“Muso minnu bɛ baaraba kɛ Matigi ye”
1 Pol tun ye sanfɛ kumaw ɲɛsin Trifɛnɛ ni Trifosɛ ma, Romɛ jɛkulu kɔnɔ balimamuso baarakɛlaba fila. Muso wɛrɛ ko la, n’o ye Pɛrside ye, a y’a fɔ ko: “Ale ye baaraba kɛ Matigi ye.” O cogo kelen na, a kumana koɲuman Fɛbɛ ko la, iko balimamuso min ye mɔgɔ “caman dɛmɛ.” (Rɔm. 16:2, 12) Sɛbɛnni senumanw kɔnɔ, Dɔrkasi kofɔlen bɛ kɛrɛnkɛrɛnnenya la iko muso min tun bɛ “kɛwale ɲuman caman ni saraka caman kɛ.” (Kɛw. 9:36) Muso minnu bɛ taama hakili senu sira la, u ye duba ye jɛkulu bolo haali!
2 Balimamuso minnu bɛ baaraba kɛ an ka jɛkulu kɔnɔ, yali an b’u koɲumandɔn wa? Olu de bɛ wajuli baara fanba kɛ, ka Bibulu kalan caman ɲɛminɛ, ani ka mɔgɔ kura caman dɛmɛ. U bɛ waati caman fana ta ka denmisɛnw dɛmɛ walasa u ka ɲɛ taa sɔrɔ hakili ta fan fɛ. Krecɛn musow b’u niyɔrɔ kɛ ka kanuya ni nisɔndiya ni hɛrɛ ni cɛsiri miiriya sabati jɛkulu kɔnɔ. Cogo caman na, u b’u furucɛw n’u ka denbaya kɔnɔ mɔgɔ wɛrɛw kɔkɔrɔdon walasa u ka se ka caman kɛ Jehowa ka baara la.
3 Balimamusow bɛ waati-dafalen baara kɛ: Balimamuso minnu ye tunga fɛ cidenw ye, olu ye muso baarakɛlaba dɔw ye. U furucɛw bɛ taa bɔ jɛkulu minnu ye, lakɔlɔsibaga taamakɛlaw musow b’u cɛsiri forobaara la yen, ka dusu don balimamuso caman na. Ɲinɛ ma kɛ Betɛl balimamusow kɔ, minnu b’u cɛsiri kosɛbɛ baara senuma na, ka Jehowa ka jamakulu kolabɛnnen kɔkɔrɔdon. Ka fara o kan, an balimamuso tutigɛbaga basigilen ka kantigiya cɛsiriw Ala tanuni na, o y’a to mɔgɔ ba caman ka dɛmɛ sɔrɔ ka tiɲɛ kalan.
4 O muso kantigiw y’u yɛrɛw di Jehowa ka baara ma. O de kosɔn, u ye wasaba sɔrɔ u ka diɲɛnatigɛ kɔnɔ. (1 Tim. 6:6, 8) An bɛ se ka foli ni dusulamin ni dɛmɛ fɛn o fɛn kɛ u ye, u ka kan n’o ye.
5 K’u to kantigiya baara la min bɛ duba lase bɛɛ ma, Krecɛn musow ye ko nafamaba ye Jehowa ka jamakulu kolabɛnnen bolo. An ka t’a fɛ ka nin muso suguw koɲumandɔn, ani ka Jehowa deli walasa a ka duba u ye, k’a sɔrɔ u bɛ ka “caman kɛ Matigi ka baara la.”