“An y’an ka wajulikɛyɔrɔ baara siɲɛ caman!”
1 Yali siɲɛ dɔ la i miirila a la k’i ka wajulikɛyɔrɔ baarala ka caya fo mɔgɔ si tɛ sɔrɔ yen bilen min bɔlen bɛ saga fɛ wa? A dɔ rɔ, i y’a miiri ko: ‘N b’a dɔn mɔgɔw bɛna n jaabi ni min ye. Mun na n bɛ segin ka taa mɔgɔw fɛ minnu t’u mago don kibaru duman na?’ Tiɲɛ don ko wajulikɛyɔrɔ caman baarala ka caya. Nka, o ko ka kan ka lajɛ miiricogo ɲuman na; a man kan ka lajɛ ni miiricogo jugu ye. Mun na? Dalilu naani minnu dilen bɛ jukɔrɔla la, i k’u jateminɛ.
2 An ka deliliw jaabira: Yesu y’a fɔ ko: “Suman tigɛta ka ca, nka baarakɛlaw ka dɔgɔ. Aw dun ka suman tigi deli ko a ka baarakɛlaw bila ka taa a ka suman tigɛ.” (Luka 10:2) San tan-tan senfɛ, an ye Jehowa deli walasa a k’an dɛmɛ kosɛbɛ. An mago bɛ baarakɛla minnu na, dɔ farala olu kan yɔrɔ caman na, wa, an y’an ka wajulikɛyɔrɔw baara tuma caman na. Jehowa y’an ka deliliw jaabi min kɛ, yali o tɛ nisɔndiya ko ye an bolo wa?
3 Timinandiya bɛ na ni den ɲumanw ye: Mɔgɔw bɛ sɔn Masaya ka cikan na, ka tiɲɛkuma dɔnniya sɔrɔ hali wajulikɛyɔrɔw la minnu baarala ka caya. O de kosɔn, an ka kan ka t’a fɛ ka bɔ mɔgɔw ye ko caman, k’an jigi d’a kan ko an na dusu tilennen tigi dɔw sɔrɔ. (Esa. 6:8-11) Iko Yesu ka kalanden fɔlɔw y’a kɛ cogo min na, i ka to ka “taa” bɔ i ka wajulikɛyɔrɔ mɔgɔw ye kudayi, k’i jija ka Ala ka Masaya dɔnni nege don u la.—Mat. 10:6, 7.
4 Pɔrtugal jamana na, jɛkulu caman b’u ka wajulikɛyɔrɔ baara dɔgɔkun o dɔgɔkun, nka hali bi u bɛ ka mɔgɔw sɔrɔ minnu bɔlen bɛ sagaw fɛ. Balimamuso dɔ bɛ yen kɛrɛnkɛrɛnnenya la min ye miiricogo ɲuman tigi ye. A ko: “Sanni ne ka bɔ wajuli la sɔgɔma o sɔgɔma, n bɛ Jehowa deli a ka ne dɛmɛ ka mɔgɔ dɔ sɔrɔ Bibulu kalan nege bɛ min na.” Don dɔ la, a ye labɛn kɛ ni kundilanso baarakɛla dɔw ye kalan kama. Nka o kɔfɛ, mɔgɔ kelen dɔrɔn de nana kalan kama. O tigi ko: “Tɔw tɛ mago don kalan na, nka a ka di ne ye.” Kalo kelen kɔnɔna na, ale yɛrɛ tun bɛ Bibulu kalan fila ɲɛminɛ. Sɔɔni o kɔfɛ, a batisera; dɔɔnin o kɔfɛ, a ye tutigɛbaga baara daminɛ.
5 Baara bɛ ka dafa: Kibaru duman wajuli b’a la ka kɛ iko Yesu kɔnna k’a fɔ cogo min na. (Mat. 24:14) Hali mɔgɔ minnu “t’a fɛ k’an lamɛn,” olu lasɔmina wajuli baara sababu la. An sigilen bɛ n’a ye dɔw k’u ban tiɲɛkuma na walima k’a kɛlɛ. Nka, o mɔgɔw ka kan ka lasɔmi a ɲɛ ma Jehowa ka kiriko nata ko la.—Eze. 2:4, 5; 3:7, 8, 19.
6 An ma tila fɔlɔ: An tɛ se k’a latigɛ ka wajuli baara dabila an yɛrɛw ma. Jehowa de b’a dɔn a ka kan k’a ban waati min na. Ale de b’a dɔn ni mɔgɔ bɛ sɔrɔ an ka wajulikɛyɔrɔ la, mɔgɔ min bɛna sɔn kibaru duman na. Bi, mɔgɔ dɔw b’a fɔ k’u mago tɛ kibaru duman na, nka yɛlɛma juguman mana don u ka diɲɛnatigɛ la, baara tiɲɛni, bana jugu, diyanyemɔgɔ ka saya, o b’a to u ka kibaru duman lamɛn waati wɛrɛ la. Fɛn jugu minnu bɛ fɔ an ko la walima bolo degun kojugu kosɔn, mɔgɔ caman ma deli k’an ka wajuli lamɛn ni sɛbɛ ye. N’an bɛ t’a fɛ ka segin ka taa bɔ u ye ka kuma u fɛ ni dusumandiya ye, o bɛ se ka kɛ sababu ye, u k’an ka cikan jate ka lamɛnni kɛ.
7 Minnu kɔrɔbayara kɔsa fɛ sanw kɔnɔna na, ani denbaya bɛ minnu fɛ sisan, olu bɛ miiri ɲɛnamaya ko la u sɛbɛ la, wa, u bɛ ɲininkaliw kɛ, ɲininkali minnu jaabi bɛ se ka sɔrɔ Ala ka Kuma kelenpe de kɔnɔ. Musomisɛn denbatigi dɔ ye Seere fila wele a ka so k’a fɔ u ye ko: “Ne ka npogotigiya la, n ma se k’a faamu abada mun kosɔn ne woloba y’i ban ka kuma Seerew fɛ k’a fɔ u ye k’a mago tun tɛ wajuli kuma na, k’a sɔrɔ u tun b’a fɛ dɔrɔn ka baro kɛ Bibulu kan. O waati la, ne y’a latigɛ ko ne mana kɔrɔbaya, ka furu ani ka n yɛrɛ ka so sɔrɔ, a na diya ne ye ka Jehowa Seerew wele ka na n ka so ka Bibulu ɲɛfɔ ne ye.” A y’o de kɛ, wa, o diyara Seerew ye minnu taara bɔ a ye.
8 Yali i bɛ se ka dɔ fara i ka baara ɲɛli kan wa? A bɛ se ka kɛ an bolo gɛlɛya ye ka wajulikɛyɔrɔ baara min baarala kosɛbɛ. Nka, a bɛ se ka kɛ k’o sababu tɛ bɔ mɔgɔw la an bɛ taa bɔ minnu ye tuma bɛɛ. Tuma dɔw la o bɛ bɔ an yɛrɛw de la. Yali an bɛ baara daminɛ ni miiricogo juguw ye wa? O bɛ se ka nɔ bila an kɛcogo, an kumakan, n’an ɲɛda cogoya la. I ka kɛ miiricogo ɲuman tigi ni mɔgɔ nisɔndi ye. I ka kuma kuntigɛcogo kura sifilɛ. I ka to ka yɛlɛma don i ka dantigɛli kumaw na, k’i gɛlɛya k’u ɲɛ ka t’a fɛ. A dɔ rɔ, i bɛ se k’i ka ɲininkali fɔlɔ kɛ cogo wɛrɛ la, walima ka baara kɛ ni Bibulu tɛmɛsira wɛrɛ ye baro senfɛ. I ka balimakɛw ni balimamusow wɛrɛw ɲininka fɛn na min kɛra u ka sangasɔrɔ sababu ye wajulikɛyɔrɔ baara la. E ni weleweledala ni tutigɛbaga caman ka bɔ ɲɔgɔn fɛ. O la, fɛn min b’a to u ka baara bɛ nɔ bɔ, i k’o jateminɛ.
9 Jehowa ka nɛɛma n’a ka duba bɛ Masaya weleweledali baara kan; an niyɔrɔ kɛli a la, o b’an ka kanuya jira ka ɲɛsin ale n’an mɔgɔɲɔgɔnw ma. (Mat. 22:37-39) O la sa, an k’an ka baara kɛ k’a dafa, an kana sɛgɛn k’an ka wajulikɛyɔrɔ baara tuma o tuma.