Ɲininkaliw Jaabi

◼ Ala-ka-marako Cidenyabaara Kalan ani Baara ka Lajɛ la, yali a bɛnnen don ka tɛgɛrɛ fɔ jɛmu ɲɛfɔlenw bɛɛ kɔfɛ wa?

Ni lamɛnbagaw ye Jehowa Seerew ye, u bɛ nafa don tiɲɛ na kumaw na minnu bɛ fɔ lajɛw la. A ka di mɔgɔ ye k’a ye k’u b’a fɛ k’u ka waleɲumandɔn jira u balimakɛw ka cɛsiriw ko la, ani kalanw ko la, kalan minnu bɛ kɛ banbali kan. An bɛ don min na iko bi, diɲɛ yɔrɔ caman na, mɔgɔw bɛ tɛgɛrɛ de fɔ walasa k’u ka waleɲumandɔn jira fɛn fɔlen ko la. Mɔgɔw bɛ o tɛgɛrɛ sugu fɔ u yɛrɛma ten, ka bɔ u yɛrɛ dusukun na. Ka fara o kan, tuma caman na mɔgɔ ka nisɔndiya jiracogo dɔ don fɛn fɔlen dɔ ko la min tɛ manamanakuma ye. O de la, jamalajɛbaw la, kafo ka jamalajɛw sen b’o la, ni kalan kɛrɛnkɛrɛnnen dɔ bolodara, k’an balimakɛw diyagoyalen don ka waati caman ta, ani ka cɛsiriba kɛ walasa ka jɛmu labɛn, jɛmu min dira u ma, an b’a kɔlɔsi ko lamɛnbagaw tɛ tɛgɛrɛ fɔ dɔrɔn jɛmu ɲɛfɔlen kɔfɛ, nka tuma dɔw la jɛmu ɲɛfɔtuma yɛrɛ la.

Nka, yali a bɛnnen don k’o ɲɔgɔn kɛ an ka Masaya Sow kɔnɔ wa? Tiɲɛ yɛrɛ la, n’a y’a sɔrɔ mɔgɔ bɛ tɛgɛrɛ fɔ u yɛrɛma ten bawo u ka nisɔndiya jiracogo dɔ don min bɛ bɔ u dusukun na, sariya tɛ yen min b’o cogo kɛlɛ. O n’a ta o ta, tuma caman na, ni jɛmuw bɛ ka ɲɛfɔ Masaya So kɔnɔ, an tɛ tɛgɛrɛ fɔ bawo o bɛ kɛ kun min na, a bɛ se k’o kɔrɔ bɔ a la pewu, k’a kɛ fɛn lankolon ye.

Nka, fɛn kelen bɛ yen an kelen-kelen bɛɛ bɛ se ka min kɛ Masaya So la walasa k’a jira k’an bɛ nafa don kumanaw ka baara la. O ye ka to ɲɛmajɔ la jɛmu kɛtuma na, ka kumana lajɛ, k’a jira an ɲɛda kɛcogo fɛ k’u bɛ ka hakilila minnu ɲɛfɔ, k’an bɛ k’u lamɛn, ka nafa sɔrɔ u la. An bɛ se fana ka kuma kumana fɛ lajɛw kɔfɛ, k’a jira k’an ye nisɔndiya sɔrɔ k’a ka jɛmu lamɛn.