I ‘bolo degunnen ka kɛ kosɛbɛ’ i ka cidenyabaara la
1 N’an b’a kalan ko Pol tun bɛ finiso dilanni baara la tuma min na Kɔrɛnte, an bɛ se ka miiri ko cogo minnu tun b’a bolo ka wajuli kɛ, ko dɔ tun bɔra o la. Nka, Kɛwalew 18:5 ko: “Pol ye a ka waati bɛɛ ta [“tun bolo degunnen bɛ kosɛbɛ,” Traduction du monde nouveau, NW] ka wajuli kɛ, ka seereya kɛ Yahutuw ye ko Yesu ye Krisita de ye.” Mun na Pol tun bolo degunnen bɛ kosɛbɛ ten wajuli baara la? Hali ni mɔgɔ caman tun ye dannabagaw ye kaban Kɔrɛnte dugu kɔnɔ, Matigi y’a sɛmɛntiya a ye k’o n’a ta o ta, hali sa mɔgɔ caman tun bɛ yen ka kɛ kalandenw ye o dugu kɔnɔ. (Kɛw. 18:8-11) Yali o kun ɲɔgɔn b’an bolo walasa an fana bolo degunnen ka to kosɛbɛ an ka cidenyabaara la wa? Ɔwɔ. Mɔgɔ caman wɛrɛ bɛ se ka sɔrɔ, ka kalan tiɲɛ ko la.
2 Awirilikalo la, an ka waati caman kɛ baara la: I bolo degunnen ka to kosɛbɛ kibaru duman wajuli la kalo o kalo, a k’a ca la, k’o de y’i kuntilenna ye. Nka, kalo dɔw bɛ cogo caman di an ma walasa “an bolo degunnen” ka to kosɛbɛ o baara la. Awirilikalo y’o dɔ la kelen ye, kɛrɛnkɛrɛnnenya la Hakilijigin don waati la. Yali i ka kow b’a to i ka se ka kɛ tutigɛbaga farankan ye wa? Walima yali u b’a to i ka dɔ fara i ka cɛsiri kan cidenyabaara la o waati la wa? Weleweledala caman minnu bɛ k’o kɛ, u ye baraji caman sɔrɔ. (2 Kɔr. 9:6) N’i y’i seko bɛɛ kɛ, i k’a to i kɔnɔ k’i ye baara min kɛ n’i ni bɛɛ ye, k’o diyara Jehowa ye. (Luka 21:2-4) I ka kow kɛra fɛn o fɛn ye, i k’a kɛ i kuntilenna ye ‘i bolo degunnen’ ka to kosɛbɛ i ka cidenyabaara la Awirilikalo la. I kana ɲinɛ fana k’i ka baara dantigɛli sɛbɛn bila kalo sa la walasa i ka baara ka se ka jate Jehowa ka jamakulu ka baara fɛ.
3 Mɔgɔ kura minnu nana Hakilijigin don na, i ka taa bɔ u ye: Iko a sɛbɛnnen bɛ cogo min na san 2001 Zanwuyekalo tile fɔlɔ La Tour de Garde ɲɛw 18 ka na 21 na, Afiriki tilebin yanfan n’a cɛmancɛ yanfan jamanaw ka baaraw dantigɛliw b’a jira ko salon, mɔgɔ ba caman nana Hakilijigin don na. Mɔgɔ minnu nana Hakilijigin don na ɲinan, diɲɛ bɛɛ la, o hakɛ mumɛ ma dɔn fɔlɔ. Nka, baara dantigɛliw b’a jira ko “sumantigɛta” ka ca, n’o ye mɔgɔw ye minnu bɛ se ka kɛ Krista ka kalandenw ye. (Mat. 9:37, 38) O la sa, n’i bɛ se dɔrɔn, i ka fɛɛrɛw tigɛ walasa ka taa bɔ magojirabagaw ye minnu nana Hakilijigin don na walasa k’u dɛmɛ alako ta fan fɛ. K’o bɔnyeliw kɛli bila kɔ la, o bɛ se ka to ‘Sitanɛ bɛ na ka o kuma mɛnnen ta ka bɔ u kɔnɔ.’ (Mat. 13:19) N’i y’i teliya ka taa bɔ u ye, o b’a jira k’i “bolo degunnen bɛ kosɛbɛ” i ka cidenyabaara la.
4 I ka walekɛbaliw dɛmɛ ka t’a fɛ: Feburuyekalo la, baara kɛrɛnkɛrɛnnen daminɛna walasa ka walekɛbaliw dɛmɛ. N’a y’a sɔrɔ maakɔrɔw ma taa bɔ u dɔw ye fɔlɔ, u bɛna fɛɛrɛw kɛ walasa k’o kɛ joona sanni Awirilikalo ka sa. Kun jɔnjɔn min y’a to o tigi kɛra walekɛbali ye, ani dɛmɛ bɛ lase o tigi ma ka ɲɛ cogo min na walasa a ka baara kɛ ko kura Jehowa ye, maakɔrɔw bɛna u cɛsiri k’o kow jateminɛ. O dɛmɛ sugu ye kanuya ye min b’a jira ko maakɔrɔw b’u ka baara ta u sɛbɛ la ikomi u ye “Ala ka sagakulu” dɛndɛnbagaw ye. (1 Piɛ. 5:2; Kɛw. 20:28) San 1993 Sɛtanburukalo tile 15 La Tour de Garde ɲɛ 22-3 bɛ hakilila ɲumanw di, maakɔrɔw bɛ se ka baara kɛ ni minnu ye n’u bɛ ka ko duuru ninnu lajɛ, ko duuru minnu dɔ la kelen bɛ se ka kɛ walekɛbaliw ka baarakɛbaliya sababu ye. A tun bɛ na fisaya n’u dɔw bɛ se ka foro cidenyabaara daminɛ ko kura Awirilikalo in kɔnɔna na.
5 I ka mɔgɔ caman dɛmɛ walasa u ka kɛ weleweledalaw ye minnu ma batise fɔlɔ: Yali i denw ye cogow dafa walasa ka kɛ kibaru duman weleweledala kuraw ye wa? I ye Bibulu kalan kɛ mɔgɔ minnu kun dun, a bɛ cogo di olu ko la? Ni sɔn kɛra olu la maakɔrɔw fɛ, yali Awirilikalo tɛna kɛ waati bɛnnen ye olu bolo walasa u ka wajuli daminɛ wa? Ni Bibulu kalanden dɔ bɛ ka ɲɛtaa kɛ, n’a ye Wajibiya gafenin ni Dɔnniya gafe kalan ka ban, a bɛ se ka t’a fɛ Bibulu kalan na gafe filanan kan, n’o ye Parole de Dieu ye, walima Paix véritable, walima Unis dans le culte ye. I kuntilenna ye ka kalanden dɛmɛ ka faamuya sɔrɔ kosɛbɛ tiɲɛ ko la walasa a ka se ka cogo dafa ka kɛ weleweledala ye min ma batise fɔlɔ, k’i yɛrɛbakun di Ala ma, ka tila ka batɛmu ta walasa ka kɛ Jehowa Seere ye.—Efe. 3:17-19; 1 Tim. 1:12; 1 Piɛ. 3:21.
6 I bɛ mago sɛbɛ min don Bibulu kalandenw na tuma bɛɛ, o bɛ se k’u dɛmɛ u ka laban ka sɔn tiɲɛ ka kɛ u ka ɲɛnamaya kɔnɔko ye. Seere dɔ ye cɛ dɔ n’a muso ye minnu tun kɔrɔla, n’u sɔnna Bibulu kalan ma. Nka, u tun y’u ka kalan bɔ a ma k’o bila dɔgɔkun nata la, dɔgɔkun saba ka tugu ɲɔgɔn na. U labanna ka kalan daminɛ. O kɔfɛ, dɔgɔkun fila o dɔgɔkun fila, cɛ n’a muso tun bɛ kalan bɔ a ma. O n’a ta o ta, muso taara ɲɛ fo ka batɛmu ta. “A ye batɛmu ta kaban tuma min na,” balimakɛ hakili b’a la ko “ji cira a ɲɛ kan, n’o tun ye nisɔndiya ɲɛji ye min kɛra sababu ye ka ne ni n muso bila nisɔndiya ɲɛjibɔ la.” Ɔwɔ, ni mɔgɔ “bolo degunnen bɛ kosɛbɛ” kibaru duman fɔli la, o bɛ na ni nisɔndiyaba ye.
7 Kiraya kuma min bɛ Bibulu kɔnɔ, ani diɲɛ kow b’a jira ko an bɛ waati laban laban yɛrɛ de la. Ala ka jamakulu “bolo degunnen” ka kan ka kɛ kibaru duman fɔli la mɔgɔ tɔw ye waati min na, o ye sisan de ye. Ciden Pol y’a sɛmɛntiya an ye k’o “baara tɛna kɛ fu ye Matigi la.”—1 Kɔr. 15:58.