I ka t’a fɛ “ko ɲuman kɛ la”

¹ I ye ko ɲuman kɛ tuma min na i kɛra Jehowa Ala ka baarakɛla ye. O n’a ta o ta, sisan, nin waati gɛlɛn in na, gɛlɛya don ka t’a fɛ “ko ɲuman kɛ la.” (Gal. 6:9) Hali ni o ka kan ni cɛsiri sɛbɛ ye, i bɛ se k’a kɛ. Cogo di?

² Yesu miiricogo baara i yɛrɛ la: Iko Yesu y’a kɛ cogo min na, i fana bɛ se ka gɛlɛyaw muɲu n’i b’i ɲɛjɔ Masaya jigiya la. (Heb. 12:​2, 3) I k’a dɔn ka jɛya ko Jehowa b’i kanu, wa, a b’a fɛ i ka taɲɛ sɔrɔ. (2 Piɛ. 3:9) I ka dannaya dafalen kɛ a la, bawo i daŋaniyalen don k’a bɛna i dɛmɛ. (1 Kɔr. 10:13) I k’i timinandiya Ala delili la, k’a ɲini Jehowa fɛ a k’i dɛmɛ ka muɲuni kɛ. (Rom. 12:12) I jɛyalen ka ɲagali a la k’i ka muɲuni bɛ na ni cogo ɲuman ye Ala ɲɛna. (Rom. 5:3-5) I kɛtɔ ka ‘Yesu Krista miiricogo kelen’ baara i yɛrɛ la ni kantigiya ye, o bɛna i wasa, wa, o bɛna Jehowa dusu nisɔndiya.—Rom. 15:5; Nta. 27:11.

³ I ka t’a fɛ baara ɲumanw kɛ la: I ka tɔnɔ dafalen sɔrɔ fɛɛrɛw la Jehowa ye minnu tigɛ walasa k’a ka jama dɛmɛ ka t’a fɛ baara ɲumanw kɛ la. I ka bolodasira ɲuman matarafa Ala ka Kuma kalan kama ani jɔnkɛ dannamɔgɔ hakilima kulu ka sɛbɛnw fana sɛgɛsɛgɛli kama, sɛbɛn minnu sinsinnen bɛ Bibulu kan. Kantigiya la, i ka jɛkulu ka lajɛw bɛɛ labɛn, ka ye u kɛnɛkan, ka i ta kɛ u sen fɛ. Sanni Krecɛn lajɛw ka daminɛ ani u bannen kɔ, i ka gɛrɛ balimakɛw n’i balimamusow la ka baro kɛ u fɛ. Kuntilenna minnu bɛ se ka timɛ, i ka olu sigi i ka cidenyabaara kama walasa i ka se k’i ta kɛ ka dafa forobaara la ani ka dɔ fara i seko kan kibaru duman jiracogo la.

⁴ O cogo la, i bɛ se ka t’a fɛ ka ko ɲuman kɛ, ka nisɔndiya fana sɔrɔ o waati kelen na. O kama, an balimakɛ dɔ ka bɔ Itali jamana na, o y’a fɔ ko: “Ni su kora, ni ne nana so k’a sɔrɔ ne tilenna Jehowa ka baara la, siga t’a la, n sɛgɛnnen don. Nka, ne nisɔndiyalen don, wa, ne bɛ Jehowa fo bawo a ye sewa di ne ma mɔgɔ si tɛ se ka min bɔsi ne na.” O de y’a to, i ka t’a fɛ ko ɲuman kɛ la, wa, e fana na nisɔndiyaba sɔrɔ.