olu kɛ. Ni o tigi ni jɛkulu kɔnɔmɔgɔ dɔ tɛ ka Bibulu kalan kɛ, i bɛ se ka Bibulu kalan kofɔ a ye ni dusumandiya ye.

⁴ Taga a fɛ ka dusu don wajulikɛbaliw kɔnɔ: Mɔgɔ minnu bɛ na Hakilijigin na, olu dɔw ye u yɛrɛ di Jehowa ma kaban. Nka, a nana se yɔrɔ dɔ la, u ye kibaru duman wajuli dabila. O n’a ta o ta, Pol bɛ dusu don an kɔnɔ ko: ‘Koɲuman kɛ . . . janko an balima dannabagaw ye.’ (Gal. 6:10) O la sa, an ka kan ka hami mɔgɔ fɔlɔ minnu na, o ye wajulikɛbaliw de ye.

⁵ Laala, dɔw sɔnna kaban dusulamin ma, dusulamin min bɔra maakɔrɔw ani mɔgɔ wɛrɛw yɔrɔ walasa u k’u sen don kokura cidenyabaara la. Ni maakɔrɔw y’i sugandi walasa e ni wajulikɛbali dɔ ka baara kɛ ɲɔgɔn fɛ, i k’a dɔn ko kanuya min b’i la ka ɲɛsin Jehowa ma, ani ka ɲɛsin foro cidenyabaara ma, o de bɛna o wajulikɛbali bila a ka da a yɛrɛ la. Wajuli bɛ kɛ sira minnu fɛ, n’i bɛ ka olu kɛ, i k’olu ɲɛfɔ a ye, walasa a ka se ka nisɔndiya sɔrɔ o la, k’a timinandiya wajuli baara la, ani ka Jehowa ka dugawuw nɛnɛ.

⁶ Weleweledala kuraw dɛmɛ baara daminɛ koɲuman na: Magojirabaga kura musoman dɔ y’a faamu tuma min na ko a ye Ala ka jɛkuluba lakika sɔrɔ, a tun b’a fɛ ka wajuli daminɛ o yɔrɔnin bɛɛ la. A kɛlen k’a dɔn ko min wajibiyalen bɛ a ma, a ko: “Ne b’a fɛ k’a daminɛ sisan sisan.” Ni i ye Bibulu kalan kɛ mɔgɔ dɔ kun, wa, ni sɔn kɛra o tigi la a ka foro baara daminɛ, i k’a dɛmɛ a ka faamu ko a ka kan ‘k’a daminɛ o yɔrɔnin bɛɛ la,’ wa a dɛmɛ a k’a daminɛ ka ɲɛ. A dɛmɛ fana a ka kɛ a delinako ye ka waati boloda walasa dɔgɔkun o dɔgɔkun, a k’a yɛrɛ labɛn foro cidenyabaara kama, ka a sen don o la.

⁷ Ni i den de kɛra weleweledala ye min ma batise fɔlɔ, baara kɛ n’a ye walasa a ka ɲɛtaa sɔrɔ ka kɛɲɛ ni a si ani a seko ye. N’i y’a dɛmɛ dɔɔnin dɔrɔn, i bɛ se ka kabakoya k’a ye ko a bɛ se kibaru duman barokɛcogo la ni mɔgɔw ye, Bibulu tɛmɛsiraw kalanni na, ani sɛbɛn jiracogo la. Ni a ka kan ka segin-ka-bɔnye dɔ kɛ, a dege o kɛcogo la, wa, a bɛ se k’a janto o tigi la cogo min na, i ka o fana jira a la.

⁸ Dɔ fara i ka cidenyabaara kan: Yali i bɛ se ka i ka kow ɲɛnabɔ walasa i ka dɔ fara i ka wajuli baara kan hali Hakilijigin waati tɛmɛnnen kɔ wa? I bɛ waati min kɛ ka kɔrɔ foro baara la, yali i bɛ se ka lɛrɛ kelen walima fila fara o kan, dɔgɔkun o dɔgɔkun wa? Yali i ye kalandiriye lajɛ walasa k’a dɔn waati minnu na i bɛ se ka kɛ tutigɛbaga farankan ye kokura wa? Walima, i bɛ se k’i ka ɲɛnamaya kɛcogo labɛn cogo la walasa i ka don cidenyabaara la, k’o kɛ waati dafalen na wa? An bɛ cɛsiri minnu kɛ cidenyabaara la, o bɛɛ bɛ se ka mɔgɔ dɔ dɛmɛ a ka sɔn tiɲɛ ma. (Kɛw. 8:​26-39) An ka miiri don nataw la, ‘ka tugu koɲuman kɛli la, anw ni ɲɔgɔn cɛ, ani anw ni mɔgɔw bɛɛ cɛ, tuma bɛɛ.’—1 Tes. 5:15.

[Box on page 3]

Taga a fɛ ka nin mɔgɔ suguw dɛmɛ:

□✔ Minnu nana Hakilijigin na

□✔ Minnu ye wajuli dabila, u k’o daminɛ kokura

□✔ Minnu ye wajuli daminɛ, nka ni u ma batɛmu ta fɔlɔ.