Dɔ fara i ka nisɔndiya kan wajuli la

¹ Yali i ka cidenyabaara la, i bɛ ka nisɔndiya sɔrɔ kibaru duman fɔli la wa? Ni an ma an jan to an yɛrɛ la, an bɛ diɲɛ jugu min kɔnɔ, o bɛ se ka kɛ sababu ye, ka an fari faga wajuli la, ka an ka nisɔndiya bɔ an na fana. Mɔgɔw t’a fɛ ka cikan lamɛn yɔrɔ minnu na, ka baara kɛ o yɔrɔ sugu la, o bɛ se fana ka an dusu faga. An bɛ se ka ko nafama jumɛnw kɛ, walasa ka dɔ fara an ka nisɔndiya kan, wajuli la?

² I ka da a la, k’i bɛna nafa sɔrɔ i ka baara la: N’an ye o hakili ɲuman sugu to an na, o na an dɛmɛ kosɛbɛ. Walasa ka se k’o hakili ɲuman mara, jɔyɔrɔ min b’an bolo ka kɛ ‘Ala baarakɛɲɔgɔnw ye,’ an ka miiri o la. (1 Kɔr. 3:9) Yesu bɛ ni an ye fana o baara la. (Mat. 28:20) A b’an dɛmɛ ni mɛlɛkɛ kuluw ye. (Mat. 13:41, 49) O kosɔn, an bɛ se ka da a la ko an ka baara ɲɛminɛnen bɛ Ala fɛ. (Jir. 14:6, 7) Hali ni hadamadenw ma an lamɛn, an b’a dɔn ko Ala ni mɛlɛkɛw bɛ nisɔndiya an ka baara la.

³ Labɛn koɲuman: Labɛn koɲuman fana bɛ dɔ fara an ka nisɔndiya kan. Ka an labɛn koɲuman cidenyabaara kama, o tɛ baara caman wajibiya an ma. A dan ye dɔrɔn ka waati damadɔw ta walasa ka se ka barokun dɔ lajɛ sɔn-ni-sɔn gafeninw kɔnɔ, walima sɛbɛn jirataw kɔnɔ kalo la. Sɔn-ni-sɔn gafenin jiracogo minnu bɛ An ka Masaya Cidenyabaara kɔnɔ, i ka o dɔ la kelen sugandi. Kuma daminɛcogo minnu bɛ san 2002 Zanwuyekalo farankan kɔnɔ, i k’olu fana mafilɛ. Walima i ka kuma daminɛcogo nafama dɔ ɲini Comment raisonner gafe kɔnɔ. An sɔsɔlikuma minnu bɛ to ka lawuli mɔgɔw fɛ foro la, ni o jaabi ka gɛlɛ an bolo, an k’an labɛn o jaabi cogo la. Nafa bɛ se ka sɔrɔ fɛn min na, an ka baro ɲɛsin o ma. N’an ye Comment raisonner gafe n’a ɲɔgɔnnaw kɛ baarakɛ minɛnw ye, an na nisɔndiya sɔrɔ wajuli kɔnɔ, ka da an yɛrɛ la.

⁴ Aladeli kɛ kosɛbɛ: Delili ye wajibi ye walasa ka nisɔndiya sɔrɔ min bɛ mɛn. Ikomi an bɛ ka Jehowa ka baara kɛ, an ka kan ka a deli a ka hakili senu di an ma, ni o den dɔ ye nisɔndiya ye. (Gal. 5:22) Jehowa bɛna fanga di an ma, walasa an ka wajuli kɛ ka t’a fɛ. (Fil. 4:13) Ni an bɛ Jehowa deli an ka cidenyabaara ko la, a bɛ se k’an dɛmɛ ka kow ye a yecogo ɲuman na, dusukasi kow mana kɛ an na wajuli sen fɛ. (Kɛw. 13:52; 1 Piɛ. 4:13, 14) Ni an bɛ siran ka wajuli kɛ, delili bɛ se k’an dɛmɛ an ka baara kɛ ka t’a fɛ ni jagɛlɛya ye, ka nisɔndiya sɔrɔ.—Kɛw. 4:31.

⁵ A ɲini cogo bɛɛ la ka kuma mɔgɔw fɛ: An ka cidenyabaara la, n’an bɛ se ka mɔgɔw sɔrɔ, k’u waju, o bɛ dɔ fara an ka nisɔndiya kan. N’an ye an ka wajuli kɛtuma yɛlɛma, k’a kɛ wuladanin fɛ, walima fitirida fɛ, nafa caman bɛ se ka sɔrɔ o la. Tuma bɛɛ i ni mɔgɔw bɛ bɛn sira kan, sanniyɔrɔw la, walima k’i to mobili kɔnɔ, walima i yaalayaalatɔ zardɛnw na. Mun na i tɛ baro daminɛcogo surun dɔ labɛn, k’a bɔ i yɛrɛ la, ka kuma mɔgɔw fɛ minnu man ka di? I n’a sɔrɔ fana i bɛ taa baarakɛyɔrɔ la, walima i bɛ taa lakɔli la. O yɔrɔw la, i bɛ se ka mɔgɔw waju don o don. O b’a jira k’i bɛ se ka cogo sɔrɔ ka seereya kɛ. I ka ɲininkali dɔ lawuli min jaabi bɛ sɔrɔ Bibulu kɔnɔ, n’a bɛ se ka diya mɔgɔw fana ye. Ɲɛjirali ɲumanw bɛ sɔrɔ san 2002 Zanwuyekalo An ka Masaya Cidenyabaara farankan ɲɛ fɔlɔ la. O kow bɛɛ bɛ se ka dɔ fara an ka nisɔndiya kan wajuli la.

⁶ Ikomi nisɔndiya b’an dɛmɛ ka muɲu, nafa b’a la ka nisɔndiya mara. Wajuli baara tɛna kɛ tun diɲɛ kɔnɔ. O la sa, ni an sera ka an ka nisɔndiya mara, o baara mana se a dan na tuma min na, an na barajiba sɔrɔ. N’an miirila o baraji la, o bɛ se ka dɔ fara an ka nisɔndiya kan wajuli la.—Mat. 25:21.